Vreemdesma nanga wakaman nanga wan libifasi di de wan eksempre
Kapitel 7
Vreemdesma nanga wakaman nanga wan libifasi di de wan eksempre
1, 2. Fa sma e si vreemde sma foeroe tron, èn foe sanede?
WAN sma di e kon na fesi leki wan sma di kenki foeroe foe sma foe na gemeenschap pe a de libi, foeroe tron den e loekoe nanga wan takroe prakseri. En libifasi sma e loekoe moro krosibé leki di foe sma di e tan ini na kontren dati. Na wan sari sani, dati son sma e kroetoe a fesi wan heri ras, wan heri naatsi ofoe wan heri lo, bikasi wán dorosésma ini den birti no ben waka èn libi boen. Den regering srefi e meki wet, order, di abi te make nanga soso vreemdesma. Efoe na waka nanga libi foe wan dorosésma e si leki wan sani di den no wani, dan den kan poeroe en ini na kondre.
2 Foe sainde ala den sani disi de so prenspari gi kristensma? Fa a moe abi krakti tapoe den libi?
3. (a) Foe sanede meki troe kristen de „dorosésma” ini disi grontapoe? (b) Fa sma di no e bribi e si den, èn foe sanede?
3 Troe kristen de ini disi grontapoe „vreemdesma nanga wakaman”, bikasi den e loekoe na den fesi foe na kon foe wan tanpresi di sa tan, èn di de wan pisi foe Gado „njoen hemel nanga wan njoen grontapoe” (1 Petrus 2:11; 2 Petrus 3:13). Foedi troe discipel foe Jezus Kristus e proberi foe denki èn handel akroederi nanga den Santa Boekoe, dan sma di no e bribi ofoe sma di soso e taki dati den e libi leki kristen, sa loekoe den kande leki den de „vreemdesma” di den no wani. Ma wan kristen no abi foe sjen, foedi na grontapoe e denki so foe en. Te joe loekoe en foe na sé foe Gado, dan na presi foe en leki vreemdesma de wan warti presi. Wan kristen foe datede sa wani doe ala en moeiti foe tjari ensrefi so dati a no e gi nowan sma wan boen rede foe kosi en.
4, 5. (a) Foe sainde na apostel Petrus ben kan taki ini na fosi eeuw G.T. foe kristensma leki „wakaman di ben panja”? (b) Fa Jehovah ben si den?
4 Di na apostel Petrus ben skrifi na kompe-bribiman, a ben poti prakseri tapoe na grani positie foe den leki „vreemdesma nanga waka-man”. Na a bigin foe en fosi brifi wi e lési:
„Petrus, wan apostel foe Jezus Kristus na den wakaman di panja ini Pontus, Galatië, Kapadócië, Asia nanga Bithynië, teki poeroe na tra sma mindri akroederi na sabi foe Gado, na Tata, nanga santafasi nanga jepi foe na jeje, sodati den e gi jesi èn kon foktoe nanga na broedoe foe Jezus Kristus.” — 1 Petrus 1:1, 2.
5 Ini na ten dati ini na fosi eeuw G.T. den bribisma ben panja alape èn den ben de na mindri foe wan bigi ipi foe sma di no ben de kristensma. Foeroetron tra sma ben wiswasi den tapoe onregtvaardiki fasi. Foe datede, a ben moe de wan sani di ben gi den dekati foe lési èn jere fa Jehovah ben si den, soleki Petrus ben tjari kon na krin ini en brifi. Den ben de troetroe „Den sma foe Gado di ben teki poeroe na tra sma mindri”. Na Moro Héwan ben teki den leki en goedoe, en pipel. Langaten bifosi na kristen gemeente foe djoe nanga no-djoe ben doe kon, na Almaktiwan ben sabi a fesi dati wan dé so wan groepoe foe en dienstknekti ben sa de, èn di ben sa libi panja-panja ini difrenti pisi foe grontapoe. Nanga jepi foe na wroko foe Gado jeje den sma disi ben kon santa ofoe ben poti aparti foe wan santa marki. Jehovah ben boemoei nanga den, sodati den ben sa de en pikin di e gi jesi èn di ben sa doe en wani. Na sabi dati na Universele Soeverein ben gebroiki den na so fasi, ben moe seki den ati dipi èn ben moe bewégi den foe ben wani libi akroederi na boen marki di Gado ben abi na prakseri nanga den.
