1-3. (a) San na wan fu den bun kado di Yehovah gi wi? (b) Fa wi kan gebroiki a kado di Gado gi wi na wan fowtu fasi? (c) Fa wi musu gebroiki a kado di Gado gi wi?

 WAN papa e gi a boi fu en wan baisigri. A breiti fu gi a boi a moi kado disi. Ma fa a ben o de efu a boi no e luku bun èn a e rèi go naki wan sma gi en mankeri? Fa a papa ben o firi?

² Yehovah na a sma di gi wi „ibri bun presenti nanga ibri kado di bun dorodoro” (Yakobus 1:17). Wan fu den bun kado di a gi wi na taki wi man taki. Fu di wi man taki, meki wi man fruteri trawan fa wi e denki èn fa wi e firi. Wi man taki sani di e yepi trawan èn di e meki den firi bun. Ma den sani di wi e taki kan hati trawan tu èn den kan meki den firi sari.

³ Den sani di wi e taki abi krakti tapu trawan. Dati meki Yehovah e leri wi fu gebroiki a kado disi na wan bun fasi. A e taki: „No meki nowan pori taki komoto na un mofo, ma taki sani di bun fu gi sma deki-ati te a de fanowdu. Na so fasi den sma di e arki, kan yere sani di bun gi den” (Efeisesma 4:29). Meki wi go  luku fa wi kan gebroiki a kado di Gado gi wi na wan fasi di e gi en prisiri èn di e gi trawan deki-ati.

4, 5. San den odo na ini Bijbel e leri wi fu a krakti di den wortu fu wi kan abi?

⁴ Wortu abi krakti. Dati meki wi musu luku bun san wi e taki èn fa wi e taki en. Odo 15:4 e taki: „Te wan sma e taki na wan switi fasi, dan dati na wan bon di e gi libi, ma te wan sma e taki sani fu bedrigi trawan, dan dati e broko sma saka.” Neleki fa a switi fu tanapu na ondro wan bon te a son faya, na so a switi gi trawan te wi e taki nanga den na wan fasi di e gi den deki-ati. Na a tra sei, a de so tu taki te wi e taki grofu nanga trawan, dan dati e hati den èn a e meki den firi sari.​—Odo 18:21.

⁵ Odo 12:18 e taki: „Sma de di e taki sani sondro fu denki, neleki na dyuku den e dyuku trawan nanga wan feti-owru.” Te wi e taki hati sani, dan dati kan meki trawan firi sari èn a kan pori mati. Kande yu sabi ete fa a ben hati yu di wan sma ben taki so nanga yu. Ma na odo e taki moro fara: „A tongo fu den koniwan na dresi.” Te wi e taki switi nanga trawan, dan dati kan trowstu den te den e sari èn a kan yepi mati fu meki en bun baka nanga makandra te den ben abi trobi. (Leisi Odo 16:24.) Efu wi e hori na prakseri taki den wortu fu wi abi krakti tapu trawan, dan wi o luku bun san wi e taki.

6. Fu san ede a muilek fu basi wi tongo?

⁶ Fu di wi alamala na sondu sma, meki wi musu luku bun tu san wi e taki. „Na soso ogri prakseri de  na ini libisma ati” èn nofo tron den sani di wi e taki e sori san de na ini wi ati (Genesis 8:21; Lukas 6:45). A kan muilek srefisrefi fu basi wi tongo. (Leisi Yakobus 3:2-4.) Ma wi musu tan meki muiti fu taki moro bun nanga trawan.

7, 8. Fa den sani di wi e taki kan meki taki wi nanga Yehovah kon pori?

⁷ Wi musu luku bun tu san wi e taki fu di wi o abi fu gi frantwortu na Yehovah fu den sani di wi e taki èn fu a fasi fa wi e taki den. Yakobus 1:26 e taki: „Efu wan sma denki taki a e anbegi Gado, ma a no e basi en tongo, dan a e kori ensrefi. A sma disi e anbegi Gado fu soso.” Sobun, efu wi no e luku bun san wi e taki, dan Yehovah no o breiti moro nanga wi. A sani dati kan meki srefi taki Yehovah no e si wi moro leki en mati.​—Yakobus 3:8-10.

