1. Suma gi wi libi?

„YEHOVAH na Gado trutru. En na a libilibi Gado” (Yeremia 10:10). Na en meki wi èn na en gi wi libi. Bijbel e taki: „Yu meki ala sani. Na fu di yu ben wani, meki den sani disi kon de èn na yu meki den” (Openbaring 4:11). Iya, Yehovah ben wani gi wi libi. Libi na wan warti kado di wi kisi fu en.—Leisi Psalm 36:9.

2. San wi musu du fu abi wan bun libi?

² Yehovah e gi wi san wi abi fanowdu fu tan na libi. A e sorgu gi sani soleki nyanyan nanga watra (Tori fu den apostel 17:28). Ma san moro prenspari gi en, na taki wi prisiri nanga a libi (Tori fu den apostel 14:15-17). Efu wi wani abi wan bun libi, dan wi musu gi yesi na den wet fu Gado.—Yesaya 48:17, 18.

3. San Yehovah du di Kain kiri Abel?

³ Bijbel e leri wi taki a libi fu wi nanga a libi fu tra sma warti gi Yehovah. Fu eksempre, di Kain, a manpikin fu Adam nanga Eva, ben atibron nanga en pikin brada Abel, dan Yehovah taigi Kain taki a musu dwengi ensrefi. Ma Kain no arki èn a kisi so wan bigi atibron taki a „naki en brada Abel kiri” (Genesis 4:3-8). Yehovah strafu Kain fu di a kiri Abel (Genesis 4:9-11). Sobun, atibron nanga bita-ati no bun, fu di den kan meki wi du ogri nanga trawan. Wan sma di abi den fasi disi no kan kisi têgo  libi. (Leisi 1 Yohanes 3:15.) Efu wi wani taki Yehovah feni wi bun, dan wi musu leri fu lobi ala sma.—1 Yohanes 3:11, 12.

4. San wán fu den wet di Gado ben gi den Israelsma e leri wi fu a libi?

⁴ Dusundusun yari baka dati, Yehovah gi Moses den Tin Komando. Den ben e sori taki Gado e si a libi leki wan warti sani. Wan fu den wet ben de: „Un no musu kiri sma” (Deuteronomium 5:17). Efu wan sma ben kiri wan trawan fu espresi, dan den ben musu kiri en tu.

5. Fa Gado e feni en te sma e puru bere?

⁵ Fa Gado e feni en te sma e puru bere? Srefi a libi fu wan pikin di no gebore ete warti gi Yehovah. Wan fu den wet di Yehovah ben gi den Israelsma ben taki dati efu wan sma ben gi wan mama mankeri èn a sani dati ben meki taki a beibi fu en dede, dan a sma dati ben o abi fu dede. (Leisi Eksodes 21:22, 23; Psalm 127:3.) Disi e leri wi taki a fowtu fu puru bere.—Luku „Ete wan tu sani” 28.

6, 7. Fa wi kan sori Yehovah taki a libi warti gi wi?

⁶ Fa wi kan sori Yehovah taki wi e si a libi fu wi nanga a libi fu tra sma leki wan warti sani? Wi kan du dati te wi no e du noti di kan meki wi noso tra sma lasi den libi. Sobun, wi no o gebroiki tabaka, wi no o smoko marwana noso tra drugs fu di den kan du ogri nanga wi èn den kan kiri wi srefi.

⁷ Na Gado gi wi libi èn na en meki wi. Dati meki wi musu gebroiki wi skin leki fa en wani. Sobun, wi musu sorgu wi skin bun. Efu wi no e du dati, dan Gado no o si wi leki sma di krin (Romesma 6:19; 12:1; 2 Korentesma 7:1). Efu wi no e si a libi leki wan warti sani, wi no o man anbegi Yehovah di gi wi libi. A kan muilek srefisrefi fu tapu nanga wan takru gwenti. Ma efu wi e tan  meki muiti fu du dati fu di wi e si a libi leki wan warti sani, dan Yehovah o yepi wi.

