Njanjan di de tranga fanowdoe foe na tego libi
Kapitel 4
Njanjan di de tranga fanowdoe foe na tego libi
1. Foe sanede den wortoe foe Gado ini na bijbel de leki oni?
SOSO wan spoen oni kan meki wan sma di abi boen foeroe angri kisi njoen krakti, sodati en ai e bigin brenki baka. Foe den wortoe foe Gado ini na bijbel nanga reti (a bijbel e taki) dati „den switi moro oni nanga oni di e lon komoto foe na godo”. Disi doe kon foedi Gado wet e tjari foeroe boen kon gi na libi foe den sma di e teki den nanga warderi (1 Samuël 1:27; Psalm 19:9-11; 119:103). Gi den sma di e kisi na koni di tanapoe ini na Wortoe di skrifi nanga santa jeje, wan ten di e kon de, èn na égi howpoe foe den no sa koti poeroe. — Spr. 24:13, 14.
2. San wi moe doe efoe Gado jeje wani wroko foe na boen foe wi?
2 Gado ben pramisi dati a sa kibri en dienstknegti te go miti na „tego libi”, wan sani di a de doe nanga jepi foe en jeje (1 Petrus 1:5). Disi e gi seker dekati. Ma wi e meki wan fowtoe efoe wi denki, dati den sma di e kisi jepi na a fasi disi, no abi foe doe no wan moeiti densrefi. Gado jeje kan jepi wi ini na fasi di wi e wroko makandra nanga en èn so wan wrokomakandra wani taki sosrefi toe dati wi gi wisrefi jeje njanjan foe den Boekoe di ben skrifi nanga krakti foe santa jeje. Na manpikin foe Gado ben sori foe san-ede disi de so.
3. San na jeje ben sa doe gi en discipel leki fa den wortoe foe Jezus Kristus ben taki?
3 Di Jezus ben verklari fa Gado jeje ben sa jepi den, a ben taki: „Na jepiman, na santa jeje di na Tata sa seni ini mi nen, dati sa leri oenoe ini ala sani èn tjari kon baka ini oenoe prakseri ala sani di mi ben taigi oenoe” (Johannes 14:26). Baka te Jezus ben go na hemel, dan na jeje, ini na wroko foe memreman, ben sa tjari kon ini na prakseri foe den discipel san Jezus ben taki, èn leki leriman na jeje ben sa meki den froestan fa den ben kan gebroiki den sani di ben tjari kon ini den prakseri.
4. Fa Gado jeje kan jepi wi, èn fa disi e poti krakti na tapoe na prensparifasi foe meki na bijbelsabi kon moro bigi?
4 Foedi Jezus Kristus srefi noiti ben leri wi, dan wi de ini wan tra situwasi leki den apostel. Ma ete ala prenspari leri foe na Manpikin foe Gado ben kibri gi wi ini na bijbel. Efoe a de fanowdoe dan na santa jeje soboen kan tjari bepaalde punt foe den Santa Boekoe kon ini wi prakseri èn jepi wi foe si na joisti fasi foe gebroiki den. Foedi Gado jeje e wroko leki memreman èn leriman, dan wi moe wroko makandra nanga en, foedi wi e go studeri na bijbel finifini. Efoe wi abi soso toemsi pikinso bijbelsabi, den a no kan dati wi njan boen krinkrin foe na wroko foe na jeje leki memreman èn leriman.
5. (a) Foe san-ede meki a de prenspari foe poeroe takroe égifasi, te wi wani njan boen dorodoro foe na wroko foe Gado jeje? (b) Sortoe rai na apostel Petrus ben gi foe wi jeje njanjan?
5 Boiti dati, na jeje santa èn a de jepi foe datede soso den sma di santa ini na ai foe Jehovah. Foe datede meki a no de nofo foe lési na bijbel soso ofoe meki sma lési gi wi foe en. Wi moe abi sosrefi toe na tranga lostoe foe poeroe ala égifasi di de kontrari den markitiki foe Gado foe krinfasi ofoe soifrifasi. Loekoe fa disi e kisi krakti ini den tra wortoe foe na apostel Petrus:
„Poeroe foe datede ala porifasi nanga ala bidrigifasi nanga falsifasi nanga big’ai nanga ala sortoe foe bakabakafasi, èn kweki leki njoen gebore bébi wan lostoe na a merki di no falsi èn di de foe na wortoe, sodati nanga jepi foe dati oenoe kan gro kon kisi verloesoe, efoe oenoe tesi dati Masra de boen.” — 1 Petrus 2:1-3.
