1, 2. San Bijbel e taki fu a situwâsi fu libisma? San na a wan-enkri fasi fa wi kan komoto na ini a situwâsi dati?

„ALA den sani di Gado meki, e tan geme makandra èn e nyan pina makandra te now ete” (Romesma 8:22). Nanga den wortu dati na apostel Paulus e poti prakseri na a sari situwâsi di wi de na ini now. Te wi luku a tori na wan libisma fasi, dan a gersi leki pina, sondu, nanga dede no sa man komoto noiti. Ma Yehovah kan du sani di libisma no man du (Numeri 23:19). A Gado fu retidu seti wan sani fu puru wi na ini a banawtu fu wi. A sani di a seti, wi e kari a lusu-paiman.

² A lusu-paiman na a moro bigi presenti di Yehovah gi libisma. A e meki taki wi kan kisi frulusu fu sondu nanga dede (Efeisesma 1:7). A e meki taki wi kan abi a howpu fu libi fu têgo, awinsi dati de na hemel noso na grontapu (Lukas 23:43; Yohanes 3:16; 1 Petrus 1:4). Ma san na a lusu-paiman trutru? San dati e leri wi fu a tumusi aparti fasi fa Yehovah e sori a retidu fu en?

3. (a) Fu san ede a lusu-paiman ben de fanowdu? (b) Fu san ede Yehovah no ben kan puru a dedestrafu gi den bakapikin fu Adam, fu gi den wan moro lekti strafu?

³ A lusu-paiman ben de fanowdu fu di Adam ben sondu. Fu di Adam trangayesi Gado, meki den bakapikin fu en e pina fu siki, sari, pen, nanga dede (Genesis 2:17; Romesma 8:20). Gado no ben kan puru dedestrafu gi libisma, noso gi den wan moro lekti strafu, soso fu di a ben e sari den. Efu a ben du dati, dan a ben o pasa en eigi wet di e taki: „Sondu e pai nanga dede” (Romesma 6:23). Boiti dati, Yehovah no ben o meki en eigi markitiki fu san de reti lasi krakti, fu di dati ben o tyari bigi bruya kon na hemel nanga grontapu. Efu a ben o du dati, dan kruktudu ben o de na ala sei!

4, 5. (a) Fa Satan ben lei gi Gado? Fu san ede Yehovah ben musu fu gi piki tapu den tyalensi dati? (b) Sortu takru sani Satan ben taki fu den getrow futuboi fu Yehovah?

 ⁴ Soleki fa wi si kaba na ini kapitel 12, dan na opruru na ini Eden ben abi fu du nanga wan bigi strei. Satan ben pori a bun nen fu Gado. Te yu luku en bun, dan a ben taki dati Yehovah na wan leiman èn wan ogri-ati tiriman di no ben e gi sma na okasi fu de fri (Genesis 3:1-5). Satan meki a gersi leki a ben man gens a prakseri di Gado ben abi fu meki grontapu kon furu nanga regtfardikisma. Na a fasi dati a ben wani taki dati Gado no man du sani nanga bun bakapisi (Genesis 1:28; Yesaya 55:10, 11). Efu Yehovah no ben gi piki tapu den tyalensi disi, dan furu fu den libisani di a meki nanga bunbun frustan, ben kan lasi a frutrow di den ben abi na ini a tirimakti fu en.

⁵ Satan ben lei gi den getrow futuboi fu Yehovah sosrefi. A ben taki dati den e dini En fu den eigi gridi lostu ede, èn taki nowan fu den ben o tan getrow na Gado efu den ben sa kisi kwinsi (Yob 1:9-11). Den strei disi ben prenspari moro leki a takru situwâsi fu libisma. Yehovah ben musu fu gi piki tapu den ogri-ati lei di Satan ben taki fu en, èn a ben abi leti fu du dati. Ma fa Gado ben kan seti den strei disi èn kibri a libisma famiri na a srefi ten?

