1, 2. Fu san ede furu sma no abi lespeki gi wet, ma fa wi kan kon firi fu den wet fu Gado?

„A WET de leki wan peti di no abi gron, a . . . e swari ala sani.” Disi na san ben skrifi na ini wan buku di kon na doro na ini a yari 1712. A skrifiman ben e krutu wan wetsistema pe sma e meki krutu-afersi go nanga langa, son leisi yari baka makandra, so taki te fu kaba den sma di ben e suku yepi na fesi krutu no ben abi moni moro. Na ini furu kondre den krutu sistema frekti srefisrefi fu di den lai kruktudu, fu di sma e krutu sani na fesi, èn sosrefi fu di sma e krutu afersi nanga tu mofo. Den sani disi pasa so furu taki sma bigin tegu gi den wet fu a kondre.

² Ma teki a tori dati gersi now nanga den wortu disi di skrifi sowan 2700 yari pasa: „Fa mi lobi yu wet!” (Psalm 119:97) Fu san ede a psalm skrifiman ben lobi a wet disi so kefalek? Fu di a wet no ben komoto fu libisma tirimakti, ma fu Yehovah Gado. O moro yu e studeri den wet fu Yehovah, o moro yu sa man firi leki fa a psalm skrifiman ben e firi. Yu sa kon frustan moro bun fa a moro bigi Krutuman fu hemel nanga grontapu e prakseri.

3, 4. Na sortu fasi Yehovah sori taki en na a Sma di e gi wet?

³ „Wán sma nomo de di e gi wet èn di de krutuman”, na so Bijbel e taigi wi (Yakobus 4:12). Iya, Yehovah na a wan-enkri Sma di kan gi wet trutru. Srefi den sani na loktu e buweigi akruderi den „wet foe hemel” di En ben seti (Yob 38:33, Da Bijbel na ini Sranantongo). Na a srefi fasi Yehovah e tiri bigi grupu santa engel nanga yepi fu den wet fu en, fu di den orga na ini grupu di abi spesrutu frantwortu, aladi den de leki dinari na ondro a tiri fu Yehovah.​—Psalm 104:4; Hebrewsma 1:7, 14.

⁴ Yehovah gi a libisma famiri wet sosrefi. Ibriwan fu wi abi wan konsensi; wan firi di e kruderi nanga a fasi fa Yehovah e prakseri fu retidu. Fu di a konsensi na wan sortu wet di de na ini wi, meki  a kan yepi wi fu si a difrenti na mindri san bun èn san fowtu (Romesma 2:14). Fu di a konsensi fu wi fosi papa nanga mama ben bun dorodoro, meki den no ben abi furu wet fanowdu (Genesis 2:15-17). Ma wan sondu libisma abi moro wet fanowdu fu tiri en te a e suku fu du a wani fu Gado. Famiri-edeman soleki Noa, Abraham, nanga Yakob, ben kisi wet fu Yehovah Gado èn den ben gi den wet disi na den osofamiri fu den (Genesis 6:22; 9:3-6; 18:19; 26:4, 5). Yehovah ben meki ensrefi kon tron wan Sma di man gi wet na wan tumusi aparti fasi, di a gebroiki Moses fu gi a pipel fu Israel wan Wetsistema. A Wetsistema disi e yepi wi fu kon frustan finifini fa Yehovah e sori a retidu fu en.

5. A de so trutru taki a Wet fu Moses ben de wan hebi èn frekti wet? Fu san ede yu e taki dati?

⁵ Furu sma e prakseri taki a Wet fu Moses ben abi fu du nanga wan lo hebi èn frekti wet. Ma so wan prakseri no tru kwetikweti. A Wetsistema dati ben abi moro leki 600 wet na ini. A kan gersi leki dati furu srefisrefi, ma prakseri disi: Na a kaba fu a di fu 20 yarihondro, den lantiwet fu Amerkankondre ben furu so te, taki moro leki 150.000 bladzijde ben de fanowdu fu skrifi ala den wet disi. Ibri tu yari den e meki ete 600 wet! Sobun, den wet di Moses ben kisi no furu srefisrefi te yu teki den gersi nanga den someni wet fu libisma. Toku a Wet fu Gado ben e tiri Israel na ini afersi fu a libi di wet fu a ten disi no e taki fu den kwetikweti. Meki wi go luku wan tu prenspari sani fu a Wet dati.