6. (a) Fa kristensma ben kisi wan krin positie na fesi foe Gado? (b) San na „foktoe foe den nanga broedoe foe Jezus Kristus” kan wani taki?
6 A no de foe taki, dati den bribisma no ben tron wan sma di Gado ben teki poeroe na tra sma mindri tapoe na gron foe den égi verdienste foe de wan santa pipel. Leki aparti sma den ben de sondari èn den ben moe kon krin. Foe datede meki na apostel Petrus e taki foe na „foktoe foe den nanga na broedoe foe Jezus Kristus”. Disi e memre wi na a fasi fa wan Israëlsma moe kon krin di na ceremonieel fasi no ben krin, foedi foe eksempre a ben fasi na dedeskin foe wan sma. Foe ben kon krin baka, so wan sma ben moe foktoe nanga watra di moe meki a kon krin (Numeri 19:1-22). Tapoe a srefi fasi den winimarki foe Kristus ofrandi ben tjari kon tapoe kristensma, sodati den ben kan abi wan krin konsensi na fesi foe Gado èn nanga fri foe taki den ben kan kon na en ini begi (Hebr. 9:13, 14; 10:19-22). Boiti dati, Mozes foktoe na pipel nanga na broedoe foe ofrandi-meti di den Israëlsma ben teki poti ini wan froebontoe nanga Jehovah (Exodus 24:3-8). Foe datede meki den wortoe foe na „foktoe nanga na broedoe foe Jezus Kristus” kan poti prakseri sosrefi toe tapoe disi dati den bribisma ben teki poti ini wan njoen froebontoe, di ben de na mindriman foe en èn di en broedoe di ben fadon ben meki kisi krakti èn dati den e teki prati now ini den winimarki foe na froebontoe dati.
7. San na presi foe wi leki „vreemdesma” e aksi?
7 Soleki den bribisma ini na fosi eeuw G.T., na so toe den toegewijde discipel foe Jezus Kristus ini disi ten e teki wan grani positie na fesi foe Jehovah Gado. Den moe tjari densrefi leki wan eksempre ini disi grontapoe leki „wakaman èn vreemdesma”. Noso den e tjari sjen kon tapoe Jehovah Gado nanga na gemeente foe en pipel. Ala sma, foe datede moe teki na vermane foe na apostel Petrus na ati: „Lobiwan, mi e vermane oenoe, leki vreemdesma nanga wakaman, foe tan hori oensrefi farawe foe skin lostoe, di de stré nanga oen sili.” — 1 Petrus 2:11.
8. Na sortoe sani wi no moe tai wisrefi tranga, èn foe sanede?
8 Foedi wi de „vreemdesma nanga wakaman” ini na seti foe sani di sa gwe, dan wi no kan gi wisrefi pasi foe hori wisrefi tranga na den sani di de foe na disiten libisma ordening. Nowan grontapoe banti, sorgoe, prisiri ofoe goedoe de foe alaten. Ten nanga sani di joe no kan si na fesi e kisi ala sma èn kan kenki wantronwantron èn so bigi na libi-omstandigheden foe wan sma (Prediker 9:11). Foe datede a de troetroe wan froestan sani foe poti prakseri tapoe na rai foe na apostel Paulus: „Meki den di abi wan oema, de leki di no abi, èn meki den di e kré, de leki den no e kré, èn den di e prisiri, de leki den no e prisiri, èn di e bai, leki den no abi, èn den di e meki gebroiki foe na grontapoe, leki den no e meki krinkrin gebroiki foe na grontapoe; bikasi na toneel foe disi grontapoe de bezig e kenki” (1 Korinte 7:29-31). Efoe wi ben sa go krinkrin ini den sorgoe nanga prisiri di de na bakapisi foe omstandigheden nanga libisma demakandra di e kenki dorodoro, dan disi ben sa de wan gensi foe kon ini wan moro krosibé matifasi nanga na Moro Héwan èn en Manpikin, sodati wi ben kan doe wisrefi boen foeroe ogri.