6. Soema e kisi tranga foe kweki wan lostoe gi na „merki”?
6 Te wi e feti fajafaja foe doe Gado wani, dan wi e tjari wi froestan nanga ati ini na joisti kondisi foe teki njanjan komoto foe den Santa Boekoe. Ma moro de fanowdoe foe kisi wan boen jeje lostoe foe njan. Na apostel ben gi na tranga: „Kweki leki njoen gebore bébi wan lostoe na a merki di no falsi èn di de foe na wortoe” (1 Petrus 2:2). Njoen gebore bébi de tevréde krin krin nanga merki. Den no wani tra njanjan. Leki pikin a bobi, a so njoen bribiman abi na „merki foe na wortoe” fanowdoe èn den moe kweki wan troetroe lostoe gi en. Te den gro moro fara kisi kristen lepifasi dan den sa abi a srefi fasi so wan lostoe gi jeje njanjan. — Hebreeër 5:12-14.
7. Foe san-ede meki wi no kan froewakti foe kisi ini wantoe jari wan dorodoro froestan foe Gado Wortoe?
7 Ja, awansi o langa wi e waka na pasi foe waarheid kaba, tog foeroe moro de foe leri foe wi Mekiman èn en wani gi wi. (Teki gersi 1 Korinte 13:12). Foedi den Santa Boekoe abi den prakseri foe na grankoni Gado Jehovah, dan srefi den engel e njan boen foe den openbaring di skrifi na ini (1 Petrus 1:12). Fa wan sma ben sa kan denki dati ini wantoe jari a kan kisi wan dorodoro froestan foe Gado santa Wortoe? Foe dat’-ede meki a ben sa de wan sani di ben sa de foe wi de tevréde nanga na sabi foe wan pikinso pisi foe en Wortoe èn taigi wi hemel Tata, te joe loekoe fini, dati wi ben winsi dati a ben gi moro pikinso foe en jeje sorgoe di de ini den Santa Boekoe.
KWEKI JEJE APTÉTI
8. San moe gi wi tranga foe kisi wan moro betre froestan foe den Santa Boekoe?
8 Na lobi foe wi gi Jehovah Gado nanga Jezus Kristus moe boewégi wi foe wani froestan someni foe na bijbel. Nanga jepi foe den bladzijde foe den Santa Boekoe wi e kisi jepi foe leri sabi wi hemel Tata nanga en Manpikin moro betre, sodati wi e kon moro krosibé foe den. Soleki na apostel Petrus ben taki, dan wi ben „tesi kaba dati Masra de boen” (1 Petrus 2:3). Jezus Kristus ben dede gi wi leki wan sori foe en lobi èn a ben meki a kan now foe kisi wan krin positie na fesi foe wi hemel Tata (Johannes 15:13; 1 Johannes 2:2) Foe dat’ede meki wi kan kon na Jehovah Gado nanga fri-foe-taki èn ferteri en ala wi broko-ede nanga nowtoe (Hebreeër 10:19-22; 1 Johannes 3:19-22). Den blesi, nanga tiri, nanga jepi di wi ben kisi leki discipel foe Jezus Kristus, e sori krin dati na Méstri foe wi de boen èn abi bigi lobi gi wi (Matteus 11:28-30). Efoe den sani di wi ben tesi ofoe ondrofeni kaba, ben de so boen, dan wi no moe abi moro ete na winsi foe waka moro krosibé na a eksempre foe Jehovah Gado nanga en Manpikin? (Psalm 34:8) Wan loekoe foe na bijbel finifini nanga ondro begi sa jepi wi nanga dati.
9. (a) San kan tapoe wan boen jeje aptéti, èn foe san-ede? (b) San wi kan doe foe meki wi jeje aptéti kon moro boen?