6, 7. (a) San e meki taki a Wet fu Moses e difrenti fu iniwan tra wetsistema? San na a moro bigi komando fu a Wet dati? (b) Fa den Israelsma ben kan sori taki den e si Yehovah leki a wan-enkri sma di abi a reti fu tiri?

⁶ A Wet ben e hei a reti di Yehovah abi fu tiri. Dati meki wi no kan teki a Wet fu Moses gersi nanga nowan tra wetsistema na grontapu. A moro prenspari wan fu den wet ben de: „Arki, o Israel: Yehovah, wi Gado, na wán Yehovah. Yu musu lobi Yehovah, yu Gado, nanga yu heri ati, nanga yu heri sili, èn nanga ala yu krakti.” Fa a pipel fu Gado ben musu sori lobi gi en? Den ben musu dini en; den ben musu saka densrefi na ondro a reti di a abi fu tiri.​—Deuteronomium 6:4, 5; 11:13.

 ⁷ Ibri Israelsma di ben wani sori taki a e si Yehovah leki a Sma di abi ala reti fu tiri, ben musu saka ensrefi na ondro den wan di ben kisi frantwortu fu Gado. Papa nanga mama, edeman, krutuman, priester, èn te fu kaba a kownu srefi, iya, den alamala ben kisi frantwortu fu Gado. Yehovah ben e si ibriwan sma di ben e opo ensrefi teige den wan di a ben poti na wroko, leki sma di ben e opo densrefi teige en. Na a tra sei, Yehovah ben kan atibron srefisrefi te den wan di ben abi frantwortu ben e du kruktu sani nanga a pipel fu en, noso te den no ben e libi bun nanga den (Exodus 20:12; 22:28; Deuteronomium 1:16, 17; 17:8-20; 19:16, 17). Sobun, den wan di ben abi frantwortu, nanga den wan di ben musu saka densrefi, ben musu lespeki Gado leki a wan-enkri sma di abi a reti fu tiri.

8. Fa a Wet ben e yepi sma fu hori a santafasi fu Yehovah hei?

⁸ A Wet ben e yepi sma fu hori a santafasi fu Yehovah hei. Den wortu „santa” nanga „santafasi” de fu feni sowan 280 leisi na ini a Wet fu Moses. A Wet ben e yepi a pipel fu Gado fu si a difrenti na mindri san krin èn san no krin, san soifri èn san no soifri. Dati meki a Wet ben e kari sowan 70 difrenti sani di ben kan meki taki wan Israelsma no ben de krin. Den wet disi ben e sori den fa fu krin den skin, san den ben kan nyan, èn srefi san den ben musu du nanga doti. Den sortu wet disi ben e yepi sma fu de gosontu trutru. * Ma den ben abi wan moro prenspari marki tu. Den wet ben musu meki taki Yehovah tan feni a pipel bun, èn den ben musu hori a pipel aparti fu den sondu gwenti fu den pipel na den lontu di ben pori srefisrefi. Luku wan tu eksempre.

9, 10. Sortu wet na ini a Wetfrubontu ben abi fu du nanga seks demakandra èn nanga a meki di sma ben e meki pikin? Sortu wini den wet dati ben abi?

