San e jepi wi foe hori doro ondro pina
Kapitel 8
San e jepi wi foe hori doro ondro pina
1, 2. Foe sanede den discipel foe Jesus Kristus no fri foe pina?
SON TRON ten kan de ini wi libi dati wi abi tranga jepi fanowdoe nanga wi problema. Efoe gaw gaw wan baka trawan na wan foeka baka na trawan e miti wi, dan koemakriki broeja kan kisi wi. Wi e kisi na firi kande taki wi no man tjari na hebi moro. We, fa jepi na na momenti dati de wan toemsi switi sani!
2 Foe di wi de discipel foe Jehovah Manpikin, no wani taki dati wi no abi jepi fanowdoe. Wi no de fri foe ongolokoe. Siki, ongolokoe, bigi watra di lon pasa abra, gronseki, bigi winti, ogridoe, kroektoedoe nanga hori den na ondro masi nanga tranga de te now wi alamala nowtoe. Wi no moesoe froewakti taki na Moro Héwan sa kebroiki en makti foe doe sani meki den sani san wi e erf foe wi mama nanga papa na skinsé nanga na birti pe wi e tan no abi krakti foe wroko na wi tapoe sodati wi leki en foetoeboi ben sa kan de fri foe na pina di den sani disi e tjari kon. Gado ten foe tapoe ala takroe bakapisi foe sondoe, de ete na ini na ten di de na wi fesi. Efoe now na ini a ten disi a ben sa meki en pipel „sondro sani-ati den”, heri hipi soema ben sa lon kon foe kon dini en — ma nomo foe den égi gridi lostoe, no foe lobi nanga bribi. — Agersi Johannes 6:10-15, 26, 27.
3, 4. Sortoe pina kan kon abra troe kristensoema di trawan no e kisi, èn sortoe aksi disi kan tjari?
3 A no sa de so taki a no kan tra fasi ofoe wi sa ondrofeni ala sortoe foeka leki na bakapisi foe ala sortoe fasi fa sani de di no switi, ma kande toe, joisti foe di wi de foetoeboi foe Gado, sa onfrofeni ferfolgoe — kande foe na sé foe famiri, birti noso kompe noso foe na sé foe edeman foe lanti. Jesus Kristus srefi ben taki: „Dan den sa gi oenoe abra na tranga hori oenoe na ondro èn den sa kiri oenoe, èn foe mi nen oenoe sa tron na sani foe bita hati foe ala naatsi” (Mattheüs 24:9). Den troe tori e sori krin taki den sani disi pasa, srefi te na ini a di foe 20 jari hondro.
4 Foe sanede na Almakti Gado e gi pasi taki en foetoeboi e ondrofeni difrenti sortoe pina? Foe di den libifasi no de fri foe den ibridé problema nanga sorgoe èn foe di foe den bribi ede den kan tron „sani foe bita-hati” srefi, soema ben sa kan aksi fa disi kan de troe troe na moro betre libipasi. Wan san de di kan wegi tegen den foeka disi, ja, di de net so hebi leki den? Soema kan de net so kolokoe te joe e tjari a tesi leki te joe e wai pasi gi en? San sa jepi wi foe hori doro ondro hebi tesi? Na piki tapoe den aksi disi kan jepi wi troe troe foe gi wi krakti nanga jepi.
SOEMA DE TROE TROE FOERANTWORTOE?
5. San wi moesoe kon froestan foe na bigin foe na pina?
5 Wi noiti moesoe frigiti taki pina no e feni en bigin na wi hemel Tata. A no en tjari sondoe kon na ini grontapoe. Wan jeje manpikin foe Gado ben hopo tegen en Mekiman èn na sowan fasi a meki ensrefi tron Satan, wan soema di e doe kontra en moro Héwan. Nanga na fasi fa a wroko tapoe den na fosi libisoema oema nanga man, Adam nanga Eva, ben broko espresi Gado wet, nanga san den tjari na kroetoe foe dede na den tapoe (Genesis 3:1-19; Johannes 8:44). Foe di Adam ben meki en volmaaktifasi lasi gowe, ala en bakapikin ben kebore ini sondoe èn den ben kon siki, de malengri, kon owroe èn den e dede (Romeini 5:12). Foe di wi kebore leki sondari, no wan foe wi man foe de so leki fa wi ben sa wani foe de troe troe èn ben moesoe foe de. Wi kan hati trawan nanga wi wortoe nanga doe sondro espresi èn na so wan fasi wi kan troesoe den moro dipi na ini na peti. Foe dat’ede wi moesoe prakseri taki wi no kan gi Gado na fowtoe foe den problema di wi e kisi foe wi égi novolmaakti-fasi noso dati foe libisoema leki wi. Efoe Gado wet ben hori, siki, malengri, owroedé nanga den foeroe tra gron foe pina noiti ben sa de.
6. Fa Jehovah e prakseri foe na no libisma-fasi nanga san libisoema e handri nanga trawan?
6 Moro fara wi hemel Tata no feni na no-libisma-fasi fa soema e handri nanga tra libisoema, boen. Na bijbel e taki: „Dati den e trapoe wan soema di de na ini doengroe-oso ini a kondre, dati wan man teki a reti foe na Moro Héwan, dati ini kroetoe-oso a reti e kon kroektoe — so wan sani Masra noiti ben feni boen” (Krésingi 3:34-36, The New English Bible). Den soema di e broko Gado wet foe di den e mishandri libisoema leki densrefi, sa tjari frantwortoe na en. „Mi abi na hati-bron; mi sa gi refrensi, Jehovah e taki” (Romeini 12:19). Foe dat’ede wi moesoe loekoe boen taki wi no kisi bita-hati nanga wi hemel Tata foe na pina di e kon te libisoema e wiswasi Gado wet espresi nanga oproeroe.
7. San wi moesoe doe, foe di Jehovah Gado e gi pasi na setuwasi di e tjari pina gi wi, prakseri foe na gron di a abi foe doe so?
7 Leki fa a de Jehovah Gado abi na makti foe tapoe Satan, den ogri jeje, den godlosoe soema nanga libisoema sondoefasi di e meki ala sortoe setuwasi foe tesi kon foe de. Foe di ai gi pasi taki srefi en foetoeboi e kon ini ala sortoe setuwasi di e gi sari, a moesoe abi boen gron foe dat’ede.
FOE WINI FOE DEN „BARI FOE SARI’HATI”
8. Sortoe gron wi kan lesi ini Romeini 9:14-24 foe sanede Jehovah Gado no e handri wanten wanten tegen den soema di e meki trawan e pina foeroe?
8 Ini na Santa Boekoe a ferklari e gi dati Gado abi wan heri boen gron san a abi na prakseri foe sanede a no e hopo doe tegen den soema di e meki trawan ondrofeni foeroe pina, ja, dati disi bakaten sa abi foeroe wini gi soema di abi wan reti hati. Ini en brifi gi den Romeini na kristen apostel Paulus ben skrifi:
„Kroektoedoe de na Gado? Meki dati noiti kon troe! Bikasi ai taki gi Moses: ’Mi sa sori sari-hati gi soema mi wani foe sori èn mi sa sari di mi sa sari.’ So a no didon na na soema di e winsi, no na soema di e waka tranga, ma na Gado, di e sori sari hati. Bikasi na Santa Boekoe e taki gi Farao: ’Joisti foe dat’ede mi meki joe tan na libi, sodati mi kan sori joe mi krakti, èn foe mi nen kan meki bekenti na ini heri grontapoe.’ Na so ai sori sari-hati gi soema a wani, ma ai meki kon tranga-ede soema a wani.