9 San joe kan doe te joe si dati na lostoe foe joe go na a „wortoe” no de so bigi? Teki dan ten foe teki prakseri nanga foeroe warderi foe san Jehovah Gado nanga Jezus Kristus ben doe gi joe. Ondrosoekoe sosrefi toe efoe joe ben pori na jeje aptéti foe joe, foedi joe poti prakseri di no fiti na filosofie, speculatie nanga propaganda foe wan grontapoe di de leki wan vreemde sma gi Gado. Ete wan feanti foe jeje aptéti de te wi e lési noti moro leki tijdschrift nanga prenki ofoe tra boekoe di no e aksi foe joe denki ofoe mediteer. Wi moesoe erken dati na bijbel no ben skrifi foe prisiri wan sma, ma foe leri sma. Aladi den wortoe srefi no de moeiliki foe froestan, tog den prakseri di tjari kon na fesi, foeroe tron abi wan dipi betekenis, di wan sma ben kan doro na gron foe en efoe a teki na ten foe go denki ini begi foe san a ben lési.
10. Sortoe sani di de troe foe den agersitori foe Jezus Kristus e bewijsi dati wan sma no kan kisi wan soifri sabi te wawantron a de lési na bijbel?
10 Den agersitori di Jezus ben gebroiki foe eksempre ben de eenvoudig. Ma den prenspari waarheid di den e tjari kon na krin, no kan froestan te wan sma lési wawan-tron ini wan ofoe tra bijbelvertaling. Prakseri dati djoe di ben jere na Manpikin foe Gado di ben taki ini den égi tongo tog no ben froestan krinkrin san a ben leri. Aladi den wortoe di a ben gebroiki, gewoon sma ben kan froestan den, tog na betekenis ben tan wan kibri sani, srefi gi den sma di ben kisi leri. Foe san-ede? Foedi na moro bigi pisi foe den arkiman foe Jezus ben mankeri sakafasi èn den no ben abi wan lostoe gi jeje njanjan. Foe dat’ede meki den no ben go moro fara foe ondrosoekoe foe kisi troetroe koni. — Matteus 13:13-15.
11. Foe san-ede wi no moe de tevréde nanga frafra sabi foe na bijbel?
11 Wi no wani de tevréde kwetkweti nanga wan frafra sabi foe na bijbel, foedi wi sabi soso kande den bijbeltori nanga den gronleri. Efoe wi taki dati wi libi Gado nanga Kristus, dan wi moe de klari foe gi ten na a bijbel èn doe moeiti foe froestan na prensparifasi, na betekenis nanga na jeje foe san tanapoe na ini èn dan handri akroederi nanga dati. No wan enkri bekwaamheid di e pai joe e kisi sondro moeiti. Wi no moe froewakti dan dati wi moe span wisrefi srefisrefi foe meki wi sabi foe Jehovah, na fonten foe ala koni, kon moro foeroe? — Teki gersi Spreuken 21:6; 1 Timoteus 4:13-16.
12. Sortoe krakti na fasi foe wi foe kisi soifri sabi abi tapoe den blesi di wi kan kisi?
12 Na fasi foe wi tapoe na tori foe na kisi foe wan moro boen froestan foe Gado Wortoe tanapoe wantronwantron nanga den blesi di wi sa kisi. Efoe wi no gebroiki dorodoro den okasi foe wi foe leri sabi Jehovah Gado moro boen, dan dati no sa meki wi lasi kande wi libi. Ma a ben sa kan meki dati wi misi foe doe Gado wani ini bepaalde opzicht èn dan meki wi lasi difrenti blesi. Jezus ben sori ini wan foe den agersitori foe en dati a no sabi foe wan sani no e meki wan sma de fri foe kisi wan seker pisi foe strafoe. Na dienstknegti di no ben froestan na wani foe en méstri èn foe dat’ede e doe sani di e ferdini fonfon, e kisi tog strafoe, aladi a no de so tranga leki na srafoe foe espresi ben trangajesi (Lukas 12:47, 48). A de foe dat’ede wan troetroe sani te wan sma no e meki presi ini en libi gi wan alaten studi foe Gado Wortoe èn leki wan bakapisi foe dati no e go na fesi leki fa a de fanowdoe tapoe a tori foe en kristen fasi, foe libi nanga waka èn wroko.