⁹ Difrenti wet na ini a Wetfrubontu ben e sori taki te sma ben abi seks demakandra noso te den ben e meki pikin, den no ben krin fu wan pisi ten, awinsi den ben trow (Lefitikus 12:2-4; 15:16-18).  Den sortu wet disi no ben e sori taki den krin presenti disi di Gado ben gi sma, ben de lagi sani (Genesis 1:28; 2:18-25). Na presi fu dati den wet dati ben e yepi sma fu hori a santafasi fu Yehovah hei, aladi den ben e sorgu taki den anbegiman fu en ben e tan fri fu iniwan sani di ben kan doti den. A bun fu sabi taki den pipel lontu Israel ben gwenti moksi na anbegi fu den nanga seks èn nanga tra gwenti di ben musu yepi den fu meki furu pikin èn fu meki sani gro bun. Na ini na anbegi fu den Kanansma, man nanga uma ben de di ben e wroko leki motyo. Na so fasi den fadon na ini wan sortu doti fisti libi. Dei fu dei moro nanga moro sma ben e bigin nanga a doti libi dati. Na a tra sei, a Wet ben e meki taki sma no ben e moksi na anbegi fu Yehovah nanga sekstori. * Ma tra winimarki ben de tu.

¹⁰ Den wet dati ben musu leri den sma wan tumusi prenspari sani. * Bika te yu luku en bun, dan fa a sondu fu Adam e abra fu a wan geslakti go na a trawan? A no fu di sma abi seks demakandra èn e meki pikin? (Romesma 5:12) Iya, a Wet fu Gado ben e memre a pipel fu en taki den na sondu sma. Te yu luku en bun, dan wi alamala e gebore na ini sondu (Psalm 51:5). Efu wi no kisi pardon fu sondu èn efu wi no kisi frulusu, dan wi no kan go krosibei na a santa Gado fu wi.

11, 12. (a) Sortu tumusi prenspari gronprakseri di abi fu du nanga retidu ben de fu feni na ini a Wet? (b) Sortu sani na ini a Wet ben musu yepi sma fu tan krutu sani reti?

¹¹ A Wet ben e horibaka gi a tumusi bun retidu fu Yehovah. A Wet fu Moses ben e leri sma gronprakseri di ben e sori den fa fu krutu sani na wan yoisti fasi. Dati meki a Wet ben e taki: „Sili fu sili, ai fu ai, tifi fu tifi, anu fu anu, futu fu futu” (Deuteronomium 19:21). Te sma ben e du ogri, dan den ben musu kisi strafu akruderi na  ogri di den ben du. A tori disi di abi fu du nanga a retidu fu Gado e kon na krin na ini a heri Wet, èn te now ete a Wet e yepi wi fu frustan a frulusu-ofrandi fu Krestes Yesus, soleki fa wi sa si na ini kapitel 14.​—1 Timoteyus 2:5, 6.

¹² A Wet ben abi difrenti pisi na ini di ben kan yepi sma fu tan krutu sani reti. Leki eksempre, ala ten wan sma ben musu abi tu kotoigi fu kan buweisi dati wan tra sma du wan fowtu sani. Wan sma ben kan kisi hebi strafu efu a ben sa lei aladi a e meki wan sweri (Deuteronomium 19:15, 18, 19). Krukafasi nanga tyuku na sani di no ben fiti kwetikweti tu (Exodus 23:8; Deuteronomium 27:25). Srefi na ini bisnis afersi, a pipel fu Gado ben musu hori densrefi na Yehovah en hei markitiki fu retidu (Lefitikus 19:35, 36; Deuteronomium 23:19, 20). A tumusi bun èn regtfardiki wetsistema dati ben de wan bigi blesi gi Israel!

13, 14. Fa a Wet ben e leri sma fu handri na wan reti fasi nanga fufuruman èn nanga den sma di den ben fufuru?

¹³ A ben de so dan taki a Wet fu Moses ben abi wan lo markitiki di ben e pina sma? Nôno, kwetikweti! Kownu David ben skrifi: „A wet fu Yehovah bun dorodoro” (Psalm 19:7). Soleki fa a ben sabi heri bun, dan a wet ben e gi sma deki-ati fu sori sari-ati èn fu no teki sei. Fa so?

