1, 2. (a) Fu san ede yu abi wan sma fanowdu fu sori yu a pasi te yu de na wan presi di yu no sabi so bun? (b) San Yehovah gi wi fu yepi wi te wi musu teki bosroiti?

 PRAKSERI taki yu e waka na ini wan sabana pe watra no de, pe sani no e gro èn pe yu kan lasi makriki. Yu kan lasi yu libi srefi. Fa yu o sabi sortu sei yu musu go? Fu kon sabi dati yu o abi fu aksi wan sma fu sori yu a pasi. Na so yu o man doro a presi pe yu musu go, sondro taki wan sani pasa nanga yu.

 ² Wi alamala e kisi problema na ini wi libi, èn a kan pasa makriki taki wi no sabi sortu bosroiti wi musu teki. Ma Yehovah gi ibriwan fu wi wan konsensi fu yepi wi (Yakobus 1:17). Meki wi go luku san na a konsensi èn fa a e wroko. Baka dati wi o si fa wi kan oefen wi konsensi. Wi o si tu fu san ede wi musu hori a konsensi fu tra sma na prakseri, èn fa wan krin konsensi kan yepi wi fu abi wan moro koloku libi.

3. San na a konsensi?

³ A konsensi fu wi na wan moi kado di wi kisi fu Yehovah. Wi konsensi na a piki di wi frustan e piki wi taki wan sani bun noso fowtu. A Griki wortu di Bijbel e gebroiki gi „konsensi”, wani taki „a sabi di wan sma sabi ensrefi”. Te a konsensi fu wi e wroko bun, dan a e yepi wi fu ondrosuku wisrefi fu kon sabi fa wi de trutru. A kan yepi wi fu no kori wisrefi te a abi fu du nanga a fasi fa wi e denki èn e firi trutru. A kan meki wi du bun èn a kan meki wi wai pasi gi san no bun. Te wi teki koni bosroiti, wi konsensi kan meki wi firi koloku. Ma te wi teki wan don bosroiti, wi o kisi konsensi fonfon.​—Luku „Ete wan tu sani” 5.

4, 5. (a) San pasa di Adam nanga Eva no arki a konsensi fu den? (b) San na wan tu Bijbel eksempre di e sori fa a konsensi e wroko?

⁴ Ibriwan fu wi kan bosroiti efu wi o arki wi konsensi noso efu wi no o du dati. Adam nanga Eva bosroiti fu no arki a konsensi fu den èn a sani dati meki taki den sondu. Bakaten den kisi konsensi fonfon, ma a ben lati kaba. Den ben trangayesi Gado kaba  (Genesis 3:7, 8). Aladi a konsensi fu den ben e wroko bun èn den ben sabi taki a no ben bun fu trangayesi Gado, toku den bosroiti fu no arki a konsensi fu den.

⁵ Ma tra fasi leki Adam nanga Eva, furu sondu sma arki a konsensi fu den. Yob na wan fu den sma disi. Fu di a ben teki koni bosroiti, meki a ben kan taki: „Nowan dei fu mi libi mi o abi konsensi fonfon” (Yob 27:6). Ma son leisi David no ben e arki en konsensi èn a ben e trangayesi Yehovah. Fu eksempre, di a no ben sori lespeki gi Kownu Saul, dan „en konsensi bigin fon en” (1 Samuel 24:5). Na so en konsensi ben e piki en taki a ben du wan sani di no bun. Te a ben o arki a konsensi fu en, dan a ben o leri fu no meki a srefi fowtu dati baka.

6. Fu san ede wi kan taki dati a konsensi na wan kado di Gado gi ala libisma?

⁶ Srefi sma di no sabi Yehovah man frustan nofo tron san bun èn san no bun. Bijbel e taki: „Den eigi prakseri e sori den taki den fowtu noso taki den no fowtu” (Romesma 2:14, 15). Fu eksempre, furu sma sabi taki a no bun fu kiri trawan noso fu fufuru. Te yu luku en bun, dan na arki den e arki a konsensi di Yehovah gi den fu kan sabi san bun èn san no bun. Den sma disi e hori densrefi tu na den gronprakseri fu Gado, noso na den leri di Yehovah gi wi fu yepi wi fu teki bun bosroiti na ini a libi.

