Yu Abi wan Yeye na ini Yu Di No Man Dede?

LIBI de, baka te wan sma dede? Dusundusun yari langa, libisma ben broko den ede nanga na aksi dati. Na ini ala den yarihondro di pasa, sma fu ala libimakandra prakseri dipi fu a tori disi, èn den kon bribi difrenti sani.

Na heri grontapu, so srefi a grupu èilanti na ini a kontren fu Polinesia na ini a Stille Zuidzee, furu sma e bribi taki wan „yeye” e tan na libi te wan sma dede. Wan sani na ini wan sma trutru e gowe libi en skin èn e libi go doro te a sma dede? San na a yeye na ini wan sma di de na libi? San e pasa nanga a yeye dati te wi dede? A Bijbel, a Wortu di Gado meki sma skrifi, e fruteri a waarheid; a e gi sma den yoisti piki tapu den aksi disi.

San Na a Yeye?

Na ini Bijbel, den wortu di vertaal nanga a wortu „yeye”, furutron wani taki „bro”. Ma a wani taki moro leki fu bro nomo. Fu eksempre, a Bijbel skrifiman Yakobus e taki: „A skin sondro yeye, dede” (Yakobus 2:26). So bun, yeye na a sani di e meki a skin kon na libi.

A krakti disi di e meki a skin kon na libi no kan de a bro nomo, noso a loktu, di e kon na ini den fokofoko fu wan sma. Fu san ede? Bika, te wan sma no e bro moro, dan libi de ete na ini den cel fu a skin fu wan syatu pisi ten — „fu wan tu miniti”, soleki fa The World Book Encyclopedia e taki. Fu dati ede, den muiti di trawan e meki fu yepi wan sma fu bro baka, kan meki a sma dati kisi ensrefi baka. Na fu dati ede, meki datra kan puru wan sani tu fu a wan sma skin, poti go na ini wan tra sma skin. Ma te a krakti di e gi libi na den cel fu a skin e komoto gowe, dan sma kan pruberi ala san den wani fu meki wan sma kon na libi baka, ma ala muiti sa de fu soso. Den kan bro omeni den wani, ma den no sa man tyari wán enkri cel srefi kon na libi baka. So bun, a yeye na a libikrakti  di wi no man si — a krakti di e gi libi — èn di e hori den cel na libi. A hari di wan sma e hari bro e meki taki a libikrakti disi e tan na ini a skin.​—Yob 34:14, 15.

A yeye dati de na ini libisma wawan? Bijbel e yepi wi fu kisi a yoisti piki tapu na aksi dati. A koni Kownu Salomo ben skrifi: „Suma sabi efu a yeye fu den manpikin fu libisma e opo go na loktu; èn efu a yeye fu den meti e saka go na ondro na grontapu?” (Preikiman 3:21). So bun, Bijbel e taki dati meti abi wan yeye èn taki libisma so srefi abi wan yeye. Fa dati kan?

Wi kan teki a yeye, noso a libikrakti, gersi a stroom na ini wan masyin noso na ini wan wrokosani. Wi kan gebroiki a stroom di wi no kan si, fu du difrenti sortu sani. Dati e anga fu a sortu masyin pe a stroom de na ini. Fu eksempre, stroom kan meki wan onfu kon faya, a kan meki wan computer gi informâsi èn a kan meki a teri sani, so srefi a kan meki wan telefisi sori prenki noso gi geluid. Toku, a stroom noiti no e kon gersi den masyin di a e gi krakti. A tan de wan krakti nomo. Na a srefi fasi, a libikrakti no e kon gersi den libisani di a e hori na libi. A no de wan libisani di abi eigifasi, a no abi frustan. Libisma èn so srefi meti „abi wán yeye nomo” (Preikiman 3:19). Fu dati ede, te wan sma dede, dan a yeye fu en no e libi go doro na wan tra presi leki wan yeye mekisani.

Dan san na a situwâsi fu den dedewan? San e pasa nanga a yeye te wan sma dede?

„Na Doti Yu Sa Drai Go Baka”

Di a fosi man, Adam, ben trangayesi a komando fu Gado fu espresi, dan Yehovah ben taigi en: „Ini a sweti fu yu fesi yu sa nyan brede, te leki yu drai go baka na a gron, bika na drape Gado ben teki yu puru. Bika doti yu de èn na doti yu sa drai go baka” (Genesis 3:19). Pe Adam ben de bifo Yehovah  ben meki en fu a doti fu a gron? We, a no ben de na no wan pe! A no ben de kwetikweti. So bun, di Yehovah Gado ben taigi Adam taki a ben o „drai go baka na a gron”, dan Gado ben taki nanga tra wortu dati Adam ben o dede. Adam no ben o go na a yeye kondre. Te a ben o dede, dan agen a ben o de sondro libi, a no ben o de kwetikweti. A strafu fu en ben de taki a ben o dede — a no ben sa abi libi moro — a no de so taki a ben musu go na wan tra presi.​—Romesma 6:23.

