Teki a joisti bosroiti
Kapitel 1
Teki a joisti bosroiti
1. Sortoe libi ben sa gi troetroe satisfaksi?
WAN libi di wani taki troetroe wan sani. Fa dati kan gi satisfaksi! Èn spesroetoe efoe dati abi ini en na pramisi foe wan seker nanga kolokoe ten di e kon. Wi kan teki wìsrefi so wan pasi foe libi? Boen réde de foe bribi dati disi kan.
2. Foe sanede a de tranga fanowdoe foe teki a joisti bosroiti tapoe a tori foe wi libi?
2 Ma a de fanodoe foe teki a bosroiti dati, sondro draidrai. Bikasi wan sani de so, dati a libiten foe wi de soso wantoe tin tron jari, èn na libi de nanga foeroe sani di no de seker. Soema kan reken a tapoe dati a sa abi foeroe jari foe proeberi fosi na wan fasi foe libi èn dan na tra fasi foe libi, ini na howpoe foe feni te foe kaba a moro boen fasi foe libi? Bosroiti di teki kan gersi leki den boen na a momenti. Ma omeni tron wi e jere sma e taki: „Efoe mi ben kan libi a libi foe mi ete wan tron baka?” A no disi wawan, ma réde de foe bribi, dati a ten e sjatoe gi a heri libisma famiri foe feni na joisti pasi èn foe teki joisti bosroiti.
SAN E JEPI WI FOE FENI A PASI
3. Soema kan ferteri wi fa wi libi kan taki troetroe wan sani èn foe sanede?
3 Na aksi de foe datede: Soema kan ferteri wi fa wi kan meki a libi foe wi wani taki troetroe wan sani. Soema kan sori wi wan pasi, di wi kan waka sondro foe abi bakaten spéti foe en, èn di e gi wi troetroe wan djaranti foe wan séker èn kolokoe ten di e kon? A no ben sa de wan logis sani dati a de a Mekiman foe a lbisma-famiri? A de seker dati a Mekiman foe wi sabi sortoe pasi foe libi de a moro boen wan gi wi. Èn a de tjari dati kon na krin ini en Wortoe di skrifi nanga santa jeje. Ma a no de dwengi wi foe waka baka a pasi dati. Na presi foe dati, a de kari na wan lobifasi sma foe ala ras foe teki wan koni bosroiti.
4. Fa na Mekiman ben gi sma tranga foe teki wan froestan bosroiti tapoe a libi foe den?
4 Hondro hondro jari pasa kaba a ben bigin foe gebroiki man nanga oema di e frede Gado èn di no e prakseri densrefi nomo foe kari sma kon. A de poti krakti tapoe a tranga fanowdoe kari foe en, foedi a de sorgoe sondro gridifasi gi ala sani di de fanowdoe foe a libi nanga jepi foe en eksempre. Gado abi troetroe belangstelling ini wi — ja, ini wi alamala — èn a de klari foe jepi wi. Disi e kon na krin nanga den wortoe foe Paulus di skrifi nanga santa jeje, wortoe di ben skrifi gi sma ini na owroe Athene:
„Na Gado di ben meki grontapoe nanga ala sani di de na ini, En di de Masra foe hemel nanga grontapoe, no e libi ini tempel di libisma anoe ben meki èn libisma anoe sosrefi toe no e sorgoe en, leki a ben abi wan sani fanowdoe, foedi ensrefi e gi libi nanga bro nanga ala sani. Èn a ben meki komoto foe wàn libisma ibri naatsi foe libisma. . . . sodati den ben sa soekoe Gado efoe den ben sa fasi en kande èn feni en troetroe, aladi a no de farawe foe ibriwan foe wi. Bikasi nanga jepi foe en wi abi na libi èn wi e bewégi wi èn wi de, soleki son wan foe den singiman na oen mindri ben taki: ’Bikasi wi de toe foe en famiri’”. — Tori foe den Apostel 17:24-28.
5, 6. Na fesi foe sortoe bosroiti a libisma famiri tanapoe?
5 Na fesi foe sortoe bosroiti wi alamala tanapoe leki a ”famiri” foe wi Mekiman? Den tra wortoe foe na lezing a sori tapoe disi:
„Foedi foe datede wi de a famiri foe Gado, dan wi no moe denki dati a persoon foe Gado gersi gowtoe ofoe solfroe ofoe ston, wan sani di meki nanga libisma koni nanga froestan. Gado foe taki leti ben loekoe pasa den ten sondro foe sabi noti, ma e taki gi den sma now dati den alamala èn alape moe abi berouw. Bikasi a ben poti wan dé di a abi na prakseri foe kroetoe na grontapoe pe libisma e libi ini regtvaardiki fasi nanga wan man di a ben poti, èn a ben gi ala sma wan djaranti, foedi a ben opo en baka foe dede!” (Tori foe den Apostel 17:29-31).
