Wan howpoe nanga wan seker djaranti
Kapitel 3
Wan howpoe nanga wan seker djaranti
1-3. Foe sanede meki soso bribi dati Gado de no de nofo foe kisi na boen-ati foe en? (b) San wi moe bribi leki fa Hebreër 11:6 e sori, èn foe sanede disi de prenspari?
FOEROE sma e taki dati den e bribi dati Gado de. Wan libi di Gado e feni boen, e aksi moro leki dati. Wi moe abi na fasti overtoigi dati ala na pina di kan kon tapoe wi, no de noti te joe teki en agersi nanga den toemsi bigi blesi di na Almakti Gado sa kanti trowe tapoe en dienstknegti.
2 Foe na réden disi meki a no de nofo toe foe dini wi Mekiman soso foedi joe e froestan dati a de wan prekti, foedi a de na Sma di gi wi libi. Soso a froestan dati a de wan prekti no sa gi wi na krakti foe tan getrow ini ala tesi di kan kon tapoe wi — misandel, skempi, siki, froewakti di no kon troe ofoe economia moeilekheid. Soso wan dipi lobi gi wi Hemel Tata di no kan broko ben sa kan doe dati.
3 Foe abi so wan lobi gi Gado, wi moe bribi dati ensrefi de nanga lobifasi, boen nanga boen-ati. Na bijbel e sori dati so wan bribi de troetroe fanowdoe gi wan kristen. Wi e lési: „Na soema di e kon na Gado moe bribi dati a de èn dati a de pai a sma di e soekoe en tranga” (Hebr. 11:6). Efoe wi ben sa denki lagi foe a pramisi foe Gado foe blesi en dienstknegti, dan wi abi troetroe wan kron prakseri foe en. Dan disi e tapoe wi foe erken Jehovah leki wan Gado di abi bigi waarderi gi den toemsi moi wroko foe en pipel (Hebr. 6:10). Ma te wi abi na fasti overtoigi dati na Moro Héwan de wan sma di e pai, dan wi foe wi sé sa piki na waarderi foe en, èn wi sa kon ini bewégi foe prisiri en.
„KISI ’KIBRI TE LEKI VERLOESOE KON”
4. Fa Jehovah Gado e jepi wi foe kisi verloesoe, èn san wi moe doe?
4 A no de foe taki dati wi no kan verdini verloesoe nanga na dienst foe wi gi Gado, foe eksempre nanga a hori foe wan toemsi moi waka èn libi èn foe jepi trawan na skinfasi. Wi hemel Tata srefi ben seti ala sani, sodati wi kan kisi tego libi, èn en e jepi wi foe doe en wani èn foe kisi na blesi dati. Na howpoe di Gado ben gi e gi wi tranga foe dat’ede foe saka wisrefi ondro na tiri foe Gado krinkrin. Poti froetrow krinkrin ini Jehovah leki na sma di e pai, e gi wi na okasi foe wroko makandra nanga en, aladi a de jepi wi foe gro kon tron troetroe lepi kristen (Efese 4:13-15). So wan actief wrokomakandra nanga wi Mekiman e aksi kande dati wi span wisrefi foe dwengi wi sondoe firi. Ma a de en troetroe, di nanga jepi foe en geest, e meki wi gro na jeje fasi. Nanga jepi foe den wortoe foe na apostel Petrus di e kon tapoe wan krakti fasi e tjari kon na fesi sortoe prati Gado abi na ini foe djaranti na kon troe foe wi kristen howpoe:
„Blesi foe a Gado nanga Tata foe wi Masra Jezus Kristus, bikasi akroederi en bigi sari-ati a ben gi wi wan njoen geboortoe foe wan libi howpoe, foe wan goedoe di no e pori èn di de sondro vlaka èn sondro foe flaw nanga jepi foe na opobaka foe Jezus Kristus foe dede. A ben poti ini hemel gi oenoe, di nanga Gado krakti nanga jepi foe bribi e kisi kibri te leki wan verloesoe, di didon klari foe kon na krin ini na laatste pisi ten.” — 1 Petrus 1:3-5.
