1, 2. San Bileam du fu kisi a pipel fu Yehovah?

A FISIMAN e go uku na a presi pe a lobi uku. A wani fanga wan spesrutu sortu fisi. A e poti a yoisti beti na a uku fu en, èn a e fringi a lin go na ini a watra. Syatu baka dati, wan fisi e hari a lin span teleki na uku-tiki e boigi, èn a fisiman e hari a fisi kon na syoro. A e lafu fu di a sabi taki a gebroiki a yoisti beti.

² Na ini a yari 1473 Fosi Krestes, wan man di nen Bileam, ben denki bun sortu beti a ben o gebroiki. Ma a sani di a ben abi na prakseri, na fu fanga a pipel fu Gado di ben seti kampu na ini Moab-sabana, krosibei fu a Pramisi Kondre. Bileam ben taki dati a ben de wan profeiti fu Yehovah, ma fu taki en leti, a ben de wan gridi man di sma ben yuru fu fluku Israel. Ma Yehovah sorgu taki Bileam blesi den Israelsma. Fu di Bileam ben wani kisi pai gi a wroko fu en, meki a prakseri fu kisi a pipel fu du seryusu sondu, so taki den eigi Gado ben o fluku den. Na a sani dati Bileam ben abi na prakseri di a fringi en beti fu kisi den Israelsma. A beti dati ben de den moi yongu-uma fu Moab.​—Numeri 22:1-7; 31:15, 16; Openbaring 2:14.

3. San ben de a bakapisi di Bileam gebroiki a beti fu en?

 ³ Bileam ben abi bun bakapisi? Iya, a kisi a pipel fu Gado. Dusundusun yonkuman fu Israel „du hurudu nanga den uma fu Moab”. Boiti dati, den bigin anbegi den gado fu den Moabsma. Den bigin anbegi srefi a tegu Bâal fu Peor, wan gado di sma ben e anbegi fu kisi furu pikin. A sani disi meki taki 24.000 Israelsma dede leti bifo den go na ini a Pramisi Kondre. Dati ben de wan bigi rampu trutru!​—Numeri 25:1-9.

4. San meki taki dusundusun Israelsma du hurudu?

⁴ Fa a du kon taki a rampu disi miti Israel? Furu sma ben kon abi wan takru ati. Den ben frigiti Yehovah, a Gado di ben puru den na ini Egepte, a Gado di ben gi den nyanyan na ini a gran sabana, èn a Gado di ben tyari den go na ini a Pramisi Kondre sondro taki ogri miti den (Hebrewsma 3:12). Na apostel Paulus ben poti prakseri na a tori dati di a skrifi: „Wi no musu libi wan hurulibi tu, soleki fa sonwan fu den ben e huru, bika dati meki taki tutenti na dri dusun fu den dede na ini wán dei.” *​—1 Korentesma 10:8.

5, 6. San wi kan leri fu a sani di miti den Israelsma na ini Moab-sabana?

 ⁵ A pipel fu Gado na ini a ten disi, de fu go na ini wan moro prenspari pramisi kondre. Den e leri furu prenspari sani fu a tori di skrifi na ini Numeri (1 Korentesma 10:11). Fu eksempre, neleki den Moabsma fu owruten, sma na ini a ten disi e poti furu prakseri na seks, ma a situwâsi moro ogri srefi. Boiti dati, ibri yari dusundusun Kresten e fadon na ini a trapu fu hurudu, a srefi sani di meki taki den Israelsma fadon (2 Korentesma 2:11). Neleki Simri di ben prefuru fu tyari wan uma fu Midian pasa na ini a kampu fu Israel go te na ini en tenti, son sma di e kon makandra nanga a pipel fu Gado èn srefi wan tu dopu Kresten, abi wan takru krakti tapu trawan na ini a Kresten gemeente.​—Numeri 25:6, 14; Yudas 4.

⁶ Yu e frustan taki yu de na ini wan srefi sortu situwâsi leki a di fu den Israelsma di ben de na ini Moab-sabana? Yu kan si a nyun grontapu di yu e fruwakti so langa kaba, a pai di yu o kisi dyonsro? Efu dati de so, dan du ala san yu man so taki Gado kan tan lobi yu. Gi yesi na a komando disi: „Lowe gi hurudu.”​—1 Korentesma 6:18.

7, 8. San na „hurudu”? Fa sma di e du hurudu e koti san den sai?