Akroederi nanga disi, wi kan taki dati soso toe bosroiti de foe teki: Den sma kan teki a bosroiti foe drai go na a Moro Héwan èn saka densrefi na ondro en wani, ofoe den kan bosroiti foe tan libi wan libi di e poti Gado nanga en wet foe wan kolokoe libi na wan sé. San a wani taki foe go na Gado?
6 Ini a fosi presi a wani taki foe erken na soema di nanga jepi foe en Gado „abi ini prakseri foe kroetoe na grontapoe pe libisma e libi ini regtvaardiki fasi”. Disi de en égi Manpikin, di ben abi na grontapoe na nen Jezus (Joh. 5:22, 27). Foe sanede en? Foedi a libisma-famiri, sondro foe stré dati a no de so, de ini katibo foe onvolmaaktifasi, sondoe nanga dede, èn Jezus de na langa froewakti Messias ofoe Kristus nanga jepi foe soema na Moro Héwan abi ini prakseri foe fri libisma-famiri foe a katibo dati. — Jesaja 53:7-12.
7. Fa Jezus Kristus de ini a tori te wan sma wani teki a moro boen pasi foe libi?
7 A bijbeltori e sori disi: Ini a lente foe 33 G.T. Jezus ben dede na a strafoe-postoe. A dede foe en ben sorgoe foe a fanowdoe ofrandi foe verzoen wi sondoe (1 Petrus 2:24; 1 Johannes 2:2). Fo-tenti dé, baka di a ben opobaka foe dede, a ben opo go na hemel foe pristeri drape a waarde foe en ofrandi na en Tata. Bigin foe a ten dati, libisma na ala presi ben moe leri dati kon fri foe sondoe nanga dede ben kan kisi wawan te wan sma teki Jezus leki a Verloesoeman di Gado ben poti. ”Ini nowan tra sma verloesoe de, bikasi ondro hemel nowan tra nen ben gi a mindri den libisma, di sa meki den kon fri” (Tori foe den Apostel 4:12). A pasi foe libi di wi angri foe kisi de na pasi di e tjari wi kon ini wan boen positie a fesi foe Gado leki foetoeboi foe en Manpikin, ja leki troetroe kristensma.
DEN WINIMARKI DI E KON FOE SO WAN LIBI
8. Foe sanede te wan sma taki dati a de wan kristensma, a no wani taki ete dati wan sma ben feni a moro boen pasi foe libi?
8 Hondro hondro miljoen sma ini disi ten e taki dati den de kristen. Disi wani taki dati den ben feni na moro boen pasi foe libi? Bikasi soso taki nanga mofo dati wan sma de wan kristensma, no de wan djaranti ete foe so wan libi. A troe dati Jezus ben taki dati foeroe sma ben sa kari en Masra, ma dati a ben sa taki gi den: „Mi no ben sabi oenoe noiti! Komoto na mi fesi, oenoe wrokoman foe kroektoedoe” (Matteus 7:23). Efoe wi taki dati wi de kristensma, dan wi e doe boen foe ondrosoekoe efoe troetroe wi de libi akroederi na eksempre nanga na leri foe Gado Manpikin. Disi e meki na aksi kon na fesi: San wi kan froewakti foe si foe a pasi foe libi foe wan troetroe kristen di e meki a de a moro boen pasi foe libi te leki now? Na piki tapoe na aksi disi de wan fundamenti foe kan sabi soifri sortoe groepoe na mindri den foeroe sma di taki dati den e bribi ini Jezus Kristus de teki a presi foe en troe gemeente.
9. Sortoe fasi e marki a troe kristen gemeente, èn fa a fasi disi e kon a fesi?
9 A Manpikin foe Gado ben taki: „Nanga disi ala sma sa sabi dati oenoe de mi discipel, efoe oen abi lobi a mindri makandra” (Johannes 13:35). A troe kristen gemeente moesoe foe de foe datede wan internationaal bradafasi, di de fri foe skotoe foe ras, nationaliteit, lo èn maatschappelek ofoe economia positie. Pe wi sa go na grontappe toe, wi sa man foe feni loyaal mati ini a bradafasi dati, sma di wi kan bow tapoe den, èn di wi kan froetrow wi goedoe na den anoe. Aladi den no sabi wi persoonlek, den sa sori moro bigi broko-ede nanga lobi gi wi leki foeroe foe wi égi famiri ben sa sori (Mark. 10:29, 30). Gi foeroe miljoen sma di taki den de kristen, a kan de wan sani di no de foe bribi, dati so wan internationaal bradafasi de. Ma foeroe doesoen kotoigi foe Jehovah kan kotoigi dati den ben ondrofeni troetroe brada lobi.
