1, 2. Fu san ede yu lobi Yehovah Gado?

 YU LOBI Gado? Kande yu lobi Gado so te taki yu gi yusrefi abra na en. Kande yu e si en leki yu moro bun Mati. Ma fosi yu bigin lobi Yehovah, a ben lobi yu kaba. Bijbel e taki: „Wi abi lobi, fu di na Gado fosi ben lobi wi.”​—1 Yohanes 4:19.

² Prakseri ala den fasi fa Yehovah sori lobi gi wi. A gi wi grontapu, wan moi tanpresi, èn a gi wi ala tra sani di wi abi fanowdu fu man abi wan koloku libi (Mateyus 5:43-48; Openbaring 4:11). A wani taki wi tron mati fu en èn a e gi wi na okasi fu kon leri sabi en. Te wi e leisi Bijbel, dan wi e arki Yehovah. Èn te wi e begi, a e arki wi (Psalm 65:2). A e gebroiki en makti santa yeye fu tiri wi èn fu tranga wi (Lukas 11:13). A seni en lobi Manpikin kon na grontapu srefi fu frulusu wi fu sondu nanga dede.​—Leisi Yohanes 3:16; Romesma 5:8.

3. Fa wi kan tan bun mati fu Yehovah?

³ Prakseri wan bun mati fu yu di ben de na yu sei na ini bun ten èn na ini muilek ten. A no de fu taki  dati yu e tan meki muiti fu kan de wan bun mati fu a sma dati. Na so a de tu taki wi e meki muiti fu tan bun mati nanga Yehovah, fu di wan moro bun Mati leki en no de. Wi kan tan bun mati fu en fu ala ten. Dati meki Bijbel e taigi wi fu du san de fanowdu fu meki ’Gado tan lobi wi’ (Yudas 21). Fa wi kan du disi? Bijbel e taki: „Te wi lobi Gado, dan wi o hori den komando fu en. Toku den komando fu en no de wan hebi.”​—1 Yohanes 5:3.

4, 5. Fa a lobi di yu abi gi Yehovah bigin gro?

⁴ Yu sabi ete di yu bigin lobi Yehovah? Prakseri fa yu ben e firi di yu kon sabi taki Yehovah wani taki yu musu libi fu têgo na ini a nyun grontapu fu en.

⁵ Yu kon sabi ala den sani di a du so taki yu kan kisi na okasi dati èn yu kon frustan sortu warti sani Yehovah gi wi di a seni en Manpikin kon na grontapu (Mateyus 20:28; Yohanes 8:29; Romesma 5:12, 18). Di yu kon frustan o furu Yehovah lobi yu, dan dati naki yu ati èn yu bigin lobi en tu.​—Leisi 1 Yohanes 4:9, 10.

6. (a) San wi o du te wi lobi wan sma? (b) San yu du fu di yu lobi Gado?

⁶ Ma di yu kon lobi Gado, dan dati no ben de ala ete. Fu eksempre, te wi lobi wan sma, dan wi no e taigi en nomo taki wi lobi en, ma wi wani du sani gi en tu, so taki a firi koloku. Na so a de tu taki a  lobi di yu abi gi Yehovah meki taki yu wani libi na wan fasi di e gi en prisiri. A no de fu taki dati di a lobi disi kon moro tranga, yu gi yusrefi abra na en èn yu dopu. Di yu gi yusrefi abra na Yehovah, dan yu pramisi en taki yu o dini en fu ala ten. (Leisi Romesma 14:7, 8.) Fa yu kan tan du san yu pramisi Yehovah?

7. (a) San wi o du te wi lobi Yehovah? (b) San na wan tu fu den komando fu en?

⁷ Fu di wi lobi Yehovah, meki ’wi e hori den komando fu en’. Fa wi e du dati? Wi e gi yesi na en. Na ini Bijbel wi e leri fa Yehovah wani taki wi libi. Fu eksempre, a e fruteri wi taki a no bun fu kon drungu, fu fufuru, fu lei, fu abi seks nanga wan sma di no de wi trowpatna, noso fu anbegi iniwan sma noso iniwan sani boiti en.​—1 Korentesma 5:11; 6:18; 10:14; Efeisesma 4:28; Kolosesma 3:9.

