Wan dekati jepi foe hori na a bosroiti foe wi
Kapitel 2
Wan dekati jepi foe hori na a bosroiti foe wi
1, 2. (a) Fa Jezus ben sori dati a de prenspari foe hori na a bosroiti foe wi foe dini Gado? (b) Foe sanede meki a de wan don sani foe trowe a rai foe Jezus?
„NOWAN sma di ben poti en anoe na a ploegoe, èn e loekoe na den sani di de na en baka, de boen nofo gi na kownoekondre foe Gado” (Lukas 9:62). Foe kan ploegoe boen èn kan meki letopoe gotro, wan sma di e ploegoe moe hori en ai fasti tapoe wan punt na a tra sé foe a gron. Fa a de moro prenspari foe hori wi ai tapoe a marki foe libi foe wi! Dan den toemsi diri dé nanga jari foe wi libi sa de wan patron di e akroederi nanga na marki di wi e feti na en baka.
2 Foe den wortoe di taki dja na tapoe foe a Manpikin foe Gado e kon na krin, dati, te wi ben tai wisrefi wantron foe dini wi Mekiman, wi moe hori fasti na a bosroiti dati, winsi san e pasa. Na grontapoe kan pristeri wi wan sani di e loekoe moro moi — a feti baka prisiri, de populair ofoe goedoe na skinfasi. Ma efoe wi ben sa loekoe baka na den sani disi nanga tranga lostoe — ofoe, moro ogri srefi, efoe wi meki den de na koko foe wi libi — dan disi ben sa wani taki, dati wi ben sa lasi na prijs di wi e feti na en baka. A ben sa kan meki dati wi froemorsoe wi libi.
3. San de wan fundament goal foe wi bribi?
3 „Bakaten, moro boen na kaba foe wan afersi de leki a bigin foe en” so tanapoe ini Prediker 7:8. Soboen, aladi a bigin foe waka na pasi di wi ben teki de prenspari, a de na kabapisi di o teri troetroe. Foe dat-ede meki Gado Wortoe e poti someni krakti a tapoe dati wi moe tan getrouw te na a kaba (Matteus 24:13). A bribi foe wi abi wan fundament prakseri ofoe goal, namkoe na kisi foe verloesoe ofoe tego libi. — 1 Petrus 1:9.
4. (a) Fa wi moe si verloesoe, te wi wani tan getrouw? (b) San 1 Petrus 1:10-12 e ferteri wi foe na belangstelling di den proféti ben abi foe Gado seti tapoe a tori foe verloesoe?
4 San kan jepi wi foe horidoro leki loyaal discipel foe Gado Manpikin? Ini a fosi presi, wi moe froestan krin èn abi dipi waarderi gi na diri waarde foe a verloesoe di wi e soekoe. Den wortoe di ben skrifi nanga santa jeje foe na apostel Petrus, di ben de wan krosbé kompe foe Jezus Kristus, kan de wan bigi jepi gi wi ini disi. Na vermane foe en kan jepi wi foe si, dati na kriboi verloesoe de wan sani di, nanga ala prisiri, wi moe horidoro ondro ala na druk foe gens, o bigi disi ben kan de toe. Wi moe de klari foe wroko gi na verloesoe disi, foe tjari ofrandi, ja, efoe a de fanowdoe foe dede srefi (Lukas 14:26-33). Ini 1 Petrus 1:10-12 na apostel e skrifi:
„Foe taki foe a verloesoe disi, den proféti di ben taki na fesi foe a no-verdini boenfasi di ben bedoel gi oenoe, ben aksi fajafaja èn ben ondrosoekoe finifini foe disi. Den ben tan ondrosoekoe sortoe spesroetoe pisiten ofoe sortoe ten na jeje ini den ben sori foe na Kristus, di disi ben gi kotoigi a fesi foe a pina foe Kristus èn foe den glori di ben sa waka na baka dati. A ben tjari kon na krin gi den, dati den no ben dini densrefi, ma oenoe nanga den sani di ben ferteri now na oenoe nanga jepi foe den, di ben meki na boen njoensoe bekenti na oenoe nanga santa jeje di ben seni kon foe hemel.”