9, 10. (a) San de na rede foe na fasi fa grontapoesma e denki foe goedoe? (b) Foe sainde wi moe abi wan tra loekoe tapoe goedoe leki sma di no e bribi?
9 Na situwasi pe na moro bigi ipi sma de na ini, e sori krin foe sanede wi no moe proberi „foe meki gebroiki krinkrin foe na grontapo”. Den sma ini algemeen òfoe no sabi Gado pramisi foe „njoen hemel nanga wan njoen grontapoe” ofoe den no e bribi troetroe ini so wan regtvaardiki njoen ordening di e kon. Foe datede den kan poti densrefi soso tapoe na disten libi. Den no abi wan boenboen howpoe foe na ten di e kon. Foe datede meki den e denki pikinmoro na soso den aladé fanowdoe foe den, èn den e feti nomo foe kisi so meni leki a kan foe na grontapoe (Matteus 6:31, 32). Den ai e koti faja na a froewakti foe kisi moi krosi, brenki diri moi ston, diri gowtoe sani, moi meubel ofoe wan prapati oso. Kande den e howpoe èn e proberi f oe meki indruk tapoe tra sma nanga jepi foe den goedoe na skinfasi. — 1 Johannes 2:15-17.
10 Wan kristen na a tra sé e erken dati wan tego ten e kon di didon na en fesi. A ben sa de wan don sani e a ben sa go so meni ini den afersi foe na libi, dati pikinmoro a no abi ten gi na Mekiman di na ten di e kon anga foe en. Disi no wani taki dati troe dienstknekti foe Gado no kan prisiri densrefi na wan fasi di fiti ini den foeroe moi sani di wan sma kan bai nanga moni. Ma srefi gosontoe prisiri nanga boen goedoe na skinfasi no moe de noiti na moro prenspari sani ini wi libi, ja no, efoe wi e si wisrefi troetroe leki „wakaman” ini a disten seti foe sani. Wi no e fermorsoe ofoe pori den sani di wi abi, ma wi e si den nanga reti , soleki betrouwbaar sma e si wan oso nanga meubel di den joeroe, ofoe wrokosani di den leni, tra sani di kande den abi fanowdoe. Den sortoe sma disi e sorgoe boen gi den sani disi, ma den no e tai densrefi na den leki a de na goedoe di sa tan foe den. Ini na libi foe wi moe kon na krin dati wi e erken dati noti foe na disten seti sa tan èn dati wi de soso „vreemdesma” nanga „wakaman”, di de na pasi foe go na a njoen pramisi ordening foe Gado.
’TAN FARAWE FOE SKIN LOSTOE’
11. San de den skin lostoe di wi moe tan farawe foe den?
11 Ma te wi wani na libipasi foe wi waka boen, dan a no de nofo foe froestan dati wi libi-omstandigheden tapoe na tori foe wi disten libi ini na grontapoe disi anga foe kenki di wi no kan si na fesi. Wi moe poti boen prakseri toe tapoe na bijbel vermane „foe tan farawe foe skin lostoe”. Disi de den fowtoe lostoe ini den memre foe wi skin. Na brifi foe na apostel Paulus gi den sma foe Galacia e tjari kon na krin sortoe sondoe den fowtoe lostoe disi e kari kon. Baka di a sori dati wan sma di e meki Gado jeje tjari „no e doe kwetkweti skin-lostoe”, dan a de kari den wroko foe na skin — „hoeroedoe, dotilibi, wan loesoefasi foe libi èn waka, afkodré, ogri jeje wroko, fejantifasi, stré, djaroesoe, atibron, trobi, pratifasi, sekte, bigi-aifasi, droengoe, njan èn dringi pasa marki, nanga den sortoe sani disi”. — Galacia 5:16, 19-21.
12, 13. (a) Na sortoe fasi skin lostoe e „stré nanga wi sili”? (b) San wi moe doe foe hori wan krin positie na fesi foe Gado?