8. San wi o du fu sorgu taki wi no du sani di kan meki wi noso tra sma lasi den libi?

⁸ Wi leri taki a libi na wan warti kado. Yehovah e fruwakti taki wi no o du sani di kan meki wi noso tra sma lasi den libi. Dati meki wi e luku fa wi e rèi wi wagi, wi motro, noso iniwan tra sani di wi e rèi. Wi no e du sport pe wi musu feti noso pe wi kan kisi bigi mankeri (Psalm 11:5). Wi e sorgu tu taki ala sani bun na wi oso, so taki sma no kisi mankeri. Yehovah ben taigi den Israelsma: „Efu yu bow wan nyun oso, yu musu bow wan pikin skotu na tapu a daki, so taki sma no fadon komoto fu a daki. Na so yu no o kisi brudu-paiman.”—Deuteronomium 22:8.

9. Fa wi musu si den meti?

⁹ Srefi a fasi fa wi e si den meti, prenspari gi Yehovah. A e gi pasi taki wi e kiri meti fu abi nyanyan nanga krosi, èn wi mag kiri wan meti te a kan du ogri nanga wi (Genesis 3:21; 9:3; Eksodes 21:28). Ma a fowtu fu du ogri nanga meti, noso fu kiri den soso fu kan abi prisiri.—Odo 12:10.

10. Fa wi du sabi taki brudu e prenki a libi?

¹⁰ Brudu na wan santa sani gi Yehovah, fu di brudu e prenki a libi. Baka di Kain kiri Abel, Yehovah taigi Kain: „A brudu fu yu brada e bari kari mi komoto fu a gron” (Genesis 4:10). A brudu fu Abel ben prenki a libi fu en èn Yehovah strafu Kain fu di a kiri Abel. Baka a Frudu na ini den dei fu Noa, Yehovah sori sma baka taki brudu e prenki a libi. Yehovah ben gi Noa nanga en osofamiri  primisi fu nyan meti. A ben taki: „Unu kan nyan ibri meti di e libi na grontapu. Neleki fa mi gi unu ala froktu nanga gruntu fu nyan, na so mi e gi unu ala den meti disi fu nyan.” Ma wan sani ben de di den no ben mag nyan. Yehovah ben taki: „Te a libi fu wan meti, sobun, a brudu fu en de na ini en skin ete, dan un no musu nyan en.”—Genesis 1:29; 9:3, 4.

11. Sortu wet di abi fu du nanga brudu, Yehovah ben gi den Israelsma?

¹¹ Sowan 800 yari baka di Yehovah taigi Noa fu no nyan brudu, a gi en pipel a wet disi baka: „Efu wan Israelsma noso wan trakondre sma di e tan na un mindri, go onti èn a kiri wan busimeti noso wan fowru di unu kan nyan, dan a musu trowe a brudu fu a meti na gron èn a musu tapu en nanga doti.” Baka dati a taki: „Un no musu nyan a brudu” (Lefitikus 17:13, 14). Yehovah ben wani taki en pipel ben musu si brudu leki wan santa sani ete. Den ben kan nyan a meti, ma den no ben mag nyan a brudu. Te den ben kiri wan meti fu nyan, dan den ben musu trowe a brudu na gron.

12. Fa Kresten e si brudu?

¹² Wan tu yari baka di Yesus dede, den apostel nanga den owruman na ini a Kresten gemeente na ini Yerusalem kon makandra fu bosroiti na sortuwan fu den wet di den Israelsma ben kisi, den Kresten ben musu hori densrefi ete. (Leisi Tori fu den apostel 15:28, 29; 21:25.) Yehovah yepi den fu frustan taki brudu ben de wan warti sani gi en èn den ben musu tan si en leki wan santa sani. Den fosi Kresten no ben mag nyan noso dringi brudu èn den no ben mag nyan wan meti efu a brudu no ben lon komoto na ini en skin. Efu toku den ben o du dati, dan a ben o ogri neleki te den ben o anbegi falsi gado noso  du hurudu. Sensi a ten dati tru Kresten weigri fu nyan noso dringi brudu. Fa a de na ini a ten disi? Te now ete Yehovah wani taki wi si brudu leki wan santa sani.

13. Fu san ede Kresten no e teki brudu?

¹³ Disi wani taki dati Kresten no e teki brudu tu? Iya. Yehovah ben taigi wi taki wi no musu nyan noso dringi brudu. Efu wan datra taigi yu fu no dringi sopi, yu ben o spoiti en go na ini yu skin? Nôno, yu no ben o du dati! Na a srefi fasi a wet di wi kisi fu no nyan noso dringi brudu wani taki dati wi no e teki brudu.—Luku „Ete wan tu sani” 29.

