1, 2. (a) Na ondro suma wi musu saka wisrefi? (b) Sortu aksi wi o luku na ini a kapitel disi?

 DI YU ben pikin, dan kande yu papa nanga mama ben aksi yu son leisi fu du wan sani di yu no ben wani du. Yu ben lobi yu papa nanga mama èn yu ben sabi taki yu ben musu gi yesi na den. Ma toku a kan taki yu no ben wani gi yesi na den ala ten.

² Wi sabi taki Yehovah, wi Tata, lobi wi. A e sorgu wi èn a e gi wi ala san wi abi fanowdu fu man de koloku. A e sori wi san wi kan du so taki sani kan waka bun nanga wi. Son leisi a e gebroiki tra sma fu yepi wi du dati. Wi musu lespeki Yehovah leki wi Tiriman (Odo 24:21). Ma fu san ede a muilek son leisi fu gi yesi na rai di wi e kisi fu den wan di e teki fesi? Fu san ede Yehovah wani taki wi saka wisrefi na ondro den wan di e teki fesi? Fa wi e sori taki wi e lespeki a tiri di wi e kisi fu Yehovah?​—Luku „Ete wan tu sani” 9.

3, 4. (a) Fa a du kon taki libisma abi sondu? (b) Fu san ede a kan muilek gi wi fu saka wisrefi na ondro den wan di e teki fesi?

³ Ten na ten, wi leki libisma e firi fu opo wisrefi teige trawan. Na so a de sensi a bigin di a fosi man nanga  uma, Adam nanga Eva, sondu. Den opo densrefi teige Gado, aladi den no ben abi sondu di Gado meki den. Dati meki ala libisma e gebore nanga sondu. Fu di wi na sondusma, meki a kan muilek gi wi fu du san Yehovah noso libisma e taigi wi fu du. Wan tra sani, na taki den sma di Yehovah e gebroiki fu sori wi san a wani taki wi musu du, na sondusma tu.​—Genesis 2:15-17; 3:1-7; Psalm 51:5; Romesma 5:12.

⁴ Fu di wi na sondusma, meki wi kan kisi heimemre makriki. Te wi abi a fasi disi, a kan muilek gi wi fu saka wisrefi na ondro den wan di e teki fesi. Fu eksempre, na ini owruten Israel, Yehovah ben poti Moses leki fesiman fu a pipel fu en. Ma wan man di nen Korak èn di ben dini Yehovah furu yari langa, kisi heimemre èn a no ben abi nowan lespeki gi Moses. Aladi Moses ben kisi a frantwortu fu tiri a pipel fu Gado, toku a no ben abi heimemre. Fu taki en leti, Bijbel e taki dati a ben de a moro safri-ati sma fu a ten dati. Ma Korak no ben wani saka ensrefi na ondro en. A ben meki srefi taki wan bigi grupu sma opo densrefi teige Moses. San pasa nanga Korak nanga den sma di ben opo densrefi teige Moses? Gado kiri den (Numeri 12:3; 16:1-3, 31-35). Na ini Bijbel, wi e feni furu eksempre di e leri wi taki a no bun kwetikweti fu abi heimemre.​—2 Kroniki 26:16-21; luku „Ete wan tu sani” 10.

5. Fa son sma gebroiki a makti fu den na wan fasi di no fiti?

⁵ Son leisi sma e taki: „Te makti frei go na wan sma ede, a o du kruka sani.” Na ini a heri historia, furu sma gebroiki a makti fu den fu kwinsi trawan. (Leisi Preikiman 8:9.) Fu eksempre, di Yehovah teki Saul fu tron kownu fu Israel, dan Saul ben de wan bun man di ben  abi sakafasi. Ma a gi pasi taki bigifasi nanga dyarusu teki rutu na ini en ati. A sani dati meki taki a bigin frufolgu David, wan man di no ben du nowan ogri (1 Samuel 9:20, 21; 10:20-22; 18:7-11). Bakaten, David tron kownu èn a ben de wan fu den moro bun kownu fu Israel. Ma baka wan pisi ten, David srefi gebroiki a makti fu en na wan fasi di no fiti. A ben abi seks nanga Batseiba, a wefi fu wan man di nen Uria. Fu di David ben wani kibri a sondu fu en, meki a seni Uria fu go dede na ini wan feti.​—2 Samuel 11:1-17.

6, 7. (a) San wi wani du fu di wi lobi Yehovah? (b) Fa na eksempre fu Yesus e yepi wi fu gi yesi, srefi te wi no wani du dati?