12 Leki wan bakapisi foe sondoe di wi ben kisi, wi e de alaten ondro na tranga druk foe go ini den wroko foe na skin èn „go doe skin lostoe”. Den ogri lostoe disi de leki wan legre di e fadon kon na inisé èn di e proberi foe kisi makti tapoe wi heri sili, na heri persoon, foe bewégi èn foe gi ensrefi abra na den sondoe skinlostoe. Na kristen apostel ben sabi heri boen na stré di ben kan kon ini wan sma. Foe ensrefi a skrifi: „Mi sabi dati ini mi, dati wani taki ini A skin, no wan boen e libi; bikasi na makti foe winsi, de ini mi, ma no a makti foe doe san boen. Bikasi na boen di mi wani, mi no e doe, ma na ogri di mi no wani, dati mi e doe” (Romeini 7:18, 19). Na stré disi e meki en gi Paulus fanowdoe foe „de tranga gi en skin èn foe tjari en leki wan srafoe, foe no trowe tapoe wan ofoe tra fasi, baka te a préki gi tra sma”. — 1 Kor. 9:27.
13 Na a srefi fasi na lostoe foe wi foe hori wan krin positie na fesi foe Gado èn foe kisi en blesi, sa poesoe wi foe doe krakti moeiti foe dwengi wi lostoe. Foe sanede wi sa meki wan hebi stré kon moro hebi nanga jepi foe ontspanning, boekoe foe lési, demakandra nanga omstandigheden di e wiki èn gi njanjan soso na den sondoe firi foe wi? San de moro prenspari ete, wi moe doe positief stap foe kibri wisrefi. A boen foe hori ini prakseri dati wi no kan doe disi ini égi krakti, ma nanga na dekati foe wi toegewijde brada èn na jepi foe Gado jeje di wi abi fanowdoe. Na apostel Paulus e gi Timoteus tranga: „Feti baka regtvaardiki fasi, bribi, lobi, vréde, makandra nanga den di e kari Masra foe wan krin ati” (2 Tim. 2:22). Efoe wi e doe dati, dan wi kan foe tapoe dati ogri lostoe teki wi abra, ma nanga jepi foe na santa jeje. Te na a fasi disi wi e kaka foetoe gi skin lostoe foe hori wi prakseri tapoe den sani di de troe, regtvaardiki, krin, lobisani, boen sani èn san di de foe prijse, dan Gado no sa trowe wi (Fil. 4:8, 9). Baka te wi ben jepi trawan foe abi winimarki, dan wi srefi no sa tron sma pe sani no waka boen gi den.
WAN TOEMSI MOI WAKA NANGA LIBI KAN JEPI TRAWAN FOE TEKI NA TROE ANBEGI
14. Fa a kan tjari winimarki gi tra sma te den e si taki wi e hori wisrefi farawe foe skin lostoe?
14 Foe hori „oensrefi farawe foe skin lostoe”, e tjari ete wan winimarki kon. Na apostel Petrus skrifi: „Hori wan toemsi moi waka nanga libi na mindri den naatsi, sodati, ini den sani di den e taki ogri foe oenoe leki ogrisma, leki wan bakapisi foe oen toemsi moi wroko, di den de ai-kotoigi foe en, den kan gi Gado grani tapoe en ondrosoekoe-dé.” — 1 Petrus 2:12.
15. Fa sma ben prakseri fowtoe foe kristensma ini na fosi eeuw G.T.?
15 Ini na fosi eeuw, kristensma foeroetron ben de sma di den ben froestan verkeerti èn di den ben taki de „ogrisma”. Kragi leki disi de leki wan marki: „Den sma disi e tjari wi foto kon krinkrin ini djoegoedjoegoe . . . èn den e leri gwenti di wi no kan teki, foedi wi de Romeinsma” (Tori foe den Apostel 16:20, 21). „Den sma disi drai grontapoe foe ondro kon na tapoe.” „Den e handri kontrari den wet foe caesar foe taki dati wan tra kownoe de, Jezus” (Tori foe den Apostel 24:5). Lési san prenspari man djoe ini Rome taigi Paulus ini Hand. 28:22.