⁷ Soleki fa Bijbel e sori, dan „hurudu”, noso hurulibi (porneya, na ini Grikitongo), abi fu du nanga iniwan fasi fa sma e abi seks nanga wan tra sma, aladi den no trow. Te sma e du sutadu, te den e seri den  skin, te den abi seks nanga wan tra sma di no de a trowpatna fu den (sosrefi te den e gebroiki den mofo fu prei nanga a syenpresi fu a sma dati, noso te den e gebroiki a bakasei fu a sma disi fu abi seks), dan dati na hurulibi. Te mansma abi seks nanga mansma, te umasma abi seks nanga umasma, èn te sma abi seks nanga meti, dan dati na hurudu tu. *

⁸ Bijbel e taki krin: Den sma di e libi wan hurulibi no kan tan wan memre fu a Kresten gemeente, èn den no o kisi têgo libi (1 Korentesma 6:9; Openbaring 22:15). Boiti dati, den sma disi e meki en muilek gi densrefi, fu di trawan no o frutrow den moro èn den e lasi lespeki gi densrefi. Den e kisi problema na ini a trowlibi fu den, den e kisi konsensi fonfon, den e hori bere di den no ben wani, den e kisi siki, èn son leisi den e dede srefi. (Leisi Galasiasma 6:7, 8.) Fu san ede yu ben o libi na wan fasi di e tyari so furu problema kon? A sari fu taki dati furu sma no e prakseri den takru bakapisi dati te den e bigin du sani di o meki taki den du hurudu te fu kaba. Nofo tron, dati e bigin te sma e luku porno.

9. A tru taki porno no e tyari takru bakapisi kon, soleki fa son sma e denki? Fruklari dati.

⁹ Na ini furu kondre, porno de fu si na ini buku di sma e seri, a de na ini poku, tapu telefisi, èn a lai tapu  Internet. * A tru taki porno no e tyari takru bakapisi kon, soleki fa son sma e denki? Dati no de so! Sma di e luku porno kan kisi a gwenti fu prei nanga a syenpresi fu den, èn den kan meki „den morsu sekslostu basi den”. A sani disi kan meki taki den sma disi no man libi sondro seks, den e kon abi takru lostu, den e  kisi bigi problema na ini a trowlibi, èn den kan broko trow srefi (Romesma 1:24-27; Efeisesma 4:19). * Wan ondrosukuman e agersi a libi di sma no man libi sondro seks nanga kanker. A e taki: „Neleki fa kanker e tan gro èn a muilek fu dresi, na so moro nanga moro den sma dati e wani abi seks èn a muilek gi den fu dwengi densrefi.”

10. Fa wi kan gi yesi na a rai di skrifi na Yakobus 1:14, 15? (Luku sosrefi a faki „ Mi kisi a krakti fu libi wan krin libi”.)

¹⁰ Luku san skrifi na Yakobus 1:14, 15: „Ibri sma e kisi tesi fu di en eigi lostu e hari en èn e kori en. Te a kweki a lostu, a e tyari sondu kon te fu kaba. Te a sondu du kaba, dan dati e tyari dede kon.” Sobun, efu yu bigin kisi takru lostu, dan puru dati wantewante na ini yu prakseri! Fu eksempre, efu sondro fu yu wani yu si wan seks prenki tapu yu computer noso telefisi, dan drai yu fesi puru wantewante, noso kenki a telefisi station. Du ala san de fanowdu fu basi den takru lostu fu yu, fosi den lostu disi e kon tranga so te taki den e bigin basi yu!​—Leisi Mateyus 5:29, 30.

11. Te wi e suku fu basi takru lostu, dan fa wi kan sori taki wi e frutrow tapu Yehovah?

¹¹ A sma di sabi wi moro bun leki fa wi sabi wisrefi abi leti fu gi wi a rai disi: „Kiri den difrenti pisi fu un skin di kan meki taki unu kisi fu du nanga hurudu, wan libi di no krin, sekslostu, takru lostu èn nanga bigi-ai di de a srefi leki na anbegi fu kruktugado” (Kolosesma 3:5). Kande a no makriki fu du disi.  Ma no frigiti taki wi abi wan lobi-ati Papa na hemel di abi pasensi nanga wi, èn wi kan aksi en fu yepi wi (Psalm 68:19). Sobun, suku yepi na en esi-esi te yu e bigin prakseri sani di no krin. Begi en fu gi yu „krakti di bigi pasa marki”, èn dwengi yusrefi fu prakseri tra sani.​—2 Korentesma 4:7; 1 Korentesma 9:27; luku a faki „ Fa mi kan tapu nanga wan takru gwenti?”