10. Fa a waka baka na eksempre foe Jezus Kristus e sorgoe dati wi kon ini wan boen matifasi nanga tra sma?
10 Soema no ben sa agri, dati a abi foe wan boen matifasi nanga famiri, birti nanga kompe-wrokoman e meki a kolokoe foe wi kon moro foeroe? Jezus Kristus ben libi èn leri akroederi a pasi foe lobi. A pasi disi e bow wan boen matifasi nanga trawan, bikasi ”lobi no e doe a naaste ogri” (Rom. 13:8-10). Èn sosrefi toe, te wi handri nanga trawan tapoe wan switi, sari-ati èn lobi fasi, dan wi e meki en makriki gi den foe sori den boen fasi disi na wi.
11. Fa den gronprakseri foe a bijbel e jepi wi foe no doe wisrefi ogri?
11 Bijbel gronprakseri kan kibri wi foe no doe wisrefi ogri. Foetroe, wi sa kan froewakti disi foe a moro boen pasi foe libi. Te wi e hori wisrefi na den moreel markitiki foe a bijbel, dan wi e kisi kibri foe den takroe firi nanga frede di e go makandra nanga a libimakandra foe man nanga oema di no abi pasi foe de nanga makandra (Spr. 5:3-11; Matt. 5:27, 28; Hebr. 13:4). A libi leki wan vroom discipel foe Jezus Kristus e gi wi a krakti di wi abi fanowdoe foe no gi wisrefi abra na njan èn dringi pasa marki, a ogri gebroiki foe drug, dobbel nanga tra ogrisani (Spr. 23:29, 30; Jesaja 65:11; 1 Kor. 6:9 te nanga 11; 2 Kor. 7:1). Moni di ben froemorsoe fositen na den sortoe gwenti disi, kan gebroiki foe doe wan sani gi tra sma, sodati wi e ondrofeni dati te wi gi nanga wi heri ati, dati e meki wi troetroe kolokoe (Tori foe den Apostel 20:35). A waka baka a rai foe a bijbel foe kibri wisrefi gi bita-ati nanga djaroesoe, e meki wi kisi foetroe wan moro betre gosontoe. — Psalm 37:1-5; Spreuken 14:30.
12. Aladi wi abi onvolmaakti fasi, fa wi kan tan abi wan krin konsensi?
12 A no de foe taki dati wi alamala wawan tron e misi foe handri so leki wi ben sa wani sote. Wi kan taki ofoe doe sani di e ati tra sma. A so tapoe wan fasi di e gi wi pen, a de tjari kon na wi froestan dati wi de onvolmaakti libisma. Ma te nanga sakafasi wi aksi Gado pardon, a sa jere wi tapoe na gron foe a dipi berouw di wi firi èn a bribi foe wi ini a verzoen krakti foe Jezus ofrandi (1 Johannes 2:1, 2). Foe datede meki wi kan hori wan krin konsensi. Wi no frede foe aksi Gado foe kisi jepi ini sortoe afersi toe, nanga na froetrow dati a sa jepi wi nanga en santa jeje foe kakafoetoe tapoe wan boen fasi gi den problema nanga tesi foe wi. — 1 Johannes 3:19-22.
13. San de na situwasi foe den sma di abi pikinso broko-ede nanga a Wortoe foe a Mekiman?
13 Ma fa a de nanga den sma di e bosroiti foe libi wan libi di e sori pikinso broko-ede gi a Wortoe foe a Mekiman? Den e tjari den problema nanga nowtoe den wawan. Boiti na mogelijkheid foe prisiri ini wantoe jari foe libi now, den no abi wan troetroe howpoe ini a ten di e kon. Te dede e kon krosibé, dan foeroe tron den abi frede gi wan strafoe foe a sé foe wan moro hé makti.