6. San na wan tu fasi fa Bijbel e kari a seti di Gado gebroiki fu kibri a libisma famiri?

⁶ A fasi fa Yehovah lusu a problema ben sori taki a abi sari-ati èn taki a regtfardiki dorodoro. Nowan libisma ben o man lusu a problema na so wan fasi. Toku Yehovah no lusu a problema na wan frekti fasi. Difrenti fasi de fa Bijbel e kari a sani di Gado seti fu lusu a problema. A e kari den: wan sani di bai puru, wan sani di meki kon bun baka, wan sani fu puru fowtu, noso wan sani fu tapu sondu (Psalm 49:8; Danièl 9:24; Galasiasma 3:13; Kolosesma 1:20; Hebrewsma 2:17). Ma den wortu di e fruteri moro soifri san a tori disi wani taki, na den wan di Yesus srefi ben gebroiki. A ben taki: ’A Manpikin fu libisma no kon fu sma dini en, ma a kon fu dini sma èn fu gi en libi leki wan lusu-paiman [Grikitongo, lyʹtron] fu frulusu furu sma.’​—Mateyus 20:28.

7, 8. (a) San a wortu „lusu-paiman” wani taki na ini Bijbel? (b) Na sortu fasi wan lusu-paiman abi fu du nanga sani di musu de a srefi?

 ⁷ San na wan lusu-paiman? A Griki wortu di gebroiki dyaso abi fu du nanga wan wortu di wani taki „fu lusu wan sani meki a gowe, fu meki wan sani de fri”. A wortu disi ben abi fu du nanga a moni di sma ben e pai fu fri den wan di den ben teki leki strafuman na ini wan orloku. Te yu luku en bun, dan wi kan taki dati wan lusu-paiman na wan sani di wan sma e pai fu kisi wan tra sani baka. Na ini den Hebrew Buku fu Bijbel, a wortu di vertaal nanga „lusu-paiman” (koʹpher) abi fu du nanga wan tra wortu di wani taki „teki wan sani fu tapu wan tra sani”. Disi e yepi wi fu kon frustan taki a lusu-paiman ben musu tapu den sondu fu wi.

⁸ A moi fu si taki a buku Theological Dictionary of the New Testament e taki dati a wortu disi (koʹpher), „ala ten abi fu du nanga sani di de a srefi”, noso nanga sani di e kruderi nanga makandra. Dati meki a tapun fu na ark fu a frubontu, ben bigi nofo fu fiti soifri tapu na ark srefi. Na a srefi fasi a sani di de fanowdu fu pai wan lusu-paiman gi sondu, noso fu tapu sondu, musu warti a srefi leki den sani di lasi leki bakapisi fu sondu, a musu tapu den krinkrin. Dati meki a Wet di Gado ben gi Israel ben e taki: „Sili fu sili, ai fu ai, tifi fu tifi, anu fu anu, futu fu futu.”​—Deuteronomium 19:21.

9. Fu san ede getrow man ben e srakti meti leki ofrandi? Fa Yehovah ben e si den sortu ofrandi dati?

⁹ Fu sensi a ten fu Abel, getrow man ben de di ben gwenti fu srakti meti leki ofrandi gi Gado. Na so fasi den sori taki den ben e frustan taki den na sondusma èn taki den ben abi wan sani fanowdu fu frulusu den. Den ben sori tu taki den ben abi bribi na ini a pramisi fu Gado, taki a ben o meki sma kon fri nanga yepi fu a „siri” fu en (Genesis 3:15; 4:1-4; Lefitikus 17:11; Hebrewsma 11:4). Yehovah ben prisiri nanga den srakti-ofrandi dati èn a ben feni den anbegiman disi bun. Aladi den meti ofrandi ben bun, toku den ben de nomo fu agersi wan sani. Meti no ben  man tapu den sondu fu libisma trutru, bika den lagi moro libisma (Psalm 8:4-8). Dati meki Bijbel e taki: „A brudu fu mankaw nanga bokoboko no man puru sondu krinkrin” (Hebrewsma 10:1-4). Den sortu ofrandi dati ben e agersi a tru frulusu-ofrandi di ben musu kon ete.

10. (a) A sma di ben o pai a lusu-paiman ben musu de a srefi leki suma? Fu san ede? (b) Fu san ede meki wán libisma ofrandi nomo ben de fanowdu?

¹⁰ „Adam meki taki ala sma e dede”, na so na apostel Paulus ben taki (1 Korentesma 15:22). Sobun, fu man pai a lusu-paiman dan wan sma di ben de a srefi leki Adam ben musu dede tu, namku wan libisma di no ben abi sondu (Romesma 5:14). Nowan tra sortu libisani ben kan pai a paiman dati. Soso wan sma di no ben abi sondu, wan sma di no ben de na ondro a dedestrafu fu Adam, ben kan pai wan „lusu-paiman di fiti”, namku wan lusu-paiman di ben de a srefi leki Adam (1 Timoteyus 2:6). A no ben de fanowdu taki someni milyun libisma ben musu dede leki srakti-ofrandi fu kan pai gi a sondu fu ibriwan fu den bakapikin fu Adam. Na apostel Paulus ben fruklari: „Wán man [Adam] tyari sondu kon na ini grontapu èn nanga sondu, dede kon” (Romesma 5:12). „Fu di a sma di tyari dede kon na wan libisma”, meki Gado sorgu sosrefi taki „wan libisma” ben kan frulusu a heri libisma famiri (1 Korentesma 15:21). Fa?