12. San na a „ati”, èn fu san ede wi musu kibri en?

¹² A koni man Salomo ben skrifi: „Kibri yu ati, moro iniwan sani di de fu kibri, bika na drape den rutu fu a libi de” (Odo 4:23). Na „ati” na a sma di wi de trutru, soleki fa Gado e si wi. Boiti dati, a no a fasi fa trawan e si wi e sori efu wi o kisi têgo libi, noso efu wi no o kisi a libi dati, ma na a fasi fa Gado e si na  „ati” fu wi. Kande a gersi wan pikin sani, ma a sani disi na wan tumusi prenspari sani. Dati meki a reti-ati man Yob ben meki wan frubontu nanga en ai taki a no ben o luku wan uma na wan fasi di no fiti (Yob 31:1). Dati na wan moi eksempre gi wi! Wan psalm skrifiman di ben abi a srefi denki leki Yob, ben skrifi: „No meki mi ai si sani di no bun.”​—Psalm 119:37.

13. Suma ben de Dina, èn fu san ede wi kan taki dati a no ben meki bun mati?

¹³ Soleki fa wi si na ini kapitel 3, dan den mati fu wi kan abi bigi krakti na wi tapu, èn a sani disi kan tyari bun bakapisi noso takru bakapisi kon gi wi. (Odo 13:20; leisi 1 Korentesma 15:33.) Luku na eksempre fu Dina, na umapikin fu a famiri-edeman Yakob. Aladi Dina ben kisi bun kweki, toku a meki a fowtu fu tron mati nanga den umapikin fu den Kanansma. Neleki den Moabsma, den Kanansma ben e libi na wan fasi di no fiti kwetikweti (Lefitikus 18:6-25). Den man fu Kanan, soleki Sikem, „a moro lespekiwan” na ini na oso fu en papa, ben e si Dina leki wan uma di kande ben o wani abi seks nanga den.​—Genesis 34:18, 19.

14. Fa den mati di Dina teki, meki taki problema miti en?

¹⁴ A kan taki Dina no ben e prakseri seks di a si Sikem. Ma Sikem du san ala Kanansma ben o du te den ben e firi fu abi seks. Awinsi fa Dina ben pruberi fu feti na a momenti dati, toku noti no yepi fu di Sikem ’grabu en’, èn „a go didon nanga en nanga tranga”. Soleki fa a sori, dan Sikem „kon lobi” Dina bakaten, ma toku a sani di a ben du nanga en no ben bun kwetikweti. (Leisi Genesis 34:1-4.) Ma a no Dina wawan ben ondrofeni den takru bakapisi fu a sani di ben pasa. Fu di Dina ben tron mati nanga den sortu sma dati, meki a heri osofamiri fu en kisi syen nanga porinen.​—Genesis 34:7, 25-31; Galasiasma 6:7, 8.

15, 16. Fa wi kan kisi a koni fu Gado? (Luku sosrefi a faki „ Denki dipi fu den Bijbeltekst disi”.)

¹⁵ Efu Dina ben leri wan prenspari sani, dan a ben  leri en nanga tranga. Den sma di lobi Yehovah èn di e gi yesi na en, no abi fu leri sani nanga tranga. Fu di den e gi yesi na Gado, meki den e bosroiti fu „waka nanga koniwan” (Odo 13:20a). Na so den e kon frustan fa fu du „bun sani”, èn den e wai pasi gi problema nanga broko-ede.​—Odo 2:6-9; Psalm 1:1-3.

¹⁶ Ala sma di wani kisi a koni fu Gado, kan kisi a koni dati te den e begi Gado doronomo, te den e tan studeri Gado Wortu, nanga den buku di a koni srafu di de fu frutrow tyari kon na doro (Mateyus 24:45; Yakobus 1:5). A prenspari tu fu abi sakafasi, fu di dati o meki taki wi de klariklari fu gi yesi na rai di e komoto fu Bijbel (2 Kownu 22:18, 19). Fu eksempre, kande wan Kresten e agri taki en ati kan bedrigi en èn taki a ogri srefisrefi (Yeremia 17:9). Ma kon meki wi taki dati a du wan sani di no bun. A de klariklari fu sori sakafasi èn fu teki a rai di trawan e gi en fu di den wani yepi en?