5. Foe sanede meki den fosi-eeuw kristen ben abi ala réden foe blesi Jehovah?
5 Den kristensma di den wortoe disi ben taki gi, ben abi ala réden foe blesi Jehovah Gado, èn sosrefi toe foe taki boen foe en ofoe foe prijse en. A ben de leki den ben kon njoen gebore baka leki pikin foe na Moro Héwan (Johannes 1:12, 13; 3:5-8). A „njoen gebortoe” disi ben doe kon, foedi na santa jeje ben wroko tapoe den. Den ben meki kon tron manpikin foe Gado, no leki wan bakapisi foe wan spesroetoe verdienste foe a sé foe den, ma tapoe na gron foe Gado sari-ati, di ben kon na fesi foedi den sondoe foe den ben kisi pardon. Di den discipel disi foe Jezus Kristus ben tron pikin foe na Almaktiwan, den ben tron toe erfgenaam.
6. San e meki na kristen howpoe de wan „libi howpoe”?
6 Leki erfgenaam den ben abi na howpoe foe kisi wan goedoe. Na howpoe dati, soleki Petrus e sori, de „wan libi howpoe”. Na moro leki wan fasi a de wan „libi howpoe”. Soleki na boskopoe foe Gado ofoe en wortoe de „na libi èn abi krakti”, sosrefi toe a howpoe dati de a libi èn abi krakti (Hebr. 4:12). Disi doe kon na a fosi presi, foedi na howpoe disi komoto foe na libi èn tego Gado èn abi en roetoe ini en Manpikin, di „no e dede moro”. Na Manpikin abi na krakti foe wan libi di no kan pori èn a man foe verloesoe krinkrin den sma di e poti den froetrow tapoe en (Jeremia 10:10; Habakuk 1:12; Hebr. 7:16, 25; 1 Petr. 1:23). Jezus Kristus de ensrefi na „libi brede” di Gado ben seni kon, èn efoe „wan sma njan foe na brede disi, a sa libi foe tego” (Johannes 6:50, 51, 57). A Manpikin e gi „libi watra”, di e tron ini den sma di e kisi en, „wan fonten foe watra di e pompoe kon na tapoe foe gi tego libi” (Johannes 4:10, 14). Na so a libi howpoe”, di wan sma e kisi leki wan bakapisi foe na „njoen gebortoe”, man toe foe jepi den sma di abi na howpoe disi foe kisi den paiman troetroe èn foe kisi tego libi.
7. Sortoe krakti na „libi howpoe” abi tapoe den sma di abi en?
7 Na howpoe dati abi krakti. A de ini na libi foe den sma di abi na howpoe disi, wan krakti di e gi faja èn di e poesoe. Na howpoe disi abi krakti tapoe den heri libi èn e kon na fesi ini den fasi foe libi. Leki fa a de nanga troe bribi, a ’so a de dati so wan howpoe no kan de dede ofoe sondro froktoe ofoe doe, sodati a no kan gi bewijsi dati a de (Jakobus 2:14-26). A de wan faja howpoe di e gi wi kowroe ati, èn na trowstoe di a de gi wi èn na fasti sekerfasi di a de meki kon troe, e gi wi tranga nanga jepi nanga krakti.
8. San wi kan taki tapoe a tori foe a kon troe foe wi howpoe, foedi a de „na libi”?
8 Krinkrin trafasi leki den froewakti foe den sma di e poti den froetrow tapoe onvolmaakti sma, di e dede, na howpoe disi foe dat’ede no de wan dede howpoe di sa meki na froewakti no kon troe, foedi a no abi wan fundamenti di no boen. A no kan tan sondro dati a no kon troe. Jehovah pramisi di no kan kenki, makandra nanga en makti di joe no kan teki gersi nanga noti, de wan fasti fundamenti gi na kristen howpoe. — Teki gersi Jesaja 55:10, 11; Hebr. 6:13-20.
9. San meki na libi howpoe disi doe kon?
9 Na apostel Petrus e tjari na „libi howpoe” disi kon akroederi nanga „na opobaka foe Jezus Kristus foe dede”. Di Gado Manpikin ben spikri na wan postoe èn en discipel ben si fa a ben dede, dan na howpoe foe den ben dede gwe pikinmoro nanga en. Ma di den ben kisi bewijsi foe en opobaka, dan na howpoe foe den kon baka na libi, „ben kisi faja baka” èn ben troesoe den foe gi kotoigi (Lukas 24:13-34; Tori foe den Apostel 4:20). Foedi na Manpikin ben kisi jeje libi baka, dan a ben kan pristeri en Tata na waarde foe en ofrandi, na, verloesoeprijs. Efoe Jezus Kristus no ben opobaka foe dede, dan no wan sma no ben kan kon verloesoe foe sondoe nanga dede (1 Korinte 15:14-19). Sondro na opobaka foe en dan wan „libi howpoe” no ben sa de.