14. Na a kon foe san den troe discipel foe Jezus Kristus e loekoe nanga foeroe froewakti?
14 Fa a de tra fasi nanga troe discipel foe Jezus Kristus! Na presi foe dati, den e loekoe nanga foeroe froewakti na a ten foe a kon foe Jezus Kristus ini glori leki wan victori kownoe, di sa fri den poeroe foe ala kroektoedoe nanga kwinsi èn di sa meki en tirimakti go na ibri pisi foe a grontapoe (2 Thessalonika 1:6-10; Openbaring 19:11 te nanga 16; teki gersi Psalm 72:8). Ja, wan toemsi boen ten de a wi fesi e kon. San a tjari kon gi wi?
WAN TOEMSI BOEN HOWPOE FOE A TEN DI E KON
15, 16. Sortoe glori ten di e kon de e wakti getrouw discipel foe Gado?
15 A bijbel e gi a piki: „Njoen hemel nanga wan njoen grontapoe de, di wi e froewakti akroederi en pramisi, èn drape retidoe sa de” (2 Petrus 3:13). „Gado sa figi poeroe ala watra foe den ai, èn dede no sa de moro, no wan sari, no wan kré, no wan pen no sa de moro. Den fositen sani pasa kaba” (Openbaring 21:4). Srefi dede no kan tapoe na kon troe foe a ten dati di e kon, bikasi a Mekiman foe a libi kan opobaka den dedewan sosrefi toe. — Johannes 5:28, 29.
16 San na kon troe foe den pramisi foe Gado kan wani taki gi joe? Prakseri pikinso fa a sa de foe libi ondro na volmaakti tiri foe Jezus Kristus na mindri foe sma di e broko-ede troetroe nanga joe, di e poti den afersi foe joe a fesi di foe den, nanga ala prisiri. Te ala sma e gi jesi na a kownoe wet foena lobi, dan ogridoe, kroektoedoe nanga kwinsi no sa de moro. Joe no sa meki na froewakti foe joe nanga di foe trawan no kon troe. Djompo-ati foe onsekerfasi ofoe bigi gevaar ede, no sa de bekenti. Hebi-skin, légifasi nanga a firi foe de en wawan, di meki a libi gi miljoen miljoensma de lek wan bita sani, no sa de moro. Nowan sma no sa djeme moro foe pen. Watra-ai no sa lon moro foe sari ede. Srefi dede, di e meki wan kaba kon na den wroko foe wan sma ofoe di e hari lobiwan poeroe foe wan sma, no sa de moro. - Jesaja 25:6-8; 65:17.
17. Foe sanede den sma di no meki presi gi na Mekiman ini den libi, no e libi wan libi di abi troetroe waarde?
17 Teki gersi nanga san den sma abi, di aladi den no pori na moreel fasi, no e meki presi gi na Mekiman ini den libi. Den kan abi kande na grani nanga den goedoe na skinfasi di den loestoe èn den e feni wan pisi satisfaksi kande ini a jepi foe mofina wan èn njan prisiri foe koeltoeroe activiteit nanga boen prisiriten. Ma den moe erken, dati noti ini disi grontapoe de tan troetroe. Nowan sma de fri foe ongolokoe, siki nanga dede. Goedoe no kan kibri wi foe dati, èn sosrefi toe wi no kan teki den gwe nanga wi te wi dede (Psalm 49:6-20; Prediker 5:13-15; 8:8). Den boen-bedoel moeiti foe jepi tra sma, kan kon tron noti foe omstandigheden ede di no boen. Soboen nanga reti wi kan aksi: Omeni wan libi abi foe taki troetroe efoe a no e pristeri noti moro leki a grebi te foe kaba? Fa a kan de wan boen sani efoe a de troetroe kontra a tego ten di e kon foe wan sma? Teki gersi Prediker 1:11, 15, 18; 2:10, 11; 9:11, 12.
WAN TEN FOE TEKI WAN BOSROITI
18. (a) Foe sanede wi no moe draidrai foe teki na joisti bosroiti tapoe a tori foe wi libi? (b) Na sortoe fasi wi de ini a srefi positie leki na famiri-edeman Noach?
18 Spesroetoe foedi wan dé foe pai e kon, a de tranga fanowdoe dati sma alape teki wan pasi foe libi, di sa tjari boen pai kon, èn no wan takroe kroetoe. A de tranga fanowdoe foe teki wan foe den toe sé disi. Wi no sabi san na dé foe tamara sa tjari kon. Boiti dati, a ten e kon krosibé, dati Jezus Kristus sa meki en kownoe tirimakti go tapoe a heri grontapoe. A libisma-famiri de now ini a srefi positie leki a famiri-edeman Noach ini den dé bifo a froedoe di ben kon na heri grontapoe. A ben moe teki a mindri toe sani: (1) :teki na kroektoedoe pasi foe libi foe den sma foe en ten ofoe (2) saka ensrefi ondro a wani foe Gado. Kolokoe, dati Noach ben teki a joisti bosroiti. A ben bow wan ark èn ben go na ini nanga sebi trawan leki fa Gado ben sori. Den aiti memre disi foe a libisma-famiri ben pasa a froedoe libilibi, èn foe datede meki a libisma-famiri de te now ete. — 1 Petrus 3:20.
