Trowstu gi Den Wan Di Brokosaka

„Te nanga now ala den sani di Gado kria e tan geme makandra èn abi pen makandra” (Romesma 8:22). Di a sani disi ben skrifi moro leki 1900 pasa kaba, dan libisma ben pina hebi trutru. Furu sma ben brokosaka. Dati meki Kresten ben kisi deki-ati: „Taki nanga den sili di brokosaka, fu trowstu den.”​—1 Tesalonikasma 5:14.

Na ini a ten disi, a banawtu fu libisma bigi moro srefi, èn moro sma leki iniwan ten na fesi, brokosaka. ¿Ma disi musu fruwondru wi? Nôno, bika Bijbel e sori taki a ten disi na „den lasti dei” èn a e kari en den ’muilek ten di tranga fu pasa’ (2 Timoteus 3:1-5). Yesus Krestes ben taki na fesi taki na ini den lasti dei „kefalek ogri sani sa de fu si”.​—Lukas 21:7-11; Mateus 24:3-14.

Te sma e broko den ede, èn e frede, te den e sari, noso den abi tra takru firi wan heri pisi ten, dan nofotron den e kon brokosaka. A dede fu wan lobiwan, a broko di wan trow broko, a lasi di wan sma lasi wroko, noso wan siki di e go nanga langa kan meki wan sma brokosaka noso sari hebi. Sma e brokosaka tu te den firi leki den no warti noti, te den e firi leki den no man du noti bun èn te den no du san trawan ben fruwakti fu den. Wan muilek situwâsi kan hebi trutru gi iniwan sma, ma te wan sma kisi a firi taki howpu no de moro èn a no man si no wan fasi fu puru ensrefi na ini wan takru situwâsi, dan a kan brokosaka seryusu.

Sma fu fositen ben kisi den firi dati tu. Yob ben kon siki èn rampu ben miti en. A ben abi a firi taki Gado ben gowe libi en, èn dati meki a ben taki dati a ben tegu fu a libi (Yob 10:1; 29:2, 4, 5). Yakob ben brokosaka fu di a ben gersi taki en manpikin ben dede, èn dati meki a no ben wani meki sma trowstu en èn  a ben wani dede (Genesis 37:33-35). Fu di Kownu David ben abi konsensi fonfon fu den bigi sondu di a ben du, meki a ben kragi: „Heri dei mi e waka nanga sari. Mi kon de sondro firi.”​—Psalm 38:6, 8; 2 Korentesma 7:5, 6.

Na ini a ten disi, furu sma brokosaka fu di den teki tumusi furu sani poti na den tapu. Ala dei den e pruberi fu libi na wan fasi di de moro leki san den man du na frustan sei, na emotioneel sei, èn na skin sei. A sori taki hebi druk, makandra nanga takru prakseri nanga takru firi, kan du a skin wan sani èn den kan meki taki a fasi fa sani e wroko na ini na ede-tonton e kon bruya, so bun, e meki taki wan sma e brokosaka.​—Teki gersi Odo 14:30.

A Yepi Di Den Abi Fanowdu

Epafroditus, wan fosi yarihondro Kresten fu Filipi, ben „brokosaka bika [den mati fu en] ben yere taki a ben kon siki”. Kande Epafroditus, di ben kon siki baka di den mati fu en ben seni en go na Rome fu tyari sani gi na apostel Paulus, ben abi a firi taki a no ben man du san den mati fu en ben fruwakti fu en èn taki den ben si en leki wan sma di no ben man du sani bun (Filipisma 2:25-27; 4:18). Fa na apostel Paulus ben yepi en?

A ben seni Epafroditus go na oso nanga wan brifi gi den mati na Filipi èn a brifi dati ben taki: „Ontfanga [Epafroditus] na ini Masra soleki fa un gwenti, nanga ala prisiri; èn tan lobi den sortu man dati” (Filipisma 2:28-30). Taki Paulus ben taki so bun fu Epafroditus èn taki den Filipisma ben ontfanga en nanga switifasi èn nanga lobi, trutru ben musu fu trowstu Epafroditus èn ben yepi en fu no brokosaka moro.

