1-3. (a) San wi e leri fu Odo 13:20? (b) Fu san ede wi musu luku bun suma wi e teki leki mati?

 OITI yu si fa wan beibi e luku en papa nanga mama? Srefi te a no man taki ete, en frustan e teki ala den sani di a e si èn yere. Te a e kon moro bigi, dan sondro fu a sabi, a e bigin du neleki en papa nanga mama. Dati meki a no e fruwondru wi taki srefi bigisma di e moksi furu nanga trawan, kan bigin denki èn du leki den sma dati.

² Odo 13:20 e leri wi: „Te wan sma e waka nanga koniwan, dan ensrefi o kon koni.” Na ini a tekst disi „waka nanga” wan sma wani taki dati yu e bumui furu nanga a sma dati. A no de so nomo taki yu de krosibei fu a sma. Wan Bijbel sabiman ben taki dati te wan sma e waka nanga wan trawan, dan dati e sori taki a lobi a sma dati èn taki a e si en leki en mati. Nofo tron na den sma di wi gwenti moksi nanga den abi furu krakti na wi tapu, spesrutu te wi lobi den sma dati.

³ Den mati fu wi kan abi krakti na wi tapu. Den kan meki wi du bun noso ogri. Odo 13:20 e taki moro fara: „Te wan sma e waka nanga don sma, dan sani no o waka bun gi en.” Na ini Hebrewtongo, den wortu  „waka nanga” wan sma, wani taki dati a wan sma e „bumui nanga” wan trawan, sobun a de wan mati fu en (Odo 22:24; Krutuman 14:20). Te wi abi mati di lobi Gado, dan den o gi wi deki-ati fu tan gi yesi na en. Meki wi go luku sortu sma Yehovah e teki leki mati. Disi o yepi wi fu kon sabi suma wi musu teki leki mati.

4. (a) Fu san ede a de wan bigi grani fu de wan mati fu Gado? (b) Fu san ede Yehovah kari Abraham „mi mati”?

⁴ Yehovah, a Moro Heiwan fu hemel nanga grontapu, e gi wi na okasi fu tron en mati. A sani disi na wan bigi grani. Yehovah no e teki ala sma leki en mati. A e tron mati nanga sma di lobi en èn di e bribi na ini en. Prakseri Abraham. A ben de klariklari fu du iniwan sani gi Gado. Ibri tron baka, Abraham sori taki a ben e bribi na ini Gado èn taki a ben e gi yesi na en. A ben de klariklari srefi fu gi en manpikin Isak leki ofrandi. Abraham ben e bribi taki „Gado ben o man gi [Isak] wan opobaka” (Hebrewsma 11:17-19; Genesis 22:1, 2, 9-13). Fu di Abraham ben e bribi na ini Gado èn fu di a ben e gi yesi na en, meki Yehovah kari en „mi mati”.​—Yesaya 41:8; Yakobus 2:21-23.

5. Fa Yehovah e si den sma di e tai hori na en?

⁵ Yehovah e si den mati fu en leki sma di prenspari gi en. Èn den mati fu Yehovah e si en leki wan tumusi prenspari sani fu tai hori na en. (Leisi 2 Samuel 22:26.) Den e tai hori na en èn den e gi yesi na en fu di den lobi en. Bijbel e taki dati Gado „de bun mati nanga den sma di ati krin”. Dati na den sma di e gi  yesi na en (Odo 3:32). Yehovah e gi den mati fu en a kari fu kon tan nanga en na ini en „tenti”. A e gi den wan kari fu dini en èn fu begi en na iniwan momenti.​—Psalm 15:1-5.

6. Fa wi kan sori taki wi lobi Yesus?

⁶ Yesus ben taki: „Efu wan sma lobi mi, a o du san mi taki èn mi Tata o lobi en” (Yohanes 14:23). Sobun, efu wi wani de wan mati fu Yehovah, dan wi musu lobi Yesus tu èn wi musu du san a e leri wi. Fu eksempre, wi e gi yesi na a komando di Yesus gi wi fu preiki a bun nyunsu èn fu meki disipel (Mateyus 28:19, 20; Yohanes 14:15, 21). Fu di wi lobi Yesus, meki wi e „waka soifri na en baka” (1 Petrus 2:21). Yehovah breiti te a e si taki wi e du muiti fu de leki en Manpikin na ini ala san wi e taki èn e du.

