1-3. (a) Fu san ede wan mama e sorgu taki a boi fu en netjes èn krin? (b) Fu san ede Yehovah wani taki a pipel fu en musu de krin?

 PRAKSERI fa wan mama e sreka a boi fu en gi skoro. A e sorgu taki a boi wasi, taki a weri krin krosi èn taki a netjes. Na so a boi o tan gosontu èn tra sma o man si taki en papa nanga mama e sorgu en bun.

² Wi Tata, Yehovah, wani taki wi musu de krin èn taki wi e libi wan krin libi (Psalm 18:26). A sabi taki a e tyari wini kon gi wi te wi de krin. Èn te wi de krin, dan Yehovah e kisi glori.​—Esekièl 36:22; leisi 1 Petrus 2:12.

 ³ San a wani taki fu de krin? Fa a e tyari wini kon gi wi te wi de krin? Te wi o luku den aksi disi, dan kande wi o si taki wi musu tyari wan tu kenki kon.

4, 5. (a) Fu san ede wi musu de krin? (b) Fa den sani di Yehovah meki e sori wi taki a wani taki ala sani musu krin?

⁴ Te wi e luku fa Yehovah de, dan wi e leri taki wi musu de krin èn taki wi musu abi wan krin libi (Lefitikus 11:44, 45). Fu di wi wani „teki na eksempre fu Gado”, meki wi wani du ala san wi man fu de krin.​—Efeisesma 5:1.

⁵ Te wi e luku den sani di Yehovah meki, dan wi e si taki a wani taki ala sani musu krin. A seti sani so taki a loktu nanga a watra fu wi kan tan krin (Yeremia 10:12). Prakseri den someni fasi fa grontapu e krin ensrefi, srefi baka te libisma doti en. Fu eksempre, Yehovah meki pikin libisani di wi no man si nanga wi ai, fu sorgu taki doti di kan siki noso kiri wi, e kenki kon tron sani di bun gi grontapu. Disi na wan kefalek moi sani. Sabiman srefi e gebroiki sonwan fu den libisani disi fu krin a grontapu.​—Romesma 1:20.

6, 7. Fa a Wet fu Moses ben e sori taki den sma di e anbegi Yehovah musu de krin?

⁶ A Wet di Yehovah ben gi den Israelsma nanga yepi fu Moses, e sori wi tu fu san ede a prenspari fu de krin. Fu eksempre, a pipel ben musu de krin efu den ben wani taki Yehovah feni na anbegi fu den bun. Na a dei te a granpriester ben musu go na ini a Moro Santa Presi, a ben musu wasi tu leisi (Lefitikus 16:4, 23, 24). Fosi den tra priester ben kan tyari ofrandi, den ben musu wasi den anu nanga den futu (Eksodes 30:17-21;  2 Kroniki 4:6). Sma ben kan lasi den libi srefi te den no ben e hori densrefi krin soleki fa a Wet ben e taki.​—Lefitikus 15:31; Numeri 19:17-20.

⁷ Fa a de na ini a ten disi? A Wet e yepi wi fu kon sabi fa Yehovah e si sani (Maleaki 3:6). A Wet ben e sori krin taki den anbegiman fu Yehovah musu de krin. Yehovah no kenki. Na ini a ten disi, a wani tu taki den anbegiman fu en de krin èn taki den e libi wan krin libi.​—Yakobus 1:27.

8. Na sortu fasi wi musu de krin?

⁸ A bun te wan sma e sorgu taki en skin tan krin, te a e weri krin krosi èn te a e krin en oso. Ma gi Yehovah dati no nofo. A wani taki wi heri libi musu de krin. Dati wani taki dati na anbegi fu wi, a fasi fa wi e tyari wisrefi nanga den prakseri fu wi musu de krin. Sobun, efu wi wani taki Yehovah si wi leki sma di krin, dan wi musu de krin na ala fasi.

9, 10. San a wani taki fu anbegi Gado na wan krin fasi?