16. (a) Fa wan troe kristen kan krin ensrefi a moro betre fasi tegen wan kroektoe fasi foe sori sani fa den de? (b) Fa disi kan jepi soema di e gensi?
16 A moro betre fasi foe krin joesrefi foe so wan kroektoe fasi foe sori sani foe wan sma, de ini wan toemsi boen libifasi. Te kristensoema e sori taki den de sma foe a kondre di e tjari densrefi so leki a fiti, e pai den lantimoni na wan getrowfasi, e sori foe wani doe boen wroko, e doe den wroko nanga faja, dati den hati krin èn den e sori opregti belangstelling foe a boen foe libisoema leki den, dan den kragi di tjari tegen den a sa kon krin taki den de falsi (Titus 2:2 teleki 3:2). Srefi den soema di e taki falsi gongosataki foe kristensoema, na so wan fasi den kan si o kroektoe den fasi foe doe de èn a kan boewégi den foe teki a troe anbegi. Te dan a ten foe Gado kroetoe doro, a kan de taki den gongosasoema dati, di ben de dati fosten kan kon de mindri den soema di e grani èn prijse na Moro Héwan.
17. Foe san wi moesoe prakseri tranga, foe di wan boen fasi foe tjari wisrefi e wroko heri boen tapoe soema di e loekoe?
17 Dati a de so taki a retifasi foe libi foe wan kristen kan de so wan bigi krakti di e tjari boen, moesoe troesoe wi foe prakseri tranga fa wi e doe nanga trawan èn o meni belangstelling wi e sori gi libisoema leki wi. Wi no wani sroto wi ai sref’srefi gi den fanowdoe foe libisoema leki wisrefi ini wi birti. Ai taki foe ensrefi dati wi no de nomo birti di abi switifasi, di lobi jepi èn di sabi maniri. A de wan pisi foe wi kristen libipasi. Jesus Kristus ben gi wan fermane ini en Bergitaki: „Ala sani san joe wani trawan doe gi joe, joe moesoe doe gi den sosrefi toe” (Mattheüs 7:12). Na Santa Boekoe e gi wi dek’ati foe: „Soboen, meki foe datede, solanga leki di a ten boen gi wi ete, doe boen gi ala sma, ma spesroetoe gi den di abi a srefi bribi leki wi” (Galaciasoema 6:10). „De efoe a kan, efoe a de na joe sé, wan soema di lobi abi fréde nanga ala soema” (Romeini 12:18). „Meki alaten moeiti foe doe san de boen, gi makandra nanga ala tra soema.” — 1 Thessalonicenzen 5:15.
18, 19. Soleki 1 Petrus 3:8 taki, dan fa wi prakseri nanga doe leki kristensma moesoe de?
18 Foe de wan kristen soleki fa a de sori wani taki moro foeroe leki kon makandra nanga soema foe a srefi bribi èn foe prati a bijbel troe tori nanga trawan, sani di wan-froe-wan de prenspari troe troe (Mattheüs 28:19, 20; Hebreër 10:24, 25). Wi abi na plekti foe waka na baka foe a Manpikin foe Gado ini wi prakseri nanga wi doe èn foe proberi foe abi a srefi fasi foe en. Na apostel Petrus ben skrifi: „Now dan, oenoe alamala de wan foe prakseri, sori firi gi trawan, abi bradafasi lobi, abi lobifasi sarihati, sakafasi na hati” (1 Petrus 3:8, a njoen Eng. uitgave van 1971). Foe kan de „wan na ini prakseri”, wi moesoe „tai kon krosibé makandra ini a srefi jeje nanga a srefi fasi foe prakseri” (1 Korinthiërs 1:10). Fornamkoe ini wi prakseri wi moesoe waka na Jesus Kristus baka, di ben sori en lobi na so wan fasi dati a gi en libi gi wi (Johannes 13:34, 35; 15:12, 13). Nanga aladi den troe discipel foe Jesus Kristus de „wan na ini prakseri”, soleki fa wi kan si na den lobi èn grontapoe wanfasi, wi srefi moesoe aksi wisrefi: „Mi troe troe e jepi taki a jeje foe wanfasi nanga lobi de? Fa, èn o meni?”