7. Fu san ede den mati fu wi musu de mati fu Yehovah?

⁷ Den mati fu Yehovah e bribi na ini en, den e gi yesi na en, den e tai hori na en èn den lobi en Manpikin. Den mati fu yu na mati fu Yehovah tu? Efu yu mati e du muiti fu de leki Yesus èn efu den e fruteri trawan fu a Kownukondre fu Gado, dan den kan yepi yu fu tron wan moro bun sma èn fu tan gi yesi na Yehovah.

8. San yu feni moi na a eksempre fu Rut nanga Naomi?

⁸ Bijbel e taki fu someni sma di ben de mati fu makandra. Tu fu den sma dati ben de Rut nanga Naomi. Rut ben trow nanga a manpikin fu Naomi. Den tu uma disi no ben de fu a srefi kondre èn den no ben abi a srefi kulturu. Boiti dati, Naomi ben owru omeni  yari moro Rut. Ma toku den tron bun mati fu di den ala tu ben lobi Yehovah. Di Naomi ben wani gowe libi a kondre Moab fu drai go baka na Israel, dan ’Rut tan nanga en’. A taigi Naomi: „Yu pipel o de mi pipel èn yu Gado o de mi Gado” (Rut 1:14, 16). Rut ben e libi bun nanga Naomi. Di den doro na ini Israel, dan Rut wroko tranga fu sorgu en mati. Naomi ben lobi Rut èn a gi en bun rai. Rut arki en èn a sani disi meki taki den ala tu kisi furu blesi.​—Rut 3:6.

9. San yu lobi fu na eksempre fu David nanga Yonatan?

⁹ David nanga Yonatan ben de bun mati tu. Den ala tu ben e tai hori na Yehovah. Yonatan ben owru sowan 30 yari moro David èn a ben o tron kownu fu Israel baka en papa (1 Samuel 17:33; 31:2; 2 Samuel 5:4). Ma di a kon sabi taki Yehovah ben wani taki David ben musu tron kownu, dan a no ben e dyarusu èn a no pruberi fu strei nanga David. Na presi fu dati, Yonatan du ala san a man fu horibaka gi David. Fu eksempre, di sma ben e suku fu kiri David, dan Yonatan gi en deki-ati fu „tan frutrow na tapu Gado”. A yepi David aladi en srefi ben kan lasi en libi (1 Samuel 23:16, 17). David ben de wan bun mati tu gi Yonatan. A ben pramisi Yonatan taki a ben o sorgu gi en famiri èn na dati a du tu baka di Yonatan dede.​—1 Samuel 18:1; 20:15-17, 30-34; 2 Samuel 9:1-7.

10. San yu e leri fu na eksempre fu den dri Hebrew yonguman?

¹⁰ Sadrak, Meisak, nanga Abedneikow ben de dri Hebrew mati di sma ben teki tyari gowe di den ben pikin. Aladi den ben de farawe fu den famiri, toku den yepi makandra fu tan gi yesi na Yehovah. Di den kon bigi, Kownu Nebukadnesar gi den a komando fu  anbegi wan gowtu popki. A sani disi ben de wan bigi tesi gi den. Ma Sadrak, Meisak, nanga Abedneikow weigri fu anbegi a popki èn den taigi a kownu: „A no den gado fu yu wi e dini. Wi no o anbegi a gowtu popki di yu meki.” Aladi den dri mati disi kisi tesi, toku den tan gi yesi na a Gado fu den.​—Danièl 1:1-17; 3:12, 16-28.

11. Fa Paulus nanga Timoteyus tron bun mati?

¹¹ Di na apostel Paulus miti a yonguman Timoteyus, dan a ben man si taki Timoteyus ben lobi Yehovah èn taki a ben e broko en ede nanga a gemeente. Dati meki Paulus leri Timoteyus fa fu yepi den brada nanga sisa na difrenti presi (Tori fu den apostel 16:1-8; 17:10-14). Timoteyus ben de so wan bun eksempre taki Paulus ben taki fu en: „A wroko tranga nanga mi fu meki a bun nyunsu go na fesi.” Paulus ben sabi taki Timoteyus ben o „sorgu trutru” gi den brada nanga sisa. Fu di Paulus nanga Timoteyus ben e wroko tranga makandra fu dini Yehovah, meki den tron bun mati.​—Filipisma 2:20-22; 1 Korentesma 4:17.

12, 13. (a) Fu san ede wi musu luku bun suma wi e teki leki mati, srefi na ini a gemeente? (b) Fu san ede na apostel Paulus ben gi den Kresten a warskow di skrifi na 1 Korentesma 15:33?