Joe foe dat’ede joe sa taki gi mi: ’Foe sanede a abi wan sani foe taki? Bikasi soema doe tegen en joisti wani?’ O libisoema, soema na joe dati joe wani taki kontrari Gado? Na sani di meki foe tokotoko sa kan taki gi en mekiman: ’Foe sanede joe meki mi so?’ San? Na soema di e meki patoe no abi makti tapoe na tokotoko, foe foe na srefi hipi kebroiki foe meki wan bari foe wan krin èn na trawan foe wan doti wroko? Efoe Gado now, nanga aladi a wani sori en hatibron nanga en krakti, nanga foeroe langa pasensi a ferdrage den bari foe hati-bron, di ben meki foe pori, sodati a ben sa kan meki bekenti a goedoe foe en granifasi foe den bari foe sari-hati, di a ben sreka na fesi, foe grani, namkoe wi, di a no teki nomo foe den djoe ma toe foe den naatsi, san dati ben sa de dan?” — Romeini 9:14-24.
9. Fa Farao ben sori foe de wan ’bari foe hati-bron’?
9 San Jehovah Gado e meki pasa noso e gi pasi foe pasa ini a libi foe libisoema, kan meki kon na krin sortoe „bari” den de. Na Farao di Jehovah ben meki Moses nanga Aäron meki bekenti dati a ben moesoe loesoe den Israëlsoema di ben de ondro katibo, ben tan tranga en hati tegen na Moro Héwan. Na srefi ten di wan foeka baka na trawan ben kon abra den Egyptesoema, na Farao disi ben tan tranga en hati moro tranga foe meki den Israëlsoema komoto gowe foe Egyptekondre leki wan fri pipel. Na so wan fasi a sori krin taki en ben de wan ’bari foe hati-bron’, dati a ben ferdini en foe na oproeroe tjalensi tegen a makti foe na Moro Héwan, Jehovah Gado, foe kisi pori. Na na srefi ten, a bita hati fasi, kroektoe fasi foe doe nanga den Israëlsoema, sori krin taki den ben abi sarihati-fasi, firi gi den noso sari den fanowdoe.
10. Fa Jehovah meki wan bigi nen gi ensrefi foe di a gi pasi taki Farao ben tan abi na tjalensi fasi foe en?
10 Poti prakseri toe dati na apostel Paulus ben sori na tapoe toe dati Jehovah ben gi pasi na Farao foe de trangajesi nanga de wan tjalensi-fasi foe di Gado nen ben abi foe doe nanga na afersi dati. Efoe na hémemre regeriman disi ben pori wanten wanten so, Jehovah Gado no ben sa abi na okasi foe hori en makti na so wan panja-fasi èn difrenti-fasi èn brokosaka den foeroe gado foe den Egyptesoema nanga den bonoeman. Den tin pina, di feni den hémarki ini a pori foe Farao nanga en fetikrakti ini a Redi se, ben de so wan bigi makti sori foe Gado makti dati ini den naatsi di ben libi lontoe, jari baka dati den ben taki ete foe en. Na sowan fasi na nen foe Jehovah ben meki bekenti na ini na heri grontapoe, nanga san a nen dati ben kisi glori nanga grani, èn opregti soema ben kisi na firi foe èrkèn na Moro héfasi foe en. — Jozua 2:10, 11; 1 Samuël 4:8.
11. Fa den Israëlsoema ben kisi wini foe den ondrofeni nanga Farao?
11 Leki fa a sori dan den Israëlsoema ben ondrofeni wini leki „bari foe sari-hati” foe na sani san na Moro Héwan ben doe. Dati a meki a masi na ondro ben kan pasa èn moro fara dati nanga jepi foe wan heri moi sori foe en makti a tyari wan kaba kon, a jepi den foe kon sabi en moro betre èn a gi den wan pisi foe en bigi fasi foe si wansani foe san efoe a ben waka tra fasi den no ben sa kan de kotoigi. O sari-hati-fasi na ondrofeni disi ben de di den Israëlsoema ben pasa na ini Egyptekondre, a seker ben moesoe jepi den foe si na prenspari-fasi foe bribi ini Gado makti foe ferloesoe èn foe abi wan gesontoe frede foe Gado. Disi ben de wan sani di den no ben sa kan misi, efoe den ben wani tan waka na wan libipasi di ben sa tjari den go na kolokoe, sekerfasi, fréde nanga wan boen gesontoe. — Deuteronomium 6:1-24; 28:1 te 68.
12. Foe doe san na gi di Jehovah e gi pasi dati wi ondrofeni pina soleki ini na afersi foe Job e sori?
12 Soleki ini a ten dati den lostoe foe den hati foe den soema ben kon na leti, na so den tesi di e kon foe di Gado e gi pasi foe den pasa ini wi libi na wi tapoe, kan tjari kon na krin ofoe wi e dini en nanga wan joisti hati. Gado féjanti, Satan, e hori taki den soema di e doe Gado wani, te joe sa loekoe fini dan den e soekoe den égi boen nomo. Foe na getrow Job na féjanti ben taki: „Ala san na libisoema abi, a sa gi foe en sili ede: Leki wan kenki tangi tangi soetoe joe anoe èn naki en te na en bonjo nanga en meti èn loekoe efoe a no sa floekoe joe reti na ini joe fesi” (Job 2:4, 5). Nanga wi getrow hori doro ondro pina wi abi wan prati na ini foe meki san di Satan taki kon tron wan létori èn foe krin na boen nen foe wi hemel Tata, di e fertrow en loyaal foetoeboi. Èn efoe Jehovah ben sa gi pasi meki Satan, nanga jepi foe en wrokoman, sa masi troe kristen na wan toemsi ogri fasi sodati den e dede noso den kon malengri? Ofoe efoe trawan e ondrofeni taki soema e gi den sjen ofoe na tra toemsi ogri fasi den e kisi misandel? So wan sani e seki soema. Ma noti kan tapoe na hemel Tata foe meki ala sani kon boen na en égi ten. Ini son okasi a kan feni en fiti foe dat’ede foe meki a tesi go so fara te a pasamarki. Na sowan fasi Gado foetoeboi abi na okasi, foe di den e tan getrow te na ini dede, foe sori no troefasi foe a gi di den e gi den srefi gi Gado sodati no wan twéfri no de.
13. San den wortoe ini 1 Petrus 1:5-7 e tjari kon na krin omtrenti a pina foe kristen di den kande kan ondrofeni?
13 Alwasi disi sa sori wan ferwondroesani gi son soema, den tesi di wi e kisi foe pasa, efoe na wi skin noso tra sani ofoe na ferfolgoe, den kande kan wroko wan boen sani gi wisrefi. Na apostel Petrus ben poti prakseri na tapoe na sani disi. Na baka di a ben taki taki kristensoema „e kisi kibri nanga jepi foe Gado krakti”, sodati na ferloesoe di den moesoe kisi te kaba foe kaba ben sa de seker, na apostel e taki:
„Ini a troe tori disi oenoe prisiri foe troe, nanga aladi na na momenti disi foe wan sjatoe ten, efoe a moesoe de so, difrenti pina e sari oenoe, sodati na égifasi foe joe bribi di tesi — san abi moro foeroe warti leki gowtoe, di e lasi gowe nanga aladi a de tesi nanga faja — kan tron wan gron foe gi biginen nanga glori nanga grani te Jesus Kristus sa sori en srefi.” — 1 Petrus 1:5-7.
14. Foe sanede kristen kan prisiri te tesi e gi den „sari”?
14 So leki san Petrus e èrkèn, a pina di wi kande e ondrofeni, no switi sref’-srefi. Tesi kan meki wi firi troe troe „sari” noso den kan hati wi firi. Tokoe na na srefi ten wi kan abi prisiri. Foe sanede? Foe wan pisi na prisiri e kon foe na sabi taki getrow horidoro ondro tesi na jeje fasi a de gi wini marki. Na san na jeje wini marki disi didon?
