SOLEKI fa Yehovah ben taki na fesi, dan Israel prati na ini tu pisi baka di Salomo drai baka gi a tru anbegi. En manpikin Rehabeyam di ben tiri baka en, ben ogri. Leki bakapisi fu dati, tin lo fu Israel opo densrefi teige en èn den seti a noordsei kownukondre fu Israel. Tu lo tan horibaka gi a kownu di ben de wan bakapikin fu David, èn di ben e tiri na ini Yerusalem. Den tu lo disi kon tron a zuidsei kownukondre fu Yuda.

Wan lo dyugudyugu nanga problema ben de na ini den tu kownukondre disi, fu di den kownu no ben poti bribi na ini Gado èn den ben trangayesi en. A noordsei kownukondre fu Israel ben abi moro problema leki a di fu Yuda, fu di sensi na a bigin den kownu drape ben gi sma deki-ati fu anbegi falsi gado. Aladi den profeiti soleki Elia nanga Elisa ben du bigi wondru, iya, aladi ala tu ben gi sma wan opobaka srefi, toku Israel ben e tan du san ogri. Te fu kaba, Gado gi pasi taki den Asiriasma pori a noordsei kownukondre.

Yuda ben tan sowan wán hondro yari moro langa leki Israel, ma te fu kaba Gado strafu den tu. Wan tu fu den kownu fu Yuda nomo ben gi yesi na den warskow fu den profeiti fu Gado èn den ben pruberi fu meki a pipel drai go baka na Yehovah. Fu eksempre, Kownu Yosia bigin puru falsi anbegi na ini Yuda èn a meki a tempel fu Yehovah kon bun baka. Di sma feni a buku fu a Wet di Gado ben gi Moses na a bigin, dan a sani disi ben naki Yosia ati. Fu dati ede a du moro muiti fu meki sma drai go baka na Yehovah.

Ma a de wan sari sani taki den kownu di ben kon baka Yosia, no ben teki a bun eksempre fu en. Dati meki Yehovah gi pasi taki a pipel fu Babilon wini Yuda. Den pori Yerusalem nanga a tempel fu en. Den sma di tan na libi ben go na ini katibo na Babilon. Gado ben taki na fesi taki den ben o de 70 yari na ini katibo. Na ini a pisi ten dati, sma no ben libi na ini Yuda, teleki a pipel ben o kisi na okasi fu drai go baka na Yerusalem, soleki fa Gado ben pramisi.

Ma nowan bakapikin fu David ben o tiri teleki a pramisi Frulusuman, noso Mesias, bigin tiri. Moro furu fu den kownu di ben tiri na ini Yerusalem, ben sori taki sondu libisma no bun nofo fu tiri. Na soso a Mesias ben o bun nofo fu du dati. Sobun, Yehovah taigi a lastiwan fu den kownu dati: „Puru . . . a kownu-ati fu yu. . . . Nowan sma o kisi en, teleki a sma kon di abi a reti fu kisi en. Dan mi o gi en a tirimakti.”—Esekièl 21:26, 27.

—Den tori disi teki puru fu 1 Kownu; 2 Kownu; 2 Kroniki kapitel 10 te go miti 36; Yeremia 25:8-11.