 ⁸ A de krin taki wi musu luku bun san wi e taki èn fa wi e taki en. Fu di wi wani taki Yehovah feni wi bun, meki wi musu kon sabi fa wi no musu taki.

9, 10. (a) Fa furu sma na ini a ten disi gwenti taki? (b) Fu san ede wi no e taki dotitaki?

⁹ Na ini a ten disi, furu sma gwenti taki dotitaki. Furu sma denki taki den musu kosi èn taki den musu taki dotitaki fu meki sma frustan den. Sma di e hori show fu meki sma lafu, gwenti taki dotitaki èn den lobi fruteri fisti tori. Ma na apostel Paulus ben taki: „Un musu tapu nanga sani soleki atibron, ogridu, kosikosi nanga dotitaki” (Kolosesma 3:8). A ben taki tu dati tru Kresten „no musu taki srefi” fu „morsu lafutori”.​—Efeisesma 5:3, 4.

¹⁰ Yehovah no lobi en te sma e taki dotitaki èn den sma di lobi Yehovah no lobi dati tu. Te sma e taki dotitaki, dan disi abi fu du nanga wan „fasi fu libi di no krin”. Bijbel e sori taki disi na wan fu „den sani di a sondu skin e du” (Galasiasma 5:19-21). „Fasi fu libi di no krin” kan abi fu du nanga difrenti sortu sondu. Te sma abi a gwenti fu du wan sani di no krin, dan dati kan meki den du tra sani di no krin. Efu wan sma abi a gwenti fu taki fisti dotitaki èn a no wani tapu nanga a gwenti dati, dan disi kan meki taki den puru en fu a gemeente.​—2 Korentesma 12:21; Efeisesma 4:19; luku „Ete wan tu sani” 23.

11, 12. (a) Fa wi kan bigin taki ogri fu trawan? (b) Fu san ede wi musu luku bun taki wi no e fruteri lei fu trawan di e gi den porinen?

¹¹ Wi musu luku bun tu taki wi no taki ogri fu trawan.  Wi alamala wani sabi fa a e go nanga trawan èn wi lobi taki fu wi famiri nanga mati. Srefi den fosi Kresten ben wani sabi fa a e go nanga den brada nanga sisa fu den èn fa den ben kan yepi den (Efeisesma 6:21, 22; Kolosesma 4:8, 9). Ma fosi yu denki, den sortu takimakandra dati kan meki wi bigin taki ogri fu trawan. Te wi e fruteri baka san wi ben yere fu trawan, dan wi kan taki sani di no tru noso wi kan taki sani di trawan no musu sabi. Efu wi no luku bun, dan a sani disi kan meki taki wi bigin fruteri lei fu trawan di e gi den porinen. Fu di den Fariseiman ben wani gi Yesus porinen, meki den lei gi en taki a du sani di a no ben du (Mateyus 9:32-34; 12:22-24). Te sma e fruteri lei fu trawan, dan dati e pori a nen fu a trawan. A sani disi e tyari trobi nanga sari kon èn a e pori mati.​—Odo 26:20.

¹² Yehovah wani taki wi taki sani di e yepi trawan èn di e gi den deki-ati. A no wani wi taki sani di e meki mati tron feanti. Yehovah no lobi sma di „lobi sutu faya fu meki trobi kon de na mindri brada” (Odo 6:16-19). A fosi sma di ben taki ogri-ati lei fu trawan ben de Satan Didibri di ben lei gi Gado (Openbaring 12:9, 10). Na ini a ten disi, sma gwenti lei gi makandra. Ma a sani disi no musu pasa na ini a Kresten gemeente (Galasiasma 5:19-21). Dati meki wi musu luku bun san wi e taki èn ala ten wi musu denki fosi wi taki. Fosi yu go fruteri wan sma wan sani di yu yere fu wan trawan, dan aksi yusrefi: ’A sani di mi o taki tru? A bun? A e yepi a trawan? Mi ben o wani a sma di mi e taki fu en, yere san mi e taki? Fa mi ben o firi efu wan sma ben taki dati fu mi?’​—Leisi 1 Tesalonikasma 4:11.