⁹ Anbegi Gado na wan krin fasi. Wi no musu abi noti fu du nanga falsi anbegi. Di den Israelsma ben de na ini katibo na Babilon, dan den ben e libi na mindri sma di den ben e anbegi falsi gado. A falsi anbegi dati ben e meki den sma libi wan fisti hurulibi. Yesaya ben taki dati den Israelsma ben o drai go baka na Israel, a kondre fu den, èn den ben o seti a tru anbegi baka. Yehovah ben taigi den: „Komoto drape. No fasi nowan sani di no krin èn komoto drape. Un hori unsrefi krin.” Gado no ben wani taki den Israelsma moksi a soifri anbegi nanga den falsi leri nanga gwenti fu den Babilonsma.​—Yesaya 52:11.

 ¹⁰ Tru Kresten na ini a ten disi e wai pasi tu gi falsi anbegi. (Leisi 1 Korentesma 10:21.) Na heri grontapu, furu pôpi gwenti nanga denki komoto fu falsi kerkileri. Fu eksempre, na ini furu kulturu, sma e bribi taki wan sani de na ini wi di e libi go doro baka te wi dede. Furu gwenti de di abi fu du nanga a denki disi (Preikiman 9:5, 6, 10). Kresten musu wai pasi gi den sortu gwenti dati. Kande wi famiri e dwengi wi fu hori wisrefi na sonwan fu den gwenti disi. Ma fu di wi wani taki Yehovah si wi leki sma di krin, meki wi e weigri fu du den sani dati awinsi trawan e dwengi wi.​—Tori fu den apostel 5:29.

11. San a wani taki fu tyari yusrefi na wan krin fasi?

¹¹ Tyari yusrefi na wan krin fasi. Efu wi wani taki Yehovah si wi leki sma di krin, dan wi no musu du hurudu kwetikweti. (Leisi Efeisesma 5:5.) Na ini Bijbel, Yehovah e taigi wi fu „lowe gi hurudu”. A e sori wi krin taki sma di e du hurudu èn di no wani sori berow, „no o kisi a Kownukondre fu Gado”.​—1 Korentesma 6:9, 10, 18; luku „Ete wan tu sani” 22.

12, 13. Fu san ede wi musu prakseri sani di krin?

¹² Prakseri sani di krin. San wi e prakseri na dati wi o du te fu kaba (Mateyus 5:28; 15:18, 19). Te wi e prakseri sani di krin, dan wi o tyari wisrefi na wan krin fasi. Fu di wi na sondusma, meki ten na ten wi o prakseri sani di no bun. Te dati pasa, dan wantewante wi musu puru den prakseri dati na wi ede. Efu wi no e du dati, dan te fu kaba wi ati no o krin moro. Kande wi o wani du den sani di wi e prakseri. Na presi fu dati wi musu furu wi frustan nanga prakseri di krin. (Leisi Filipisma 4:8.) Fu dati ede wi e luku bun sortu sani wi e du fu abi  prisiri. Wi no o leisi, luku, noso taki fu sani di abi fu du nanga hurudu noso ogridu.​—Psalm 19:8, 9.

¹³ Efu wi wani taki Gado tan lobi wi, dan wi musu anbegi en na wan krin fasi, wi musu tyari wisrefi na wan krin fasi, èn wi musu abi krin prakseri. Ma Yehovah wani tu taki wi skin nanga den sani di wi abi tan krin.

14. Fu san ede a prenspari fu hori wisrefi krin?

¹⁴ Te wi e hori wi skin nanga den sani di wi abi krin, dan dati bun gi wi èn gi trawan. Wi o firi bun èn tra sma o lobi fu de makandra nanga wi. Ma wan moro prenspari sani de fu san ede wi musu hori wisrefi krin. Wi musu hori wisrefi krin fu di dati e gi Yehovah glori. Prakseri a sani disi: Efu yu e si wan pikin di doti ala leisi, dan kande yu no ben o denki bun fu en papa nanga mama. Na so a de tu taki efu wi no sorgu wisrefi bun èn efu wi no e hori wi skin krin, dan sma no o denki bun tu fu Yehovah. Paulus ben taki: „Na nowan fasi wi e du sani di e meki trawan fadon, so taki sma no sa taki takru fu a diniwroko fu wi. Ma na ala fasi wi e sori taki wi na dinari fu Gado.”​—2 Korentesma 6:3, 4.

15, 16. San wi kan du fu hori wisrefi krin?