8, 9. Fa wi kan sabi san Yehovah wani taki wi musu du na ini situwâsi pe Bijbel no abi wan wet? Gi wan eksempre.

⁸ Ma efu wi wani taki Yehovah breiti nanga wi, dan wi musu du moro leki fu gi yesi nomo na den komando fu en. A no gi wi wan lo wet gi ibri situwâsi na ini a libi. Sobun, a no ala ten wan wet o de na ini Bijbel di e taigi wi krin san fu du. Ma san o yepi wi fu teki bun bosroiti? (Efeisesma 5:17) Na ini Bijbel wi e feni gronprakseri noso prenspari leri di e sori wi fa Yehovah e si sani. Te wi e leisi Bijbel, dan wi e kon sabi fa Yehovah de trutru. Wi e kon sabi fa a e denki, san a lobi èn san a no lobi. ​—Leisi Psalm 97:10; Odo 6:16-19; luku „Ete wan tu sani” 1.

⁹ Fu eksempre, fa wi kan sabi san bun fu luku na telefisi noso tapu Internet? Yehovah no e taigi wi finifini san wi musu du. Ma den gronprakseri di a e gi wi o yepi wi fu teki bun bosroiti. Furu sani di de fu si na telefisi noso tapu Internet, na sani di lai nanga ogridu èn nanga seks. Bijbel e taki dati „efu wan sma lobi ogridu, dan Gado no lobi en kwetikweti” èn taki a „o krutu huruman nanga sutaman” (Psalm 11:5; Hebrewsma 13:4). Fa den gronprakseri disi kan yepi wi fu teki bun bosroiti? Te wi kon sabi taki Yehovah no lobi wan sani noso taki a e si en leki wan sani di no fiti, dan wi musu wai pasi gi a sani dati.

10, 11. Fu san ede wi e gi yesi na Yehovah?

¹⁰ Fu san ede wi e gi yesi na Yehovah? Wi no e du dati soso fu di wi no wani kisi strafu noso fu di wi no wani kisi fu du nanga den takru bakapisi fu den don bosroiti di wi teki (Galasiasma 6:7). Nôno, wi e gi yesi na Yehovah fu di wi lobi en. Neleki fa pikin wani taki den papa breiti nanga den, na so wi wani taki wi hemel Tata breiti nanga wi. Noti e gi wi moro prisiri leki fu sabi taki Yehovah breiti nanga wi.​—Psalm 5:12; Odo 12:2; luku „Ete wan tu sani” 2.

¹¹ Wi no e gi yesi na Yehovah soso te dati makriki noso te tra fasi no de. Wi no e luku tu na sortu wet wi o gi yesi èn sortuwan wi o trangayesi  (Deuteronomium 12:32). Na presi fu dati, wi e gi yesi na en na ini ala sani, neleki a psalm skrifiman di ben taki: ’Mi e prisiri nanga den komando fu yu di mi lobi’ (Psalm 119:47; Romesma 6:17). Wi wani de leki Noa. Fu di a ben lobi Yehovah trutru, meki a du ala sani di Yehovah ben taigi en fu du. Bijbel e taki dati Noa „du leti so” (Genesis 6:22). Yu wani taki Yehovah taki a srefi fu yu?

12. Fa wi kan meki Yehovah ati prisiri?

¹² Fa Yehovah e firi te wi e gi yesi na en? Bijbel e taki dati wi e meki en „ati prisiri” (Odo 11:20; 27:11). Denki a tori! A Mekiman fu hemel nanga grontapu e prisiri te wi e gi yesi na en. Ma noiti a e dwengi wi fu du dati. Na presi fu dati a gi wi a grani fu teki wi eigi bosroiti. Disi wani taki dati wi srefi kan bosroiti efu wi o du bun noso ogri. Efu wi lobi Yehovah, dan wi o teki bun bosroiti. Na dati Yehovah wani taki wi du. Na so wi o abi a moro bun libi di wi kan abi.​—Deuteronomium 30:15, 16, 19, 20; luku „Ete wan tu sani” 3.

13, 14. Fa wi du sabi taki a no muilek tumusi fu gi yesi na den komando fu Gado? Gi wan eksempre.