7. Fu san ede wi konsensi kan kori wi son leisi?

⁷ Ma son leisi wi konsensi kan kori wi. Fu di wi na sondusma, meki den denki nanga den firi fu wi kan meki wi du sani di no bun. Wan bun konsensi no e  kon fu ensrefi (Genesis 39:1, 2, 7-12). Wi musu oefen wi konsensi. Dati meki Yehovah gi wi en santa yeye nanga Bijbel gronprakseri (Romesma 9:1). Meki wi go luku fa wi kan oefen wi konsensi.

8. (a) Fa den firi fu wi kan abi krakti tapu a konsensi fu wi? (b) San wi musu aksi wisrefi fosi wi teki wan bosroiti?

⁸ Son sma e denki taki te den musu arki den konsensi, dan dati wani taki dati den kan du nomo san den e firi. Den e denki taki den kan du ala san den wani, solanga den konsensi no e trobi den. Ma fu di wi na sondusma, meki den firi fu wi kan kori wi. Den firi fu wi kan tranga so te taki den kan abi krakti tapu a konsensi fu wi. Bijbel e taki: „Na ati na a moro bedrigi sani di de èn a ogri srefisrefi. Suma kan sabi en?” (Yeremia 17:9) Sobun, wi kan denki taki wan sani bun aladi a no bun. Fu eksempre, fosi Paulus ben tron wan Kresten, a ben e frufolgu Gado pipel na wan ogri-ati fasi èn a ben e denki taki a ben e du san bun. Paulus ben e denki taki a konsensi fu en ben e wroko bun. Ma bakaten a taki: „A sma di e ondrosuku mi na Yehovah” (1 Korentesma 4:4; Tori fu den apostel 23:1; 2 Timoteyus 1:3). Di Paulus kon frustan fa Yehovah ben e denki fu den sani di a ben e du, dan a kon si taki a ben musu tyari kenki kon. A de krin taki fosi wi du wan sani, wi musu aksi wisrefi: ’San Yehovah wani taki mi du?’

9. San a wani taki fu abi lespeki gi Gado?

⁹ Te yu lobi wan sma, dan yu no wani du sani di a  no feni bun. Fu di wi lobi Yehovah èn fu di wi abi bigi lespeki gi en, meki wi no wani du nowan enkri sani di a no feni bun. A prenspari srefisrefi fu abi bigi lespeki gi Yehovah. Na eksempre fu Nehemia e sori dati. Nehemia ben weigri fu gebroiki a posisi di a ben abi leki granman fu kon gudu. Fu san ede? A ben taki dati a weigri fu du dati, fu di a „ben abi bigi lespeki gi Gado” (Nehemia 5:15). Nehemia no ben wani du nowan sani di Yehovah no feni bun. Neleki Nehemia, wi e luku bun taki wi no e du sani di kan meki taki Yehovah no feni wi bun moro. Te wi e leisi Bijbel, dan wi kan kon sabi san Yehovah feni bun.​—Luku „Ete wan tu sani” 6.

10, 11. Sortu Bijbel gronprakseri kan yepi wi fu teki bun bosroiti te a abi fu du nanga sopi?

¹⁰ Fu eksempre, kande wan Kresten musu bosroiti efu a o dringi sopi noso efu a no o du dati. Sortu gronprakseri o yepi en fu teki wan bun bosroiti? Luku wan tu fu den: Bijbel no e taki dati sma no mag dringi sopi. Fu taki en leti, Bijbel e taki dati win na wan kado fu Gado (Psalm 104:14, 15). Ma Yesus ben taigi den bakaman fu en fu „no dringi tumusi furu” (Lukas 21:34). Èn Paulus ben taigi den Kresten fu ’no go na bradyari fesa èn fu no kon drungu’ (Romesma 13:13). A ben taki dati drunguman „no o kisi a Kownukondre fu Gado”.​—1 Korentesma 6:9, 10.