¹² Na ini a gemeente, wi kan leri fu wi brada nanga sisa èn wi kan yepi makandra fu tan gi yesi na Yehovah. (Leisi Romesma 1:11, 12.) Ma srefi na ini a gemeente wi musu luku bun suma wi e teki leki mati. Wi abi furu brada nanga sisa fu difrenti kulturu èn di kweki na difrenti fasi. Sonwan fu den no de so langa ete na ini a gemeente èn trawan e dini Yehovah furu  yari kaba. A e teki ten fosi wan sma e tron bun mati nanga Yehovah, neleki fa a e teki ten fosi wan froktu kon lepi. Dati meki wi musu abi pasensi nanga makandra, wi musu lobi makandra, èn ala ten wi musu luku bun suma wi e teki leki mati.​—Romesma 14:1; 15:1; Hebrewsma 5:12–6:3.

¹³ Son leisi wan seryusu sani kan pasa na ini a gemeente. A kan taki wan brada noso wan sisa e du wan sani di Bijbel no feni bun. Noso kande wan sma kon abi a gwenti fu krutukrutu fu sani na ini a gemeente. Wi musu luku bun nanga den sani disi, fu di den no  bun gi a gemeente. Wi no e skreki te disi e pasa fu di srefi na ini a ten fu den apostel, problema ben de na ini a gemeente son leisi. Fu taki en leti, na apostel Paulus ben warskow den Kresten na a ten dati: „No meki sma kori unu. Takru kompe e pori bun gwenti” (1 Korentesma 15:12, 33). Paulus ben warskow Timoteyus tu fu luku bun suma a ben e teki leki mati. Wi musu du a srefi na ini a ten disi.​—Leisi 2 Timoteyus 2:20-22.

14. Fu san ede wi musu luku bun suma wi e teki leki mati efu wi wani tan mati fu Yehovah?

¹⁴ Wi musu luku bun taki noti no meki taki wi nanga Yehovah pori. Disi na a moro warti sani di wi abi. Sobun, wi no e tron mati nanga nowan sma di kan swaki a bribi fu wi èn di kan meki taki wi nanga Gado no de mati moro. Te wi poti wan sponsu na ini doti watra, dan wi no kan fruwakti taki a e soigi krin watra. Na so a de tu taki te wi abi mati di e du sani di no bun, dan wi no kan fruwakti taki wi o tan du san bun. Dati meki wi musu luku bun suma wi e teki leki mati.​—1 Korentesma 5:6; 2 Tesalonikasma 3:6, 7, 14.

15. San yu kan du fu meki bun mati na ini a gemeente?

¹⁵ Na ini a gemeente, yu kan feni sma di lobi Yehovah trutru. Den sma dati kan tron bun mati fu yu (Psalm 133:1). No tron mati soso nanga sma di owru leki yu noso di kweki leki yu. No frigiti taki Yonatan ben owru omeni yari moro David èn taki Rut ben yongu moro Naomi. Wi wani gi yesi na a Bijbel rai disi: „Opo un ati moro” (2 Korentesma 6:13; leisi 1 Petrus 2:17). O moro yu de leki Yehovah, o moro tra sma o wani de yu mati.

16, 17. Efu wan sma na ini a gemeente du wan sani di hati wi, dan san wi no musu du?

¹⁶ Na ini ibri osofamiri, ala sma de tra fasi. Den alamala abi den eigi denki èn den e du sani na den eigi fasi. Na so a de tu na ini a gemeente. Ma fu di ala sma de tra fasi meki wi kan leri fu makandra èn a sani disi e meki taki wi abi prisiri na ini a libi. Ma son leisi a kan pasa taki wi no e frustan wi brada nanga sisa so bun èn a sani dati kan meki taki wi e mandi na den tapu. Kande den du noso taki wan sani di hati wi (Odo 12:18). Ma den sani disi musu meki wi lasi-ati? Den musu meki taki wi no go moro na den konmakandra?

¹⁷ Nôno. Awinsi wan sma du wan sani di hati wi, toku wi musu tan go na den konmakandra. A no Yehovah du wan hati sani nanga wi. A gi wi libi èn a gi wi ala tra sani. A e frudini en taki wi lobi en èn taki wi e tai hori na en (Openbaring 4:11). A gemeente na wan kado di Yehovah gi wi fu yepi wi fu tan abi wan tranga bribi (Hebrewsma 13:17). Noiti wi musu wisiwasi a kado disi, soso fu di wan sma du wan sani di hati wi.​—Leisi Psalm 119:165.

