Yehovah wani taki trowpatna musu tan na makandra, soleki fa den ben pramisi. Di Yehovah tyari a fosi man nanga uma kon na wán leki trowpaar, dan a taki: „Wan man . . . o tai hori na en wefi èn den o tron wán skin.” Bakaten, Yesus Krestes taki den srefi wortu dati baka, èn a taki tu: „Fu dati ede, san Gado tyari kon na wán nowan sma musu prati” (Genesis 2:24; Mateyus 19:3-6). Sobun, Yehovah nanga Yesus e si a trowlibi leki wan sani di musu tan fu ala ten. Na dede wawan kan prati sma di trow (1 Korentesma 7:39). Fu di a trowlibi na wan santa sani, meki a de wan seryusu sani te sma e broko trow. Fu taki en leti, Yehovah no lobi en kwetikweti te sma e broko trow na wan fasi di no e kruderi nanga Bijbel.​—Maleaki 2:15, 16.

Soleki fa Bijbel e sori, dan o ten wan sma kan broko trow? We, Yehovah no lobi en te sma e du sutadu nanga hurudu  (Genesis 39:9; 2 Samuel 11:26, 27; Psalm 51:4). A e tegu so te gi hurudu, taki a e gi pasi taki sma e broko trow te a trowpatna fu den du hurudu. (Na ini paragraaf 7 fu kapitel 9, yu kan leisi moro fini san na hurudu.) Te wan sma en trowpatna du hurudu, dan Yehovah e gi a sma disi a reti fu bosroiti efu a o tan nanga a trowpatna dati, noso efu a o broko trow nanga en (Mateyus 19:9). Dati meki te wan sma wani broko trow fu di en patna du hurudu, dan a sma dati no e du wan sani di Yehovah no feni bun. Ma dati no wani taki dati a Kresten gemeente e gi sma deki-ati fu broko trow. Fu taki en leti, son leisi wan Kresten kan bosroiti fu tan nanga en patna, spesrutu te a patna dati sori trutru berow. Ma te fu kaba, iniwan sma di wani broko trow fu di Bijbel e gi en pasi fu du dati, musu teki en eigi bosroiti, èn a o abi fu tyari den bakapisi fu a bosroiti di a teki.​—Galasiasma 6:5.

Ma son leisi wan muilek situwâsi kan meki taki wan Kresten e broko trow noso a e prati nanga a trowpatna fu en, aladi a patna no du hurudu. Na ini den situwâsi disi, Bijbel e sori taki a sma di gowe musu „tan sondro masra (noso wefi), noso a musu meki en bun baka nanga en masra (noso wefi)” (1 Korentesma 7:11). A Kresten disi no mag suku wan tra masra noso wefi fu trow nanga en (Mateyus 5:32). Wi o go luku wan tu sani di meki taki son Kresten bosroiti fu prati nanga a patna fu den.

Te a masra e weigri fu sorgu gi en osofamiri. Son leisi wan masra kan weigri fu sorgu gi en osofamiri, aladi a man du dati. Kande na osofamiri e pina srefisrefi fu di den no abi nyanyan, bun krosi, noso wan tanpe. Bijbel e taki: „Efu wan sma no e sorgu gi den . . . sma fu en osofamiri, dan a drai en baka gi a bribi èn a takru moro wan sma di no abi bribi” (1 Timoteyus 5:8). Efu so wan man no wani kenki den fasi fu en, dan a wefi kan bosroiti efu a o go na krutubangi fu prati nanga en masra. Kande a e du dati fu di a feni taki dati moro bun gi en nanga den pikin. A no de fu taki dati Kresten owruman musu si en leki wan seryusu sani te wan sisa  e fruteri den taki a masra e weigri fu sorgu na osofamiri, èn den musu ondrosuku a tori bun. Te wan Kresten e weigri fu sorgu en osofamiri, dan a kan pasa taki den puru en fu a gemeente.

Te wan sma e fon en trowpatna. Son leisi wan sma kan fon en trowpatna so te taki a kisi hebi mankeri. Efu a sma di e fon en trowpatna na wan Kresten, dan den owruman musu ondrosuku a tori. Efu wan Kresten gwenti fu kisi bigi atibron, èn efu a gwenti fu du ogri nanga trawan, dan a kan pasa taki den puru en fu a gemeente.​—Galasiasma 5:19-21.

Te wan sma e tapu pasi gi en trowpatna fu anbegi Gado. Kande wan sma e tapu pasi doronomo gi en trowpatna fu teki prati na a tru anbegi, noso kande a e dwengi en fu pasa den wet fu Gado. Te dati de so, dan a trowpatna musu bosroiti efu a wan-enkri fasi fa a kan „gi yesi na [Gado leki tiriman] moro leki na libisma”, na fu go na krutubangi fu prati nanga en patna.​—Tori fu den apostel 5:29.

Na ini ala den situwâsi di kari na ini a pisi disi, nowan sma musu dwengi a patna di no du noti, fu prati noso fu tan na en trowpatna. Aladi lepi Kresten nanga owruman kan yepi a sma èn den kan gi en rai di komoto fu Bijbel, toku den no sabi finifini sortu problema wan masra nanga en wefi abi. Na Yehovah wawan sabi dati. A no de fu taki dati wan wefi no ben o sori lespeki gi Gado èn gi a trowlibi efu a ben o lei taki en nanga en masra abi bigi problema na ini a trowlibi, soso fu di a wani prati nanga en masra. Wi kan taki a srefi fu wan masra di ben o du dati. Awansi fa wan sma e pruberi fu kibri sani, Yehovah sabi krin sortu triki sani a e du, soso fu man prati nanga a trowpatna fu en. Iya, „a sma di wi musu gi frantwortu, e si ala sani krin èn nowan sani kibri gi en” (Hebrewsma 4:13). Ma efu wan Kresten de na ini den sortu situwâsi disi wan langa pisi ten kaba, dan nowan sma musu krutu en efu a e bosroiti fu prati nanga en trowpatna. Te fu kaba, „wi alamala sa tanapu na fesi a krutuman-sturu fu Gado”.​—Romesma 14:10-12.