Luku a tori disi: A de woensdag bakadina. Jeff, wan boi fu 17 yari, kaba nanga en osowroko èn now a wani go relax pikinso. A e go sidon èn a e leti a telefisi.

En papa e kon na ini a voorzaal èn yu kan si taki a e mandi.

Efu yu ben de Jeff, san yu ben o du fu no meki yu papa kisi atibron?

Son leisi yu musu suku wan tra fasi fu taki nanga yu papa nanga mama, neleki fa yu musu suku wan tra pasi te yu si taki sani tapu a pasi pe yu e rèi.

 WAN EKSEMPRE:

Wan meisje di nen Lea e taki: „A muilek gi mi fu taki nanga mi papa. Son leisi te mi e taki nanga en, mi e denki taki a e arki mi, ma dan a e aksi: ’Sorry, nanga mi yu e taki?’”

LEA KAN DU DRI SANI:

1. Bari en papa.

   Lea e bari: „Arki, no! Na wan seryusu sani mi wani fruteri yu!”

2. No taki moro nanga en papa.

   Lea no e pruberi moro fu taki nanga en papa fu a probleem fu en.

3. Wakti wan moro bun ten fu taki fu a tori baka.

   Lea e taki nanga en papa wan tra leisi.

San yu ben o taigi Lea fu du?

A BUN FU SABI DISI: Lea papa prakseri de na wan heri tra presi. A no e si taki Lea wani taki fu wan probleem. Dus efu Lea ben o teki A, en papa ben o denki taki na somaar a e bari. Kande a no ben o wani arki en srefi. A ben o sori tu taki Lea no abi lespeki gi en papa (Efeisesma 6:2). Dus bari no ben o yepi nowan fu den tu.

Efu Lea ben o teki B, dan kande a ben o gersi leki dati na wan bun sani fu du. Ma dati no de so. Fu san ede? Fu di efu Lea wani taki a probleem fu en lusu, dan a musu taki nanga en papa. Efu a wani taki en papa yepi en, dan a musu fruteri en san du en. A no o feni yepi efu a no e taki.

Ma te Lea e teki C, dan a no e meki noti tapu en fu taki nanga en papa. Na presi fu dati a e pruberi fu taki fu a tori wan tra leisi. Kande Lea feni taki a kan skrifi en papa wan brifi tu, fu di dati kan meki a firi bun wantewante.

A brifi ben o yepi en tu fu taki krin san a wani taigi en papa. Te en papa e leisi a brifi, a o sabi san Lea ben wani taigi en. Dati o yepi en fu frustan san na a probleem fu Lea. Dus C e tyari wini kon gi Lea nanga en papa. Awinsi Lea e go taki langalanga nanga en papa noso a e skrifi en wan brifi, a „du muiti fu libi bun” nanga en papa. A du san Bijbel e taki.—Romesma 14:19.

Sortu tra sani Lea ben kan du?

Luku efu yu kan denki wan tra sani di Lea ben kan du. Dan denki san kan pasa te a du dati.

Hori na prakseri taki son leisi yu e taki wan sani, ma yu papa noso mama e frustan wan heri tra sani.

FU EKSEMPRE:

Yu papa noso mama e aksi yu: „Fa a gersi leki wan sani e du yu?” Yu e piki den: „Nèks no du mi.”

Ma kande yu papa noso mama e frustan: „Mi no wani taki fu a tori. Mi no denki taki yu o frustan mi. Mi o fruteri den mati fu mi a probleem. Mi no o taki nanga yu.”

Kon meki wi taki dati yu abi wan probleem èn yu papa noso mama wani yepi yu. Ma dan yu e taigi den: „No span. Mi sabi san mi o du.”

• San yu papa noso mama e frustan kande?

• San ben o de a moro bun sani fu taki?