10. Foe sanede Petrus ben kan kari na goedoe leki „no e pori, di de sondro vlaka, èn di no e flaw”?
10 Na moro bigi goedoe di na apostel Petrus nanga en kompe-bribiman ben loekoe foe kisi, „no e pori èn di de sondro vlaka èn sondro foe flaw. Foedi a no e pori, dan no wan fasi a kan kon na wan kaba ofoe kisi mankeri. Sosrefi toe a no kan kisi vlaka ofoe doti, bikasi a no de foe kisi nanga triki ofoe bidrigifasi ofoe tra kroektoedoe sani. Na wondroe goedoe disi no sa fadon noiti ini na anoe foe sma di no e hori densrefi na gronprakseri. Boiti dati, tra fasi leki fa a de nanga moi bromki, di e lasi a moifasi foe den esesi, a sa tan foe tego èn no lasi en glorifasi nanga moi.
11. Foe sanede na goedoe de seker?
11 Leki fa Petrus taki, dan na pramisi goedoe „poti ini hemel gi oenoe”. A de wan sani di de seker gi den mede-erfgenaam foe Kristus. Drape ini hemel a abi wan moro betre kibri leki ini sortoe bank di de toe, bikasi den hemel di no de foe si de den tanpresi foe na tego Gado, Jehovah di e tan (Psalm 103:19; 115:3, 16; Mattheüs 5:11, 12). Boiti dati, na apostel Petrus e sori dati na Almaktiwan ben sa jepi foe kisi na goedoe foe den. Na Moro Héwan ben sa gebroiki nanga jepi foe en geest en „krakti” gi den èn jepi den foe tan boen ini en ai èn na so fasi kibri den afersi foe den. Foe datede meki den no ben sa ondrofeni na kroetoe „ini na laatste pisi ten”, di sa kon tapoe den ogri sma, ma den sa kisi verloesoe foe tego libi.
12. Fa Jehovah sa „kibri” wi foe kisi verloesoe?
12 Soleki den fosi-eeuw kristen, na so ala bribiman ini disi ten kan de seker dati Jehovah Gado sa kibri den foe kisi verloesoe. Nanga jepi foe en santa jeje a ben jepi wi na a bigin foe abi bribi, èn nanga na srefi jeje dati a sa tan tranga wi bribi. Na bribi disi tapoe wan boen fasi kan jepi wi pasa ala sortoe tesi (1 Johannes 5:4). Wi no abi boen réden foe de grantangi na Jehovah dati a de tan jepi wi foe kisi tego libi? Foe troe, èn spesroetoe te wi e prakseri dati a no e doe disi tapoe a gron foe wi égi verdienste, ma foe en bigi sari-ati ede.
DEDE NO KAN TAPOE NA KON TROE FOE WI HOWPOE
13. Sortoe djaranti de dati wi kristen howpoe didon tapoe wan boen fundamenti?
13 Srefi na dede no kan tapoe na kon troe foe wi kristen howpoe. San wi hemel Tata ben doe tapoe a tori foe en Manpikin, e gi wan seker djaranti di no kan fadon, dati wi howpoe didon tapoe wan stéfi fundamenti. Na apostel Petrus ben skrifi:
„Seker, en (Gado Manpikin) (Gado) ben sabi na fesi, bifo na poti foe a fundamenti foe grontapoe. Ma a ben kon na krin na a kaba foe den ten, foe na boen foe oenoe, di nanga en oen ben kon de bribiman ini Gado, di ben opo en baka foe dede èn ben gi en glori, sodati a bribi nanga howpoe foe oen ben sa poti tapoe Gado.” — 1 Petrus 1:20, 21.