19 Efoe wi lobi wi jeje brada troe troe, wi sa sori switi fasi èn wi sa gi pardon. Efoe wan problema takimakandra kaba èn soema kroederi kaba foe a loesoe foe en, wi no sa abi bita hati noso koti pasi espresi doro doro, gi son memre foe a kristen gemeente di kande ben jepi meki a problema ben kon foe de. Foe kroederi nanga a rai foe Petrus wi moesoe loekoe boen dati wi no kon tron so sondro firi, tranga nanga hémemre soleki fa a gwenti de ini grontapoe. Tra soema moesoe kan si taki wi abi „firi gi” trawan di e pina, dati wi abi lobi ofoe matifasi lobi nanga wi heri hati gi wi jeje brada, dati wi abi „lobi fasi sari hati” ofoe wi abi a firi foe sori sari hati èn dati wi no e prakseri foeroe foe wisrefi, ma wi de „sakafasi”, lobi foe dini trawan. — Agersi Mattheüs 18:21-35; 1 Thessalonicenzen 2:7-12; 5:14.
20. San a teki foe a rai ini 1 Petrus 3:9 e aksi foe wi?
20 Morofara wi no moesoe meki wi sori foe wi firi, sari hati nanga switifasi no tan wawan gi wi brada nanga sisa foe a srefi bribi (Lukas 6:27-36). Na apostel Petrus ben gi kristen moro fara a rai: „No pai ogri baka nanga ogri ofoe koti odo nanga koti odo, ma, presi foe dati, gi wan ségi” (1 Petrus 3:9). Disi no wani taki dati soema di e doe wi ogri èn e pori wi nen, wi sa prijse den noso lai den abra nanga lobifasi. Ma wi sa meki foeroe boen kon psa marki, sa abi a moro bigi, fréde foe jeje èn de moro kolokoe, te wi e tan handri den nanga switifasi èn nanga froestan nanga na howpoe dati den sa kenki densrefi èn so toe sa kisi Gado ségi.
Foe sanede wi no moesoe doe baka soleki fa den doe wi
21. Fa Jehovah eksempre kan jepi wi foe no doe ogri baka nanga den di doe ogri nanga wi?
21 Dati Jehovah Gado nanga jepi foe a ofrandi foe Jesus ben gi wi sondoe pardon, moesoe troesoe wi foe handri wi féjanti nanga switifasi èn nanga firi gi den. Jesus Kristus ben taki: „Efoe oenoe no e gi den soema pardon foe den sondoe di den doe, so joe Tata no sa gi joe pardon foe joe sondoe di joe ben doe” (Mattheüs 6:15). Efoe wi sa kisi ségi foe Gado di e tan, de kon foe a wani di wi wani foe gi trawan ségi. Jehovah Gado e gi pasi, dati soema e handri sondro switifasi nanga wi. Wan foe den gron de, foe di wi abi na okasi foe sori taki wi e gi trawan pardon èn taki wi e sori sari hati gi trawan leki wisrefi. Na apostel Petrus ben meki a prakseri disi kon na fesi di a ben taki moro fara: „Bikasi na foe a pasi disi [den soema di e ségi den di e doe den ogri] oenoe ben kisi kari, sodati oenoe ben kan kisi wan ségi” (1 Petrus 3:9). Disi no moesoe meki wi kisi na prakseri dati wi Hemel Tata wani taki tra soema doe wi ogri. A no e tapoe en dati wi e kisi problema foe sondoe soema di e libi ini wan sondoe grontapoe. Èn nanga dati wi kan sori efoe troe troe wi wani de leki fa en de — switifasi, sori firi gi trawan èn gi trawan pardon.
22. Sortoe dek’ati Psalm 34:12-16 e gi foe koti pasi gi wan jeje foe bita hati?
22 Petrus e go moro fara nanga a dek’ati di ai gi foe no nanga wortoe no nanga doe foe pai ogri baka nanga ogri. Foe disi ai teki den wortoe foe Psalm 34:12-16 èn ai skrifi:
„Bika ’a sma di wani lobi a libi èn wani si boen dé, moesoe hori en tongo foe san ogri èn en mofoboeba foe taki bedrigi tori, ma meki a drai kmoto foe san ogri èn doe san boen; meki a soekoe fréde èn waka na en baka. Bikasi den ai foe Jehovah de tapoe den soema di e doe sani nanga leti èn en jesi de foe jere den tranga begi; ma a fesi foe Jehovah de tegen den soema di e doe ogri sani.’” — 1 Petrus 3:10-12.