13. Foe san wi kan djaranti wisrefi nanga jepi foe Gado Wortoe, èn fa disi moe abi krakti te wi e teki jeje njanjan ini wi?
13 Na heri Wortoe foe Gado abi leki marki foe jepi wi „foe gro kon kisi ferloesoe”, dati wani taki, foe meki wi de seker foe wi troetroe ferloesoe leki discipel foe Masra Jezus di Gado feni boen. Efoe soboen wi abi belangstelling gi wi tégo tanboen, dan disi moe kon na krin ini na tranga winsi foe wi foe leri sabi Jehovah Gado nanga en Manpikin moro boen nanga jepi foe den Santa Boekoe di ben skrifi nanga santa jeje.
14. Sortoe krakti opregti belangstelling gi na jeje tanboen foe tra sma kan abi tapoe wi jeje aptéti?
14 A no de foe taki, dati moro leki wi egi libi de ini na tori. (Teki gersi 1 Timoteus 4:16). Leki foetoeboi foe Jezus Kristus wi abi wan komando foe jepi trawan tron en discipel (Matteus 28:19, 20). Fa wi kan doe disi efoe wi mankeri troetroe na froestan foe na bijbel? Wi kan taki dati wi abi opregti belangstelling gi na jeje tanboen foe tra sma efoe wi e doe soso pikinso moeiti foe kisi moro sabi, di wi ben sa kan jepi den? Sontron wi e kisi na fanowdoe tranga-skin foe meki wi jeje aptéti kon moro bigi te wi e bigin foe leri wan tra sma. A no pikinso nomo wi e si dati den sma di e gi moro ten na a préki foe na bijbel waarheid, dati den égi lostoe gi jeje njanjan e kon moro foeroe. Na so foe eksempre, den aksi di sma di abi belangstelling e aksi, kan de na fanowdoe dek’ati foe go moro dipi ini na Wortoe foe Gado foe kan gi piki di e gi satisfaksi.
15. Fa sma di no kan lesi ofoe di abi moeiti nanga lési, kan njan boen foe na bijbel?
15 Ma fa a de nanga sma di no kan lési boen ofoe di no man foe lési den Santa Boekoe densrefi? Den kan njan boen foe ala san de ini na bijbel, foedi tra sma e lési na bijbel gi den èn e tjari dati kon na krin gi den. Dan baka dati den kan go teki dipi prakseri foe san den ben jere èn gebroiki en ini den libi (Openbaring 1:3; Nehemia 8:8). Te na problema de dati den no kisi nofo skoro, dan a ben sa de boen te den sortoe sma dati njan boen foe sani di seti foe kisi leri foe lési ofoe foe meki na lésibekwaamheid foe den kon moro boen. Te soso wantoe pisi foe den Santa Boekoe de foe kisi ini wan bepaalde tongo, dan wan bigi frantwortoe de tapoe na skowroe foe den sma di e leri trawan èn di sabi na tongo pe na eri bijbel de na ini. Leki na apostel Paulus, na so wi moe feti foe meki „ala na rai foe Gado” bekenti. — Tori foe den Apostel 20:27.
A WORTOE E WROKO TAPOE WI LIBI
16, 17. (a) Sortoe krakti Gado Wortoe ben abi tapoe den fosi eeuw kristen leki fa Petrus taki? (b) Sortoe sani e sori dati égi moeiti de fanowdoe, efoe na „wortoe” wani wroko troetroe ini bribisma?