14. Fa Gado „ben sabi Jezus Kristus a fesi, bifo na poti foe na fundamenti foe grontapoe”, èn fa „a ben meki bekenti na a kaba foe den ten”
14 Bifo Adam nanga Eva ben poti na fundamenti foe wan libisma-grontapoe, foedi den ben meki pikin, Jehovah Gado ben teki na bosroiti, dati en enkri wan gebore Manpikin ben sa verloesoe na libismafamiri foe katibo foe sondoe nanga na dede (Teki gersi Genesis 3:15; 41:1, 2; Lukas 11:49-51). Nanga na kon foe na Messias den laatste dé foe na djoe seti foe sani nanga en priesterwroko, en ofrandi nanga tempeldienst, ben bigin. Na kon foe na Messias ben abi na marki foe wan bigin foe wan njoen pisiten ini na libisma historia. Foe datede meki na apostel Petrus ben taki dati Kristus „ben kon na krin na a kaba foe den ten”.
15. Foe sanede Petrus ben kan taki dati Jezus Kristus ben kon na krin „foe na boen foe oenoe, di ben kon de bribiman ini Gado na a kaba foe den ten”?
15 Ma foe sanede na apostel ben taki dati Gado Manpikin ben kon na krin „foe na boen foe oenoe, di nanga en oen kon de bribiman ini Gado”? Bifo Jezus ben kon na grontapoe, dan nowan sma ben kan njan boen foe na Verloesoewroko di a ben sa doe. Soso ini na fosi eeuw dati ben kan gi den bribiwan. Foedi den ben poti bribi ini Kristus, meki den bribiman disi ben poti sosrefi toe bribi ini na Tata, di ben seni na Manpikin kon na disi grontapoe (Johannes 17:21). Boiti dati, soleki Petrus ben taki, dan na sani di Jehovah Gado ben doe gi en Manpikin — dati a ben opo en baka èn ben gi en „glori” foe hé en te na en reti anoe sé — de gi wi wan boen réden foe poti wi bribi ini na Almaktiwan èn foe howpoe tapoe en. Fa so?
16. Foe san na opobaka foe Jezus Kristus de wan djaranti?
16 Precies soleki na Moro Héwan ben opo en Manpikin, a so a kan opo baka tra dienstknegti foe dede. Foedi Jezus Kristus ben opobaka foe kisi hemel libi foe no dede moro, dan den fosi-eeuw discipel foe en ben kan de seker dati den toe ben sa teki prati nanga en ini hemel glori. Na opobaka foe Gado Manpikin de wan djaranti di no kan kenki, dati sma di e sribi ini dede, sa opobaka foe kisi libi. — 1 Korinte 15:12-22.
17. Fa na opobaka foe Jezus Kristus abi boen bewijsi?
17 Foe datede meki na tori foe na Opobaka foe Jezus ben abi boen bewijsi, èn dati ben pasa sosrefi toe. Moro leki 500 discipel ben si na Manpikin foe Gado di ben opobaka (1 Korinte 15:6). Den aikotoigi disi ben sabi dati Gado féanti kande ben sa poeroe na fri foe den èn srefi ben sa kiri den te den ben sa gi kotoigi foe na toemsi bigi wondroe disi. Ma ete den getrouw discipel foe Jezus Kristus ben gi kotoigi fri nanga sondro frede foe na tori disi (Teki gersi Tori foe den Apostel 4:1-3; 7:52-60). So wan dekati bribi ben kan wawan foedi den ben abi boen bewijsi foe en opobaka.
NA KONBAKA FOE KRISTUS INI GLORI DE SEKER
18. San na apostel Petrus e taki foe na „krakti èn de-noja foe wi Masra Jezus Kristus”?
18 Soleki a ben de nanga na opobaka foe en Manpikin, a so Jehovah Gado ben sorgoe dati wan krin kotoigi ben gi foe na sekerfasi foe na konbaka foe Kristus nanga krakti èn bigi glori” (Matteus 24:30; Openbaring 1:7). Na apostel Petrus ben taki:
„Nono, no foedi wi ben waka baka anansitori di falsi, wi ben meki bekenti na joe na krakti nanga na de-noja foe wi Masra Jezus Kristus, ma foedi wi de ai-kotoigi foe en glori. Bikasi a ben kisi foe Gado, grani nanga glori, di wortoe leki disi nanga na glorifasi ben taki gi en: ’Disi na mi Manpikin, mi lobiwan, di mi ben feni boen.’ Ja, den wortoe disi wi ben jere e komoto foe hemel, di wi ben de nanga en tapoe na santa bergi” (2 Petrus 1:16-18)
Na sortoe sani di ben pasa Petrus e sori wi dja?
