ALA sma abi broko-ede, srefi den sma di e dini Yehovah. A psalm skrifiman ben abi broko-ede tu di a taki: „Den prakseri fu mi di ben e trobi mi, ben kon hebi gi mi” (Psalm 94:19). Yesus ben taki tu dati na a ten fu a kaba den broko-ede fu na aladei libi ben o meki en muilek gi wi fu dini Yehovah (Lukas 21:34). Fa a de nanga yu? Moni problema, problema na ini na osofamiri, noso gosontu problema e meki en hebi gi yu tu? Fa Yehovah kan yepi yu?

Wi wawan no o man tyari den broko-ede fu wi, dati meki wi abi yepi fanowdu. Na apostel Paulus ben skrifi: „Wi e kisi ala sortu hebi tesi, ma a no de so taki wi no man du noti moro. Wi e bruya, ma a no de so taki wi no man feni nowan lusu. . . . . Den naki wi trowe, ma wi no dede.” San e yepi wi fu horidoro? „A krakti di bigi pasa marki.” A krakti dati e kon fu wi Almakti Gado, Yehovah.​—2 Korentesma 4:7-9.

Prakseri fa yu kisi „a krakti di bigi pasa marki” na ini a ten di pasa. Yu e memre fa wan moi lezing gi yu deki-ati fu abi moro warderi gi a lobi fu Yehovah? A bribi fu yu ben kon moro tranga di yu fruteri trawan taki grontapu o tron wan paradijs? Te wi e go na den Kresten konmakandra èn wi e fruteri trawan san wi e bribi, dan wi e kisi krakti fu horidoro aladi wi abi broko-ede. Disi e yepi wi tu fu firi korostu so taki wi kan dini Yehovah nanga prisiri.

Ma kande yu feni taki yu abi tumusi furu fu du. Fu eksempre, Yehovah e aksi wi fu suku fosi a Kownukondre èn fu tan du ala den sani di abi fu du nanga na anbegi fu wi (Mateyus 6:33; Lukas 13:24). Ma kande famiriman nanga sma na wrokope e gens yu, kande yu e siki ibri leisi noso kande yu abi tra problema na ini yu osofamiri di meki taki yu no man du so furu moro. Kande yu wroko e teki furu fu yu ten nanga krakti so taki yu no man du furu na ini a gemeente. Efu yu musu du so furu sani ma yu no abi nofo ten nanga krakti fu du alamala, dan yu kan bruya. Kande yu aksi yusrefi efu Yehovah no e aksi tumusi furu fu yu.

Yehovah sabi san e miti wi. Noiti a e fruwakti moro fu wi leki san wi man du. A e frustan tu taki wi abi ten fanowdu fu kisi wisrefi te wi weri èn te wi abi broko-ede.​—Psalm 103:13, 14.

Luku fu eksempre fa Yehovah sorgu gi a profeiti Elia. Elia ben lasi-ati èn a kon frede so te taki a lowe go na ini a sabana. San Yehovah du? A piri-ai gi Elia èn a seni en go baka fu du en wroko? Nôno. Tu leisi Yehovah seni wan engel fu wiki Elia na wan safri fasi èn fu gi en nyanyan.  Ma toku baka 40 dei, Elia ben e frede ete èn a ben sidon nanga broko-ede. San Yehovah du moro fu yepi en? Na a fosi presi, Yehovah sori Elia taki a man kibri en. Dan Yehovah trowstu Elia nanga „wan tiri, safri sten”. Te fu kaba, Yehovah taigi Elia taki dusundusun tra sma ben de di ben e dini Gado ete. Syatu baka dati, Elia kisi ensrefi baka èn a ben kon de wan fayafaya profeiti baka (1 Kownu 19:1-19). San wi kan leri fu disi? Di den broko-ede ben moro Elia, dan Yehovah ben abi pasensi nanga sari-ati nanga en. Yehovah no kenki. A e sorgu gi wi na a srefi fasi tu.

Te yu e luku san yu kan gi Yehovah, dan no pruberi fu du san yu no man. No luku taki yu no man du so furu moro leki fosi. Luku wan eksempre: Te wan sma di ben e lon streilon, no oefen omeni mun noso omeni yari langa, dan a no kan bigin lon wantronso na ini wan streilon. Na presi fu dati, a e oefen pikinsopikinso teleki a man lon tranga baka. Kresten de leki sma di de na ini wan streilon. Den abi wán sani na prakseri èn dati meki den e oefen (1 Korentesma 9:24-27). Fu san ede yu no e pruberi fu du wan sani di yu man doro now? Fu eksempre, yu kan bosroiti fu bigin go na wan gemeente konmakandra. Aksi Yehovah fu yepi yu du dati. Te a bribi fu yu e kon tranga baka, dan yu o „tesi èn si taki Yehovah bun” (Psalm 34:8). Hori na prakseri taki ala sani di yu e du fu sori taki yu lobi Yehovah, awansi o pikin a sani dati de, na wan bigi sani gi en.​—Lukas 21:1-4.

Fa Yehovah yepi June fu drai kon baka na en? June e fruteri wi: „Mi tan begi Yehovah fu yepi mi. Dan a frow fu mi boi taigi mi taki wan kring konmakandra ben o hori na ini a foto pe mi e libi. Mi bosroiti fu go wán dei na a programa. Mi ben breiti srefisrefi fu de baka nanga a pipel fu Yehovah! A konmakandra dati yepi mi trutru. Na dati mi ben abi fanowdu fu kisi misrefi baka. Now mi e dini Yehovah baka nanga prisiri. Mi sabi now san na a moro prenspari sani na ini a libi. Mi e frustan now taki mi abi mi brada nanga sisa fanowdu èn taki mi musu teki a yepi fu den. Mi breiti taki ten ben de ete fu drai kon baka.”