11. (a) Fa a sma di ben o pai a lusu-paiman ben o „ondrofeni gi ala sma san na dede”? (b) Fu san ede meki Adam nanga Eva no ben kan kisi wini fu a lusu-paiman? (Luku a futuwortu.)

¹¹ Yehovah ben seti sani so, taki wan man di no ben abi sondu èn di ben klariklari fu yepi, ben kan gi en libi leki srakti-ofrandi. Soleki fa Romesma 6:23 e taki, dan „sondu e pai nanga dede”. Te a sma di ben o pai a lusu-paiman ben o gi en libi leki srakti-ofrandi, dan a ben o „ondrofeni gi ala sma san na dede”. Dati wani taki, dati a ben o pai a paiman fu a sondu fu Adam (Hebrewsma 2:9; 2 Korentesma 5:21; 1 Petrus 2:24). Akruderi den wet fu Gado, a sani disi ben o tyari furu kenki kon. Fu di a lusu-paiman ben puru a dedestrafu di ben de tapu den bakapikin fu  Adam di gi yesi na Gado, meki a puru a rutu fu sondu di e pori so furu sani.​—Romesma 5:16. *

12. Gi wan eksempre fu sori fa a pai fu wán paiman nomo, kan tyari wini gi bun furu sma.

¹² Fu gi wan eksempre: Meki wi taki dati yu e libi na ini wan foto pe furu fu den sma e wroko makandra na wán bigi wrokope. Yu nanga den birtisma fu yu e kisi bunbun moni gi a wroko di unu e du èn unu alamala e libi wan switi libi. Ma a sani dati e kenki te a wrokope e tapu. Fu san ede a e tapu? A driktoro fu a wrokope kon kruka, so taki a wrokope lasi so furu moni taki a musu tapu. Wantronso yu nanga den birtisma fu yu, no abi wroko moro. Dati e meki taki unu no man pai den paiman fu unu. A wán man di go du kruka sani e meki taki yu trowpatna, yu pikin, nanga tra sma di musu kisi den moni, e nyan pina. Wan fasi de fu komoto na ini a problema? Iya! Wan guduman e bosroiti fu yepi. A sabi taki a wrokope dati na wan prenspari wrokope èn a e firi sari gi den wrokoman nanga den osofamiri fu den. Sobun, a e seti sani fu pai a paiman fu a wrokope èn fu opo a wrokope baka. Fu di a wán paiman dati, no de moro, meki ala den wrokoman, den osofamiri fu den, èn sosrefi den tra sma di ben musu kisi den moni, e kisi wini fu dati. So a de tu taki milyunmilyun libisma kisi wini, baka di a paiman fu Adam ben komoto a pasi.

13, 14. (a) Fa Yehovah ben sorgu fu wan lusu-paiman fu frulusu libisma? (b) Na suma a lusu-paiman ben musu pai? Fu san ede so wan seti de fanowdu?

¹³ Yehovah wawan ben kan sorgu fu „a Pikin Skapu . . . di e puru a sondu fu grontapu” (Yohanes 1:29). Ma Gado no ben  teki iniwan fu den engel fu kon frulusu libisma na grontapu. Na presi fu dati, a ben seni a Sma di ben kan sori krinkrin taki Satan no ben abi leti di a ben taki takru fu den futuboi fu Yehovah. Iya, Yehovah du a moro bigi sani di wan sma kan du gi trawan, fu di a seni en wan-enkri gebore Manpikin, „a wan di a ben lobi trutru” (Odo 8:30). A Manpikin fu Gado ben de klariklari fu „gowe libi” a libi di a ben abi na ini hemel (Filipisma 2:7). Na wan wondru fasi, Yehovah poti a libi nanga den maniri fu a fosi gebore Manpikin fu en di ben de na hemel, na ini a bere fu wan Dyu nyunwenke di ben nen Maria (Lukas 1:27, 35). Leki libisma den ben o kari a Manpikin disi, Yesus. Ma akruderi wet, den ben kan kari en a di fu tu Adam, bika na ini ala sani a ben de a srefi leki Adam (1 Korentesma 15:45, 47). Sobun, Yesus ben kan gi ensrefi leki wan srakti-ofrandi fu frulusu a sondu libisma famiri.

