1-3. (a) Fa furu sma e si a wroko fu den? (b) Sortu aksi wi o piki na ini a kapitel disi?

 SMA na heri grontapu e wroko tranga fu sorgu densrefi nanga na osofamiri fu den. Furu sma no lobi a wroko fu den èn den no e firi fu go na wroko ibri dei. Efu dati na fa yu e firi, dan san kan yepi yu fu du yu wroko nanga moro prisiri?

² Yehovah e taki dati „ibri sma musu nyan, taki a musu dringi èn taki a musu prisiri nanga ala a tranga wroko di a e du. Na wan presenti fu Gado” (Preikiman 3:13). Yehovah meki wi fu wroko èn a meki wi na so wan fasi taki wi wani wroko. Ma a wani tu taki wi du wi wroko nanga prisiri.​—Leisi Preikiman 2:24; 5:18.

³ Sobun, san kan yepi wi fu du wi wroko nanga prisiri? Nanga sortu wroko Kresten musu luku bun? Fa wi kan sorgu taki a wroko fu wi no e tapu wi fu anbegi Yehovah? Èn san na a moro prenspari wroko di wi kan du?

4, 5. Fa Yehovah e prakseri fu wroko?

⁴ Yehovah srefi lobi wroko tu. Genesis 1:1 e taki: „Na a bigin Gado meki hemel nanga grontapu.” Baka  di Gado kaba meki grontapu nanga ala den sani di de na en tapu, a taki dati den sani di a meki ben de „heri bun” (Genesis 1:31). A Mekiman fu wi ben breiti nanga den sani di a ben meki.​—1 Timoteyus 1:11.

⁵ Yehovah e tan wroko. Yesus ben taki: „Mi Tata tan wroko teleki now” (Yohanes 5:17). A tru taki wi no sabi ala den bigi sani di Yehovah e du, ma toku wi sabi wan tu fu den. Wán fu den sani na taki a e tyari den sma kon na wán di o tiri na ini a Kownukondre makandra nanga en Manpikin, Yesus Krestes (2 Korentesma 5:17). Boiti dati, Yehovah e sorgu gi libisma èn a e tiri a preikiwroko di e du na heri grontapu. Na so milyunmilyun sma e kon sabi Yehovah èn den e kon abi a howpu fu libi fu têgo na ini wan paradijs na grontapu.​—Yohanes 6:44; Romesma 6:23.

6, 7. Fa Yesus du a wroko fu en?

⁶ Yesus lobi wroko neleki en Papa. Fosi Yesus kon na grontapu a ben de „wan tumusi bun wrokoman” di ben e wroko makandra nanga Gado fu meki ala sani na hemel èn na grontapu (Odo 8:22-31; Kolosesma 1:15-17). Di Yesus ben de na grontapu a tan wroko tranga. Di a ben de wan yonguman a leri fu de wan bun temreman, di ben e meki sani soleki sturu, tafra, nanga oso. Yesus ben e du en wroko so bun taki sma ben kon sabi en leki „a temreman”.​—Markus 6:3.

⁷ Toku a moro prenspari wroko di Yesus ben e du di a ben de na grontapu, na fu preiki a bun nyunsu èn fu yepi sma fu kon sabi Yehovah. A ben abi dri nanga afu yari fu kaba a wroko fu en. A wroko tranga, fu mamanten fruku te lati neti (Lukas 21:37, 38; Yohanes 3:2).  Yesus waka hondrohondro kilometer tapu santi pasi fu preiki a bun nyunsu gi so furu sma leki a ben man.​—Lukas 8:1.

8, 9. Fu san ede Yesus ben e prisiri fu du a wroko fu en?

⁸ A wroko di Yesus ben e du gi Gado ben de leki nyanyan gi en, fu di a ben e gi en krakti. Son leisi Yesus ben e wroko so tranga, taki a no ben e teki ten srefi fu nyan (Yohanes 4:31-38). A ben e gebroiki ibri okasi di a ben e feni fu yepi sma fu kon sabi en Papa. Dati meki a ben man taigi Yehovah: „Mi gi yu glori na grontapu, fu di mi klari a wroko di yu gi mi fu du.”​—Yohanes 17:4.

⁹ A de krin taki Yehovah nanga Yesus e wroko tranga èn taki a wroko fu den e gi den prisiri. Wi wani „teki na eksempre fu Gado” èn wi wani „waka soifri na [Yesus] baka” (Efeisesma 5:1; 1 Petrus 2:21). Dati meki wi e du muiti fu wroko tranga, awinsi sortu wroko wi e du.

10, 11. San kan yepi wi fu du wi wroko nanga prisiri?

¹⁰ Leki a pipel fu Yehovah wi e wroko tranga fu sorgu wisrefi nanga wi osofamiri. Wi wani du wi wroko nanga prisiri, ma dati kan muilek son leisi. San wi kan du efu a wroko fu wi no e gi wi prisiri?