¹³ Ma fa a de te wi feni taki den komando fu Yehovah hebi tumusi gi wi, noso taki den o tapu wi fu libi soleki fa wi srefi wani? Bijbel e taki krin: „Den komando fu en no de wan hebi” (1 Yohanes 5:3). Na ini tra Bijbeltekst a Griki wortu di vertaal  nanga „hebi” abi fu du nanga hebi wet noso nanga sma di e pruberi fu basi èn kwinsi trawan (Mateyus 23:4; Tori fu den apostel 20:29, 30). Sobun, te Bijbel e taki dati den komando fu Yehovah no hebi gi wi, dan dati wani taki dati a no muilek gi wi fu gi yesi na den. Noiti Yehovah e aksi tumusi furu fu wi.

¹⁴ Fu eksempre, kon meki wi taki dati yu e yepi wan mati fu yu fu froisi. A poti ala den sani fu en na ini dosu. Sonwan fu den dosu lekti èn a makriki fu tyari den, ma trawan hebi so te taki tu sma musu opo den. Yu denki taki yu mati ben o aksi yu fu opo wan hebi dosu yu wawan? Kwetikweti! Fu san ede? Fu di a no wani taki yu kisi mankeri. Neleki a mati dati, Yehovah noiti ben o aksi wi fu du wan sani di muilek tumusi gi wi (Deuteronomium 30:11-14). Yehovah sabi san wi man èn san wi no man. A „sabi heri bun fa wi meki. A e hori na prakseri taki na fu doti wi meki.”​—Psalm 103:14.

15. Fu san ede wi kan de seiker taki den komando fu Yehovah na fu wi eigi bun?

¹⁵ Moses ben taigi a pipel Israel taki efu den ben o gi yesi na den komando fu Yehovah, dan ’ala ten sani ben o waka bun gi den’ (Deuteronomium 5:28-33; 6:24). Na so a de tu na ini a ten disi. Ala san Yehovah e aksi fu wi na fu wi eigi bun. (Leisi Yesaya 48:17.) Ala ten wi Tata Yehovah, sabi san bun gi wi (Romesma 11:33). Bijbel e taki: „Gado na lobi” (1 Yohanes 4:8). Disi wani taki dati ala san Yehovah e taki èn e du na fu di a lobi wi.

16. Fa wi du sabi taki wi kan gi yesi na Gado aladi wi na sondusma di e libi na ini wan ogri grontapu?

 ¹⁶ A no ala ten a makriki gi wi fu gi yesi na Gado. Wi e libi na ini wan ogri grontapu di de na ini a makti fu Didibri. A e pruberi fu abi krakti tapu sma so taki den e du ogri (1 Yohanes 5:19). Wi musu feti tu nanga wi eigi sondu denki nanga firi, fu di den kan meki wi trangayesi Gado (Romesma 7:21-25). Ma a lobi di wi abi gi Yehovah e gi wi a krakti fu du san bun. A e si a muiti di wi e du fu gi yesi na en èn a e gi wi en santa yeye fu yepi wi (1 Samuel 15:22, 23; Tori fu den apostel 5:32). A santa yeye e yepi wi fu kon abi fasi di e meki en makriki gi wi fu gi yesi na Gado.​—Galasiasma 5:22, 23.

17, 18. (a) San wi o leri na ini a buku disi? (b) San wi o luku na ini a tra kapitel?

¹⁷ Na ini a buku disi wi o leri fa fu libi na wan fasi di Yehovah feni bun. Wi o leri fa wi kan hori wisrefi na den gronprakseri nanga den wet fu en. No frigiti taki Yehovah noiti e dwengi wi fu gi yesi na en. Te wi bosroiti fu gi yesi na en, dan wi o abi wan moro bun libi èn wan moi howpu gi a ten di e kon. Ma san moro prenspari, na taki te wi e gi yesi na Gado, dan wi e sori en o furu wi lobi en.​—Luku „Ete wan tu sani” 4.

¹⁸ Yehovah gi ibriwan fu wi wan konsensi fu yepi wi fu kon sabi san bun èn san no bun. Efu wi oefen wi konsensi, dan dati kan yepi wi fu „hori den komando fu en”. Sobun, san na wi konsensi èn fa wi kan oefen en? Meki wi go luku.