KAPITEL 16
Kakafutu gi Didibri
„Kakafutu gi Didibri èn a o lon gowe fu unu.”—YAKOBUS 4:7.
1, 2. San wi musu kon sabi fu Satan nanga den ogri yeye?
A LIBI na ini a nyun grontapu di Yehovah o seti gi wi o switi srefisrefi. Na a ten dati, wi o libi soleki fa Gado ben wani taki wi musu libi. Ma nownow wi e libi na ini wan grontapu di Satan nanga den ogri yeye fu en e tiri (2 Korentesma 4:4). Aladi wi no man si den, toku wi sabi taki den de èn taki den abi furu makti.
2 Na ini a kapitel disi, wi o luku fa wi kan tan krosibei fu Yehovah èn fa wi kan sorgu taki Satan no du ogri nanga wi. Yehovah pramisi taki a o yepi wi. Ma wi musu kon sabi na sortu fasi Satan nanga den ogri yeye wani kori wi èn fa den wani du ogri nanga wi.
„WAN LEW DI E BARI”
3. San Didibri wani du nanga wi?
3 Satan e taki dati libisma e anbegi Yehovah fu di den e suku den eigi bun. A taki tu dati wi o drai baka gi Gado te a e kon muilek gi wi. (Leisi Yob 2:4, 5.) Te Satan nanga den ogri yeye e si taki wan sma wani kon leri sabi moro fu Yehovah, dan den e pruberi fu tapu en. Den ati e bron te wan sma gi ensrefi abra na Yehovah èn dopu. Bijbel e agersi Didibri nanga „wan lew di e bari, fu di a e suku fu swari wan sma” (1 Petrus 5:8). Satan e suku fu pori wi nanga Yehovah.—Psalm 7:1, 2; 2 Timoteyus 3:12.
Satan ati e bron te wi bosroiti fu du a wani fu Yehovah
4, 5. (a) San Satan no man du? (b) Fa wi kan „kakafutu gi Didibri”?
4 Ma wi no abi fu frede Satan nanga den ogri yeye fu en. Yehovah sorgu taki den no kan du ala san den wani nanga wi. Yehovah pramisi taki „wan bigi ipi” tru Kresten o pasa „a bigi banawtu” libilibi (Openbaring 7:9, 14). Didibri no kan du noti fu meki taki a sani dati no pasa, fu di Yehovah e kibri a pipel fu en.
5 Efu wi tan krosibei fu Yehovah, dan Satan no o man pori wi nanga En. Gado Wortu e pramisi wi: „Yehovah o de nanga unu, solanga unu de nanga en” (2 Kroniki 15:2; leisi 1 Korentesma 10:13.) Na ini owruten, furu man nanga uma soleki Abel, Heinok, Noa, Sara, nanga Moses, ben man kakafutu gi Didibri. Den ben man du dati fu di den tan krosibei fu Yehovah (Hebrewsma 11:4-40). Wi man du dati tu. Gado Wortu e pramisi wi: „Kakafutu gi Didibri èn a o lon gowe fu unu.”—Yakobus 4:7.
SORTU FETI WI MUSU FETI?
6. Fa Satan e suku fu du ogri nanga wi?
6 Aladi Satan sabi taki Yehovah sorgu taki a no man du ala san a wani nanga wi, toku a e pruberi fu du iniwan sani fu pori wi nanga Gado. Na ini a ten disi, Didibri e suku fu du ogri nanga wi na difrenti fasi èn a e du dati nanga triki di a gebroiki dusundusun yari kaba. San na wan tu fu den triki dati?
7. Fu san ede Satan e suku fu du ogri nanga a pipel fu Yehovah?
7 Na apostel Yohanes ben skrifi: „Heri grontapu de na ini a makti fu na ogriwan” (1 Yohanes 5:19). Satan e tiri na ogri grontapu disi èn a ben o wani tiri Yehovah en pipel tu (Mika 4:1; Yohanes 15:19; Openbaring 12:12, 17). Didibri sabi taki en ten syatu èn dati meki a e du ala san a man fu meki ibriwan fu wi drai baka gi Gado. Son leisi a de krin fu si taki Didibri e du ogri nanga wi, ma tra leisi baka a no de krin fu si.
8. San ibri Kresten musu frustan?
8 Efeisesma 6:12 e taki dati wi „e feti . . . nanga den ogri yeye na hemel”. Ibri Kresten musu feti nanga Didibri nanga den ogri yeye. Wi musu frustan taki ala sma di gi densrefi abra na Yehovah, de na ini a feti disi. Di na apostel Paulus skrifi a brifi gi den Efeisesma, a gi Kresten a deki-ati dri leisi fu tan „tanapu kánkan”.—Efeisesma 6:11, 13, 14.