19. Oten nanga fa Petrus nanga Jakobus nanga Johannes ben tron aikotoigi foe na glori foe Kristus?
19 A de sori dja tapoe na transfiguratie foe Masra Jezus Kristus. Wan pisi ten baka na Pascha foe na jari 32 G.T. na Manpikin foe Gado ben taigi den discipel foe en: „Foe troe, mi e taki gi oenoe, dati son wan foe den di tanapoe dja, no sa si dede, bifo den si fosi na Manpikin foe libisma e kon ini en kownoekondre” (Matt. 16:28). Baka wan toe dé kaba, den wortoe dati foe Jezus ben kon troe. Gado Manpikin ben teki go nanga en den apostel Petrus, Jakobus nanga Johannes go na wan hé bergi, kande na bergi Hermon. Tapoe wan sébergi foe na bergi disi na sani disi ben pasa: „(Jezus) ben ondrofeni na fesi den ai wan transfiguratie èn en fesi brenki leki son èn en tapoesékrosi krin leki leti.” Na so fasi na fesi den dri apostel ben sori foe troe dati na konbaka foe Jezus ini Kownoekondre-makti ben sa go troetroe nanga glorifasi. Dan wan „krin wolkoe” ben kon nanga wan sten di ben taki: „Disi de mi Manpikin, na lobiwan, di mi ben feni boen; arki na en.” — Matteus 17:1-5.
20. Foe sanede na bribi ini na konbaka foe Jezus ini Kownoekondremakti abi wan stéfi fundamenti?
20 Na bribi ini na konbaka foe Jezus ini Kownoekondremakti no ben de foe dat’ede tori di libisma ben meki en di no de troe. Triki nanga bidrigi-fasi no ben de ini na tori foe proeberi foe overtoigi tra sma dati na Manpikin foe Gado ben sa konbaka „nanga krakti èn bigi glorifasi”. Petrus, Jakobus nanga Johannes ben si na fesi den ai fa Jezus Kristus ben kisi glorifasi èn den ben jere na égi sten foe Gado, di ben komoto foe wan „krin wolkoe” ofoe foe na „toemsi bigi glorifasi”. Na sten disi ben erken Jezus leki na lobi Manpikin. Nanga na erkenning disi èn nanga na brenki-fasi di a ben kisi, dan a ben kisi troetroe grani nanga glorifasi. Foe na toemsi bigi openbaring disi di ben komoto foe Jehovah Gado, meki Petrus ben kari na bergi pe na transfiguratie disi ben feni presi, nanga reti „na santa bergi”.
21. San na transfiguratie-visoen wani taki gi wi?
21 San na transfiguratie disi wani taki gi bribisma? Petrus e piki: „Leki wan bakapisi foe disi, na profétis wortoe kon de moro faste, èn oenoe e doe boen foe poti prakseri a tapoe leki wan lampoe di e skijn ini wan doengroe presi, teleki na dé opo èn wan déstari opo kon ini oenoe ati” (2 Petrus 1:19). Ja, na transfiguratie e sori dati a profétis wortoe de troe tapoe na tori foe na konbaka foe na Masra Jezus Kristus ini Kownoekondre-makti. Na visioen disi de wan tesi foe en kownoe glori. Sondro krakti ofoe makti, dan a no de foe taki, dati no wan kownoe glori, nanga wartifasi kan de. Foe dat’ede meki na transfiguratie de sosrefi toe wan bewijsi foe na sekerfasi foe na konbaka foe Jezus ini makti.
22, 23. Fa wi e sori dati wi e doe boen „foe poti prakseri” tapoe na profétis wortoe? (b) Fa na wortoe dati de wan lampoe?