¹⁵ Wi skin nanga wi krosi. Wi musu hori wi skin krin ibri dei. Fu eksempre, wi e wasi ibri dei efu dati kan. Wi e wasi wi anu nanga sopo nanga watra, spesrutu te wi o go bori noso te wi o go nyan, èn seiker baka te wi go na toilet noso te wi fasi wan doti sani. Kande wi no e si en leki wan seryusu sani fu wasi wi anu, ma  a sani disi prenspari efu wi no wani taki siki nanga bakteria panya. A sani disi kan kibri wi libi srefi. Awinsi wi e tan na wan presi pe toilet no de noso pe peipi nanga gotro no de fu meki doti watra lon gowe, toku wi kan feni fasi fu hori a presi krin. Wi kan leri wan sani fu den Israelsma fu owruten. Fu di den no ben abi toilet, meki den ben e diki olo na ini a gron te den ben e go pupe èn den ben e tapu den olo disi baka. Den ben e diki den olo disi farawe fu den oso nanga den watrapeti fu den. Na so sma no ben e kon siki.​—Deuteronomium 23:12, 13.

¹⁶ Den krosi fu wi no abi fu de diri krosi, èn wi no abi fu weri den moro nyun modo. Ma den musu krin. (Leisi 1 Timoteyus 2:9, 10.) Ala ten wi wani weri krosi di e meki Yehovah kisi glori.​—Titus 2:10.

17. Fu san ede wi wani sorgu taki wi oso nanga den sani di wi abi e tan krin?

 ¹⁷ Wi oso nanga den sani di wi abi. Awinsi pe wi e libi, wi e hori wi oso krin. Wi e sorgu tu taki wi wagi, wi bromfiets, wi baisigri, noso iniwan sani di wi e rèi e tan krin, spesrutu te wi e go na den konmakandra noso te wi de na ini a preikiwroko. Wi musu hori na prakseri taki te wi e preiki, wi e fruteri sma fu a libi di wi o abi na ini wan krin paradijs grontapu (Lukas 23:43; Openbaring 11:18). A fasi fa wi oso nanga den sani di wi abi de, kan sori efu wi e sreka wisrefi kaba gi a libi na ini a nyun grontapu di o krin.

18. Fu san ede wi wani taki a presi pe wi e anbegi Gado e tan krin?

¹⁸ A presi pe wi e anbegi Gado. Fu di a prenspari gi wi taki sani e tan krin, meki wi e sorgu taki den Kownukondre zaal fu wi, noso den presi pe wi e hori bigi konmakandra, e tan krin. Te sma e kon na wan Kownukondre zaal fu a fosi leisi, dan nofo tron den e si fa a krin. A sani disi e gi Yehovah glori. Leki memre fu a gemeente, wi alamala kan yepi krin wi Kownukondre zaal èn wi kan sorgu tu taki a e tan bun.​—2 Kroniki 34:10.

19. Sortu sani wi no musu du?

¹⁹ Bijbel no e taki fu ibri takru gwenti di wi no musu abi. Ma a abi gronprakseri di kan yepi wi fu frustan fa Yehovah e si sani. A no wani taki wi smoko, a no wani taki wi dringi tumusi furu sopi èn a no wani taki wi gebroiki drugs. Efu wi na Gado mati, dan wi no o du den sortu sani disi. Fu san ede? Fu di wi abi furu lespeki gi  a libi di Gado gi wi. Den gwenti disi kan syatu wi libi, den kan pori a gosontu fu wi, èn den kan tyari problema kon gi trawan. Furu sma e pruberi fu tapu nanga den gwenti disi fu di den no wani kon siki. Ma fu di wi na mati fu Yehovah, meki wi wani tapu nanga den gwenti disi fu di wi lobi Gado. Dati na a moro prenspari sani di e meki taki wi no e du den sortu sani disi moro. Wan yongu uma ben taki: „Yehovah yepi mi fu krin mi libi èn fu tapu nanga gwenti di no krin. . . . Mi no denki taki mi ben o man tyari den kenki disi kon nanga mi eigi krakti.” Meki wi go luku feifi Bijbel gronprakseri di o yepi wan sma fu tapu nanga gwenti di no krin.