WAN SANI DI DEN PROFÉTI BEN GRIDI FOE SABI SOTE
5. San den proféti ben taki foe a pina foe a Messias?
5 Hondro hondro jari bifo Jezus ben libi na grontapoe, dan den hebrew proféti ben kisi Gado santa jeje foe taki a fesi foe na pina foe na pramisi Messias ofoe Kristus. A profétitori foe Daniël ben ferteri na precies ten, di na Kristus ben sa kon èn a ben ferteri dati baka wan dienst foe dri nanga afoe jari a ben sa koti poeroe ini dede (Daniël 9:24-27). Ini a profétitori foe Jesaja wi e kon sabi dati a Messias ben sa trowe èn ben sa tron wan ston foe naki foetoe (Jesaja 8:14, 15; 28:16; 53:3). A profétitori disi ben sori toe, dati a ben sa tjari den siki foe den sma, ben sa tjari go a fesi kroetoe, ben sa kisi kroetoe, ma ben sa de leki babawman na fesi en kragiman, dati den ben sa spiti tapoe en, dati den ben sa teri en makandra nanga den sondari èn ben sa soetoe en boro, ben sa dede wan ofrandi dede èn ben sa tjari den sondoe gwe foe meki foeroe sma kisi wan regtvaardiki positie na fesi foe Gado (Jesaja 50:6; 53:4-12). Na profétitori foe Zacharia ben sori a tapoe dati a Messias ben sa tori foe 30 solfroe moni (Zacharia 11:12). Èn na proféti Micha ben taki na fesi dati na Kristus, ”na kroetoeman foe Israël”, ben sa kisi naki na en séfesi. — Micha 5:1.
6. Sortoe detail foe a pina foe a Messias e kari ini den Psalm?
6 Sosrefi toe ini den Psalmen wi e feni verklari di abi foe doe nanga Jezus Kristus, soleki, dati wan krosbé mati ben sa tori en (Psalm 41:9). Tiriman, di kisi jepi foe den borgroe foe den, ben sa opo tanapoe tégen en (Psalm 2:1, 2). Den djoe kerki mesreman ben sa trowe en (Psalm 118:22). Te a ben kon na a presi pe den ben sa kiri en, dan den ben sa gi en wan dranki di kan droengoe sma (Psalm 69:21a) Falsi kotoigi ben sa kotoigi tégen na Messias (Psalm 27:12). Den sma di ben spikri en na a oedoe, leki wilde meti ben sa poti densrefi „tapoe en anoe nanga en foetoe” (Psalm 22:16). Den ben sa iti lot foe en krosi (Psalm 22:18). Den feanti foe en ben sa spotoe en nanga den wortoe: „A ben libi ensrefi abra na Yehovah. Meki En sorgoe foe verloesoe en! Meki en fri en, foedi a ben feni prisiri ini en” (Psalm 22:8). Foedi a ben sa abi bigi dréwatra, a ben sa aksi wan sani foe dringi èn ben sa kisi swa win (Psalm 22:15; 69:21b). Let bifo en dede a ben sa bari: „Mi Gado, mi Gado, foe sanede joe ben libi mi?” — Psalm 22:1.
7. San den profétitori e sori foe den glori di ben sa kon baka a pina foe na Kristus?
7 Soleki Petrus ben sori, dan den proféti ben kisi Gado santa jeje foe taki foe den glori di ben sa kon baka na pina foe na Messias. Nanga Gado bigi powa na getrouw Manpikin disi ben sa opobaka foe dede (Psalm 16:8-10). Baka te a ben opo go na hemel, a ben sa sidon na a reti anoe foe Gado èn wakti drape te leki en feanti ben poti leki wan foetoebangi foe en foetoe (Psalm 110:1). A ben sa teki na positie foe wan tego priester na a fasi foe Melchizedek (Psalm 110:4). En Tata, „na Owroeman foe dé”, ben sa gi en kownoe makti (Daniël 7:13, 14) Te foe kaba na ten ben sa kon dati Gado Salfoewan ben sa masi ala naatsi di ben sa opo tégen na tiri foe en (Psalm 2:9). Baka dati a ben sa sori en tirimakti tapoe na heri grontapoe. — Psalm 72:7, 8; Zacharia 9:9, 10.