22 Wi ini na ten disi „e doe boen” foe poti prakseri tapoe na profétis wortoe, bikasi noti ben sa de moro prenspari gi wi libi èn ben kan abi moro bigi winimarki ofoe winimarki di e tan. Meki sma lési nanga faja na grontapoe-njoensoe ofoe ondrosoekoe den sani di politiek, economia nanga wetenschappelek sabiman taki na fesi. Te foe kaba, den e kon si dati den no kon sabi noti moro fara. Ma na leti di e skijn komoto foe na profétis wortoe no sa tjari wi noiti go na wan pasi di no e go moro fara ofoe tjari wi kon ini wan broeja presi pe wi no man foe komoto moro na ini. Na profétis wortoe disi moe kisi ini wi studi nanga meditatie foe dat’ede wan prenspari presi. Wi e doe foe dat’-ede boen foe gebroiki ala okasi foe konmakandra nanga kompe-bribiman te den e taki foe na „wortoe”. Ma „poti prakseeri” wani taki moro leki lési finifini ofoe arki nanga respeki. Akroederi nanga na profétis wortoe a wani taki foe handri, foe abi krakti tapoe na waka nanga libi foe wi èn na fasi fa wi e gebroiki wi ten, krakti nanga sani di wi abi. (Teki gersi Jakobus 1:22 te nanga 27). Ja, wi e erken nanga reti na troetroe praktisch waarde foe na profétis wortoe dati ini wi aladé libi èn wi no e si en soso leki wan afersi pe wi e poti prakseri na en ini den pisi ten foe formeel aanbegi.
23 Akroederi nanga na dekati di Petrus e gi, dan wi moe meki na profétis wortoe de leki wan lampoe gi wi e e skijn ini wan doengroe presi èn di e gi leti na wi ati. Efoe wi „e poti prakseri na tapoe”, foedi wi e meki a tjari wi ini ala pisi foe na aladé libi foe wi dan a sa tjari wi boen te na a toemsi bigi dé dati di na „déstari”, Masra Jezus Kristus, sa sori ensrefi ini ala en glorifasi. (Teki gersi Openbaring 22:16). Na sori ensrefi foe na Manpikin foe Gado sa wani taki gi den sma di no e bribi, pori, ma den getrow discipel foe en sa kisi dan toemsi bigi blesi (2 Thessalonika 1:6-10). Na howpoe di tai makandra nanga na kontroe foe na profétis wortoe, moesoe gi wi seker dekati foe doe ala wi moeiti dati wi moe feni boen te wi Masra kon sori ensrefi. — Lukas 21:34-36.
24. (a) Foe sanede wi kan abi froetrow ini na heri profétis wortoe di de ini na bijbel?
24 A troe foe na tori de, dati wi moe poti boen prakseri na a heri profétis wortoe ini den Santa Boekoe èn wi moe meki a tjari wi ini wi libi. Soso kaba na fasi foe na profétis wortoe, na fasi fa a ben doe kon, moe foeroe wi ati nanga froetrow foe a ten di e kon. A no ben de so dati Jehovah proféti ben loekoe finifini, fa den libisma afersi ben go èn dan taki na fesi san sa psa tapoe na gron foe den égi verklari foe den afersi disi. Den profétitori no ben de san den proféti ben prakseri baka di den ben ondrosoekoe finifini den toestand di ben de ini na ten dati. Nono, na santa jeje ben wroko tapoe na froestan foe den proféti èn ben bewégi den foe taki na boskopoe foe Gado. Na apostel Petrus e taki moro fara: „Disi joe sabi ini na fosi presi, dati no wan enkri profétitori foe den Santa Boekoe e doe kon foe wan égi bodoi. Bikasi noiti profétitori ben doe kon nanga na wani foe wan libisma, ma libisma ben taki foe Gado ede, soleki santa jeje ben tjari den” (2 Petrus 1:20, 21). Foedi troe profétitori no e feni en bigin na libisma, di kan lasi pasi, ma na wi koni Mekiman, dan wi sabi dati ala den profétitori di de ini Gado Wortoe sa kon troe.
25. San wi kan taki foe na sekerfasi foe na kristen howpoe foe wi?
25 Na kristen howpoe abi wan troetroe boen fondamenti. Betrouwbaar tori foe ai-kotoigi e sori dati sma di e sribi ini dede, sa opobaka foe libi èn dati Jezus Kristus sa sori en glori nanga krakti. Bigi na dé sa de te wi Masra sa opo doe wan sani tegen ala sma di wégri foe dini na Mekiman èn fri en getrow foetoeboi foe ala pina, foedi a sa opo wan njoen regtvaardiki ordening, pe no wan siki, pen nanga dede no sa de moro. — Openbaring 21:4, 5.
[Aksi foe a tori disi]