¹⁴ Na son kondre na ini a ten disi, a wet meki na so wan fasi taki a gersi leki a e horibaka gi den ogriman, na presi fu yepi den sma di nyan a pina fu den ogriman disi ede. Leki eksempre, kande fufuruman e koti strafu fu wan pisi ten. Ma aladi a kan taki den sma di lasi den gudu no e kisi den sani dati baka, toku a de so taki na ini furu kondre den musu pai lantimoni di a kondre e gebroiki fu sorgu den strafuman disi. Na ini Israel fu owruten strafu-oso no ben de soleki fa wi sabi den now. Wet ben de di ben e sori krin o hebi wan strafu ben kan de (Deuteronomium 25:1-3). Wan fufuruman ben musu pai a sma ala den sani baka di a ben fufuru èn a ben musu pai moro srefi. Omeni a ben musu pai? We, a no ala ten a ben de a srefi. Soleki fa a sori, dan den krutuman ben de fri fu luku difrenti sani di ben abi fu du nanga a tori, fu eksempre, efu a sma di ben du a sondu ben abi berow. Dati ben sa fruklari fu san  ede a paiman di wan fufuruman ben musu pai soleki fa Lefitikus 6:1-7 e sori, de moro mendri leki san skrifi na ini Exodus 22:7.

15. Fa a Wet ben sorgu taki wan sma di no ben kiri wan trawan fu espresi ben kan kisi krutu na wan reti fasi? Fa a wet ben sorgu sosrefi taki sma ben kan sori sari-ati gi en?

¹⁵ Na wan sari-ati fasi a Wet ben e sori taki a no ala sma ben e du ogri fu espresi. Leki eksempre, te wan man ben kiri wan trawan ma no fu espresi, dan a no ben abi fu pai sili fu sili efu a ben sa lowe go na wan fu den loweman foto di ben de na difrenti presi na ini Israel. Baka te den krutuman di ben bun nofo fu du a wroko ben ondrosuku a tori fu so wan man, dan a ben musu tan na ini a loweman foto teleki a granpriester dede. Baka dati a ben de fri fu go libi pe a wani. Na a fasi dati a ben kan kisi wini fu a sari-ati fu Gado. Na a srefi ten a wet disi ben e sori krin taki a libi fu libisma warti srefisrefi.​—Numeri 15:30, 31; 35:12-25.

16. Fa a Wet ben e kibri son reti fu sma?

¹⁶ A Wet ben e kibri den reti fu sma. Prakseri fa a Wet ben e kibri den sma di ben de na paiman. A wet ben e taki dati efu wan sma ben abi wan paiman na yu, dan yu no ben kan go teki sani na ini na oso fu hori dati leki panti teleki a pai yu baka. Na presi fu dati, dan yu di ben leni a trawan a moni ben musu tan na dorosei, teleki a trawan srefi ben tyari a panti kon gi yu. Na so fasi a wet ben e sorgu taki nowan sma ben kan waka go langalanga na ini tra sma oso fu teki sani. Efu yu di leni moni na wan trawan ben sa teki a dyakti fu a trawan leki panti, dan yu ben musu gi a trawan a dyakti baka bifo neti fadon, bika a sma di ben meki a paiman ben musu man teki waran te neti.​—Deuteronomium 24:10-14.

17, 18. San ben de a difrenti na mindri den orloku fu den Israelsma nanga di fu den tra pipel? Fu san ede?