Fa a de nanga tra sma di dede? Preikiman 9:5, 10 e tyari kon na krin san na a situwâsi fu den dedewan. Drape wi e leisi: „Den dede soema no sabi noti . . . No wan wroko efoe wrokosani efoe koni efoe sabi de na ini a grebi” (Da Bijbel na ini Sranantongo). Fu dati ede, dede na a de di wan sma no de. A psalm skrifiman ben skrifi taki te wan sma dede, dan „en yeye e komoto gowe, a e go baka na en gron; na a dei dati den prakseri fu en e lasi gowe”.​—Psalm 146:4.

A de krin taki dedesma no sabi san e pasa lontu den, èn den no man du noti. Den no sabi notinoti. Den no man si yu, yere yu, noso taki nanga yu. Den no man yepi yu, den no man du yu ogri tu. Yu no abi fu frede dedesma. Ma na sortu fasi a yeye „e komoto gowe” fu wan libisma te a dede?

A Yeye „E Drai Go Baka na a Tru Gado”

Bijbel e taki dati te wan sma dede, dan „a yeye srefi e drai go baka na a tru Gado di ben gi en” (Preikiman 12:7). Disi wani taki dati wan yeye sani trutru e komoto fu a skin èn e frei go na loktu fu de nanga Gado? Kwetikweti! A fasi fa Bijbel e gebroiki a wortu „drai go baka”, no wani taki dati wan sma trutru musu abra fu wan presi go na wan tra presi. Fu eksempre, Gado ben taigi den Israèlsma: „’Drai kon baka na mi, èn mi sa drai kon baka na unu’, na so Yehovah fu den legre taki” (Maleaki 3:7). A ’drai di Israèl drai kon baka’ na Yehovah, ben wani taki dati den ben drai den baka gi wan fowtu fasi fu libi èn ben waka agen na tapu a regtfardiki pasi fu Gado. A ’drai di Yehovah drai kon baka’ na Israèl, ben wani taki dati  a ben sori en pipel bun-ati fu di a ben poti prakseri na den ete wan leisi. Na ini ala tu kefal, a ’drai di den drai kon baka’, ben abi fu du nanga a poti di den ben poti spesrutu prakseri na wan sani. Den no ben abra trutru fu wan presi go na wan tra presi.

Na so a de tu te wan sma dede. Te a yeye e „drai go baka” na Gado, dan no wan sani e gowe libi grontapu trutru fu go na hemel. Memre taki a yeye na a libikrakti. Te a libikrakti dati no de moro na ini wan sma, dan Gado wawan man gi dati baka. So bun, a yeye „e drai go baka na a tru Gado” na a fasi disi, taki iniwan howpu di a sma dati abi fu kisi libi na ini a ten di e kon, de krinkrin ini anu fu Gado now.

Fu eksempre, luku san den Buku fu Bijbel e taki fu a dede fu Yesus. Na evangelie skrifiman Lukas ben skrifi: „Yesus ben kari nanga wan tranga sten èn ben taki: ’Tata, na ini yu anu mi e poti mi yeye.’ Baka di a ben taki dati, a tapu bro” (Lukas 23:46). Di a yeye fu Yesus ben gowe komoto fu en, dan Yesus no ben de na pasi trutru fu go na hemel. Yesus no ben kisi wan opobaka te leki a di fu dri dei baka a dede. Èn a ben de 40 dei na grontapu ete bifo a ben opo go na hemel (Tori fu den Apostel 1:3, 9). Ma na a ten di a dede, dan nanga ala frutrow Yesus ben poti en yeye na ini Yehovah anu fu di a ben frutrow dorodoro taki Yehovah ben man meki en kon na libi baka.

Iya, Gado wawan kan meki wan sma kon na libi baka (Psalm 104:30). Disi e gi wi kefalek moi howpu fu tru!

Wan Howpu Di No Abi Misi

Bijbel e taki: „A yuru e kon pe ala sma di de na ini den memregrebi, sa yere [Yesus] sten èn sa kon na doro” (Yohanes 5:28, 29). Iya, Yesus ben pramisi taki ala den sma di de na ini a prakseri fu Yehovah, sa kisi wan opobaka, noso sa kon na libi baka. Na presi fu sari boskopu taki sma dede, prisiri nyunsu sa de fu yere fu den wan di Gado tyari kon baka na libi. A sa de wan prisiri sani srefisrefi fu bari wan switikon gi den lobiwan di komoto na grebi!

 Yu wani sabi fa yu kan kisi wini fu a howpu disi di Gado e gi? Wi e gi yu a kari fu skrifi go na wan fu den adres di skrifi na ondrosei, efu yu wani a brochure di nen Jeje foe den dedewan​—Den man jepi joe noso den man doe joe ogri? Den de troetroe?

Te a no taki tra fasi, dan ala den bijbeltekst teki fu a New World Translation of the Holy Scriptures.