20, 21. Sortu gwenti Yehovah no wani taki wi abi?

²⁰ „Fu dati ede, lobiwan, fu di wi abi den pramisi disi, dan meki wi krin wisrefi fu ibri sani di kan doti wi skin nanga wi denki, èn meki a lespeki di wi abi gi Gado meki taki wi kon santa dorodoro” (2 Korentesma 7:1). Yehovah no wani taki wi abi gwenti di kan pori wi gosontu noso wi frustan.

²¹ Na ini 2 Korentesma 6:17, 18 wi e si fu san ede a prenspari fu „krin wisrefi fu ibri sani di kan doti wi”. Yehovah e taigi wi: „No fasi den sani moro di no krin.” A e pramisi wi tu: „Mi o teki unu. Mi o de un papa èn unu o de mi manpikin nanga mi umapikin.” Iya, wi musu wai pasi gi iniwan sani di o meki taki wi no krin. Te wi du dati, dan Yehovah o lobi wi neleki fa wan papa lobi en pikin.

22-25. Sortu Bijbel gronprakseri kan yepi wi fu no kon abi gwenti di no krin?

²² „Yu musu lobi Yehovah yu Gado nanga yu heri  ati, nanga yu heri libi, èn nanga yu heri frustan” (Mateyus 22:37). Disi na a moro prenspari komando di Gado gi wi (Mateyus 22:38). Yehovah e frudini en taki wi lobi en nanga wi heri ati. Fa wi kan lobi en nanga wi heri ati efu wi e du sani di kan syatu wi libi noso di kan pori wi frustan? Dati no kan. Dati meki wi e du ala san wi man fu sori taki wi e lespeki a libi di a gi wi.

²³ „[Yehovah] e gi ala sma libi, a e meki den bro èn a e gi den ala sani” (Tori fu den apostel 17:24, 25). Efu wan mati gi yu wan moi kado, dan yu ben o fringi en trowe noso broko en? A libi na wan tumusi warti kado di Yehovah gi wi. Wi abi furu warderi gi a kado disi. Dati meki wi wani gebroiki wi libi na wan fasi di o gi Gado glori.​—Psalm 36:9.

²⁴ „Yu musu lobi tra sma leki fa yu lobi yusrefi” (Mateyus 22:39). Te wi abi gwenti di no krin, dan a no wi wawan e kisi takru bakapisi. A sani disi kan tyari problema kon tu gi trawan, èn nofo tron dati na den sma di wi lobi. Kon meki wi taki dati wan sma e libi na ini wan oso makandra nanga wan trawan di e smoko. Te yu luku en bun, dan na smoko a sma disi e smoko tu èn a kan kisi seryusu problema nanga a gosontu fu en. Sobun, te wi e tapu nanga takru gwenti, dan wi e sori trawan taki wi lobi den.​—1 Yohanes 4:20, 21.

²⁵ „Tan memre den fu saka densrefi na ondro gran lanti èn na ondro den wan di abi makti èn fu gi yesi na den” (Titus 3:1). Furu kondre abi wet di e taki dati sma no mag abi drugs èn taki den no mag gebroiki en tu. Fu di Yehovah e taigi wi fu lespeki den regering, meki wi e gi yesi na den wet dati.​—Romesma 13:1.

26. (a) San wi musu du efu wi wani taki Yehovah feni na anbegi fu wi bun? (b) Fu san ede wi wani du ala san wi man fu hori wisrefi krin èn fu libi wan krin libi?

 ²⁶ Efu wi wani tan mati fu Yehovah, dan kande wi o si taki wi musu tyari wan tu kenki kon. Efu dati de so, dan wi musu tyari den kenki dati kon wantewante. A no makriki ala ten fu tapu nanga wan gwenti di no krin, ma wi man du en! Yehovah e pramisi taki a o yepi wi. A e taki: „Mi, Yehovah, na yu Gado. Mi na a sma di e leri yu fu kisi wini. Mi na a sma di e meki yu waka a pasi di yu musu waka” (Yesaya 48:17). Te wi e du ala san wi man fu hori wisrefi krin èn fu abi wan krin libi, dan wi kan de seiker taki Gado o kisi glori.