8. Fa den proféti ben sori bigi belangstelling gi den sani di den ben skrifi, èn foe sanede den ben doe disi?
8 Ja, den profétitori ben gi wan toemsi moi prenki foe a ten di e kon foe na rol di na Messias ben sa pré ini Gado seti foe verloesoe ofoe fri foe sondoe nanga na dede. Na getrouwfasi foe en ondro pina, a dede foe en, na opobaka nanga na go na hemel foe en leki wan glori jeje mekisani — ala dati ben de fanowdoe, sodati libisma ben kan kisi na „no-verdini boen-ati”, nanga na pardon foe sondoe èn nanga na kon de verzoen krinkrin baka nanga Jehovah Gado èn en pikin. Den proféti srefi no ben kan froestan krinkrin fa nanga jepi foe na Messias verloesoe ben sa kon. Den ben ondrosoekoe finifini den proféti wortoe èn ben studeri alaten den égi profétitaki foe den foe froestan na betekenis foe na sani di den ben skrifi ondro na krakti foe santa jeje. Foedi den proféti ben froestan dati wondroe waarheid ben de na ini den openbaring di den ben kisi, dati meki den ben gebroiki ala den froestan foe njan someni boen foe den sani di Gado ben taki na fesi. Disi den ben doe aladi, te leki na kon foe na Messias, sma no ben kan foe kisi na no-ver-dini-boen-ati di ben taki na fesi. Ma ete a ben de so dati den sani di den proféti ben froestan ben de nofo foe jepi den èn a ben gi den tranga sosrefi toe foe wani sabi moro ete. Den ben abi gridi foe sabi spesroetoe sortoe toestand ben sa de na a ten foe a kon foe a Messias, ja, ini „sortoe ten” a ben sa ondrofeni na pina di ben taki na fesi èn baka dati foe ben kisi glori.
9. Soema spesroetoe ben njan boen foe den profétitori di ben go foe na Messias?
9 Soleki Petrus tjari kon na krin, dan den Hebrew proféti ben kon na den froestan dati den profétitori di ben go foe na Messias no ben skrifi ini na fosi presi foe na boen foe den, ma foe na boen foe den sma di ben sa libi ini na ten dati na Messias ben sa sori ensrefi (1 Petr. 1:12). Na proféti Daniël ben erken foe den openbaring di a ben kisi: „Mi ben jere, ma mi no ben kan froestan den” (Dan. 12:8). Ma den sma di ben teki a „boen njoensoe” ini na fosi eeuw G.T., ben njan boen krinkrin foe den wortoe foe na fosi kon foe na Messias. Na dèn den proféti ben dini troetroe. — Matteus 13:16, 17.
10. Fa na belangstelling di den Hebrew proféti ben sori gi verloesoe, moe abi krakti tapoe wi, èn foe sanede?
10 Fa na bigi belangstelling disi foe den proféti moe abi now krakti tapoe wi? Den ben sa moe bewégi wi foe ondrosoekoe wisrefi foe si ofoe wi abi a srefi gridi ini verloesoe leki den. Na prenspari sani ini wi libi de foe tan dienstknegti foe Jehovah Gado nanga Jezus Kristus di den e feni boen? Na sani disi abi ala wi prakseri? Foe troe wi abi ala réde foe gi wisrefi krinkrin foe sori dati wi de loyaal discipel foe Gado. Na Messias ben kon someni hondro hondro jari pasa kaba. Na ofrandi dede foe en ben gi na fundamenti foe verloesoe èn ben meki a kon troe foe ibri aparti pramisi foe Gado de seker (2 Kor. 1:20). Na sekerfasi, dati den pramisi foe Gado sa kon troe, no kon swaki kwet-kweti te a ten ben e pasa gwe. Disi e sori moro foeroe dati Gado wani someni sma kisi verloesoe (1 Tim. 2:3, 4; 2 Petr. 3:9). Foe dat’ede nanga froetrow, wi kan loekoe foe kisi den blesi di na Moro Hé Wan abi gi den getrouwwan.
FOE SANEDE ÈNGEL GRIDI FOE SABI
11. O bigi, leki fa 1 Petrus 1:12 sori, na belangstelling di den èngel abi gi na seti foe Gado ben de tapoe a tori foe verloesoe?