18. (a) San kan yepi wi fu libi bun nanga wi brada nanga sisa? (b) Fu san ede wi musu gi trawan pardon?

¹⁸ Wi lobi wi brada nanga sisa èn wi wani libi bun nanga den. Yehovah no e fruwakti taki sma no o meki fowtu èn wi no musu fruwakti dati tu (Odo 17:9; 1 Petrus 4:8). Wi alamala e meki fowtu, ma lobi o yepi wi fu tan ’gi makandra pardon nanga wi heri ati’ (Kolosesma 3:13). Lobi o meki taki wi no e gi pasi taki wan  pikin trobi e tron wan bigi problema. A tru taki te wan sma du wan sani di hati wi, dan a kan muilek gi wi fu no tan prakseri a sani dati. A makriki fu mandi èn fu hori a sma na ati. Ma dati no o meki wi de koloku èn wi o kisi bita-ati. Efu wi gi wan sma pardon te a du wan hati sani nanga wi, dan wi o firi bun, a wánfasi na ini a gemeente o tan, èn san moro prenspari, na taki wi o tan bun mati fu Yehovah.​—Mateyus 6:14, 15; Lukas 17:3, 4; Romesma 14:19.

19. O ten wi no musu bumui moro nanga wan sma na ini a gemeente?

¹⁹ Na ini wan osofamiri pe sma lobi makandra, ibri sma e du muiti fu sorgu taki den trawan de koloku. Ma kon meki wi taki dati wán sma na ini a famiri e weigri fu hori ensrefi na den wet na ini na oso. Ala trawan na ini a famiri e pruberi ibri tron baka fu yepi a sma dati, ma a no wani teki a yepi. Kande a e bosroiti fu gowe libi oso, noso kande na ede fu a famiri e aksi en fu gowe. Wan srefi sortu sani kan pasa na ini a gemeente. Efu wan sma tan du san Yehovah no feni bun, dan disi kan tyari problema kon na ini a gemeente. A sma disi no wani teki a yepi di a e kisi èn a fasi fa a e tyari ensrefi e sori taki a no wani de wan memre fu a gemeente moro. Kande en srefi e bosroiti fu gowe libi a gemeente, noso kande den brada musu puru en fu a gemeente. Efu disi pasa, dan Bijbel e taki krin dati wi „no musu bumui” nanga en (leisi 1 Korentesma 5:11-13; 2 Yohanes 9-11). A sani disi kan  muilek gi wi efu a sma disi na wan mati noso wan famiriman fu wi. Ma na ini den sortu situwâsi disi, wi musu du muiti fu tai hori na Yehovah na presi fu tai hori na trawan.​—Luku „Ete wan tu sani” 8.

20, 21. (a) Te den owruman puru wan sma fu a gemeente, dan fa dati e sori taki Yehovah lobi wi? (b) Fu san ede wi musu luku bun suma wi e teki leki mati?

²⁰ Yehovah seti sani so, taki den owruman musu puru wan sma fu a gemeente te a e du sondu sondro fu sori berow. A seti disi e sori taki Yehovah lobi wi. Na so sma di no e lespeki den wet fu Yehovah no o man pori a gemeente (1 Korentesma 5:7; Hebrewsma 12:15, 16). Te den owruman puru wan sma fu a gemeente, dan den e sori taki den e lespeki Yehovah nen nanga den wet fu en di bun moro ala tra wet. Te wi no e moksi nanga so wan sma soleki fa Yehovah leri wi, dan wi e sori tu taki wi lobi Yehovah nanga den bun wet fu en (1 Petrus 1:15, 16). A puru di den owruman puru wan sma fu a gemeente fu di a no abi berow, e sori taki Yehovah lobi a sma dati. A strafu di a sma kisi kan yepi en fu kon frustan taki san a e du no bun èn kande disi o yepi en tu fu tyari kenki kon. Furu sma di den brada ben puru fu a gemeente, drai kon baka na Yehovah bakaten èn den brada nanga sisa ben breiti taki den kon baka na ini a gemeente.​—Hebrewsma 12:11.

²¹ Awinsi fa a no fa, den mati fu wi kan abi krakti na wi tapu. Dati meki a prenspari fu luku bun suma wi e teki leki mati. Efu wi lobi den sma di Yehovah lobi, dan wi o abi mati di kan yepi wi fu tan gi yesi na en fu ala ten.