13, 14. (a) Te wi e kosi sma, dan san dati e du nanga den? (b) Fu san ede Kresten no musu kosi trawan?

 ¹³ Son leisi wi alamala e taki sani di wi winsi wi no ben taki. Ma wi no wani teki en leki wan gwenti fu krutu trawan noso fu taigi den hati sani. Leki Kresten wi no musu kosi trawan. Paulus ben taki: „Puru ala takru bita-ati nanga faya-ati nanga atibron nanga babari nanga kosikosi na un mindri” (Efeisesma 4:31). Te wi e kosi trawan, dan dati e broko den èn a e meki den firi leki den no warti noti. Fu di pikin kan lasi-ati makriki, meki wi musu luku bun fu no taigi den hati sani.​—Kolosesma 3:21.

¹⁴ Son sma abi a gwenti fu kosi trawan. Den e du a sani disi fu di den wani hati trawan fu espresi. Bijbel e warskow wi fu no du a sani disi. A ben o de wan sari sani te wan sma ben o du dati nanga en patna noso nanga den pikin fu en! Fu taki en leti, wan sma di no e tapu fu kosi trawan, no kan de wan memre moro fu a gemeente (1 Korentesma 5:11-13; 6:9, 10). Soleki fa wi si, dan efu wi e taki dotitaki, efu wi e taki sani di no tru, noso efu wi e taigi trawan hati sani, dan wi no o de mati moro fu Yehovah èn fu trawan.

15. Fa wi kan gi trawan deki-ati?

¹⁵ Fa wi kan taki na wan fasi di Yehovah feni bun? Aladi Bijbel no e taigi wi krin san wi musu taki èn san wi no musu taki, toku a e taigi wi fu „taki sani di bun fu gi sma deki-ati” (Efeisesma 4:29). Wi e gi sma deki-ati te wi e taki sani di fiti, te wi e taki na wan switi fasi èn te wi e taki sani di tru. Yehovah wani wi taki sani fu gi trawan deki-ati èn fu yepi den. A sani disi no  makriki ala ten. A moro makriki fu taki ogri-ati sani nanga hati sani, leki fu taki bun sani (Titus 2:8). Meki wi go luku wan tu fasi fa wi kan gi trawan deki-ati.

16, 17. (a) Fu san ede wi musu prèise trawan? (b) Suma wi kan prèise?

¹⁶ Yehovah nanga Yesus lobi prèise trawan. Wi wani de leki den (Mateyus 3:17; 25:19-23; Yohanes 1:47). Te wi e hori den firi fu trawan na prakseri èn te wi e broko wi ede nanga den, dan wi o man prèise den na wan fasi di e gi den deki-ati trutru. Odo 15:23 e taki: „Wan sani di taki na a yoisti ten, bun srefisrefi.” A e gi wi deki-ati te wan sma e prèise wi gi a tranga wroko di wi du noso te a e taigi wi taki a e warderi wan sani di wi du.​—Leisi Mateyus 7:12; luku „Ete wan tu sani” 27.

¹⁷ Efu yu e teki en leki wan gwenti fu si a bun na ini trawan, dan a o moro makriki gi yu fu prèise den nanga yu heri ati. Kande yu si wan sma na ini a gemeente di e sreka ensrefi bun gi den lezing fu en èn di e meki muiti fu gi piki na den konmakandra. Kande wan yongusma no e frede fu opo taki gi a waarheid na skoro, noso kande wan owrusma e teki prati doronomo na a preikiwroko. A bun fu prèise den sma dati, fu di a kan taki na dati den abi fanowdu na a momenti dati. A prenspari tu taki wan masra e taigi en wefi taki a lobi en èn taki a e warderi en (Odo 31:10, 28). Neleki fa wan bon abi son nanga watra fanowdu fu gro, na so wan sma musu man firi taki trawan e warderi en. A sani disi prenspari gi pikin tu. Suku okasi fu prèise den gi den bun fasi fu den èn gi a muiti di den e du. Te wi e prèise den, dan den o kisi moro deki-ati èn den o meki moro muiti fu du san bun.