A no abi misi taki a rai na ini Bijbel di e sori wi taki wi musu „taki nanga den sili di brokosaka, fu trowstu den”, na a moro bun rai. „Yu musu kon sabi taki trawan lobi yu leki wan sma”, wan uma ben taki di ben brokosaka. „Yu musu kon yere wan sma e taigi yu: ’Mi e frustan; a sa go bun nanga yu.’”

Nofotron, na a sma srefi di brokosaka musu go suku wan sma di e frustan den firi fu en, wan sma di a kan frutrow. A sma disi musu man arki bun èn a musu abi furu pasensi. A no musu  piri-ai gi a sma di brokosaka èn a no musu taki sani tu di e krutu a sma, soleki: ’Yu no musu firi so’ noso, ’Dati na wan fowtu denki.’ A sma di brokosaka e firi sani moro esi leki trawan, èn so wan fruferi sani di yu e taki sa meki nomo taki a sa prakseri moro takru fu ensrefi.

Wan sma di brokosaka kan abi a firi taki a no warti noti (Yona 4:3). Toku wan sma musu hori na prakseri taki san e teri trutru, na a fasi fa Gado e prakseri fu wan sma. Sma ben si Yesus Krestes „leki wan sma di no warti noti”, ma disi no ben kenki a warti di a ben warti trutru gi Gado (Yesaya 53:3). Sabi, taki neleki fa Gado lobi en lobi Manpikin, na so a lobi yu tu.​—Yohanes 3:16.

Yesus ben sari den wan di ben de na banawtu èn a ben pruberi fu yepi den fu si sortu waarde densrefi ben abi (Mateus 9:36; 11:28-30; 14:14). A ben fruklari taki Gado e si srefi den pikin fowru di no wani taki furu, leki warti sani. „Gado no e frigiti no wan fu den”, na so a ben taki. ¡Dan A musu fu si libisma di e pruberi fu du en wani, leki warti sani tu! Yesus ben taki fu den sma disi: „Srefi ala den wiwiri na tapu un ede teri kaba.”​—Lukas 12:6, 7.

A tru, taki wan sma di brokosaka srefisrefi èn di den swakifasi nanga den fowtu fu en e moro en, e feni en muilek fu bribi taki Gado e si en leki wan warti sani srefisrefi. A abi na overtoigi kande taki en no warti fu Gado lobi en èn broko En ede nanga en. „Wi ati e krutu wi kande”, na so Gado Wortu e erken. ¿Ma dati na a moro prenspari sani? Nôno, kwetikweti. Gado e frustan taki sondu libisma kan prakseri takru fu sani èn den kan krutu densrefi tu. Dati meki en Wortu e trowstu den: „Gado bigi moro wi ati èn a sabi ala sani.”​—1 Yohanes 3:19, 20.

Iya, wi hemel Tata di lobi wi, no e si soso den sondu nanga den fowtu fu wi. A sabi den sani di ben meki taki wi handri na so wan fasi, A sabi wi heri libi, den reide fu san ede wi e du sani, nanga den prakseri fu wi. A sabi taki wi kisi nanga sondu, siki, nanga dede fu wi papa èn fu dati ede bun furu sani de di wi no man du. Taki wi e firi sari èn wi ati e bron nanga wisrefi, na wan buweisi srefi taki wi no wani du sondu èn taki wi no  go tumusi fara. Bijbel e taki dati wi ’de na ondro soso sani’ sondro taki wi ben wani dati. So bun, Gado e frustan na ini sortu takru situwâsi wi de, èn na wan sari-ati fasi A e hori den swakifasi fu wi na prakseri.​—Romesma 5:12; 8:20.