¹¹ A fasi fa wi e denki fu wi wroko prenspari. Kande wi no lobi a presi pe wi e wroko noso den yuru di wi e wroko. A kan taki wi no man kenki a situwâsi fu wi, ma wi kan kenki a fasi fa wi e denki fu a wroko fu wi. Te wi e frustan san Yehovah e fruwakti fu wi, dan dati kan yepi wi. Fu eksempre, Yehovah e fruwakti taki  wan osofamiri-edeman e du ala san a man fu sorgu gi en osofamiri. Bijbel e taki dati wan man di no e sorgu gi en osofamiri, „takru moro wan sma di no abi bribi” (1 Timoteyus 5:8). Efu yu na wan osofamiri-edeman, dan a no de fu taki dati yu e wroko tranga fu sorgu gi yu osofamiri. Ma awinsi yu no lobi a wroko di yu e du, yu sabi taki Yehovah breiti nanga yu fu di yu e sorgu yu osofamiri.

12. Fu san ede a bun fu wroko tranga èn fu de eerlijk?

¹² Wroko tranga èn de eerlijk. Disi kan meki en moro makriki gi yu fu du yu wroko nanga prisiri (Odo 12:24; 22:29). Fu eksempre, yu basi o man frutrow yu. Nofo tron basi lobi wrokoman di de eerlijk, fu di den no e furufuru moni noso tra sani, èn den no e nyan a yuru (Efeisesma 4:28). Ma san moro prenspari srefi, na taki Yehovah sabi te wi e wroko tranga èn te wi de eerlijk. Te yu e du dati, dan yu kan abi „wan krin konsensi” fu di yu sabi taki a Gado di yu lobi breiti nanga yu.​—Hebrewsma 13:18; Kolosesma 3:22-24.

13. Sortu tra wini a abi te wi de eerlijk na wroko?

¹³ Hori na prakseri taki a fasi fa yu e tyari yusrefi na wroko kan gi Yehovah grani. Disi na ete wan sani di e meki taki wi wani du wi wroko nanga prisiri (Titus 2:9, 10). A kan pasa srefi taki wan sma na wroko wani studeri Bijbel fu di a si a bun eksempre fu yu.​—Leisi Odo 27:11; 1 Petrus 2:12.

14-16. San wi musu hori na prakseri te wi e suku wan wroko?

¹⁴ Bijbel no e kari ala den wroko di wi leki Kresten kan du. Ma Bijbel abi gronprakseri di kan yepi wi fu  teki bun bosroiti (Odo 2:6). Gebroiki Bijbel gronprakseri èn aksi yusrefi den sani di e kon now.

¹⁵ A wroko disi o meki mi du sani di Yehovah no feni bun? Wi sabi taki Yehovah no lobi en te sma e fufuru èn te den e lei (Eksodes 20:4; Tori fu den apostel 15:29; Efeisesma 4:28; Openbaring 21:8). Dati meki wi e luku bun fu no du wroko di o meki wi pasa den wet fu Yehovah.​—Leisi 1 Yohanes 5:3.

¹⁶ A wroko disi e horibaka gi wan sani di Yehovah no feni bun? Fu eksempre, a no fowtu fu wroko na  wan presi pe yu musu teki telefon èn du tra papirawroko. Ma fa a de te wan Kresten feni wan wroko na wan casino noso na wan presi pe den e seri lòt? Kande yu no abi fu wroko pe den sma e dòbel èn kande yu srefi no abi fu seri den lòt. Ma yu no denki taki te yu e wroko na den sortu presi disi, yu e horibaka gi sma di e dòbel? Wi sabi taki te sma e dòbel, den kan kisi bigi-ai èn Gado Wortu e krutu a sani dati.​—Efeisesma 5:3-5.

17. San kan yepi wi fu teki bosroiti di Gado feni bun?

¹⁷ Hebrewsma 5:14 e taki fu „sma di leri fa fu gebroiki den frustan fu man si sani krin, so taki den kan sabi san bun èn san no bun”. Bijbel gronprakseri kan yepi wi fu de den sortu sma disi. Aksi yusrefi: ’Tra sma o naki futu efu mi teki a wroko disi? Mi o abi fu libi mi osofamiri fu go wroko na wan tra presi noso na wan tra kondre srefi? San o pasa nanga mi osofamiri?’

18. Fu san ede a kan muilek gi wi fu poti na anbegi fu wi na a fosi presi?

¹⁸ Na ini den „muilek ten” disi „di tranga fu pasa”, a kan muilek gi wi fu poti na anbegi fu Yehovah na a fosi presi (2 Timoteyus 3:1). Son leisi a no makriki fu feni wan wroko èn fu hori en. A no de fu taki dati wi musu sorgu wi osofamiri, ma toku na anbegi fu wi musu de na a fosi presi. Wi no musu meki grontapu sani tron den moro prenspari sani na ini wi libi (1 Timoteyus 6:9, 10). Sobun, fa wi kan „kon sabi san na den moro prenspari sani” èn fa wi kan sorgu gi wi osofamiri na a srefi ten?​—Filipisma 1:10.