⁶ Wi e lespeki a tiri di wi e kisi fu Yehovah fu di wi lobi en. Fu di wi lobi Yehovah moro leki iniwan sani noso iniwan sma, meki wi wani prisiri en ati. (Leisi Odo 27:11; Markus 12:29, 30.) Ma Satan wani meki sma tweifri efu Yehovah abi a reti fu de wi Tiriman. Disi de so sensi a ten di a fosi trowpaar ben e libi na ini a dyari fu Eden. Didibri wani meki wi denki taki Yehovah no abi a reti fu taigi wi san wi musu du. Ma wi sabi taki dati no tru. Wi e agri nanga den wortu disi: „Na yu, Yehovah wi Gado, warti fu sma prèise yu gi a glori, a grani nanga a makti di yu abi, bika na yu meki ala sani.”​—Openbaring 4:11.

⁷ Di yu ben pikin, dan kande yu leri fu gi yesi na yu papa nanga mama, srefi te yu no ben wani du dati. Na so a de tu taki wi leki futuboi fu Yehovah feni en  muilek son leisi fu gi yesi na Gado. Ma fu di wi lobi Yehovah èn fu di wi e lespeki en, meki wi e du ala san wi man fu gi yesi na en. Yesus na wan moi eksempre gi wi. A gi yesi na Yehovah srefi te a no ben makriki gi en. Dati meki a ben kan taigi en Papa: „A no mi wani musu pasa, ma yu wani.”​—Lukas 22:42; luku „Ete wan tu sani” 11.

8. San na wan tu fasi fa Yehovah e tiri wi? (Luku a faki „ Arki rai”.)

⁸ Na ini a ten disi, Yehovah e tiri wi na difrenti fasi. Fu eksempre, a gi wi a Bijbel. A gi wi gemeente owruman tu. Te wi e lespeki den wan di Yehovah e gebroiki fu tiri wi, dan wi e sori taki wi e lespeki Yehovah leki Tiriman. Efu wi e weigri fu teki a yepi fu den, dan fu taki en leti, wi e weigri fu si Yehovah leki wi Tiriman. Di den Israelsma weigri fu teki a tiri fu Moses, dan Yehovah ben si dati leki wan seryusu sani. Gi Yehovah, dati ben wani taki dati den no ben wani teki a tiri fu en.​—Numeri 14:26, 27; luku „Ete wan tu sani” 12.

9. Fa lobi o yepi wi fu gi yesi na den wan di e teki fesi?

⁹ Te wi e lespeki den wan di e teki fesi, dan dati e sori tu taki wi lobi wi brada nanga sisa. Yu musu si en so: Te wan rampu pasa, dan nofo tron wan grupu sma e wroko makandra fu yepi so furu sma leki den man. Efu a grupu wani du a wroko bun, dan wan sma musu de fu orga a wroko èn ibri sma na ini a grupu musu du san a taki. Ma fa a de te wan sma no wani arki èn a e du san en srefi wani? Awinsi na bun a ben wani du, toku dati kan tyari problema kon gi den trawan di e wroko makandra nanga en. Den kan kisi seryusu mankeri srefi. Na so a de tu taki te wi no wani  gi yesi na Yehovah noso na den sma di a poti fu tiri wi, dan dati kan tyari problema kon tu gi trawan. Ma te wi e du san Yehovah wani, dan wi e sori taki wi lobi wi brada nanga sisa èn taki wi e lespeki a fasi fa Yehovah seti sani.​—1 Korentesma 12:14, 25, 26.

10, 11. San wi o luku now?

¹⁰ Iniwan sani di Yehovah e aksi fu wi, na fu wi eigi bun. Te wi e sori lespeki gi den wan di e teki fesi na ini wi osofamiri, na ini a gemeente, èn gi heihei lantiman, dan ala sma e kisi wini.​—Deuteronomium 5:16; Romesma 13:4; Efeisesma 6:2, 3; Hebrewsma 13:17.

¹¹ Te wi e frustan fu san ede Yehovah wani taki wi e sori lespeki gi trawan, dan dati kan de wan yepi gi wi. Wi o luku moro fini now fa wi kan sori lespeki na ini dri prenspari situwâsi.