16 Te wi de hori wisrefi ini begi nanga ini ala sakafasi nanga Gado Wortoe bézig, dan now kaba disi kan wroko boen tapoe wi libi. Disi e kon na krin ini san na apostel Petrus ben skrifi gi en kompe-bribiman:
„Now di oen soifri oen sili nanga na gi jesi di oen ben gi jesi na a waarheid, nanga brada lobi di no de falsi leki bakapisi, oen moe lobi makandra tranga nanga oen eri ati. Bikasi oen ben kisi wan njoen gebortoe, no nanga siri di e pori (siri di de frantwortoe foe na de foe libisma a skinfasi, di de ondro dede), ma nanga siri di no e pori, ma kan meki njoen siri kon, nanga jepi foe na wortoe foe na libi èn tégo Gado. ’Bikasi ala skin de leki grasi, èn ala en glori de leki wan bromki foe na grasi; na grasi e pori, èn na bromki e fadon, ma san Jehovah taki, e tan tégo’. We, disi de na „odo”, disi di meki bekenti gi oenoe leki boen njoensoe.” — 1 Petrus 1:22-25.
17 Loekoe pikinso fa Petrus wortoe ben abi foe doe nanga den kristen di ben libi ini na fosi eeuw G.T. Te den discipel foe Jezus Kristus ben teki na waarheid ini den, dan den ben kisi tranga foe doe moeiti foe krin densrefi èn foe broko nanga takroe gwenti. Nanga jepi foe Gado jeje, sondro trangajesi, den ben fiti densrefi na den sani di na waarheid ben aksi foe den. Leki wan bakapisi foe dati den ben bigin foe sori troetroe lobi gi den sma di ben abi na srefi bribi leki den (Johannes 13:34, 35). Ma na wondroe kenki disi ini na libi foe den no ben sondro foe doe moeiti densrefi. Soso nanga na gi jesi na a krakti foe na waarheid èn foe Gado jeje, den ben kan sori brada lobi di no de falsi. Foe na rede dati meki Petrus ben kan gi den tranga: ’Lobi makandra tranga nanga oen eri ati’ (1 Petrus 1:22). Na Griki wortoe foe „tranga” wani taki letterlek „boen bigi”. Na sori foe na lobi disi no moe de naw ofoe pikinso foe bakabakfasi, bita-ati ofoe djaroesoe ede, ma moe komoto foe wan soifri ati. A no de wan formeel sori foe lobi sondro opregti switifasi, ma wan lobi di e marki ensrefi nanga tranga firi. Foe di na Gado foe lobi, Jehovah, ben meki den kristen discipel disi ben tron en manpikin, foedi a gi den wan njoen gebortoe, dan a ben de joisti nomo dati den ben doe moeiti foe bewijsi dati den de manpikin nanga na sori foe lobi gi den kompe-bribiman foe den. — 1 Johannes 3:10, 11.
18. (a) Foe san-ede meki den kenki foedi wan sma e fiti ensrefi na Gado Wortoe, no de frafra ofoe foe wan sjatoe ten? (b) Fa na sani di na „wortoe” èn Gado jeje e doe, de tra fasi leki na ondrofeni foe sondoe sma?
18 So srefi toe ini disi ten, den kenki di den discipel foe Jezus Kristus e tjari, no de frafra ofoe foe wan sjatoe ten, foedi den e gi densrefi njanjan nanga na „wortoe foe na libi èn tégo Gado” èn den e fiti densrefi na dati. A „wortoe” disi no e pori. Foe dat’ede meki ala sma di tan ondro na krakti foe na waarheid foe na „boen njoensoe” alaten e kisi wan boen krakti. Aladi sondoe sma e Iasi den moifasi na dorosé leki na grasi èn e dede, tog den kenki e tan alaten di na tégo „wortoe” nanga na jeje foe Gado ben tjari.
19. Fa wi moe prakseri foe wi jeje fanowdoe?
19 Meki wi no si foe dat’ede jeje sani noiti leki noti, ma lobi foe foeroe wi ati nanga froestan nanga na waarheid. Nanga wi boen jeje aptéti wi kan de gosontoe nanga tranga na jeje fasi. Aladi wi e saka wi srefi nanga sakafasi na a krakti foe na „boen njoensoe” nanga Gado santa jeje, meki wi sori dan dati wi de getrow discipel foe Jezus Kristus èn jepi tra sma foe kisi wan soifri sabi foe den Santa Boekoe. Te wi e gi wisrefi njanjan, na so wan fasi nanga na tégo „wortoe”, dan disi sa jepi wi foe gro kisi ferloesoe èn djaranti wisrefi foe wan ten di e kon.
[Aksi foe a tori disi]