17. Taki fu wan situwâsi di kan de na ini wan osofamiri, èn sori fa wan papa kan yepi na umapikin fu en.

¹⁷ Luku a situwâsi disi. Wan papa no wani taki en umapikin nanga wan yongu Kresten brada e go na  wan presi den wawan. Na umapikin e taki: „Ma papa, fu san ede yu no e frutrow mi? Wi no o du nowan ogri!” Kande na umapikin disi lobi Yehovah, èn kande a no abi takru prakseri. Ma a de so taki a e ’waka nanga a koni fu Gado’? A e „lowe gi hurudu”? Noso a e meki a fowtu fu „frutrow na tapu ensrefi”? (Odo 28:26) Kande yu sabi tra gronprakseri di a papa disi kan gebroiki fu yepi na umapikin fu en fu kon si sani na a yoisti fasi.​—Luku Odo 22:3; Mateyus 6:13; 26:41.

18, 19. Sortu tesi miti Yosef, èn fa a kakafutu gi a tesi dati?

¹⁸ Wan yonkuman di ben lobi Gado èn di ben lowe gi hurudu, na Yosef, wan afu-brada fu Dina (Genesis 30:20-24). Di Yosef ben de wan yongu boi, dan ensrefi ben si den takru bakapisi fu a don bosroiti di en sisa ben teki. Yosef no ben frigiti den sani dati, èn a ben wani trutru taki Gado tan lobi en. A musu de so taki na dati kibri en na ini Egepte di a wefi fu en basi ben e pruberi „ibri dei” fu kisi en fu didon nanga en. A no de fu taki dati leki wan srafu, Yosef no ben kan gowe libi en wroko! A ben musu gebroiki en frustan èn a ben musu sori deki-ati. Dati meki a tan kakafutu gi a wefi fu Potifar, èn te fu kaba a lowe gi en.​—Leisi Genesis 39:7-12.

¹⁹ Denki a tori: Efu Yosef ben tan prakseri na uma disi, noso efu a ben e prakseri seks doronomo, a ben o man tan gi yesi na Gado? Kande a no ben o man du dati. Yosef no tan prakseri sani di no fiti, ma a ben e warderi a matifasi di a ben abi nanga Yehovah. Dati meki a taigi a wefi fu Potifar: „A basi fu mi poti ala  sani na ini mi anu boiti yu, fu di yu na en wefi. Dan fa mi kan du so wan bigi ogri èn sondu teige Gado?”​—Genesis 39:8, 9.

20. Fa Yehovah meki sani waka gi Yosef?

²⁰ Prakseri fa Yehovah ben e firi prisiri te a ben e si fa a yonkuman Yosef di ben de farawe fu en famiri, ben e du san reti ibri dei (Odo 27:11). Bakaten, Yehovah meki sani waka na so wan fasi taki Yosef komoto na strafu-oso. A tron sosrefi granman fu a heri kondre Egepte, èn a kisi a frantwortu fu prati nyanyan gi a pipel! (Genesis 41:39-49) A sani disi di skrifi na Psalm 97:10 tru: „Unu di lobi Yehovah, un no musu lobi ogri sani kwetikweti. A e kibri a libi fu den wan di e tai hori na en. A e frulusu den puru na a anu fu den ogriwan”!

21. Fa wan yongu brada na ini wan Afrikan kondre ben man tan du san bun?

²¹ Na ini a ten disi, furu futuboi fu Gado e sori tu taki den ’no lobi ogri kwetikweti, ma taki den lobi san bun’ (Amos 5:15). Wan yongu brada na ini wan Afrikan kondre e memre taki wan meisje fu en klas ben prefuru fu taigi en taki efu a ben o yepi en na a wiskunde repetitie, dan a ben o abi seks nanga en. A brada disi e taki: „Wantewante mi taigi en taki mi no wani. Fu di mi du san bun, meki mi no lasi lespeki gi misrefi, èn gi mi a sani dati warti moro gowtu nanga solfru.” A tru taki te wi e du sondu, dan wi kan ’nyan bun fu en fu wan pisi ten’, ma te fu kaba dati e tyari furu sari kon (Hebrewsma 11:25). Boiti dati, a prisiri dati na noti te yu e agersi en nanga a koloku firi di yu o abi fu di yu e gi yesi na Yehovah.​—Odo 10:22.