FA PINA KAN DORO WI BRIBI
15. Sortoe wroko tesi kan abi tapoe na bribi?
15 Na apostel Petrus ben agersi na wroko di tesi kan abi tapoe na bribi foe wan kristen, nanga na doro foe gowtoe nanga faja. Nanga na dordoroo disi san no abi warti e komoto èn na soifri gowtoe e tan abra. Na warti foe na gowtoe di krin e meki na dorowroko troe troe fanowdoe. Ma soleki fa Petrus ben taki dan srefi na gowtoe di doro nanga faja kan lasi gowe. A kan kon owroe noso a kan pori na wan tra fasi. Nanga wan bribi di poti ondro tesi noso bribi di ondrofeni tesi a de tra fasi. Wan troe bribi no kan pori.
16. Foe sanede a abi bigi wini marki gi wi te wi abi wan troe troe bribi?
16 Te wi wani Gado feni wi boen, dan troe troe a de fanowdoe foe abi so wan bribi. Na bijbel e ferteri wi: „Sondro bribi a no kan foe plisi Gado” (Ebréër 11:6). Ja, wan bribi di tan troe ondro tesi, e pasa na warti foe gowtoe di doro krin krin. Wi tégo libi di de na wi fesi de na so wan bribi.
17. Sortoe aksi ben kan aksi na na sé foe na wroko san tesi kan abi na wi bribi?
17 Ma fa na bribi kan doro nanga tesi, sodati a „kan feni foe de wan gron foe gi bigi nen nanga glori nanga grani te Jesus ben sa sori ensrefi”? Disi kan pasa na difrenti fasi.
18. Fa na bribi ben sa kan sori ensrefi ondro tesi, fa disi kan tranga wi?
18 Efoe wi bribi tranga, a sa trostoe èn gi wi tranga ini hebi ten. Baka di wi pasa wan tesi boen, wi e firi tranga foe teki moro tesi di kan kon abra wi. Ondrofeni sa sori wi san wi bribi kan doe gi wi.
19. San wan spesroetoe tesi ben sa kan tjari kon na krin foe wi na na sé foe swakisé ini na bribi, èn fa disi kan jepi wi?
19 Wan spesroetoe tesi kan sori toe den mankeri ini wi égifasi, kande hémemre, trangajesi, sondro pasensi, grontapoeprakseri noso switi skin nanga lobi foe prisiri. Den sortoe égifasi disi e komoto foe swakifasi ini a bribi. Fa dati so? Foe di den e sori taki na soema disi no wani foe saka ensrefi krin krin na na tiri foe Gado nanga en wani na na sé gi den. A no sabi seker taki en Tata sabi moro boen san kan tjari den go na kolokoe èn dati na waka na baka na tiri foe Gado alaten e tjari ségi (Ebreër 3:12, 13). Te nanga tesi swakisé e kon na doro, disi de wan warskow gi wan kristen dati a moesoe krakti en bribi efoe a wani tan foe de wan foetoeboi di na Moro Héwan e tan feni boen.
20. San wi moesoe doe te tesi e tjari swakisé ini wi bribi kon na krin?
20 Te foe wan spesroetoe setuwasi foe dat’ede wan swaki pisi kon na krin ini wi bribi, wi kan ondrosoekoe wisrefi èn loekoe sortoe skeki wi moesoe meki foe betre wisrefi. A ben sa boen efoe wi aksi wisrefi: „Foe sanede mi bribi swaki? Mi onborsoe foe studeri Gado Wortoe èn foe prakseri dipi foe en? Mi e teki ala okasi di mi kisi foe konmakandra nanga soema foe na srefi bribi foe kisi krakti nanga jepi foe den sani di den e taki foe den bribi? Mi abi na firi foe fertrow moro na mi tapoe dan mi mag foe doe, presi foe mi poti ala mi sorgoe nanga nowtoe na Jehovah tapoe? Begi, ja begi di e komoto foe mi hati, de wan pisi troe troe foe mi ibridé libi?Te wi si kaba na ini san wi sa moesoe tjari betre kon, wi moesoe meki boen foeroe moeiti foe tjari kenki ini wi ibridé libi foe meki wi bribi kon tranga.
21. San a wani taki dati wi bribi tron „wan gron foe kisi biginen nanga glori nanga grani te Jesus Kristus sa sori ensrefi krin”?
21 Foe di wi e loekoe foe tiri na Gado èn e fertrow nanga pasensi taki a sa sori wi na pasi foe loesoe den problema foe wi, den ondrofeni disi di foeroe nanga tesi kan meki dati wi tron moro boen foetoeboi foe Gado. Dan wi bribi foe troe sa „feni foe de wan gron foe gi biginen nanga glori nanga grani . . . te Jesus Kristus sa sori ensrefi”. Foe wi bribi ede a sa gi wi wan grani paiman èn a sa gi wi nanga dati „glorifasi”. A sa „grani wi na fesi foe Jehovah Gado nanga den engel, leki en discipel. (Agersi Mattheüs 10:32; Lukas 12:8; 18:8.) Disi sa wani taki taki wi sa abi wan libi di no abi kaba nanga kolokoe na wi fesi. Ma fa wi kan jepi dati ondro hebi pina wi no kon swaki ini bribi?
FA WI MOESOE DOE ONDRO HEBI MASI
22. Sortoe troe tori na na sé foe na langa foe tesi kan jepi wi foe hori doro?
22 Wán sani di kan jepi wi foe pasa hebi tesi nanga foe di ai kon boen, de foe froestan taki den de foe wan sjatoe pisi ten. Na doro foe na gowtoe abi wan bigin ma so toe wan kaba. So toe ibri wan pina di wi e ondrofeni, no sa de sondro kaba. Efoe wi e tan hori Gado pramisi foe tégo libi sondro siki, bari noso skinhati na ini wi hati, srefi na moro ogri pina ini a seti foe sani kan kon si leki wan sani di de ’sjatoe troe troe èn lekti’ (2 Korinthiërs 4:17). Loekoe na fesi na na ten pe „den sani foe fosi” troe troe ’no sa kon baka ini na prakseri, no toe den sa kon ini na hati’ (Jesaja 65:17). Fa disi de wan toemsi switi sani foe sabi taki den hebi ondrofeni disi srefi no sa wiki den takroe memre disi moro!
23. Foe sanede kewonlek pina no e kon abra wi foe di wi abi wan heri boen fasi foe tjari wisrefi?
23 Moro fara a de so taki wanwantron nomo a de so taki ibridé agen wi e ondrofeni hebi pina foe di na soema e tjari en kon na wi tapoe. Nanga na heri boen fasi fa wi e tjari wisrefi leki fa a de wi e gi soema weniki gron foe den doe wi ogri. Foe di a de na wroko foe regeri edeman foe hori na wet hé èn hori ordre, a de heri boen dati den gi Jehovah foetoeboi biginen foe di den de soema di e hori densrefi na ordre. Ini na ten disi srefi féjanti ben kon dwengi foe taki wan sortoe sani leki den féjanti foe Gado getrow profeti Daniël: „Ini a Daniël disi wi no sa feni no wan enkri létori, noso wi ben sa moesoe kan feni dati ini wet foe en Gado.” Ja, wi e lési dati Daniël „ben de wan soema di joe kan fertrow èn no enkri onborsoe ben de foe feni na en no toe win bedrigi sani ben de foe feni na en” (Daniël 6:4, 5). Na troe tori dati wan heri boen fasi foe tjari wisrefi kewonlek no de na gron foe sanede wan kristensoema de na marki foe féjantifasi, kande meki na apostel Petrus aksi na tra aksi di e folgoe: „Ja, soema de na soema di sa meki joe ondrofeni lasi efoe joe e meki moeiti foe doe na boen?” — 1 Petrus 3:13.