12. Fa wan masra e sori taki a e lespeki Yehovah?

¹² Yehovah seti na osofamiri èn a gi ibri sma na ini na osofamiri wan frantwortu. Te ibri sma na ini na osofamiri e frustan san Yehovah e fruwakti fu en, dan sani o waka bun èn den alamala o kisi wini (1 Korentesma 14:33). Yehovah poti a masra leki edeman fu na osofamiri. Disi wani taki dati Yehovah e fruwakti fu wan masra taki a e sorgu en wefi nanga en pikin na wan lobi-ati fasi èn taki a e teki fesi na wan lobi-ati fasi tu. Sobun, wan masra o abi fu gi frantwortu na Yehovah fu a fasi fa a e sorgu en osofamiri. Wan Kresten masra e sori switifasi nanga lobi gi en osofamiri èn a e libi nanga den neleki fa Yesus e libi nanga a gemeente. Te wan masra e du dati, dan a e sori taki a e lespeki Yehovah.​—Efeisesma 5:23; luku „Ete wan tu sani” 13.

13. Fa wan wefi kan sori taki a e lespeki en masra?

 ¹³ Wan Kresten wefi abi wan prenspari frantwortu na ini na osofamiri. A e horibaka gi en masra di e du tranga muiti fu de wan bun edeman gi na osofamiri. En nanga en masra abi a frantwortu fu kweki den pikin fu den bun. Wán fasi fa a e leri den pikin fu en fu sori lespeki, na te en srefi e sori lespeki (Odo 1:8). A e lespeki en masra èn a e horibaka gi den bosroiti fu en. Srefi te a no e agri nanga en masra fu wan sani, toku a e fruteri en na wan lespeki fasi fa a e firi. Wan Kresten uma di trow nanga wan man di no de wan Kotoigi abi tra sortu problema. Ma efu a e tan sori lobi nanga lespeki gi en masra, dan kande wan dei a masra o wani kon sabi Yehovah èn anbegi en.​—Leisi 1 Petrus 3:1.

14. Fa pikin kan sori taki den e lespeki den papa nanga mama?

¹⁴ Pikin warti srefisrefi gi Yehovah èn a prenspari taki den papa nanga mama kibri den èn kweki den bun. Te pikin e gi yesi, dan den papa nanga mama breiti. Ma san moro prenspari na taki pikin di e gi yesi na den papa nanga mama e sori lespeki gi Yehovah èn e gi en prisiri (Odo 10:1). Na ini furu osofamiri a de so taki wan papa noso wan mama e kweki en pikin en wawan. A sani disi kan muilek srefisrefi gi a pikin èn gi a papa noso a mama. Ma te den pikin e gi yesi na a papa noso na a mama, èn te den e horibaka gi en, dan sani o waka moro bun na ini na osofamiri. Awinsi san na a situwâsi, ibri osofamiri abi en eigi problema. Ma den o de moro koloku te ibri sma na ini na osofamiri e teki a tiri fu Yehovah. Disi e gi grani na Yehovah, a sma di seti na osofamiri.​—Efeisesma 3:14, 15.

15. Fa wi kan sori taki wi e lespeki den wan di e teki fesi na ini a gemeente?

¹⁵ Yehovah e tiri wi nanga yepi fu a Kresten gemeente èn a gi Yesus a frantwortu fu tiri a gemeente (Kolosesma 1:18). Yesus fu en sei, gi „a koni srafu di de fu frutrow” a frantwortu fu sorgu gi a pipel fu Gado na grontapu (Mateyus 24:45-47). Na ini a ten disi, „a koni srafu di de fu frutrow” na a Tiri Skin. A Tiri Skin e gi wi san wi abi fanowdu fu man tan abi wan tranga bribi èn a e du dati na a yoisti ten. Owruman, dinari ini a diniwroko, nanga kring-opziener e horibaka gi den gemeente na heri grontapu èn den e kisi rai fu a Tiri Skin. Ala den brada disi abi a frantwortu fu sorgu gi wi. Den e gi frantwortu na Yehovah fu a fasi fa den du den wroko. Sobun, te wi e sori lespeki gi den man disi, dan wi e sori lespeki gi Yehovah.​—Leisi 1 Tesalonikasma 5:12; Hebrewsma 13:17; luku „Ete wan tu sani” 14.