¹¹ Wan Kresten ben kan aksi ensrefi: ’O prenspari sopi de gi mi? Mi abi en fanowdu fu man firi bun? Mi e dringi sopi fu kisi moro deki-ati? Mi man hori misrefi fu no dringi tumusi furu èn fu no dringi ibri  tron baka? * Efu sopi no de fu dringi, dan mi e prisiri ete fu de nanga den mati fu mi?’ Wi kan aksi Yehovah fu yepi wi fu teki koni bosroiti. (Leisi Psalm 139:23, 24.) Na so wi e oefen wi konsensi fu man hori wisrefi na den gronprakseri fu Bijbel. Ma dati a no ala. Meki wi go luku san moro de fanowdu.

12, 13. (a) Fu san ede a kan taki a konsensi fu wi e wroko tra fasi leki a di fu trawan? (b) San wi kan du te den sortu sani disi pasa?

¹² A no ala sma konsensi e wroko na a srefi fasi. Kande yu konsensi e gi pasi taki yu du wan sani, ma a konsensi fu wan trawan no e du dati. Fu eksempre, kande yu e bosroiti fu dringi sopi, ma wan tra sma feni taki a no o du dati. Fu san ede tu sma no abi fu denki a srefi fu a tori disi?

¹³ Nofo tron a fasi fa wan sma e denki fu wan sani, abi fu du nanga a presi pe a kweki, a fasi fa en famiri ben e denki fu a sani, den sani di miti en na ini en libi, nanga tra sani. Kon meki wi taki dati wan sma no wani dringi sopi srefisrefi, fu di fosi a no ben man hori ensrefi fu no dringi tumusi furu (1 Kownu 8:38, 39). Efu yu gi so wan sma sopi fu dringi èn a no wani, dan san yu o du? Yu o mandi? Yu o tan dwengi en fu teki a sopi? Yu o de nomonomo fu kon sabi fu san ede a no wani? Nôno, yu no o du dati, fu di yu e lespeki a konsensi fu en.

14, 15. (a) Sortu situwâsi ben opo kon na ini a ten fu Paulus? (b) Sortu bun rai Paulus gi den Kresten?

 ¹⁴ Na ini a ten fu na apostel Paulus, wan situwâsi ben opo kon di sori taki ala sma konsensi no e wroko a srefi. A meti di son sma ben e seri na wowoyo, ben de meti di den ben gebroiki na ini falsi anbegi èn di den ben tyari leki ofrandi gi falsi gado (1 Korentesma 10:25). Paulus no ben denki taki a ben fowtu fu bai a meti disi èn fu nyan en. Gi en, ala nyanyan ben e komoto fu Yehovah. Ma son brada di ben e anbegi falsi gado fosi, ben e denki tra fasi fu a tori. Den ben feni taki a no ben bun fu nyan a meti disi. Yu denki taki Paulus ben taigi ensrefi: ’A sani disi no e trobi mi konsensi. Mi mag nyan san mi wani’?

¹⁵ Paulus no ben e denki so. Fu di a ben prenspari gi en fu hori den firi fu en brada na prakseri, meki a bosroiti fu no nyan a meti, aladi a ben abi a reti fu nyan en. Paulus taki dati wi no musu „plisi wisrefi”. A ben taki moro fara: „Bika srefi Krestes no ben plisi ensrefi” (Romesma 15:1, 3). Neleki Yesus, Paulus ben e broko en ede moro nanga trawan, leki nanga ensrefi.​—Leisi 1 Korentesma 8:13; 10:23, 24, 31-33.

16. Fu san ede wi no musu krutu wi brada noso sisa te a konsensi fu den e gi pasi fu du son sani?

¹⁶ Ma fa a de te a konsensi fu wan trawan e gi en pasi fu du wan sani di wi srefi no ben o du? Wi musu luku bun fu no krutu trawan èn fu no de nomonomo taki den du wan sani di no bun. (Leisi Romesma 14:10.) Yehovah gi wi wan konsensi fu krutu wisrefi, a no gi wi en fu krutu trawan (Mateyus 7:1). Noiti wi wani meki den denki fu wi tyari prati kon na ini a  gemeente. Na presi fu dati, wi e du muiti fu sorgu taki lobi nanga wánfasi de na wi mindri.​—Romesma 14:19.