19. Te wi e frutrow tapu Yehovah, dan fa dati o yepi wi fu no si a wroko fu wi leki a moro prenspari sani na ini wi libi?

 ¹⁹ Frutrow tapu Yehovah nanga yu heri ati. (Leisi Odo 3:5, 6.) Wi sabi taki Yehovah sabi heri bun san wi abi fanowdu èn taki a e broko en ede nanga wi (Psalm 37:25; 1 Petrus 5:7). A Wortu fu en e taki: „No meki a fasi fa unu e libi sori taki unu lobi moni. Ma un musu breiti nanga den sani di unu abi now, bika Gado taki: ’Mi no o libi yu kwetikweti èn noiti mi o gowe fu yu’” (Hebrewsma 13:5). Yehovah no wani taki wi broko wi ede doronomo fa wi o sorgu gi wi osofamiri. Ibri leisi baka Yehovah sori taki a man sorgu gi a pipel fu en (Mateyus 6:25-32). Awinsi sortu wroko wi e du, wi e sorgu taki wi e tan studeri Gado Wortu, taki wi e tan preiki a bun nyunsu, èn taki wi e tan go na den Kresten konmakandra fu wi.​—Mateyus 24:14; Hebrewsma 10:24, 25.

20. Fa wi kan libi na so wan fasi taki wi kan tan poti na anbegi fu Yehovah na a fosi presi na ini wi libi?

²⁰ Hori yu ai krin. (Leisi Mateyus 6:22, 23.) Disi wani taki dati yu musu libi na so wan fasi taki yu kan tan poti na anbegi fu Yehovah na a fosi presi na ini yu libi. Wi sabi taki a moro prenspari sani na ini wi libi, na fu de mati fu Gado. Dati meki a ben o de wan don sani te wi e meki taki moni, wan bun libi, nanga den moro nyun sani, tron den moro prenspari sani gi wi. Fa wi kan sorgu taki dati no pasa? Wi musu du ala san wi man fu no meki paiman. Ma efu wi abi wan paiman, dan wi musu meki muiti fu pai en, awinsi na pikinsopikinso. Efu wi no luku bun, dan grontapu sani kan teki so furu fu wi ten nanga krakti, taki wi no  abi ten moro fu begi, fu studeri, noso fu preiki. Wi no wani taki grontapu sani meki wi libi kon moro hebi, ma na presi fu dati wi musu de tevrede te wi abi den moro prenspari sani soleki ’nyanyan nanga krosi’ (1 Timoteyus 6:8). Awinsi san na a situwâsi fu wi, a bun fu ondrosuku wi libi ten na ten fu kon sabi efu wi kan du moro gi Yehovah.

21. Fu san ede wi musu luku san na den moro prenspari sani na ini wi libi?

²¹ Sabi san na den moro prenspari sani. Wi musu gebroiki wi ten, wi krakti, nanga den gudu fu wi na  wan koni fasi. Efu wi no luku bun, dan wi kan gebroiki furu fu wi ten gi sani di no de so prenspari, soleki skoroleri nanga sani di wi e du fu meki moni. Yesus ben taki: „Tan suku fosi a Kownukondre” (Mateyus 6:33). Den bosroiti di wi e teki, den gwenti fu wi, den sani di wi e du ala dei, nanga den sani di wi wani du na ini a ten di e kon e sori san moro prenspari gi wi.

22, 23. (a) San na a moro prenspari wroko di wan Kresten kan du? (b) San kan yepi wi fu du wi wroko nanga prisiri?

²² A moro prenspari sani di wi kan du na fu dini Yehovah. Wán fasi fa wi kan du dati, na fu preiki a bun nyunsu gi trawan (Mateyus 24:14; 28:19, 20). Neleki Yesus, wi wani du a wroko disi fayafaya. Son sma froisi go yepi na presi pe moro preikiman ben de fanowdu. Trawan leri wan tra tongo fu kan preiki gi sma di e taki a tongo dati. Taki nanga sma di du den sani disi èn aksi den fa den du en. Den o fruteri yu taki den kon de moro koloku èn taki den e firi taki den e du wan bun sani nanga den libi.​—Leisi Odo 10:22.

²³ Na ini a ten disi, furu fu wi musu wroko heri dei, noso kande wi musu du moro leki wán wroko fu man sorgu gi den moro prenspari sani di wi osofamiri abi fanowdu. Yehovah sabi dati èn a e warderi a muiti di wi e du fu sorgu gi wi osofamiri. Sobun, meki wi alamala tan wroko tranga neleki Yehovah nanga Yesus, awinsi sortu wroko wi e du. Wi no musu frigiti taki a moro prenspari wroko fu wi na fu dini Yehovah èn fu preiki a bun nyunsu fu Gado Kownukondre. Na so wi o de koloku trutru.