16. Fu san ede wi kan taki dati owruman nanga dinari ini a diniwroko kisi a frantwortu fu den nanga yepi fu santa yeye?

¹⁶ Owruman nanga dinari ini a diniwroko e yepi a gemeente fu tan abi wan tranga bribi èn fu sorgu taki wánfasi de na ini a gemeente. A no de fu taki dati den na sondusma neleki wi. Ma fa den brada disi kisi den frantwortu disi dan? A no de fu taki dati den musu doro den markitiki di skrifi na ini Bijbel (1 Timoteyus 3:1-7, 12; Titus 1:5-9). Yehovah gebroiki en santa yeye fu yepi Bijbel skrifiman fu fruklari san na den markitiki dati. Den owruman e begi Yehovah fu tiri den nanga en santa yeye te den musu bosroiti suma den o gi a frantwortu fu tron owruman noso dinari ini a diniwroko.  A de krin taki na Yesus nanga Yehovah e tiri den gemeente (Tori fu den apostel 20:28). Wi kan de nanga tangi taki Gado poti den man disi fu yepi a gemeente èn fu sorgu gi en.​—Efeisesma 4:8.

17. San wan sisa musu du son leisi fu sori taki a e lespeki den wan di e teki fesi?

¹⁷ Son leisi, owruman noso dinari ini a diniwroko no de fu du wan spesrutu wroko na ini a gemeente. Nofo tron tra dopu brada kan du a wroko dati. Ma te dopu brada srefi no de, dan a kan de fanowdu taki wan sisa du a wroko dati. Na ini den situwâsi dati a sisa musu tapu en ede nanga wan sani, kande wan syaal noso wan ati (1 Korentesma 11:3-10). Na so a e sori taki a e lespeki a seti fu Yehovah taki mansma musu teki fesi na ini na osofamiri èn na ini a gemeente.​—Luku „Ete wan tu sani” 15.

18, 19. (a) San wi e leri fu Romesma 13:1-7? (b) Fa wi e sori taki wi abi lespeki gi den regering?

¹⁸ Na ini a ten disi, Yehovah e gi pasi taki den regering abi makti èn wi musu lespeki den. Den e orga sani na ini a kondre èn na ini a libimakandra so taki sani waka bun. Den e du spesrutu wroko tu gi a pipel. Kresten e gi yesi na a rai di skrifi na Romesma 13:1-7. (Leisi en.) Wi e lespeki „den tiriman” èn wi musu gi yesi na den wet fu a kondre noso fu a libimakandra pe wi e tan. Kande den wet disi e sori wi san wi musu du leki osofamiri, noso te wi e du bisnis. Kande de e sori wi tu taki wi musu go skrifi na ini lantibuku sortu gudu wi abi. Fu eksempre, wi e pai belasting èn wi e skrifi soifri gi lanti san den wani sabi. Ma san wi musu du efu  lanti e aksi wi fu du wan sani di no e kruderi nanga den wet fu Gado? Na apostel Petrus ben taki: „Fu di Gado na wi tiriman, meki wi musu gi yesi na en moro leki na libisma.”​—Tori fu den apostel 5:28, 29.

¹⁹ Efu wi e kisi fu du nanga sma soleki wan krutuman noso wan skowtu, dan ala ten wi musu sori lespeki. Kresten yonguwan e sori lespeki gi den leriman fu den na skoro èn sosrefi gi tra sma di e wroko na skoro. Na wrokope, wi e sori lespeki gi wi basi, awinsi tra wrokoman no e du dati. Te wi e du disi, dan wi e teki na eksempre fu na apostel Paulus. A ben sori lespeki gi heihei lantiman srefi te dati ben muilek son leisi (Tori fu den apostel 26:2, 25). Awinsi tra sma no e libi bun nanga wi, toku wi e tan sori lespeki gi den.​—Leisi Romesma 12:17, 18; 1 Petrus 3:15.

20, 21. Sortu bun sani kan pasa te wi e sori lespeki gi trawan?

²⁰ Na heri grontapu, moro nanga moro sma no e sori lespeki gi trawan. Ma a pipel fu Yehovah de tra fasi. Wi e du muiti fu sori lespeki gi ala sma. Wi e gi yesi na a rai disi di na apostel Petrus ben gi: „Gi grani na ala sortu sma” (1 Petrus 2:17). Te wi e lespeki trawan, dan den e si dati. Yesus ben taigi wi: „Un musu meki un leti skèin gi sma tu. Dan den kan si den bun di unu e du èn den kan gi glori na un Tata.”​—Mateyus 5:16.

²¹ Te wi e sori lespeki gi trawan na ini wi osofamiri, na ini wi gemeente, èn na ini tra situwâsi, dan a bun eksempre fu wi kan meki taki tra sma o wani kon sabi moro fu Yehovah. Èn te wi e sori lespeki gi trawan, wi e sori lespeki gi Yehovah srefi. A sani disi e gi Yehovah prisiri èn wi e sori en taki wi lobi en.