17. San pasa nanga a konsensi fu son sma?

¹⁷ Na apostel Petrus ben skrifi: „Tan abi wan bun konsensi” (1 Petrus 3:16). A sari taki te sma e teki en leki wan gwenti fu no hori densrefi na den gronprakseri fu Yehovah, dan te fu kaba a konsensi fu den no e warskow den moro. Paulus ben taki dati so wan konsensi „dede neleki na wan faya isri bron en”  (1 Timoteyus 4:2). Oiti yu skin bron so kefalek taki yu kisi grometi èn yu no man firi noti moro drape? So wan sani kan pasa tu nanga wi konsensi. Efu wan sma e tan du sani di no bun, dan en konsensi kan kon de neleki skin di „bron” èn te fu kaba a no o wroko moro.

18, 19. (a) Te wi ati e naki wi noso te wi e firi syen baka te wi meki wan fowtu, dan fu san ede dati na wan bun sani? (b) San wi kan du efu wi abi konsensi fonfon ete aladi wi sori berow fu den sondu fu wi?

¹⁸ Te wi ati e naki wi baka te wi du wan sani, dan a kan taki na wi konsensi e piki wi taki wi meki wan fowtu. Disi kan yepi wi fu kon sabi san wi du èn fu no du a sani dati moro. Wi wani leri fu den fowtu fu wi so taki wi no e tan meki den srefi fowtu dati. Fu eksempre, Kownu David ben sondu, ma fu di a ben  abi konsensi fonfon meki a sori berow. A no ben lobi srefisrefi san a ben du èn a bosroiti fu no trangayesi Yehovah moro. A sani disi meki taki David ben kan taki dati Yehovah ’na wan bun Gado èn taki a de klariklari fu gi sma pardon’.​—Psalm 51:1-19; 86:5; luku „Ete wan tu sani” 7.

¹⁹ Ma son leisi a kan de so taki wan sma di sori berow wan heri pisi ten kaba, kan abi konsensi fonfon ete. Disi kan meki taki a e sari èn kande a e firi leki a no warti noti. Efu na so yu e firi son leisi, dan no frigiti taki yu no man kenki san pasa kaba. Kande yu no ben e frustan krin na a ten dati san bun èn san no bun. Awansi fa a no fa, Yehovah gi yu pardon èn a figi den sondu dati puru krinkrin. Yehovah e si yu leki  wan sma di krin èn yu musu sabi taki now yu e du san bun. Kande yu ati e krutu yu ete, ma Bijbel e taki: „Gado bigi moro wi ati.” (Leisi 1 Yohanes 3:19, 20.) Disi wani taki dati Yehovah wani gi wi pardon trutru èn taki a lobi di a abi gi wi bigi srefisrefi. Dati meki wi no abi fu tan firi syen fu den sondu di wi du. Sobun, yu kan de seiker taki Yehovah gi yu pardon. Te wan sma e bribi taki Yehovah gi en pardon, dan a konsensi fu en no o trobi en moro èn a o man dini Gado nanga prisiri.​—1 Korentesma 6:11; Hebrewsma 10:22.

20, 21. (a) Fa a buku disi o yepi yu? (b) Fa wi musu gebroiki a fri di Yehovah gi wi?

²⁰ A buku disi o yepi yu fu oefen yu konsensi, so taki a kan warskow yu èn yepi yu fu no teki don bosroiti na ini den muilek lasti dei disi. A o yepi yu tu fu hori yusrefi na Bijbel gronprakseri na ini difrenti situwâsi. A no de fu taki dati a buku disi no o taki fu wet di e sori san fu du na ini ibri situwâsi. Wi e hori wisrefi na „a wèt fu Krestes” di komoto fu den gronprakseri fu Gado (Galasiasma 6:2). Te wan spesrutu wet no de gi wan tori, dan a no wani taki dati wi kan du san no bun (2 Korentesma 4:1, 2; Hebrewsma 4:13; 1 Petrus 2:16). Ma fu di wi de fri fu teki wi eigi bosroiti, meki wi wani sori ala ten taki wi lobi Yehovah.

²¹ Te wi e denki dipi fu den Bijbel gronprakseri èn te wi e hori wisrefi na den, dan wi e ’leri fa fu gebroiki wi frustan’, so taki wi kan denki soleki fa Yehovah e denki (Hebrewsma 5:14). Na so a konsensi fu wi o wroko bun èn wi o teki koni bosroiti di o meki taki Gado tan lobi wi.