22, 23. (a) Efu wan Kresten du wan seryusu sondu, dan fu san ede a no musu denki taki howpu no de moro gi en? (b) Sortu yepi de gi wan sma di du wan ogri?

²² Fu di wi abi sondu, meki wi alamala e meki muiti fu basi den sondu firi fu wi èn fu du san Gado feni bun (Romesma 7:21-25). Yehovah sabi disi, èn a e „hori na prakseri taki na fu doti wi meki” (Psalm 103:14). Ma son leisi, a kan pasa taki wan Kresten e du seryusu sondu. A de so taki howpu no de moro gi a Kresten disi? Kwetikweti! A tru taki a sma di du na ogri dati kan kisi takru bakapisi, neleki fa dati ben pasa nanga Kownu David. Ma Gado „de klariklari fu gi sma pardon” te den e sori berow èn „e taki krin” sortu sondu den du.​—Psalm 86:5; Yakobus 5:16; leisi Odo 28:13.

²³ Boiti dati, fu di Gado lobi a Kresten gemeente, meki a poti „mansma di abi spesrutu koni” fu teki fesi. Den mansma dati na lepi skapuman di man yepi wi èn den e angri tu fu du dati (Efeisesma 4:8, 12; Yakobus 5:14, 15). Den brada disi wani yepi wan sma di du ogri fu kon abi wan bun matifasi baka nanga Gado èn fu „kon abi wan koni ati”, so taki a no e du na ogri dati moro.​—Odo 15:32.

24, 25. (a) Fa a yonkuman di Odo 7:6-23 e taki fu en, ben sori taki „a no ben abi frustan”? (b) Fa wi kan „kon abi wan koni ati”?

²⁴ Bijbel e taki fu wan sma ’di no abi frustan’, èn fu wan sma di „e kon abi wan koni ati” (Odo 7:7). Fu di wan sma ’di no abi frustan’, no lepi nofo èn a no  abi nofo ondrofeni na ini na anbegi fu Gado, meki a kan taki a no sabi krin san bun èn san ogri. Neleki a yonkuman na ini Odo 7:6-23, a sma disi kan du seryusu sondu makriki. Ma a sma di „e kon abi wan koni ati”, e ondrosuku ensrefi. Fu dati ede a e studeri Gado Wortu doronomo, èn a e begi Gado fu yepi en. Leki wan sondu sma a e du ala san a man fu sorgu taki den prakseri fu en, den winsi fu en, den firi fu en, nanga den sani di a wani du, e kruderi nanga a wani fu Gado. Na so a e sori taki a „lobi ensrefi” noso taki a e du bun gi ensrefi, èn a „o feni bun”.​—Odo 19:8.

²⁵ Aksi yusrefi den sani disi: ’Mi e bribi taki den sani di Gado e aksi fu mi na bun sani? Mi e bribi trutru taki mi o de koloku te mi e du san a e aksi fu mi?’ (Psalm 19:7-10; Yesaya 48:17, 18) Srefi efu yu e tweifri pikinso nomo, no libi a sani so. Denki bun san kan pasa te yu e trangayesi den wet fu Gado. Boiti dati, „tesi èn si taki Yehovah bun”. Iya, libi na wan fasi di e kruderi nanga den tru leri fu Bijbel, èn poti prakseri soso na sani di bun. Dati na sani di tru, sani di reti, sani di krin, sani di e meki sma sori lobi, èn sani di warti (Psalm 34:8; Filipisma 4:8, 9). Yu kan de seiker taki o moro yu e du dati, o moro yu o kon lobi Gado. Yu o lobi den sani di a lobi, èn yu o tegu gi den sani di a e tegu gi. Yosef ben abi sondu. Ma toku a ben man „lowe gi hurudu”, fu di a meki Yehovah tiri en furu yari langa, so taki a ben kan kon abi wan koni ati. Meki a de so taki yu e du dati tu.​—Yesaya 64:8.

26. Sortu prenspari tori wi o luku na ini a tra kapitel?

²⁶ Wi Mekiman no gi wi wan syenpresi leki wan sani di wi kan prei nanga en soso fu firi switi. Ma a  gi wi en so taki wi kan meki pikin èn so taki trowpatna kan prisiri te den abi seks nanga makandra (Odo 5:18). Na ini den tu kapitel di e kon, wi o luku fa Gado e si a trowlibi.