9. San Satan nanga den ogri yeye e pruberi fu du nanga wi?
9 Satan nanga den ogri yeye e pruberi fu kori wi na ala sortu fasi. A no fu di wi kakafutu gi wán tesi fu Satan, dan dati wani taki dati a no man kori wi nanga wan tra sani. Didibri e pruberi fu kon sabi san na den swakifasi fu wi so taki a kan sabi sortu triki a musu gebroiki fu kisi wi. Ma Didibri no abi fu kisi wi fu di Bijbel e leri wi fa a e wroko (2 Korentesma 2:11; luku „Ete wan tu sani” 31). Wán fasi fa a e wroko, na taki a e kori sma fu du sani di abi fu du nanga ogri yeye noso afkodrei.
TAN FARA FU DEN OGRI YEYE
10. (a) Sortu sani abi fu du nanga ogri yeye? (b) Fa Yehovah e si den sortu sani dati?
10 Sani soleki lukuman-wroko, bonu, wisi, èn a suku di sma e suku fu taki nanga den dedewan abi fu du nanga ogri yeye. Bijbel e taigi wi taki Gado e „tegu gi” den sortu sani disi. Wi no kan du den sortu sani disi, aladi wi e taki dati wi e anbegi Yehovah (Deuteronomium 18:10-12; Openbaring 21:8). Kresten musu tan fara fu ala sani di abi fu du nanga ogri yeye noso afkodrei.—Romesma 12:9.
11. San kan pasa te wi lobi sani di abi fu du nanga ogri yeye?
11 Efu Satan e si taki wi lobi sani di abi fu du nanga ogri yeye, dan a o moro makriki gi en fu kori wi fu go du afkodrei. Iniwan sani di abi fu du nanga den ogri yeye o pori wi nanga Yehovah.
SATAN E PRUBERI FU KORI WI
12. Fa Satan wani bruya a fasi fa wi e denki?
12 Satan e pruberi fu bruya a fasi fa sma e denki. Safrisafri a e meki sma tweifri teleki den e denki taki „bun ogri èn ogri bun” (Yesaya 5:20). Didibri wani taki sma denki taki den rai di skrifi na ini Bijbel no bun èn taki wi o de moro koloku efu wi no hori den wet fu Gado.
13. Fa Satan pruberi fu meki sma tweifri?
13 Wán fasi fa Satan e kori furu sma, na taki a e meki den tweifri. A e gebroiki a triki disi langa ten kaba. Na ini a dyari fu Eden, a pruberi fu meki Eva tweifri di a aksi en: „A de so trutru taki Gado taki dati un no musu nyan fu ala den bon na ini a dyari?” (Genesis 3:1) Bakaten, na ini a ten fu Yob, Satan aksi Yehovah na fesi ala den engel: „Na fu soso Yob e dini Gado?” (Yob 1:9) Baka di Yesus dopu, Satan tesi en di a taki: „Efu yu na wan manpikin fu Gado, dan taigi den ston disi fu tron brede.”—Mateyus 4:3.
14. Fa Satan e meki sma tweifri na ini a ten disi?
14 Te now ete Didibri e pruberi fu meki sma tweifri. Satan e meki a gersi leki son sani di abi fu du nanga ogri yeye no ogri so. A sani dati kan meki sma tweifri efu trutru den sani dati no bun. A sani disi meki srefi taki son Kresten no e si den sani dati moro leki ogri sani (2 Korentesma 11:3). San wi kan du fu kibri wisrefi? Fa wi kan sorgu taki Satan no e kisi wi nanga den triki fu en? Meki wi go luku tu fasi fa Satan kan kori wi. Wi o taki fu sani di wi e du fu abi prisiri èn wi o taki fu datrayepi.
SATAN KAN TESI WI NANGA DEN SANI DI WI LEKI LIBISMA WANI
15. San kan meki taki ogri yeye kon na ini wi libi?
15 Na ini a ten disi furu felem, telefisi programa, computer game nanga Internet website e sori sani di abi fu du nanga ogri yeye, bonu, nanga sma di abi krakti di wi leki libisma no abi. Furu sma no e si den sortu sani disi leki ogri sani, fu di den no e frustan san kan miti den te den e du sani di kan meki taki ogri yeye kon na ini den libi. Te sma e leisi horoskoop, te den e meki sma leisi den anu gi den, noso te den e meki sma koti luku gi den na wan tra fasi, dan dati abi fu du nanga ogri yeye tu. Didibri e kori sma fu di a e tyari den sani dati kon na so wan fasi taki den e hari sma èn taki sma kon lobi den. Wan sma kan denki taki solanga a no e du afkodrei, a no ogri fu luku sani di abi fu du nanga ogri yeye. Fu san ede wi musu luku bun nanga a denki dati?—1 Korentesma 10:12.