11 Na eksempre foe den èngel moe gi wi tranga toe foe doe ala wi moeiti foe tan ini na boen-ati foe Gado. Ala di den getrouw èngel no ben abi fanowdoe foe na seti foe Gado foe kisi verloesoe, tog den ben gridi foe si na kon troe foe na toemsi bigi prakseri foe Gado nanga na libismafamiri. Na apostel Petrus ben skrifi: „Ini den srefi sani (di den Hebrew proféti ben poti ala prakseri) den èngel angri foe loekoe na ini” (1 Petrus 1:12). Ja, bifo Jezus Kristus ben kon na grontapoe, den èngel ben angri foe sabi moro foe a pina foe na Kristus, „den glori di ben sa waka baka foe dati” èn na krakti di na „boen njoensoe” ben sa abi tapoe na libismafamiri. Na apostel Petrus ben kan taki foe den, dati den ben „angri” foe „loekoe” ini den sani disi. Na Griki wortoe foe „loekoe na ini” abi na prakseri ini en foe wan sma di e boigi ensrefi na fesi foe ondrosoekoe foe krosbé wan sani finifini. Ma foe sanede den èngel ben abi so wan bigi belangstelling gi na openbaring foe Jehovah tapoe a tori foe verloesoe foe ondrosoekoe disi finifini? Foe san-ede, leki volmaakti jeje mekisani, den ben abi belangstelling ini den seti gi sondoe, grontapoe libisma?
12, 13. Fa wi ben sa kan verklari na bigi belangstelling di den èngel abi gi na verloesoe foe na libisma-famiri?
12 Foedi den èngel no sabi ala sani, sondro degedege, den e meki den sabi foe den kon moro foeroe te den e loekoe nanga ala prakseri den doe nanga openbaring foe Gado. Na seti foe na bai fri foe na libisma-famiri ben de troetroe wan wondroe eksempre foe Jehovah lobi, geregtigheid, sari-ati nanga koni. Te foe datede den ben de bézig foe froestan moro boen Jehovah seti foe verloesoe na sondoe libisma-famiri, dan den èngel ben sa kisi moro waarderi gi den hemel Tata. Den ben sa leri sani foe en égifasi nanga pasi, di den no ben kan kon sabi nanga wan studi ofoe ondrosoekoe foe sortoe tra sani di ben kan pasa ini na universum. — Teki gersi Efese 3:8-10.
13 Boiti dati, den èngel „lobi” na libisma-famiri sote. (Teki gersi Odotaki 8:22-31). Nanga ala prisiri den si dati na libisma-famiri kon de verzoen nanga na hemel Tata, Jehovah. Foe dat’ede meki Jezus Kristus ben kan taki: ”Den èngel foe Gado e prisiri foe wàn sondari di abi berouw.” — Lukas 15:10.
14. (a) Na fasi foe den èngel tapoe a tori foe na verloesoe foe wi, moe gi wi tranga foe san? (b) Sortoe rai foe na apostel Petrus wi moe abi ini prakseri foe tan getrouw dienstknegti foe Gado?
14 Ja, miljoen-miljoen èngel ben prisiri di wi ben kon abi berouw. Den abi foeroe belangstelling foe si dati wi tan getrouw te na a kaba. A de leki den e „poti faja gi wi”. Meki wi no meki na prenki foe na makti hemel legre, di abi bigi belangstelling nanga lobi gi wi, kon doengroe. Wi wani dati troetroe den tan prisiri foe wi ede. Disi e aksi foe wi foe wi poti prakseri tapoe na vermane foe Petrus: „Tranga foe dati ede joe geest foe doe wroko, hori ala joe prakseri na wan; poti joe howpoe tapoe na no-verdini boen-ati di joe sa kisi na a openbaring foe Jezus Kristus.” — 1 Petrus 1:13.
TRANGA WI GEEST FOE DOE WROKO
15. Fa wi moe froestan Petrus vermane „foe tranga wi geest foe doe wroko”?
15 San a wani taki „foe tranga na geest foe doe wroko”? Letterlijk vertaald, dan den wortoe foe Petrus taki: „Tai den mindri foe joe geest.” Ini den dé foe na apostel Petrus, den mansma ben e weri langa krosi. Efoe wan man ben e wroko ofoe a ben teki prati na wan tranga wroko leki strélon, dan a ben ari na krosi na mindri en foetoe go na tapoesé èn a ben poti en ondro wan sinta (leerboeba). „Tai en mindri”, ben wani taki, dati wan sma de klari foe doe wroko. „Tai den mindri foe na geest” ben sa wani taki gi wi foe dat’ede foe poti wi froestan klari foe doe wi kristen verplekti èn foe horidoro ondro ala sortoe tesi.