¹⁴ Na suma a lusu-paiman dati ben musu pai? Psalm 49:7 e taki krin dati a lusu-paiman ben musu pai na „Gado”. Ma fa dati kan? Na Yehovah srefi ben seti sani fu a lusu-paiman ben kan pai, a no so? Iya, ma disi no e meki a lusu-paiman lasi waarde; a no de leki te wan sma e puru moni fu a wan sei saka, poti na ini a tra sei saka. Wi musu hori na prakseri taki a lusu-paiman disi a no wan paiman pe wan sma e langa wan sani trutru gi wan trawan, ma a de wan sani di pai akruderi wet. Fu di Yehovah ben seti sani fu pai a lusu-paiman, awinsi a ben o kostu en bun furu, dan a sori krin taki a e hori ensrefi na en retidu di bun dorodoro.​—Genesis 22:7, 8, 11-13; Hebrewsma 11:17; Yakobus 1:17.

15. Fu san ede Yesus ben musu pina èn dede?

¹⁵ Na a bigin pisi fu a yari 33 G.T., Yesus Krestes ben de klariklari fu nyan pina, fu kan pai a lusu-paiman te fu kaba. A ben gi pasi taki sma grabu en aladi a no ben du noti; a gi pasi taki den leisi krutustrafu gi en, èn taki den spikri en na wan postu fu kiri en. Ma a ben de fanowdu trutru taki Yesus ben musu pina na so wan fasi? Iya, bika a strei di ben abi fu du nanga a soifri retifasi fu den futuboi fu Gado, ben musu kon na wan kaba. A moi fu si taki Gado no ben gi pasi taki Herodes kiri Yesus di a ben de wan pikin ete (Mateyus 2:13-18). Ma leki bigisma Yesus ben man kakafutu gi den moro hebi tesi fu Satan, aladi a ben e hori na prakseri  taki ensrefi ben de na ini a strei tu. * Yesus ’tan getrow dorodoro, a no du ogri, a no meki fowtu, a no moksi nanga sondari’, awinsi sma ben e du ogri-ati sani nanga en. Nanga disi a sori na wan tumusi aparti fasi taki Yehovah abi futuboi di e tan na en sei, awinsi den e kisi tesi (Hebrewsma 7:26). A no e fruwondru wi fu dati ede, taki leti bifo Yesus dede a ben bari nanga overtoigi: „A kaba!”​—Yohanes 19:30.

16, 17. (a) Fa Yesus ben go doro nanga a frulusuman wroko fu en? (b) Fu san ede Yesus ben musu „sori ensrefi now na fesi Gado srefi, fu a bun fu wi”?

¹⁶ Yesus no ben kaba ete nanga en wroko leki frulusuman. Na a di fu dri dei baka di Yesus dede, dan Yehovah wiki en baka (Tori fu den Apostel 3:15; 10:40). Nanga a kefalek sani disi di Yehovah du, a no ben blesi en Manpikin nomo gi a getrow fasi fa a du a diniwroko fu en, ma A ben gi en na okasi tu fu kaba a frulusuman wroko fu en, leki a Granpriester fu Gado (Romesma 1:4; 1 Korentesma 15:3-8). Na apostel Paulus e fruklari: „Di Krestes ben kon leki granpriester . . . , dan a ben go na ini a santapresi, no nanga a brudu fu bokoboko èn fu yongu mankaw, nôno, ma nanga en eigi brudu, èn a ben kisi wan têgo frulusu gi wi, wán tron fu ala ten. Bika Krestes no ben go na ini wan santapresi di ben meki nanga anu, di de wan kopi fu a trutru sani, ma na ini hemel srefi fu sori ensrefi now na fesi Gado srefi, fu a bun fu wi.”​—Hebrewsma 9:11, 12, 24.