„Yehovah abi sari-ati èn bunfasi”, na a dyaranti di wi kisi. „So fara leki son-opo de fu sondongo, na so fara fu wi a poti den sondu fu wi. Bika ensrefi sabi heri bun fa A meki wi, èn A e hori na prakseri taki wi na doti” (Psalm 103:8, 12, 14). Trutru, Yehovah na „a Gado fu ala trowstu, di e trowstu wi na ini ala wi banawtu”.​—2 Korentesma 1:3, 4.

A yepi di den wan di brokosaka abi moro furu fanowdu, e kon te den e go krosibei na a Gado fu den di abi sari-ati èn den e teki a kari di a e gi fu ’trowe den hebi fu den na en tapu’. A kan „gi na ati fu den sma di brokosaka, krakti baka” (Psalm 55:22; Yesaya 57:15). Dati meki Gado Wortu e gi sma deki-ati fu begi, fu di a e taki: „Trowe ala un broko-ede na [Yehovah] tapu, bika a e sorgu gi unu” (1 Petrus 5:7). Iya, te sma e begi èn e aksi Gado sani tangitangi, dan den kan kon krosibei na Gado èn nyan bun fu „a vrede fu Gado, di e pasa ala prakseri”.​—Filipisma 4:6, 7; Psalm 16:8, 9.

Te wan sma e tyari trutru kenki kon na ini a fasi fa a e libi, dan dati kan yepi en tu fu no brokosaka moro. Ala den sani leki na oefen di wan sma e oefen a skin, bun nyanyan, a hari di a e hari loktu di bun èn a rostu di a e rostu nofo, èn a luku di a no e luku telefisi tumusi furu, na prenspari sani. Wan uma ben yepi sma di brokosaka fu di a ben meki den waka bun furu. Di wan misi di ben brokosaka ben taki: „Mi no wani go waka”, dan na uma disi ben piki a misi na wan switi fasi ma toku na wan krakti fasi: „Iya, yu o go.” Na uma ben fruteri: ’Wi ben waka siksi kilometer. Di wi drai kon na oso, a misi ben weri, ma a ben firi moro bun. Yu no man bribi fa wan krakti oefening kan yepi, te leki yu pruberi en.’

Ma son leisi wi no man wini brokosaka dorodoro, srefi te wi pruberi ala sani, so srefi a yepi fu datra. „Mi pruberi ala sani,” na so wan uma di pasa 40 yari kaba ben taki, „ma toku mi brokosaka ete.” Na so den brenisma, den dofusma noso den lansma  nofotron no man kon betre tu nownowde. Toku sma di brokosaka kan kisi trowstu nanga howpu te den abi a gwenti fu leisi Gado Wortu, pe den kan kisi a trutru howpu taki den sa kon fri fu têgo fu ala siki di libisma abi.​—Romesma 12:12; 15:4.

Te No wan Sma Sa Brokosaka Moro

Di Yesus ben taki fu den ogri sani di ben o pasa na grontapu na ini den lasti dei, dan a ben taki: „Te den sani disi e bigin pasa, opo tanapu leti-opu èn opo un ede go na loktu, bika a frulusu fu unu e kon krosibei” (Lukas 21:28). Yesus ben e taki fu a fri di sma sa kon fri na ini a regtfardiki nyun grontapu fu Gado, pe „den sani srefi di Gado kria sa kon fri tu fu a katibo fu porifasi èn den sa abi a glori fri fu den pikin fu Gado”.​—Romesma 8:21.

¡A sa de wan trutru frulekti gi a libisma famiri te den kon fri fu den hebi fu a ten di pasa èn te den e wiki ibri dei nanga wan frustan di man denki krin, ala di den de fayafaya fu bigin nanga a wroko fu a dei dati! A problema fu a brokosaka di sma brokosaka no sa hendri no wan sma moro. A seiker pramisi di gi na libisma na taki Gado „sa figi puru ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba”.​—Openbaring 21:3, 4.

Te a no taki tra fasi, dan ala den bijbeltekst teki skrifi fu a New World Translation of the Holy Scriptures.