16. Fa wi kan sori dati wi „e hori ala wi prakseri na wan”?
16 Te wi de klari na jeje fasi foe tan dini Gado getrouw, dan „wi sa hori ala wi prakseri na wan”. Wi sa de ini balans ini wi denki èn sa kan kroetoe sani tapoe wan joisti fasi. Ini wi waka nanga libi sa kon na krin, dati wi e dwengi wisrefi èn wi no e fadon gi den korifasi foe wan grontapoe di no sabi Gado (1 Johannes 2:16). A doe foe den sani di de boen ini na ai foe wi hemel Tata nanga en Manpikin, sa teki dan na fosi presi ini wi libi.
17. (a) San de na „no-verdini-boen-ati” di bribiman sa kisi? (b) Fa „wi e poti wi howpoe tapoe na no-verdini-boen-ati di wi sa kisi na a openbaring foe Jezus Kristus”?
17 Te wi wani „tranga wi geest foe doe wroko èn hori wi prakseri na wan”, dan wi moe ”poti wi howpoe tapoe na no-verdini-boen-ati di wi sa kisi na a openbaring foe Jezus Kristus.” Te Jezus kon ini glori, dan ala sma di abi na hemel howpoe èn di tan en discipel di tan frede Gado, sa teki prati na a no-verdini-boen-ati foe Gado (1 Korinte 1:4-9). Dan a no soso den discipel di ben kon gebore njoen nanga geest ben sa kan kisi fri foe pina, di den ben ondrofeni foe ogri sma; sosrefi toe den kristen di abi wan howpoe tapoe wan grontapoe paradijs, sa kisi kibri ini na „bigi benawtoe”, di e waka baka na kon foe Kristus, nanga tego libi na grontapoe na den fesi. Wi abi troetroe ala réden foe hori alaten na kon troe foe wi kristen howpoe na wi fesi, èn loekoe nanga foeroe froewakti na a ten dati wi sa kisi na boen-ati foe Gado. Na froetrow foe wi ini na seker kon troe foe wi howpoe kan gi wi tranga foe tan loyaal na wi hemel Tata nanga en Manpikin. Meki wi hori wi ai fasti tapoe den blesi di na kon foe Kristus ini glori sa tjari kon gi den getrow foetoeboi foe en. — Mattéus 25:31-46.
SORI DATI WI DE GEHOORZAAM PIKIN FOE GADO
18. Fa wi e sori dati wi de „gehoorzaam pikin”?
18 Akroederi nanga na howpoe foe wi, dan wi moe tjari wisrefi leki „gehoorzaam pikin”. Na apostel Petrus e go moro fara foe taki: „Leki gehoorzaam pikin, no meki den lostoe di joe ben abi fositen boigi joe” (1 Petrus 1:14). Leki pikin di e respeki èn lobi den hemel Tata, wi sa moe wani foe saka wisrefi na ondro den marki foe en nanga ala prisiri, ini na froestan dati disi wawan de joisti. Wi no wani foe tjari wi libi moro na a srefi fasi leki fa wi ben gwenti bifo wi ben tron discipel foe Kristus. Foedi wi no ben sabi den komando foe Gado, dan wi ben gi wisrefi abra na den sondoe lostoe foe wi kande, wi ben poti na wan gridifasi den égi afersi foe wi na fesi di foe trawan ofoe wi ben seti wi libi so foe kisi goedoe, populariteit ofoe makti. Foe wan bigi pisi wi ben seti wi libi nanga den prakseri, wortoe nanga doe foe sma ini wi birti. Now wi sabi, dati so wan libi, pe wi e libi Gado na wan sé, de légi èn no abi waarde.