16. Fu san ede wi musu luku bun nanga den sani di wi e du fu abi prisiri?
16 Satan nanga den ogri yeye no man sabi san wi e denki. Ma den kan kon sabi san wi wani èn san wi e denki te den e luku den bosroiti di wi e teki gi wisrefi èn gi wi osofamiri, soleki den sani di wi e du fu abi prisiri. Te wi e luku felem, te wi e arki poku, noso te wi e leisi buku di abi fu du nanga bonuman, sma di e wisi trawan, sma di e kisi winti, heks, asema, nanga den sortu sani dati, dan Satan nanga den ogri yeye fu en sabi taki wi lobi den tori dati. Na a fasi dati den kan pruberi fu meki wi du afkodrei.—Leisi Galasiasma 6:7.
17. Fa Satan kan gebroiki a firi di wi abi fu de gosontu fu kori wi?
17 Fu di Satan sabi taki wi alamala wani de gosontu, meki a kan gebroiki a firi dati tu fu kori wi. Furu sma na ini a ten disi siki. Kande wan sma pruberi ala sortu sani fu kon betre, ma noti no e yepi (Markus 5:25, 26). So wan sma kan bruya so te taki a wani du iniwan sani fu kon betre. Ma leki Kresten wi musu luku bun taki wi no go suku datrayepi di abi fu du nanga „afkodrei”.—Yesaya 1:13.
Frutrow tapu Yehovah te yu siki
18. Nanga sortu datrayepi wan Kresten musu luku bun?
18 Na ini Israel fu owruten, sma ben de di ben e du „afkodrei”. Yehovah ben taigi den: „Te unu e opo un anu fu begi mi, dan mi no o luku unu. Awinsi unu e begi mi furu tron, toku mi no o arki” (Yesaya 1:15). Denki a tori. Yehovah no ben wani arki den begi fu den srefi! Wi no wani du nowan sani di kan pori wi nanga Yehovah èn di kan meki taki a no yepi wi moro, spesrutu te wi siki (Psalm 41:3). Dati meki wi musu ondrosuku finifini efu a datrayepi di wi o teki abi fu du nanga ogri yeye noso afkodrei (Mateyus 6:13). Efu a de so taki a datrayepi abi fu du nanga den sani dati, dan wi no musu teki en!—Luku „Ete wan tu sani” 32.
TORI DI ABI FU DU NANGA OGRI YEYE
19. San Didibri du fu meki furu sma frede en?
19 Son sma e denki taki Didibri nanga den ogri yeye no de trutru. Ma tra sma sabi taki den de trutru fu di den ondrofeni dati. Furu sma e frede ogri yeye èn a sani dati e meki taki den e hori densrefi na ala sortu gwenti. Trawan e meki sma kon frede fu di den e fruteri den ala sortu tori fu ogri yeye di du ogri-ati sani nanga libisma. Furu sma e si den tori disi leki span tori èn den lobi fu fruteri trawan den tori disi tu. Nofo tron den tori dati e meki sma frede Didibri.
20. Fa wi kan panya den lei fu Satan sondro taki wi sabi?
20 Hori na prakseri taki Didibri wani taki sma musu frede en (2 Tesalonikasma 2:9, 10). En na wan leiman di sabi san a musu du fu kori sma di lobi sani di abi fu du nanga ogri yeye èn a kan meki den bribi sani di no abi fu de so trutru. Kande den sma dati e fruteri tori fu sani di den denki taki den si noso yere. O moro sma e fruteri den tori disi, o moro den tori e kon span. Wi no wani panya den tori disi fu di wi no wani yepi Satan fu meki sma kon frede en.—Yohanes 8:44; 2 Timoteyus 2:16.
21. Fu sortu tori wi kan taki, na presi fu fruteri tori fu ogri yeye?
21 Efu ogri yeye ben e trobi wan futuboi fu Yehovah fosi, dan a no o go fruteri sma a tori dati leki na wan span tori a e gi. Den anbegiman fu Yehovah no abi fu frede nowan sani di Didibri noso den ogri yeye fu en kan du. Na presi fu dati wi musu poti ala wi prakseri na Yesus èn na a makti di Yehovah gi en (Hebrewsma 12:2). Yesus no ben e waka e fruteri den disipel fu en ala sortu tori fu den ogri yeye. A ben e poti prakseri na a Kownukondre boskopu èn na „den bigi sani di Gado du”.—Tori fu den apostel 2:11; Lukas 8:1; Romesma 1:11, 12.
22. San yu o du?
22 Wi no musu frigiti taki Satan o du ala san a man fu pori wi nanga Yehovah. Ma wi sabi fa Didibri e wroko. Dati meki wi o du ala san wi man fu kakafutu gi iniwan sani di abi fu du nanga den ogri yeye. Ma awinsi san pasa, wi ’no o gi Didibri okasi fu abi krakti na wi tapu’. (Leisi Efeisesma 4:27.) Efu wi kakafutu gi Didibri, dan Yehovah o kibri wi so taki wi no fadon na ini den trapu fu en.—Efeisesma 6:11.