24. Foe san-ede libisma no kan doe wi ogri foe alaten?
24 Na apostel ben kan bedoel nanga en aksi sosrefi toe: „Soema kan doe wan getrow kristen troetroe ogri?” No wan sma kan doe wi ogri foe alaten. Jezus Kristus ben taigi en discipel: „No frede den di e kiri na skin, ma di no kan kiri na sili; ma frede moro foeroe en di kan pori èn sili èn skin ini Gehenna” (Matteus 10:28). Ja, sma kan go so fara dati den e kiri wi, ma den no kan poeroe na reti na wi anoe foe de wan libi sili. Na Moro Hé Gado kan èn sa tjari en getrow dienstknekti kon na libi nanga jepi foe en Manpikin. Soso Jehovah kan poeroe na wi na reti tapoe tego libi leki libi mekisani èn kroetoe wi foe kisi na tego dede, sondro howpoe tapoe wan opobaka.
25, 26. (a) Foe san-ede meki wi kan de kolokoe te wi e njan pina foe regtvaardiki fasi ede? (b) Foe san-ede wi no moe frede den sani di den ferfolgoeman foe wi e frede?
25 Foe den waarheid disi, na apostel Petrus ben kan taki gi en kristen brada: „Wans joe sa njan pina foe regtvaardiki fasi ede, joe de kolokoe. Ma no frede na sani foe a frede foe den èn no skreki.” — 1 Petr. 3:14.
26 Efoe wi e njan pina „foe regtvaardiki fasi ede”, dan wi kan de kolokoe, foedi wi abi wan krin konsensi na fesi foe Gado nanga libisma. Wi e njan pina foe na joisti reden. Wi sa si wan dipi inisé satisfaksi, foedi wi sabi dati wi e doe den sani di e prisiri na Moro Héwan. Ma disi kan soso, soleki na apostel e taki, efoe wi no frede. Na apostel kan sori dja tapoe na frede di ferfolgoeman kan meki wi kisi foedi den e tjari benawtoe kon tapoe Gado pipel. Ma a kan bedoel toe na frede di den ferfolgoeman srefi abi. Den gensman foe troe kristen foe eksempre e frede wan biten dede, foedi den no e bribi dati Jehovah Gado sa opo den dedewan nanga jepi foe Kristus (Hebr. 2:14, 15). Ma leki dienstknekti foe Gado wi no afoe foe frede san sma di no e bribi e frede, foedi wi kon fri foe na frede foe so wan dede, èn wi sabi dati wi hemel Tata no sa libi wi noiti. Foe datede meki wi no moe meki den „skreki” wi ofoe tjari wi ini broeja, sodati wi opo wisrefi ini atibron tegen wi ferfolgoeman.
27, 28. Fa na rai ini 1 Petrus 3:15 kan jepi wi te wi tjari go na fesi foe tiriman èn den e aksi sani nanga tranga èn foe saka wi?
27 San wi moe doe efoe den tjari wi go na fesi tiriman èn den e aksi wi sani nanga tranga èn foe saka wi? Noiti wi moe pai ogri nanga ogri. Na froetrow dati Gado e jepi wi, kan gi wi kande fri foe taki, ma a no de wan excuus foe de nanga fetifasi ofoe asrantifasi. (Teki gersi Tori foe den Apostel 4:5-20). Na apostel e gi na rai: „Santa na Kristus leki Masra ini joe ati, de klari alaten foe frantwortoe joesrefi na fesi foe ibrisma di e aksi wan reden foe na howpoe di de na joe ini, ma doe disi nanga safri fasi èn dipi respeki” (1 Petrus 3:15). Efoe wi ben sa poti na rai disi na wan sé foedi wi no e sori respeki, dan wi no ben sa njan pina moro langa foe regtvaardiki fasi ede. Den tirimakti ben sa firi den srefi fri foe opo tegen wi foedi a de, taki wi no e sori respeki èn wi e wegri dienst. Grontapoesma e mandi, e kisi atibron nanga bita ati te den méne dati den trapoe den reti nanga foetoe. Wan kristen moe tjari ensrefi tra fasi.
28 Soleki na apostel e gi rai, dan wi moe hori wi Masra ofoe Meester ini prakseri èn prakseri na eksempre foe en ini den sortoe omstandigheden disi. Wi moe loekoe boen foe gi Jezus Kristus na moro bigi respeki èn gi en wan santa presi ini wi ati. Wi de discipel foe en, èn te den e aksi wi sani, dan wi moe taki so leki wi ben de na fesi foe wi Masra. Tapoe wan respeki, safri nanga rustig fasi wi moe tjari kon na krin den reden foe wi kristelek standpunt.
A ABI WAN BOEN KRAKTI TAPOE DEN GENSMAN
29. Sortoe krakti a getrow horidoro ondro pina kan abi tapoe gensman?
29 Getrow horidoro ondro pina kan meki dati gensman tapoe den mofo. Na apostel Petrus e tjari disi kon na fesi leki wan tranga foe hori wan boen konsensi, foedi a taki: „Hori wan boen konsensi sodati den di e soso oen boen libifasi ini Kristus, kan kisi sjen” (1 Petr. 3:16). Gensman di e si dati Gado dienstknekti e tan nanga pasensi, sondro foe kragi, sa firi sjen kande, dati den ben kosi den. Disi de spesroetoe so te wi e handri nanga switi fasi nanga gensman. — Romeini 12:19-21.
30. (a) Foe san-ede a no e tjari wini kon foe njan pina foe ogri ede? (b) Foe san-ede Petrus ben taki ini na tori foe pina foe regtvaardiki fasi ede, „efoe na wani foe Gado aksi dati”?
30 Dati getrow horidoro ondro pina foe regtvaardiki fasi ede kan tjari den sortoe winimarki disi, e poti krakti na den tra wortoe foe Petrus: „Bikasi a moro betre foe njan pina, foedi joe e doe boen, efoe a wani foe Gado e aksi dati, leki foedi joe e doe ogri” (1 Petrus 3:17). Sortoe wini de na ini efoe wan foefoeroeman, wan afperser, wan sma di e doekroen foe pai belasting ofoe leki wan sma di foe wan falsi vroom fasi ofoe faja di fowtoe e opo ensrefi tegen makti na en tapoe? Efoe wan kristen kisi strafoe foe dati, dan sjen soso a sa tjari gi ensrefi nanga en kompebribiman. Ma efoe a de horidoro nanga pasensi ondro wan onregtvaardiki behandeling, dan trawan kan kon ondro na indruk foe na krakti di e jepi troe anbegiman foe tan tanapoe èn a mofo foe sma di e taki fowtoe foe waarheid nanga den sma di e stré gi en, kan tapoe. Foedi na pina di kan kon tapoe wan kristen de wan sani di Gado e gi pasi foe dati, meki dati Petrus no e gi wan fowtoe fasi foe si sani, ma nanga reti a ben taki: „efoe na wani foe Gado aksi dati”.
WAN FASI FOE DOE DI ABI WINIMARKI SOLEKI FA WI E SI NANGA JESUS
31. Sortoe ségi a ben abi foe di Jesus ben tan hori doro getrow ondro pina?
31 Dati getrow hori doro ondro pina kan tjari grani blesi gi wan kristen, wi kan si boen nanga Jesus Kristus. Foe di a no ben abi sondoe a no ben doe noti di ben ferdini wan takroe foe doe nanga en. Ma dati srefi te na ini dede a, ja, wan toemsi sjen fasi foe dede na wan oedoe, tan hori doro getrow, ben abi wondroe boen ségi gi wi èn a ben sorgoe taki a kisi grani blesi: Na apostel Petrus ben skrivi:
„Tokoe, Kristus srefi dede wan tron foe alaten foe wi sondoe, wan retiwan gi den di no de reti, foe tjari oenoe na Gado, en, dede na meti, ma kon na libi na jeje. Na na kondisi a gowe èn a ben préki gi den jeje ini doengroe hoso, di wan tron ben tranga jesi, di na pasensi foe Gado ben wakti ini den dé foe Noach, di na ark ben bow, na ini san weniki, namkoe aiti sili, ben pasa sondro kefaar na na watra.” — 1 Petrus 3:18-20.