19. Fa wi kan froestan foe na wet foe Mozes san a wani taki foe de Santa?
19 Te wi wani abi wan libi di foeroe nanga boen sani, dan wi moe waka baka Jehovah Gado, di de santa, krin ofoe soifri. Na waka baka wi hemel Tata wani taki wawan dati wi e gi en formeel aanbegi? Loekoe dati na apostel Petrus e taki: „Akroederi nanga na santawan di ben kari oenoe, oen srefi toe moe de santa ini oen heri waka nanga libi” (1 Petrus 1:15). Moro fara a ben teki san ben tanapoe ini Leviticus 19:2 pe tanapoe: „Oen moe sori dati oenoe de santa, bikasi mi, Jehovah, oen Gado, de santa” (1 Petrus 1:16). Den wortoe disi ini Leviticus de ini wan omlijsting di e sori san Jehovah Gado ben aksi foe den lsraëlsma, na ini den formeel aanbegi, èn na ini den gewoon aladé afersi foe den. Ini den marki disi foe wan santa waka nanga libi de sosrefi toe: Joisti respeki gi papa nanga mama, opregtifasi, abi dofoesma, brenisma nanga tra malengrisma ini prakseri, no abi bita-ati, ma lobi joe naaste, kibri joesrefi foe gongosa nanga gi falsi kotoigi èn doe geregtigheid (Leviticus 19:3, 9-18). Na marki foe kan de santa ofoe soifri ini na ai foe Jehovah, abi soboen ala pisi foe na libi na ini.
„TJARI JOESREFI . . . NANGA FREDE”
20. San wi moe abi ini prakseri tapoe a tori foe a kroetoe, èn fa disi moe abi krakti tapoe wi waka nanga libi?
20 Ete wan krakti réden foe libi akroederi na gi di wi gi wisrefi abra na Gado, wi e feni ini den tra wortoe foe Petrus: „Efoe oen kari na Tata, di e kroetoe a wroko foe ibrisma sondro partijfasi, tjari oensrefi dan nanga frede ini na ten, di oenoe e libi ini wan vreemde kondre” (1 Petrus 1:17). Wi no moe lasi noiti ini na prakseri dati wi hemel Tata sa kroetoe wi nanga jepi foe en Manpikin. Dorosé sani no sa abi krakti tapoe na kroetoe dati, ma a sa de sondro partijfasi èn akroederi nanga san wi de troetroe na inisé (Jesaja 11:2-4. Soboen efoe wi e erken na Moro Héwan leki wi Tata, dan wi sa wani tjari wisrefi so, dati a sa loekoe wi nanga boen ai èn sa kroetoe wi tapoe wan boen fasi. Nanga reti wi sa waka baka wan libipasi di e sori wan gosontoe nanga respeki frede gi Jehovah Gado.
21. Fa wi e sori ini disi grontapoe dati wi de leki ini wan vreemde kondre?
21 Boiti dati, wi moe froestan dati na grontapoe makandra nanga san a abi foe gi wi, sa pasa gowe. Wi moe prakseri dati wi „e libi ini wan vreemde kondre”. A de prenspari dati wi kibri wisrefi foe tai wisrefi na iniwan sani ini disi grontapoe, leki a ben sa tan foe tego. Srefi den toemsi moi paleisi foe den kownoe foe na owroe Assyria, Babylon, èn Persia no de gi no wan sma moro wan switi libipresi; den de leki wan broko ston-ipi. Nowan architectonisch wroko, no wan wroko foe na modern fasi foe bow sani nanga technologie, no wan moi skedré, nowan moi ston-popki, nowan enkri sani di libisma meki kan tan foe tego sondro foe a kenki. Ma wi moe libi ini na grontapoe disi di no sabi Gado; wi no kan „froisi komoto” foe en (1 Korinte 5:9, 10). Ma wi no moe firi wisrefi leki wi de „na oso” ini na disiten seti foe sani. Nono, bikasi wi e loekoe na wan sani di de moro boen, wi e froewakti „njoen hemel nanga wan njoen grontapoe”, di komoto foe Gado (2 Petrus 3:13). Ini a pisiten foe na waka foe wi ini na grontapoe wi de vreemde sma, èn disi moe de foe si ini wi fasi, wi wortoe nanga wi doe. — Teki gersi Hebreeër 11:13-16.
WAN DIRI PRIJS BEN PAI
22, 23. Foe sanede wi moe hori ini prakseri dati wi de boen dipi ini paiman alaten na fesi foe Jehovah Gado nanga Jezus Kristus?