18, 19. (a) Fu san ede wi musu meki muiti fu gi trawan deki-ati èn fu trowstu den? (b) Fa wi kan gi trawan deki-ati èn trowstu den?

 ¹⁸ Te wi e gi trawan deki-ati èn te wi e trowstu den, dan wi e teki na eksempre fu Yehovah. A e broko en ede trutru nanga den „sma di firi brokosaka” èn nanga den „sma di lasi-ati” (Psalm 51:17). Yehovah wani taki wi „gi makandra deki-ati” èn taki wi e „taki na wan fasi di e trowstu den sma di lasi-ati” (1 Tesalonikasma 5:11, 14). Te wi e pruberi fu du disi, dan a e si san wi e du èn a e warderi a muiti di wi e meki.

¹⁹ Kande yu e si taki wan sma na ini a gemeente firi brokosaka noso taki a lasi-ati. San yu kan taki fu yepi  a sma? Kande yu no man lusu a problema fu en, ma yu kan sori en taki yu e broko yu ede nanga en. Kande yu kan meki ten gi en. Kande yu kan leisi wan Bijbeltekst gi a sma fu gi en deki-ati. Yu kan aksi en srefi efu yu kan begi nanga en (Psalm 34:18; Mateyus 10:29-31). Sori den sma disi taki den kan de seiker taki den brada nanga sisa na ini a gemeente lobi den (1 Korentesma 12:12-26; Yakobus 5:14, 15). Taki na wan fasi tu di e sori taki den wortu fu yu e komoto na ini yu ati.​—Leisi Odo 12:25.

20, 21. San e meki en makriki gi sma fu teki rai?

²⁰ Wi e gi trawan deki-ati tu te wi e gi den bun rai.  Ten na ten, wi alamala abi rai fanowdu, fu di wi na sondu sma. Odo 19:20 e taki: „Arki rai èn teki piri-ai, so taki yu kan tron wan koni sma bakaten.” A no owruman wawan kan gi rai. Papa nanga mama musu gi den pikin fu den rai (Efeisesma 6:4). Èn sisa kan gi makandra bun rai (Titus 2:3-5). Fu di wi lobi wi brada nanga sisa, meki wi wani gi den rai na so wan fasi taki den no firi fruferi. San kan yepi wi?

²¹ Kande yu sabi ete di wan sma ben gi yu bun rai di ben makriki fu teki. Fu san ede a ben makriki gi yu fu teki a rai dati? Kande yu ben firi taki a sma ben e broko en ede trutru nanga yu. Noso kande a sma ben e taki na wan switi fasi èn na wan fasi di ben e sori taki a lobi yu (Kolosesma 4:6). A musu de taki a rai dati ben komoto fu Bijbel (2 Timoteyus 3:16). Te wi e gi rai, dan ala ten a rai dati musu komoto fu Bijbel, a no abi trobi efu wi e leisi wan tekst langalanga komoto fu Bijbel noso efu wi e taki fu wan tori na ini Bijbel. Nowan sma musu dwengi trawan fu si sani soleki fa en e si sani èn nowan sma musu drai wan Bijbeltekst soso fu horibaka gi en eigi denki. Te yu e memre a fasi fa trawan ben gi yu rai, dan dati kan yepi yu tu te yu musu gi trawan rai.

22. Fa yu ben o wani gebroiki a kado di Gado gi yu?

²² A taki di wi man taki, na wan kado di wi kisi fu Gado. Fu di wi lobi Gado, meki wi wani gebroiki a kado disi na wan fasi di fiti. Wi musu hori na prakseri taki wortu man broko wan sma saka noso den kan gi wan sma deki-ati. Dati meki wi musu du ala san wi man fu taki sani di e tranga trawan èn di e gi den deki-ati.