19. San 1 Petrus 3:21, 22 e sori foe verloesoe?
19 Na a srefi fasi wi moe tai wisrefi na Jehovah Gado leki discipel foe Jezus èn disi de leki wan foe den marki foe kisi tego libi. Soleki a dorosé foe na ark verloesoe no ben de, a so verloesoe no de gi wi a dorosé foe a seti foe Gado nanga jepi foe en Manpikin Jezus Kristus. Bakadi a ben taki foe na verloesoe foe den aiti soema ini na ark, na kristen apostel Petrus ben skrifi:
”Sosrefi toe now joe e kisi verloesoe nanga san e akroederi nanga disi, namkoe na dopoe (no a poeroe foe na doti foe na skin, ma na begi na Gado foe wan boen konsensi), nanga jepi foe na opobaka foe Jezus Kristus. A de na a reti anoe foe Gado, bikasi a ben go na hemel, èn èngel nanga makti nanga krakti ben poti na en ondro.” — 1 Petrus 3:21, 22.
20. San e sori dati a dopoe ini watra wawan no de nofo foe kisi tego libi?
20 A no de na dopoe ini watra wawan di e tjari verloesoe kon. Watra foe taki leti kan krin wi foe doti, ma a sani di e tjari verloesoe kon, „no de a poeroe foe na doti foe na skin” nanga jepi foe wan ceremonieel wasi foe a skin na dorosé. Loekoe pikinso dati Petrus ben taki dati verloesoe e kon „nanga jepi foe na opobaka foe Jezus Kristus.” A soema di kisi dopoe, moe erken foe datede dati tego libi kan kon wawan, foedi a Manpikin foe Gado ben dede wan dede leki wan ofrandi, ben opobaka na a di foe dri dé, èn te foe kaba ben poti na a reti anoe foe Gado. — Romeini 10:9, 10.
21. Fa wan soema e kisi wan boen konsensi?
21 Boiti dati, na apostel Petrus e poti krakti tapoe „na begi na Gado foe wan boen konsensi”. Foe kisi so wan boen konsensi, dan ala sma di wani dopoe, moe abi fosi berouw foe den fositen fowtoe fasi foe libi, poti bribi ini Gado seti foe tego libi, drai densrefi poeroe foe wan takroe waka, èn gi densrefi krinkrin abra ofoe tai densrefi foe doe Gado wani. A dopoe de wan marki na publiki foe na inisé bosroiti disi. Te na dopoe discipel now hori ensrefi na san Jehovah Gado e aksi foe en, dan a de kisi wan boen konsensi. Gado no sa kroetoe en. — Teki gersi Tori foe den Apostel 2:38-40; 3:19; 10:34-48.
22. Fa wi kan njan boen foe den toe brifi foe na apostel Petrus di skrifi nanga santa jeje?
22 O moro esi wan soema teki a toemsi boen pasi foe libi disi, o moro esi a sa bigin piki den froktoe. Efoe wantron wi ben teki na bosroiti foe libi akroederi Gado wani èn saka wisrefi ondro a dopoe ini watra, leki wan marki foe wi verbontoe ofoe gi wisrefi abra, dan wi abi foetroe na lostoe foe hori getrouw na a bosroiti dati. Ma san sa jepi wi foe tan waka na pasi foe libi disi? Fa wi kan kakafoetoe gi den krakti di sa kan meki dati wi lasi den disiten blesi nanga den blesi di e kon èn di tai makandra nanga a de foe wan troe discipel foe Gado Manpikin? Langaten pasa kaba, na apostel Petrus di ben abi Gado santa jeje ben gi boen piki tapoe den aksi disi. Den toe brifi foe en de a fundamenti foe san e kon na krin ini den boekoe disi. Wi de howpoe dati nanga na ondrosoekoe foe den brifi disi, wi sa kisi tranga foe brasa a moro boen pasi foe libi leki dienstknegti foe Gado èn foe tan njan prisiri moromoro foe a pasi foe libi disi.
[Aksi foe a tori disi]
[Prenki di e tapu heri bladzijde 4]