22 Foe poti krakti moro fara o prenspari a de dati wi tan de santa dienstknegti di e frede Gado, na apostel Petrus e skrifi: „Bikasi oen sabi, dati a no ben de nanga sani di kan pori dati oen ben kon fri foe oen sondro froktoe fasi foe libi, di oen ben kisi foe oen fositenpapa. Ma a ben de nanga diri broedoe, leki di foe wan krin èn sondro vlaka lam, ja, foe Kristus” (1 Petrus 1:18, 19). Foedi wi ben kon fri foe na kroetoe foe sondoe nanga na dede, dan wi abi verplekti na fesi foe Jehovah Gado, di ben seti sani foe na sani disi. Kon wi taki, dati wan bigi ipi solfroe ofoe gowtoe ben pai foe verloesoe wi foe dede. Wi no ben sa de ini wan paiman na a sma di ben tjari so wan bigi ofrandi foe goedoe gi wi?
23 Omeni moro wi de ini paiman na Jehovah Gado nanga Jezus Kristus! Na verloesoeprijs, di ben pai gi wi, ben abi moro waarde, dan sortoe tra goedoe, di kan lasi, ofoe foefoeroe of pori. A abi moro waarde leki ala na solfroe nanga gowtoe di de foe feni now na grontapoe. Na warti verloesoeprijs di ben pai gi wi, no de noti moro leki na diri broedoe foe na sondro-sondoe Manpikin foe Gado. A de na libibroedoe foe wan sma di abi na reti foe libi foe tego èn di foe dat’ede ben doe foeroe moro leki foe gi en libi biten abra, soleki tra sma ben doe disi gi wan afersi di ben de bigi gi den. A ben de tapoe na gron foe na pai foe na verloesoeprijs disi, dati wi, soleki Petrus e taki, „ben kon fri foe oen sondro froktoe fasi foe libi, di oen ben kisi foe oen fositen papa”. Fa so?
24. Fa na waka nanga libi foe wi ben de „sondro froktoe” bifo wi ben tron discipel foe Jezus Kristus?
24 Di wi ben erken dati wi ben verloesoe ofoe bai fri nanga na diri broedoe foe Jezus Kristus, dan wi ben drai baka gi wi fositen libi nanga waka. Sondro na sabi foe Jehovah Gado ofoe en prakseri, a libi foe wi ben de „sondro froktoe”, wan soso sani, légi, bikasi a ben drai lontoe soso na kisi foe sani di no e tan alaten. A waka nanga libi foe wi, kan abi wan takroe krakti tapoe wi froestan, wi skin nanga wi firi. Boiti dati, wi papa nanga mama ofoe granpapa nanga granmama kande no ben sabi na bijbel. Foe dat’ede meki den markitiki nanga gronprakseri, di den ben seti den libi nanga en, kande no ben akroderi nanga Gado wani. Kande den ben teki prati srefi na kerki gwenti di ben afrontoe Gado. Soboen, srefi san wi ben kisi foe wi papa nanga mama tapoe a tori foe wi waka nanga libi, no ben meki na libi kon de moro warti. — Teki gersi Matteus 15:3-9.
25. Fa den wortoe ini 1 Petrus 1:18, 19 kan de wan krakti dekati gi wi foe tan getrow na Jehovah Gado nanga wi Masra Jezus Kristus?
25 Ja, den wortoe foe na apostel Petrus de troetroe wan dekati foe na a bosroiti foe wi foe dini Jehovah Gado leki discipel foe Jezus Kristus di e frede Gado. Wi no moe frigiti na bigi belangstelling di den Hebrew proféti nanga den èngel ben sori gi den openbaring foe Gado tapoe a tori foe verloesoe. Meki wi prakseri alaten na a sekerfasi foe Gado kroetoe, na kon troe foe wi howpoe na a openbaring foe Jezus Kristus, na prensparifasi foe de krin ini wi waka nanga libi, foedi Jehovah santafasi e aksi disi, èn na sani dati na libi foe wi ini disi grontapoe de soso wan di de leki vreemde sma. Ma moro foeroe, meki wi no frigiti noiti, nono, noiti, dati wi ben bai fri nanga na diri broedoe foe Jezus Kristus!
26.
26 Te wi teki agersi den blesi di a dini foe a Moro Héwan e tjari kon, dan den moisani foe disi grontapoe de soso wan ipi doti (1 Korinte 7:29-31; Filippi 3:7, 8). Wan krin konsensi, wan warti libi now nanga wan kolokoe libi ini wan tego ten, di de na wi fesi, no de foe bai nanga moni. Ma getrouw dienst gi Gado e tjari den blesi disi kon. Fa disi de krakti réden foe meki dienst gi Gado de na moro prenspari sani ini wi libi!
[Aksi foe a tori disi]