32. Fa wi feni wini foe di Kristus nanga a pina tokoe a hori doro te na ini dede?
32 Di Jesus Kristus ben hori doro ondro sondro a meki wan fowtoe na en retidoe, a ben kan gi en libi leki wan folmaakt libisoema ofrandi. Nanga en dede nanga dati a pasi ben hopo gi libisoema foe kan „tjari den go na Gado”, sodati den ben kan meki boen baka nanga na moro Héwan èn ben kan kisi na hopoe foe tégo libi. Wi no moesoe de klari foe di wi e kisi someni winimarki dati Kristus dede gi wi, foe waka na en baka èn teki en eksempre èn tjari pina foe retidoe hede?
33. Foe sanede nanga na hopo baka foe Jesus Kristus wi kan de seker te wi abi foe doe nanga frede di soema e frede wi nanga dede?
33 Moro fara net soleki nanga en wi kan de seker dati wi getrow hori doro sa kisi ségi. Na troe tori dati Jesus Kristus „ben kon na libi na jeje” ofoe a ben kisi hopobaka foe kisi jeje libi, de wan garanti di no kan kenki dati en discipel sa kisi libi baka. — 1 Korinthiers 15:12-22.
34. San Jesus Kristus ben kan doe foe di a ben getrow, na na sé foe godlosoe jeje?
34 Foe di na Manpikin foe Gado ben tron winiman nanga di a ben hori doro getrow, a ben kan leki wan jeje gi wan boskopoe foe kroetoe na „den jeje ini doengroe-hoso”. Foe di na tranga jesi foe den engel disi e poti na ini na ten foe Noach, a moesoe de taki a tori e go foe den engelmanpikin foe Gado di ben libi den fosi presi foe tan èn ben kon libi na grontapoe leki mansoema èn libi makandra nanga oemasoema (Genesis 6:1-4). Den kisi nen „jeje ini doengroe-hoso” foe di den strafoe wani taki wan fasi foe den no de so fri. A ben de so namkoe taki foe alaten den no ben mag foe drai go baka na den fosi tanpresi mindri den getrow engel. Den wortoe foe Judas e sori taki a nomo wan boskopoe foe kroetoe ben sa kan taki gi den fadon engel disi: „Den engel di no tan hori den fosi presi ma den libi den fosi joisti tanpresi, Gado kibri den ondro deki banti ondro deki doengroe foe na kroetoe na bigi dé” (Judas 6). Foe di a hori doro na wan getrowfasi Jesus ben kisi na grani foe kon na libi baka, sodati a ben kan préki sowan kroetoe gi den fadon engel noso meki en bekenti na den.
35. Foe sanede na troe tori dati Jesus ben ferteri den „jeje ini doengroe-hoso” taki den sa pori, kan gi wi dek’hati foe hori doro na wan getrowfasi?
35 Dati den godlosoe jeje e kisi foe jere taki den sa pori, moesoe de wan dek’hati gi wi foe hori doro getrow ondro tesi. Foe sanede? Bikasi den godlosoe jeje krakti disi de fornamkoe foerantwortoe dati libisoema di komoto foe Gado e gens den discipel foe Jesus Kristus. Na bijbel e ferteri wi: „Na Gado foe na seti foe sani disi breni na jeje foe den soema di no e bribi . . . sodati na krin leti foe na heri boen njoensoe foe Kristus, di de na prentji foe Gado, no sa skijn go doro” (2 Kor. 4:4). „Wi kristensoema no abi wan feti tegen broedoe nanga meti, ma tegen den regeri, tegen den makti, tegen den grontapoe tiriman foe doengroe, tegen den godlosoe jejekrakti na hemelsé” (Efeziërs 6:12; loekoe toe Openbaring 16:13, 14). Foe di Jesus Kristus di ben hopo baka foe dede ben kan préki wan kroetoe boskopoe gi den godlosoe engel, e gi wi na sekerfasi taki wan tron a sa kaba krin krin nanga den ogri makti. (Agersi Markus 1:23, 24.) Fa dati sa de wan wondroefasi trowstoe!
36. (a) Fa Jesus Kristus ben kisi paiman foe en getrowfasi? (b) Fa wi moesoe prakseri, foe na presi di Jesus abi, foe na pina foe en nen ede?
36 Jesus Kristus a no nomo a ben kisi hopo baka foe dede leki Gado foetoeboi di kroetoe boen èn soboen a ben abi na okasi foe tjari wan boskopoe foe kroetoe gi den trangajesi engel, ma a ben kisi wan bigi hé grani. Na apostel Petrus e ferteri wi: „A de na Gado retihanoe, bikasi a go na hemel, èn engel nanga makti nanga krakti ben saka na en ondro” (1 Petrus 3:22). A ferklari disi e akroederi nanga den wortoe di Jesus srefi ben taki na baka di a ben hopo komopo foe dede: „Ala makti ini hemel nanga grontapoe mi kisi” (Mattheüs 28:18). Foeroe soema ben de klari klari foe, foe di den e wroko gi libisoema regeriman di de foeroe tron moro lagi na makti, pasa pina èn srefi foe ofer den libi. Den ben loekoe en wan bigi grani foe dini wan kownoe ofoe koningin na sowan fasi. O meni moro wi moesoe firi wi srefi grani foe ondrofeni tesi di wi de getrow na wi hemel Kownoe, Jesus Kristus!
WAKA NA JESUS KRISTUS BAKA
37. Soema eksempre wi moesoe proberi foe folgoe te wi e ondrofeni pina?
37 Loekoe alaten ondro tesi na Gado Manpikin leki joe eksempre. Na apostel skrifi: „Foe di Kristus njan pina na ini skin, so joesrefi sreka joesrefi toe nanga na srefi prakseri, bikasi na soema di njan pina na skinsé, kaba foe sondoe, foe na pisi foe en libi na skin di de na en fesi ete foe no libi gi den lostoe foe libisma, ma foe Gado wani.” — 1 Petrus 4:1, 2.
38. Sortoe fasi foe prakseri foe sani Jesus Kristus ben abi?
38 Sortoe fasi foe prakseri Jesus ben abi? A ben saka ensrefi na wan sakafasi foe teki misandel nanga skempi te leki na kaba foe en a dede wan toemsi takroe dede na wan oedoe. Foe di a noiti ben doe soema baka leki san den ben doe en, na Manpikin foe Gado ben meki den profetitaki kon troe: „Leki wan skapoe den ben tjari en go srakti, èn leki wan lam di babao gi den soema di e skrebi en, na so a no e hopo en mofo.” — Tori foe den apostel 8:32; Jesaja 53:7.
39. Foe san soema kan si taki wi kaba foe sondoe?
39 Wi foetoeboi foe na Moro Héwan moesoe de klari klari foe hori so doro ondro pina èn moesoe kaka foetoe gi wan prakseri foe hopo wi srefi noso doe soleki fa den doe nanga wi. Efoe wi ben sa frede wi ferfolgoeman èn wi ben sa soekoe okasi foe doe den ogri, disi e sori dati te now wi de ondro dwengi foe na sondoe skin ete. Efoe nanga di libisoema e pina wi, dan alaten disi moesoe kan kon nomo foedi wi no e folgoe na gridi fasi foe doe foe na grontapoe disi (Johannes 15:19, 25). Na sowan fasi wi kan sori dati na na sé foe wi fasi fa wi e doe, wi wortoe nanga wi doe ’wi no e libi moro gi den gridi lostoe foe libisoema, ma foe Gado wani’.