14, 15. Kresten abi lespeki gi a libi, ma den o trangayesi Gado fu di den wani tan na libi? Fruklari dati.

¹⁴ Ma san wi o du te datra taigi wi taki wi o dede efu wi no teki brudu? Ibri sma musu bosroiti efu a o gi yesi na a wet fu Gado di abi fu du nanga brudu. Kresten abi bigi lespeki gi a libi di Gado gi wi. Dati meki den o suku tra dresi di kan yepi den fu tan na libi, ma den no o teki brudu.

¹⁵ Wi e du tranga muiti fu abi wan bun gosontu, ma wi no e teki brudu fu di a libi na wan warti sani gi Gado. A moro prenspari fu gi yesi na Yehovah, leki fu trangayesi en fu di wi wani tan na libi. Yesus ben taki: „A sma di wani kibri en libi, o lasi en. Ma a sma di lasi en libi fu mi ede, o feni en” (Mateyus 16:25). Wi wani gi yesi na Yehovah fu di wi lobi en. A sabi san bun gi wi èn wi e si a libi leki wan santa sani èn leki wan warti sani neleki Yehovah.—Hebrewsma 11:6.

16. Fu san ede den anbegiman fu Gado e gi yesi na en?

¹⁶ Den anbegiman fu Gado di e dini en nanga den heri ati, teki a bosroiti fu gi yesi na a wet di abi fu du nanga brudu. Den no o nyan noso dringi brudu èn den no  o teki brudu. * Ma den o teki tra dresi di kan yepi den fu tan na libi. Den de seiker taki a sma di gi wi libi èn di meki a brudu sabi san bun gi den. Yu e bribi taki Gado sabi san bun gi yu?

17. San na a wan-enkri fasi fa Yehovah ben wani taki den Israelsma ben musu gebroiki brudu?

¹⁷ Na ini a Wet di Gado ben gi Moses, Yehovah taigi den Israelsma: „A libi fu wan libisani de na ini en brudu. Misrefi seti sani fu unu poti brudu na tapu na altari, so taki unu kan kisi pardon fu sondu. Bika na brudu wawan kan meki taki wan sma kisi pardon fu sondu” (Lefitikus 17:11). Efu den Israelsma ben sondu, dan den ben kan gi wan meti leki ofrandi fu aksi Yehovah pardon èn den ben kan aksi a priester fu trowe pikinso fu a brudu fu a meti tapu na altari na a tempel. Disi na a wan-enkri fasi fa Yehovah ben wani taki den Israelsma ben musu gebroiki brudu.

18. San na ofrandi di Yesus tyari e du gi wi?

¹⁸ Di Yesus kon na grontapu a gi en libi, noso en brudu, so taki wi kan kisi pardon fu sondu. Fu di a du dati meki a wet di ben e taki dati sma musu tyari meti leki ofrandi no ben e teri moro (Mateyus 20:28; Hebrewsma 10:1). Yesus en libi ben abi so furu waarde taki Yehovah ben kan gebroiki na ofrandi fu en fu gi ala libisma na okasi fu libi fu têgo.—Yohanes 3:16; Hebrewsma 9:11, 12; 1 Petrus 1:18, 19.

19. San wi musu du efu wi no wani „abi nowan brudu-paiman”?

 ¹⁹ Libi na wan warti kado di wi kisi fu Yehovah èn wi e warderi en trutru! Wi wani fruteri sma taki efu den poti bribi na ini Yesus, den o man libi fu têgo. Wi lobi sma èn wi o du ala san wi man fu leri den fa den kan kisi libi (Esekièl 3:17-21). Efu wi e du dati, dan neleki na apostel Paulus wi o man taki: „Mi no abi nowan brudu-paiman, bika mi no hori noti na baka. Iya, mi fruteri unu ala sani di Gado wani libisma fu du” (Tori fu den apostel 20:26, 27). Iya, wi e sori bigi lespeki gi a libi èn gi brudu te wi e fruteri trawan fu Yehovah èn fu a fasi fa a e si a libi.