¹⁷ A Wet ben e sori srefi fa orloku ben musu feti. A pipel fu Gado no ben musu feti orloku fu kon abi makti noso fu teki tra kondre abra, ma fu de leki yepiman na ini den „Orloku fu Yehovah” (Numeri 21:14). Furu tron den Israelsma ben musu fruteri den tra pipel fosi san den ben musu du fu gi densrefi abra. Efu a foto no ben wani du dati, dan Israel ben kan lontu a foto fu teki en abra, ma den ben musu du dati na a fasi di Gado ben e sori den. Tra fasi leki furu srudati na ini a historia, den man na ini a legre fu Israel no ben abi primisi fu dwengi uma fu didon nanga den, noso fu kiri  iniwan sma di den ben wani kiri. Den no ben musu pori ala sani di den ben e si na ini a kondre, èn den no ben kan koti den froktubon fu den feanti trowe. * Tra legre no ben abi fu hori densrefi na den sortu wet dati.​—Deuteronomium 20:10-15, 19, 20; 21:10-13.

¹⁸ Fa yu e firi te yu e yere taki na ini son kondre sma e leri pikin-nengre srefi fu tron srudati? A no e gi yu groskin? Na ini Israel fu owruten wan man no ben kan go na ini a legre efu a no ben doro 20 yari ete (Numeri 1:2, 3). Srefi efu wan bigibigi man ben e frede tumusi fu go feti, dan a no ben abi fu go. Te wan man no ben trow so langa ete, dan wan heri yari langa a no ben abi fu go feti, so taki a ben kan si fa en wefi e meki pikin bifo a bigin nanga a wroko di ben kan meki a lasi en libi. A Wet ben e fruklari taki na a fasi disi a nyun-nyun masra ben kan meki a nyun wefi fu en „firi prisiri”.​—Deuteronomium 20:5, 6, 8; 24:5.

19. San a Wet ben seti fu kibri umasma, pikin, osofamiri, uma di den masra ben dede kaba, nanga pikin di no ben abi papa noso mama?

¹⁹ A Wet ben e kibri umasma, pikin, nanga osofamiri tu, fu di a ben sorgu taki den ben abi san ben de fanowdu. A Wet ben gi papa nanga mama a komando fu tan poti prakseri na den pikin fu den èn fu tan gi den a leri fu Gado (Deuteronomium 6:6, 7). A Wet ben krutu seks nanga krosibei famiri, èn sma di ben e du dati ben e kisi dedestrafu (Lefitikus, kapitel 18). Boiti dati, a Wet ben e krutu sutadu di e broko someni osofamiri èn di e pori a korostu libi nanga a wartifasi fu na osofamiri. A Wet ben seti sani fu sorgu uma di den masra dede kaba, nanga pikin di no ben abi papa noso mama. Na wan krakti fasi a Wet ben e sori taki sma no ben musu du ogri nanga den wan disi kwetikweti.​—Exodus 20:14; 22:22-24.

20, 21. (a) Fu san ede a Wet fu Moses ben e gi Israelsma pasi fu abi moro leki wán trowpatna? (b) Ini a tori fu brokotrow a Wet ben e difrenti fu san Yesus ben leri den bakaman fu en. Fu san ede?

²⁰ Na ini a pisi tori disi son sma kan aksi densrefi: ’Ma fu san ede a Wet ben e gi sma pasi fu abi moro leki wán trowpatna?’  (Deuteronomium 21:15-17) Te wi e luku den sortu wet dati, dan wi musu hori na prakseri fa a libi ben de na ini a ten dati. Te wan sma ben sa krutu a Wet fu Moses soleki fa wi e si sani now èn soleki fa den nyunmodo kulturu fu wi e krutu sani, dan a no de fu taki dati a sma o krutu a Wet na wan fowtu fasi (Odo 18:13). Den markitiki di Yehovah ben poti langa ten pasa na ini Eden, ben meki taki a trowlibi tron wan têgo seti na mindri wán man nanga wán uma (Genesis 2:18, 20-24). Ma na a pisi ten di Yehovah gi Israel a Wet, a ben de wan gwenti someni yarihondro kaba fu libi nanga moro leki wan patna. Yehovah ben sabi taki a pipel fu en ben „tranga-ede” èn taki ibri tron baka den ben o misi fu gi yesi na den moro prenspari wet fu en, soleki den wet di ben e krutu afkodrei (Exodus 32:9). Fu dati ede a ben de wan koni sani taki A no ben kenki den trow gwenti fu den na a pisi ten dati. Ma hori na prakseri taki a no ben de Yehovah di taki dati sma ben kan libi nanga moro leki wán patna. Toku a ben gebroiki a Wet fu Moses fu seti sani, so taki a libi ben kan waka bun te sma ben abi moro leki wán patna, èn fu sorgu taki a pipel no ben o gebroiki a gwenti dati fu go du ogri.