WAN GRON FOE DE KOLOKOE
40. Foe sanede a kan taki a ben sori wan frémde sani gi den soema di ben bribi ini na fosi jarihondro foe ondrofeni pina foe Kristus nen ede?
40 Den afkodréman foe na di foe wan jarihondro no ben abi foe njan pina foe bribi hede. Ma te wan soema ben tron wan kristen, a ben kon tron wan gron foe bita hati. A ben moesoe foe de wan frémde sani foe lasi joesrefi te joe ben ondrofeni ferfolgoe. A ben de wan heri tra sani leki den ségi di na teki foe na „boen njoensoe” e poti na wi fesi. A ben de gi den kristen disi troe troe prenspari foe si a pina disi na wan joisti fasi. Den wortoe foe na apostel Petrus di e folgoe now ben sa de troe troe switi gi den:
Lobiwan, oenoe no tanapoe loekoe ferwondroefasi foe na faja di e kon na mindri oenoe, di e kon abra oenoe leki wan tesi, leki na wan frémde sani e miti oenoe. Na kontrari, tan abi prisiri, tan abi prisiri, foe di oenoe abi pisi na na pina foe na Kristus, sodati oenoe te a sori ensrefi oenoe kan tan abi prisiri èn oenoe hati kan tjompo. Efoe foe na nen foe Kristus oenoe e kisi pori nen, oenoe de kolokoe, bikasi na jeje foe glori, ja, na jeje foe Gado, de tapoe joe.” — 1 Petrus 4:12-14.
41, 42. (a) Fa wi foe kroederi nanga 1 Petrus 4:12-14 moesoe loekoe na pina foe hede foe reti-doe? (b) San e kon troe nanga na pina dati?
41 Presi foe wi ferwondroe noso a kon sondro ferwakti taki pina kon na wi tapoe, wi ben sa kan teki den leki na sreka na fesi foe den ségi di wi sa kisi te Masra sa sori ensrefi. Petrus ben taki foe na pina leki wan „faja”, foe di isri sani na faja e soifri den. Na na srefi fasi disi Gado e gi okasi na en foetoeboi dati den pina di den e ondrofeni, den e kon soifri èn krin. Leki fa a de dan Gado no meki wi nanga sondoe. Ma foe di wi abi sondoe kaba, a kan gi pasi dati wi ondrofeni wan spesroetoe pisi foe tesi di kan sorgoe taki wi kon krin. Na pina di wi e ondrofeni, kan jepi wi foe kon moro switi, sakafasi, firi moro gi trawan èn sori froestan te wi de makandra nanga libisoema leki wisrefi. So toe den wortoe foe trostoe nanga dek’hati di wi e taki gi trawan, abi moro krakti te wi srefi pasa hebi tesi. Den soema di wi e trostoe, sabi dan dati wi e froestan san den e psa.
42 Foe di Gado Manpikin ben njan pina, den pina di wi e psa, de stéfi na tori dati wi de troe troe en discipel, dati wi de troe troe wán nanga en. Jesus ben taki gi den discipel foe en: „Prakseri na wortoe di mi ben taki gi joe: Wan srafoe no moro bigi leki en masra. Efoe den ferfolgoe mi, den sa ferfolgoe joe toe” (Johannes 15:20). Foe di foe na srefi gron wi e ondrofeni ferfolgoe, leki wi Masra èn soleki en e pina foe retidoe hede, ’wi abi pisi na na pina foe na Kristus’. Èn soleki fa foe di a ben de getrow en hemel Tata ben gi en paiman, wi toe te wi hori doro ondro pina, kan kisi na sekerfasi dati te na Manpikin foe Gado sa sori ensrefi wi kan kisi kroetoe boen. A de so taki wi sa abi prisiri pasa marki te wi e kisi paiman nanga tégo libi ini wan njoen seti foe sani, pe no wan bigin foe den problema foe na ten disi sa de moro.
43. Sortoe jeje e sori foe de tapoe wi te wi e hori getrow doro ondro pina, èn foe sanede?
43 Petrus ben taki toe dati kristen ben kan de kolokoe te foe na nen foe Kristus, dati wani taki, foe di den de en discipel, e ondrofeni pori nen. A de sori namkoe taki den soema di e kisi pori nen, abi Gado jeje noso na granifasi „jeje foe glori”, di e komoto foe Gado. Foe di na jeje disi de santa, a kan rostoe tapoe soema nomo foe na sé foe Gado den de soifri noso krin.
44. Sortoe pina wi moesoe wai pasi gi?
44 Foe dat’hede a de wan prenspari sani foe ondrosoekoe fin’fini te wi e ondrofeni pina, dati disi no de foe di wi doe wan kroektoe sani foe wi sé. Na apostel Petrus e sori tranga na tapoe: „Dati no wan foe oenoe njan pina leki wan kiriman noso wan foefoeroeman noso wan ogri-man noso wan soema di e boemoei nanga trasma tori.” — 1 Petrus 4:15.
45. San kan de na bakapisi te wan sma di taki a de wan kristen e njan pina, foedi a doe wan ogri?
45 Wan sma di taki a de wan kristen èn di doe en kompe-libisma ogri no kan froewakti foe kon fri foe strafoe. (Teki gersi Tori foe den Apostel 25:11). Na strafoe dati sa tjari sjen kon tapoe en, tapoe na gemeente, di a de nanga en èn tapoe na nen foe Kristus. Na presi foe prisiri a de kisi sjen.
46. (a) San wan sma e doe di e boemoei nanga tra sma tori? (b) Fa wan kristen ben sa kan pina leki wan sma di e soetoe en noso ini tra sma tori?
46 Na soema di e boemoei nanga tra sma sani, kan meki den abi ogri-ati foe en. Fa wan sma kan kon so fara foe „boemoei nanga tra sma sani” e kon na krin nanga jepi foe na srefi Griki wortoe, di Petrus e gebroiki dja. A wani taki letterlek „de opziener tapoe na sani di de foe wan trawan”. Tapoe na gron foe en sabi foe na bijbel, wan kristen kan firi dati a abi na leti foe ferteri grontapoe sma fa den moe seti den afersi foe densrefi. A kan poesoe en prakseri gi trawan tapoe na tori foe krosi di fiti, kweki foe pikin, na loesoe foe trow nanga seksueel problema, ontspanning, njanjan nanga so moro fara. Efoe sondro den aksi en, a poesoe ensrefi go ini den problema foe trawan, e taigi den san den moe ofoe no moe doe, dan a de proberi foe de wan „opziener” foe den afersi foe den. Disi e tjari mandi kon. Den sa taigi so wan sma kande ini wortoe di no kan froestan verkeerti dati a moe boemoei nanga en égi tori. Kande sma di e njan den niri foedi a boemoei ini den privé-afersi, e go abra foe gi en skin-ati srefi. A de tjari ensrefi kon ini moeilijkheid èn ai gi sma foe dorosé wan verkeerti indruk foe na kristendom èn na kristen boskopoe. A no de foe taki dati sma di e soetoe en noso ini tra sma tori no moe de toe na inisé foe na gemeente. — Teki gersi 1 Timoteus 5:13.