¹⁷ Krestes no ben kan teki a brudu fu en tyari go na hemel  trutru (1 Korentesma 15:50). A brudu fu en ben e prenki en libisma libi di ben bun dorodoro èn di a ben gi leki wan srakti-ofrandi akruderi den wet fu Gado. Sobun di a go na hemel, dan a go na fesi Gado nanga a waarde fu na ofrandi dati, so taki a ben kan pai a lusu-paiman gi ala sondu libisma. Yehovah ben teki na ofrandi dati? Iya, èn disi ben kon na krin tapu a Pinksterfesa fu 33 G.T., di Gado ben kanti santa yeye na tapu 120 disipel na ini Yerusalem (Tori fu den Apostel 2:1-4). Aladi dati ben de wan tumusi span sani, toku a ben de a bigin nomo fu den blesi di a lusu-paiman ben o tyari gi libisma.

18, 19. (a) Sortu tu grupu fu sma e kisi wini fu di den kon bun baka nanga Gado, nanga yepi fu a brudu fu Krestes? (b) San na wan tu blesi di den wan fu a „bigi ipi” e kisi nownowde èn di den sa kisi na ini a ten di e kon, leki bakapisi fu a lusu-paiman?

¹⁸ Na ini a brifi di Paulus skrifi den Kolosesma a fruteri den taki Gado ben feni en bun fu gebroiki Krestes fu meki a banti na mindri En nanga ala tra sani kon bun baka. A ben du dati di a ben tyari vrede kon nanga yepi fu a brudu fu Yesus di lon, di a ben de na a pina-udu. Paulus e fruteri sosrefi taki tu aparti grupu fu sma ben musu meki kon bun baka nanga Gado, namku ’den sani na ini hemel’, nanga ’den sani na grontapu’ (Kolosesma 1:19, 20; Efeisesma 1:10). A fosi grupu abi fu du nanga 144.000 Kresten di abi a howpu fu dini na ini hemel leki priester, èn leki kownu den o tiri grontapu makandra nanga Krestes Yesus (Openbaring 5:9, 10; 7:4; 14:1-3). Nanga yepi fu den a heri libisma famiri di e gi yesi sa nyan bun moro nanga moro fu den blesi fu a lusu-paiman, wán dusun yari langa.​—1 Korentesma 15:24-26; Openbaring 20:6; 21:3, 4.

¹⁹ „Den sani na grontapu” na den sma di o kisi na okasi fu nyan bun fu volmaakti libi na ini a Paradijs na grontapu. Openbaring 7:9-17 e kari den „wan bigi ipi” di sa libi pasa „a bigi banawtu” di de na pasi e kon. Ma den sma disi no abi fu wakti teleki a ten dati fu nyan bun fu den blesi fu a lusu-paiman. Nownow kaba den ’wasi den langa krosi fu den kon weti na ini a brudu fu a Pikin Skapu’. Fu di den e bribi na ini a lusu-paiman,  meki den e kisi wini na yeye fasi fu a lobi-ati seti dati nownow kaba. Gado ben si den leki regtfardiki sma, so taki den kan de mati fu en! (Yakobus 2:23) A srakti-ofrandi fu Yesus e meki taki den kan „go na fesi a kownusturu fu bun-ati sondro fu frede” (Hebrewsma 4:14-16). Te den e meki fowtu, dan den e kisi pardon trutru (Efeisesma 1:7). Aladi den na sondu sma, toku den abi wan krin konsensi (Hebrewsma 9:9; 10:22; 1 Petrus 3:21). Sobun, a no de so taki den e howpu nomo taki wan dei den o kon bun baka nanga Gado, ma disi e pasa nownow kaba! (2 Korentesma 5:19, 20) Na ini a pisi ten fu a Dusun Yari Tiri, dan safrisafri den sa „komoto na ini a katibo di e tyari pori kon”, èn te fu kaba den sa kon „fri trutru leki pikin fu Gado”.​—Romesma 8:21.

20. Sortu wini a kan abi gi yu efu yu denki dipi fu a lusu-paiman?

²⁰ „Tangi fu Gado nanga yepi fu Yesus Krestes”, taki den pai a lusu-paiman! (Romesma 7:25) A lusu-paiman a no wan frekti tori, ma toku a seti na so wan koni fasi taki a e furu wi ati nanga bigi lespeki (Romesma 11:33). Te wi e denki dipi fu a lusu-paiman èn te wi e sori warderi gi en, dan a e naki wi ati trutru. Na so fasi wi e kon moro krosibei na a Gado fu retidu. Neleki a psalm skrifiman, wi abi furu sani fu san ede wi musu wani prèise Yehovah, a Gado di „lobi regtfardikifasi nanga retidu”.​—Psalm 33:5.