23, 24. (a) San a wani taki gi wi foe ’lobi a libi’ ’èn wani foe si boen dé’? (b) Fa a de wan wini gi wi efoe wi e sori taki wi lobi libi?
23 Den wortoe disi foe Petrus e sori tranga taki wi moesoe handri ala soema nanga switi fasi, ja, dati disi de troe troe na wan enkri joisti libifasi. Wan soema di ’lobi libi’, e warderi en leki wan gave foe Gado, èn wani si „boen dé” — dé te a abi na firi taki en libi abi warti èn abi wan marki — e sori disi foe di ai jepi meki tra libisoema leki ensrefi e kisi kolokoe. Ai hori en tongo foe di a no e brokosaka trawan, pori den nen noso bedrigi den. Ai abi a winsi foe wai pasi gi ala sani di de kroektoe èn doe den sani di de boen na Gado ai. Foe di ai soekoe fréde èn ai meki moeiti foe abi en, a no sa hatibron gaw noso lobi foe feti, ma a sa doe foeroe moeiti foe meki boen fasi de nanga trawan èn mindri trawan. — Romeini 14:19.
24 A sma de sori en lobi foe libi, foe di ai jepi trawan foe kisi kolokoe nanga fréde, e meki en srefi tron wan kompe di a switi foe de nanga en. Trawan sa sori taki nanga den wortoe nanga den fasi foe doe taki den e si wan soema na ini en di den abi fanowdoe èn di den e warderi. En libi foe dat’ede noiti sa de légi ofoe sondro waarde. —Odo 11:17, 25.
25.
25 Nanga aladi kande en boenfasi no e kisi warderi alaten, a kan de seker foe Gado Jehovah lobifasi sorgoe. Foe di den ai foe na Moro Héwan e loekoe èn hori wakti èn en jesi alaten de foe jere den tranga begi, a sabi joisti san den abi fanowdoe èn a kan doe hesi foe jepi den. Troe troe a sa sorgoe taki den ’si boen dé’, bikasi a gadofasi gi densrefi di den e sori, abi „wan pramisi na ini foe a libi di moesoe kon èn a libi di de now” (1 Timotheüs 4:8). Den soema di e doe san ogri — di no e jepi meki trawan kisi fréde nanga kolokoe — no kan ferwakti Gado feni den boen. Gado „fesi” drai tegen den sortoe soema dati èn a sa kroetoe den, bikasi noti e pasa en prakseri.
WAN FASI FOE DOE DI E GI PAIMAN
26. Soleki den wortoe foe Petrus de, soema ben sa wani si troe troe taki wi drai go baka na den pori doe foe a grontapoe disi?
26 Foe di wi alaten sa hori den winimarki na ini prakseri di wan heri boen fasi foe tjari wisrefi e gi, wi sa kisi jepi foe kaka foetoe gi a kwinsi foe gi wisrefi abra na den lagi doti fasi foe doe foe a grontapoe disi. Na apostel Petrus e gi wi foe na afersi disi wan krakti dek’ati. Ai taki:
„A nofo taki ini a ten di pasa joe ben doe a wani foe den naatsi, di joe ben gi joesrefi abra na doe foe jajolibi, prisiri, hebi dringi foe win, fermorsoe, sopi-oso nanga afkodré. Foe di joe no e waka moro langa nanga den tapoe na pasi disi foe go na a srefi lagi peti foe jajolibi, den e loekoe ferwondroe èn den e go doro foe taki skempifasi foe joe. Ma den soema disi sa gi frantwortoe na en di tanapoe klar’klari foe kroetoe den libiwan nanga den dedewan. Foe taki leti, nanga a marki disi a boen njoensoe ben préki gi den dedewan, sodati foe loekoe foe libisoema sé den ben kan kisi kroetoe na skinfasi, ma foe Gado sé den ben sa kan libi ini jeje.” — 1 Petrus 4:3-6.