47. Fa wan kristen kan gi Gado grani foedi a de horidoro ondro pina?
47 Na presi foe na sjen di wan sma e kisi foedi na publiki den e tjari kon na krin dati a de wan sma di e pasa wet èn e soetoe en noso ini tra sma sani, dan na pina foe wan kristen e tjari grani kon. Petrus e skrifi: „Efoe a de pina leki wan kristen, dan a no moe sjen foe dati, ma meki a tan gi Gado grani ini na nen disi” (1 Petrus 4:16). Te wi e njan pina foe wi kristen fasi foe libi, dan wi e gi grani na a Moro Héwan nanga na pasensi horidoro foe wi. Nanga dati wi e bewijsi dati den sani di wi abi leki kristen — wan diri mati fasi nanga Gado èn Kristus, wan krin konsensi, jeje gosontoe èn wan boen howpoe foe na ten di e kon — de wan goedoe foe bigi waarde. Wi e sori dati wi de klari foe njan pina foe dati, ofoe a de fanowdoe foe dede, èn nanga dati na Gado di wi e dini tranga e kisi bigi grani. Efoe wi gi wi abra na druk èn libi na bribi foe wi, dan na presi foe dati wi sa saka en nen. Sma di e loekoe ben sa kon ini degedege foe na bigi waarde foe de wan discipel. — Teki gersi Efese 3:13; 2 Korinte 6.3-10.
WAN FASI FOE TRANGA LERI OFOE KWEKI
48. Fa 1 Petrus 4:17-19 e sori dati wi no de sondro jepi te wi moe pina foe regtvaardiki fasi ede?
48 Wi ben si dati Jehovah ini en almakti ben sa kan tapoe en dati kristen pina na wan onregtvaardiki fasi. Aladi na Moro Héwan no e libi en dienstknekti sondro jepi. Ini a tori disi na apostel Petrus e skrifi:
„Bikasi na ten de now, disi na kroetoe moesoe bigin ini na oso foe Gado. Ma efi nanga wi fosi a bigin, fa na kaba foe den sma sa de dan, disi no ben gi jesi na a Evangelium foe Gado? Èn efoe pikinmoro na regtvaardiki sma no sa doro da sani, ope na ogri sma nanga na sondari sa tan dan? Foe dat’ede den sma, disi de na pina nanga Gado wani, den moesoe hori doro foe doe boen, libi den sili abra na a froetrow Gado, disi ben meki ala sani.” — 1 Petrus 4:17-19.
49. (a) Sensi oten „na oso foe Gado” de ondro na kroetoe? (b) San e bepaal na troetroe kroetoe te foe kaba?
49 Leki na „oso foe Gado„ na kristen gemeente ini na jari 33 G.T. ben meki wan bigin. Foe sensi na ten dati, den memre foe en tanapoe ondro na kroetoe foe Gado. Na fasi fa den e teki na wani foe en, èn so toe den fasi, wortoe nanga doe foe den tapoe na tori foe san Gado e meki kon na tapoe den, abi foeroe foe doe nanga san sa de na troe troe kroetoe foe en. Sontron Gado e feni en boen foe gi pasi dati hebi tesi kon. Ma na ferfolgoe e tjari wan vorm foe trangaleri kon, di Gado kan meki de foe na boen foe en pipel. — Hebr. 12:4-11; loekoe toe Hebr. 4:15, 16, pe e sori dati na pina di Jezus Kristus ben ondrofeni, ben meki en klari foe de wan sari-ati hépriester di e firi gi trawan.
50, 51. Fa den ondrofeni foe Jozef nanga Paulus e sori dati Jehovah kan kenki den sani di sma kande e doe wi foe doe wi ogri, tron wan blesi?
50 Sma di de ondro na makti foe Satan, kande kan proberi nanga mishandel foe pori wi bribi. Ma Jehovah kan meki na ogri prakseri foe den tron noti. Ja, aladi wi hemel Tata srefi no man si ogri na ai, tog a kan meki na sani di kan doe wi ogri, wroko boen gi wi. Teki foe eksempre na tori foe Jakob jongoe Manpikin Jozef. Den afoe brada foe en ben abi ogri-ati foe en èn den seri en go ini katibo. Foeroe jari Jozef ben moe njan foeroe pina; wan pisi ten srefi a ben trowe go ini doengroe-oso tapoe wan onregtvaardiki fasi. Ma baka dati Jehovah ben meki gebroiki foe na sani disi foe hori na osofamiri foe Jakob ini libi. Ini disi Jozef ben taki gi en jongoe brada:
„Oen no firi now dipi sari èn no atibron tapoe oensrefi dati oen ben seri mi kon dja; bikasi foe hori oenoe na libi Gado ben seni mi go na oen fesi. Bikasi a de now na di foe toe jari foe na angriten na grontapoe, èn féfi jari e kon ete pe ten foe proegoe ofoe koti no sa de. Foe datede meki Gado ben seni mi go na fesi foe poti wan fikapisi foe oenoe na grontapoe, èn foe hori oenoe na libi nanga jepi foe wan bigi konfri. Now dan, no oenoe ben seni mi kon dja, ma na troe Gado srefi, sodati a ben kan poti mi leki wan tata gi Farao èn leki masra tapoe en heri oso èn leki tiriman foe na heri kondre Egypte.” — Genesis 45:5-8.
51 Wan srefi sani na tori foe na apostel Paulus ben de toe, di a ben de ini Rome ini strafoe-oso. Na omstandigheid disi di no ben boen, ben sorgoe foe na afersi foe na troe anbegi kon na fesi. Ini en brifi gi den Filippisma, a ben skrifi:
„Oen moe froestan, brada, dati na sitoewasi foe mi ben doe foeroe foe panja na evangelium. Na heri oso foe na keizer nanga ala trawan, a kon de krin now gi den, dati mi de ini strafoe-oso foe na bribi foe mi ini Kristus. Èn na moro bigi pisi foe mi brada abi froetrow ini Masra èn den teki dekati foe na strafoe foe mi foe bar wroko foe na boskopoe foe Gado sondro frede.” — Filippi 1:12-14, Na Njoen Testament ini aladétongo.
52. Foe san-ede „na ogrisma nanga na sondari” no kan howpoe foe „kon” a fesi foe Gado?
52 Di Jehovah Gado e gi pasi dati en loyaal dienstknekti e ondrofeni hebi tesi, sodati den kan kon soifri èn kan sori a faja foe den, fa wi kan prakseri dan dati „na ogrisma èn na sondari” ini sé foe na kristen gemeente ofoe na „oso foe Gado” ben sa kan „kon” na Gado fesi makandra nanga na „regtvaardikisma” ini na srefi gemeente? Na psalmsingiman e verklari: „Den ogrisma no sa tan tanapoe ini na kroetoe, no den sondari ini na konmakandra foe den regtvaardiki sma (Psalm 1:5). Nono, den ogrisma no sa tan tanapoe leki den ben feni den boen, ma den sa kisi kroetoe. Kande joe sa feni den ini na konmakandra foe den regtvaardiki sma, ma den no sa „kon” ini wan boen leti a fesi foe Gado. Te wan sma prakseri san ala bribi sma moe ondrofeni ini disi grontapoe, dan a de aksi foe den foeroe moeiti, lobi nanga bribi, te den wani kisi ferloesoe nanga tego libi. Foe datede den sa kisi ferloesoe nanga moeiti”. Foe datede meki ala memre foe na kristen gemeente (na „oso foe Gado”) moe wai komoto foe na pasi foe de ini disi ten” foe na kroetoe „ogrisma” nanga „sondari”. — 1 Petrus 4:17, 18; Spreuken 11:31.
53. (a) Sortoe trowstoe wi kan feni, te wi e ondrofeni pina, dati Jehovah de wan „Getrow Mekiman”? (b) Fa wi moe waka go miti den ferfolgoeman foe wi?