²¹ A Wet fu Moses ben e sori tu taki difrenti seryusu sani ben de fu san ede wan man ben kan brokotrow nanga en wefi (Deuteronomium 24:1-4). Yesus ben taki dati Gado ben gi a Dyu pipel pasi fu du dati fu di den ’ati ben tranga’. Ma toku Gado ben gi den pasi fu du dati gi wan pisi ten nomo. Di Yesus ben e taki nanga den bakaman fu en, dan a leri den fu hori densrefi na den markitiki di abi fu du nanga a trowlibi, soleki fa Yehovah ben seti dati na a bigin.​—Mateyus 19:8.

22. Na sortu fasi a Wet fu Moses ben e gi sma deki-ati fu sori lobi? Gi suma den ben musu sori a lobi dati?

²² Yu denki taki wan disiten krutu-sistema sa gi sma deki-ati fu sori lobi gi makandra? Toku a moro prenspari sani di a Wet fu Moses ben e leri sma, ben de fu sori lobi. Iya, te yu luku en bun, dan na ini a buku Deuteronomium wawan, a wortu di vertaal nanga „lobi” de fu si sowan 20 tron. A di fu tu moro bigi komando fu a heri Wet ben de: „Yu musu lobi den kompe fu yu leki yusrefi” (Lefitikus 19:18; Mateyus 22:37-40). A pipel fu Gado no ben musu  sori a lobi dati gi makandra nomo, ma sosrefi gi den trakondre sma na den mindri, aladi den ben musu hori na prakseri taki wan heri pisi ten, den leki Israelsma ben e libi na ini tra sma kondre tu. Den ben musu sori lobi gi den pôtiwan èn gi den sma di ben e pina. Den ben musu gi den sma dati san den ben abi fanowdu, aladi den no ben musu du ogri nanga sma di no ben man yepi densrefi. Den ben kisi a komando srefi fu sori switifasi gi den meti di den ben e gebroiki fu syow lai èn den no ben musu pina den.​—Exodus 23:6; Lefitikus 19:14, 33, 34; Deuteronomium 22:4, 10; 24:17, 18.

23. San a skrifiman fu Psalm 119 ben e suku fu du? San wi kan bosroiti fu du?

²³ Sortu tra pipel ben kisi a grani fu abi so wan Wetsistema? Wi kan frustan fu san ede a psalm skrifiman ben skrifi: „Fa mi lobi yu wet!” Ma a lobi dati no ben de wan firi nomo. A lobi dati ben pusu en fu handri, bika a ben e du muiti fu gi yesi na a wet èn fu libi akruderi a wet. A ben taki moro fara: „Heri dei mi wani poti prakseri na [a wet fu yu]” (Psalm 119:11, 97). Iya, doronomo a ben e teki ten fu studeri den wet fu Yehovah. A no abi misi taki, o moro a ben e du dati, o moro a ben e kon lobi den wet dati. Na a srefi ten a lobi fu en gi a Sma di ben meki den wet, ben e gro tu. Fu dati ede, meki a de so taki yu e tan kon moro krosibei na Yehovah, fu di yu e tan studeri den wet fu En leki a Moro Gran Sma di e gi wet èn leki a Gado fu retidu.