27. Foe sanede wi noiti moesoe wani drai go baka na den pori fasi foe a grontapoe?
27 A seker de nofo dati wan kristen kande ini a ten di pasa ben gi ten na en sondoe lostoe nanga lobi den toemsi foe prisi den, di a no ben sabi Gado wani nanga san a ben seti na fesi ete. A foe dat’ede noiti a moesoe wani foe drai go baka na wan libi di foeroe nanga jajolibi nanga mankeri foe moreel dwengi ensrefi. Wi noiti wani frigiti o légi èn sondro waarde wan libi foe soso prisiri de èn sortoe sjen e go makandra nanga en (Romeini 6:21). Lagi, prisiri broskin na wan fasi di no fiti, morsoe dansi nanga wilder pokoe di e opo joe lostoe na seks sé — sani di de so popu ini grontapoe — no moesoe hari wi, ma moesoe troesoe wi gowe. Nanga aladi a no koemakriki kande dati owroe mati e skempi wi foe di wi e tan fara foe den sortoe sani dati, wi no sa wini noti te wi e go doe nanga den wilder party nanga den jajolibi. Presi foe dati wi abi foeroe foe lasi te wi e prakseri leki a grontapoe disi. Ala soema di e doe san takroe moesoe gi frantwortoe foe den doe foe den na fesi foe Jesus Kristus, di Jehovah ben poti leki kroetoebakra foe den libiwan nanga den dedewan (2 Timotheüs 4:1). Foe di a kroetoe disi de seker, a „boen njoensoe” ben taki gi den „dedewan”, dati wani taki, gi den jeje dedewan, di ben moesoe sori sari hati, ben moesoe drai den libi foe Gado sé den ben moesoe kon na libi foe di den wini foe Kristus ofrandi di e krin ben moesoe kan wroko tapoe den.
28. (a) Foe sanede kristen „foe libisoema sé ben sa kan kisi kroetoe na skinfasi”? (b) Foe sanede so wan kroetoe no moesoe broeja wi?
28 Den soema di abi troe troe sari hati, den ini Gado ai troe troe foe bigi waarde, èn a wani taki den libi foe tégo èn de kolokoe. Den soema foe a grontapoe disi no e erken taki troe kristensoema de na ini wan boen fasi nanga na Mekiman. Den grontapoe soema disi e si Kristus discipel na a srefi fasi leki fa den e si tra soema èn den e kroetoe den „na skinfasi”, na a dorosé skijn. Dati den e kroetoe wi kroektoe, no moesoe meki wi firi broeja. San e teri troe troe, de efoe Jehovah Gado feni dati wi e libi „na a jeje”, dati wani taki efoe wi e libi wan jeje libi. Disi sa de so efoe wi e tan libi foe akroederi nanga den wet foe a Moro Héwan.
29. Sortoe boen gron wi abi foe kibri wan heri boen fasi foe tjari wisrefi?
29 Foe troe wi abi boen gron leki „frémde soema nanga soema di e libi dja wan pisiten nomo” foe wi kibri wan heri boen fasi foe tjari wisrefi ini a seti foe sani foe a ten disi. Na Moro Héwan e komanderi dati. En égi eksempre, a switi fasi nanga na sari hatifasi fa ai doe nanga wi, e gi wi a plekti foe te wi e makandra nanga trawan wi sori taki wi e prakseri den, e firi gi den èn e gi den pardon. A fasi fa wi e tjari wisrefi di de foe kisi gafa e trowe wan boen leti tapoe wi Gado èn kan jepi trawan foe tron foetoeboi foe en. Soso nanga te wi kibri wan heri boen fasi foe tjari wisrefi, wi sa tan abi Jehovah ségi èn te kaba foe kaba wi sa kisi tégo libi ini wan tanpresi di e tan. No wan enkri tra fasi foe libi de now kaba so foeroe nanga winimarki èn e pramisi so wan heri moi ten di de na wi fesi.
[Aksi foe a tori disi]