53 Tesi kan kon na wi tapoe di wi no ben sa kan pasa ini égi krakti. Ma wans o sari wi toestand kan de, Jehovah Gado kan hori wi baka èn ala ogri di wi kande ondrofeni kan meki kon boen. Te wi poti wi froetrow krinkrin na tapoe den, dan a kan tranga wi foe pasa pina. Foedi en, soleki Petrus e skrifi, de wan „getrow Mekiman”, wan Gado di wi kan poti bribi tapoe en, a no sa sori ensrefi ontrow nanga en pramisi foe jepi en dienstknekti (1 Petrus 4:1-9). Na sabi disi kan jepi wi foe wai komoto a pasi foe go miti wi ferfolgoeman tapoe wan fasi di e pori Gado nen. Na presi foe wi go feti nanga den èn soekoe foe pai den baka, wi sa wani foe go doro foe doe boen. — Luk. 6:26, 28.
54. Fa wi e saka wisrefi ondro Gado hanoe, èn sortoe wini disi abi?
54 Efoe wi saka wisrefi na dati san kan kon abra wi, èn nanga dati wi e kibri wan fasi foe prakseri leki Kristus, wi kan abi na fertrow dati Jehovah sa hopo wi. No wan tesi e tan foe tégo. A sa abi wan kaba. Solanga leki wi e tjari wisrefi foe kroederi nanga Gado wani te wi e ondrofeni takroe behandel, wi de tan ondro Gado hanoe. Èn na hanoe dati kan hé wi leki en foetoeboi di a feni boen èn di a tesi. Foe dat’hede na apostel Petrus ben gi wi rai: „Saka joesrefi foe dat’hede ondro na makti hanoe foe Gado, sodati te na ten doro a kan hé joe, nanga di joe e poti ala joe sorgoe na en tapoe, bikasi ai sorgoe foe joe.” — 1 Petrus 5:6, 7.
55. Foe san wi kan meki wisrefi kon fri, nanga aladi wi no kan lon gowe foe tesi, èn fa?
55 Fa dati e gi wi dek’hati te wi sabi dati Jehovah e sorgoe foe wi troe troe! En lobi e meki wi hati firi waran; en jeje e tranga èn skraki wi. Te wan spesroetoe tesi pasa èn wi de loekoe baka na a lobifasi sorgoe foe Jehovah, wi e firi taki wi hari kon moro krosibé foe en. Na situwasi disi kan agersi nanga dati foe wan pikin di abi foeroe tangi di ben firi na lobi nanga sorgoe foe en lobi papa nanga mama na na ten di a ben siki tranga. En fertrow nanga lobi kon tranga troe troe. A de troe dati den situwasi di e tjari foeroe tesi kon wi no kan wai pasi koemakriki gi den. Ma wi kan trowe wi brok’hede tapoe Jehovah Gado. Wi no abi foe broko wi hede o’langa wi kan ferdrage fonfon sondro pardon foe wan groepoe sma di abi hatibron, mishandri na seks sé noso tra toemsi ogrisani. Nanga na jepi foe lobi hemel Tata wi kan hori doro èn kisi wan wini na moreelsé tapoe wi ferfolgoeman foe di wi e tan getrow na wi Gado. Na sekerfasi disi e poeroe wi sorgoe di ben sa meki wi lasi wi fréde ini wi hati, di wi abi so tranga fanowdoe foe tan hori doro ondro tesi.
56. Foe san’hede wi no kan loekoe tesi leki wan sani sondro foe wi broko wi hede, nanga aladi wi e trowe wi sorgoe tapoe Jehovah?
56 Disi no wani taki dati te wi e trowe wi sorgoe tapoe Jehovah, wi hati kan sidon foe wi sé noso wi no abi trobi nanga noti moro. Wi tan abi wan féjanti. „Hori joe froestan na wan, tan na ai”, Petrus ben skrifi. „Joe gensman, na Didibri, e go lontoe leki wan krasi tigri, foe soekoe foe feni wan soema di a kan swari.” — 1 Petrus 5:8.
57. Na ini san Satan abi belangstelling?
57 Foe kroederi nanga na rai foe na apostel wi no kan lasi wisrefi foe de sondro wi hori sorgoe na prakseri te joe prakseri pina. Na gensman e wakti nomo tapoe wan momenti foe meki wi fadon. Efoe Satan kan meki wi twéfri na na getrowfasi foe wi brada nanga sisa noso efoe a kan swaki wi na wan tra fasi na jejesé, a sa doe dati. Wi sa hari wisrefi komoto foe de makandra nanga na kristen gemeente ofoe wi no sa taki moro nanga trawan foe wi bribi, dan disi ben sa wani taki dati Satan, na „krasi tigri”, di alaten e soekoe wan foefoeri-sani di no e froewakti en, swari wi krin krin.
58. Sortoe sani di wi sabi foe wi brada nanga sisa kan jepi wi foe tan getrow?
58 Foe kan tan wiki, a sa de wan jepi gi wi foe prakseri dati wi no de den enkri wan di e ondrofeni pina. Na ini na heri grontapoe wi brada nanga sisa di de kristen moesoe kaka foetoe gi difrenti sortoe foe wasi. Èn nanga na jepi foe Gado jeje den man foe tjari den tesi na wan getrowfasi. Na sabi disi kan jepi wi foe wi no fadon ini den trapoe foe Satan, bikasi A gi wi fertrow dati wi toe ini na krakti foe Jehovah kan hori doro. Foe dat’hede na poti faja gi wi: „Teki joe fasi foe si tegen en, faste ini a bribi, foe di joe sabi dati densrefi sani foe pina, na mindri ala wi brada ini heri grontapoe a de pasa.” — 1 Petrus 5:9.
59, 60. Fa wi tesi kan gi wi moro foeroe winimarki?
59 Foe di Jehovah wani taki wi moesoe kan kisi jepi, wi kan loekoe na en foe kisi jepi nanga ala fertrow. Na na srefi ten ala san e miti wi foe di Gado e gi pasi foe a pasa, moesoe leki tranga jeri di abi foeroe warti, di e jepi wi foe gro kon tron heri, lepi kristen, di abi wan tranga bribi. Na apostel Petrus ben taki disi heri moi, foe di a ben taki:
„Ma baka di joe pina wan sjatoe ten, na Gado foe ala boenfasi di wi no e ferdini, di kari joe na en tégo glori na wanfasi nanga Kristus, sa kaba joe leri, a sa meki hoe tan hori doro, a sa meki joe tranga. En sa abi ala makti foe tégo. Amen.” — 1 Petrus 5:10, 11.
60 Soleki fa Jesus Kristus ben pina wan sjatoe ten na grontapoe èn baka dati a ben kisi bigi grani, den discipel foe Gado Manpikin e loekoe na fesi foe wan glorifasi paiman. Te na pina di Gado sa gi gi primisi foe a kon abra wi, e tranga wi foe hori faste na den bijbel markitiki, kon moro sakafasi, firi moro gi trawan èn sori moro sarihati leki discipel foe Gado Manpikin, dan na fasi disi foe tranga leri nanga kweki doe en wroko. Te wi wani dati moesoe de so dan wi moesoe fertrow krin krin tapoe wi hemel Tata, nanga na fertrow dati ala sani san ai gi permisi, te kaba foe kaba sa de foe wi tégo boen nanga kolokoe te wi e saka wi srefi nanga sakafasi na en ondro (Romeini 8:28). Nanga na prakseri foe na apostel Petrus wi kan hopo wi sten te wi e taki: ’Tangi foe Gado dati ai gi permisi dati wi e kweki nanga tesi èn ai jepi wi foe wi leki en foetoeboi di ai feni boen èn di abi na den fesi foe kisi tégo libi, tan hori doro nanga tranga”.
[Aksi foe a tori disi]
