1, 2. (a) San yu ben sa wani aksi Gado? (b) San Moses ben aksi Gado?

KON meki wi taki dati yu abi wan takimakandra nanga Gado. Te yu e prakseri fu a sani dati nomo, taki a Moro Heiwan fu hemel nanga grontapu e taki nanga yu, dan dati e furu yu ati nanga lespeki! Na a bigin yu e frede pikinso, ma dan yu e teki pikin deki-ati fu taki wan sani. Gado e arki yu, èn dan a e piki yu baka. A e gi yu na okasi srefi fu poti aksi gi en; iniwan aksi di yu wani. Ma sortu aksi yu o poti gi en now?

² Langa ten pasa, yu ben abi wan man di ben kisi so wan okasi. A man dati ben nen Moses. Ma kande a sa fruwondru yu fu yere san Moses ben aksi Gado. A no ben aksi wan sani di abi fu du nanga ensrefi, nanga a tamara fu en, noso nanga den problema fu libisma. Na presi fu dati a ben aksi fa Gado nen. Kande yu e aksi yusrefi fu san ede Moses du dati, bika a ben sabi a nen fu Gado kaba. Sobun, a musu de so taki na aksi fu en ben abi fu du nanga wan moro dipi tori. Te yu luku en bun, dan na aksi di Moses poti ben de a moro prenspari sani di a ben kan aksi. A piki tapu na aksi dati abi krakti tapu a libi fu wi alamala. A kan yepi yu fu du san de tranga fanowdu fu kon krosibei na Gado. Fa so? Meki wi luku fa na aparti takimakandra dati ben waka.

3, 4. Fa a du kon taki Moses ben kon abi wan takimakandra nanga Gado? Fu sortu prenspari tori den ben taki?

³ Moses ben abi 80 yari. Fo tenti yari langa a ben de leki wan katiboman, farawe fu en pipel, den Israelsma, di ben de srafu na ini Egepte. Wan dei di a ben e luku den skapu fu a papa fu a wefi fu en, dan a si wan aparti sani. A si wan makabusi di ben teki faya, ma toku a bon srefi no ben e bron gowe. A faya ben e tan bron nomo, so taki a makabusi ben de leki wan bigi leti na sei a bergi. Moses go moro krosibei fu ondrosuku a sani disi. A musu de taki a skreki srefisrefi di a yere wan sten e taki nanga en komoto fu a faya! Nanga yepi fu wan engel, Gado taki finifini  nanga Moses fu wan tu sani. Moses ben e fredefrede pikinso. Ma neleki fa yu sabi kande, dan dati ben de na okasi pe Gado gi en a komando fu gowe libi a tiri libi fu en èn fu drai go baka na Egepte fu puru den Israelsma na ini katibo.​—Exodus 3:1-12.

⁴ Na a momenti dati, Moses ben kan poti aksi gi Gado; iniwan aksi di a ben wani. Ma luku sortu aksi a ben poti gi Gado: „Kon meki wi taki dati mi doro now na den manpikin fu Israel èn taki mi e taigi den trutru: ’A Gado fu un fositen tata seni mi kon na unu’, èn taki den aksi mi: ’Fa a nen?’ San mi sa piki den dan?”​—Exodus 3:13.

5, 6. (a) Sortu tumusi prenspari tru tori wi e leri fu na aksi fu Moses? (b) San na a moro bigi fowtu di libisma meki nanga a nen fu Gado? (c) Fu san ede a de so wan bigi sani taki Gado fruteri libisma fa a nen?

⁵ Na a fosi presi, na aksi dati e leri wi taki Gado abi wan nen. Wi no musu si a tru tori disi leki wan lawlaw sani. Toku furu sma e du dati. Sma puru a nen fu Gado na ini bun furu bijbelvertaling. Na presi fu a nen dati den gebroiki wortu soleki „Masra” nanga „Gado”. Disi na wan fu den moro sari sani èn sosrefi wan fu den moro bigi fowtu di sma ben kan meki na ini a nen fu kerki. Bika san na a fosi sani di yu e du te yu e miti wan sma a fosi leisi? Yu e aksi a sma fa a nen, a no so? So a de tu te wi wani kon sabi Gado. Gado a no wan sma di no abi wan nen. A no de wan sma di de tumusi fara fu wi, so taki wi no man kon sabi en, noso frustan en. Aladi wi no man si en, toku a de wan trutru sma di abi wan nen ​— Yehovah.

⁶ Moro fara a de so taki te Gado e tyari kon na krin san na en nen, dan wan kefalek bigi sani de fu pasa. A e gi wi a kari fu kon leri sabi en. A wani taki wi musu teki a moro bun bosroiti di wan sma kan teki na ini en libi; a wani wi fu kon krosibei na en. Ma Yehovah no fruteri wi nomo fa a nen. A leri wi sosrefi suma na a Sma di e tyari a nen disi.

7. (a) Soleki fa wi e frustan en, dan san a nen fu Gado wani taki? (b) San Moses ben wani kon sabi trutru di a aksi Gado a nen fu En?

⁷ Yehovah na a sma di ben bosroiti sortu nen a ben o gi ensrefi,  wan nen di de tumusi prenspari. Soleki fa wi e frustan, dan a nen „Yehovah” wani taki „A e meki kon tron”. Nowan sma na hemel èn na grontapu de leki Yehovah, fu di na en meki ala sani èn na en meki taki ala sani di a abi na prakseri e kon tru. Te wi e prakseri disi, dan a e meki wi kisi furu lespeki gi en. Ma dati na ala san a nen fu Gado wani taki? We, a de krin taki Moses ben wani kon sabi moro fu Gado nen. Te yu luku en bun, dan a ben sabi kaba taki Yehovah na a Mekiman èn a ben sabi Gado nen. A nen fu Gado no ben de wan nyun nen. Sma ben e gebroiki a nen dati hondrohondro yari kaba. Sobun, di Moses aksi Gado fa a nen, dan a ben wani kon sabi suma na a sma di e tyari a nen dati. Te yu luku en bun, dan a ben aksi: ’San mi kan fruteri yu pipel, Israel, fu meki den poti moro bribi na yu? San mi kan fruteri den fu yu fu overtoigi den taki yu o frulusu den trutru?’

8, 9. (a) San Yehovah ben piki tapu na aksi fu Moses? San fowtu na a fasi fa sma vertaal a piki dati furu tron? (b) San den wortu „Mi sa tron san mi wani tron”, wani taki?

⁸ Di Yehovah piki Moses, dan a sori en wan moi sani fu ensrefi. A sani disi abi fu du nanga san a nen fu en wani taki. A taigi Moses: „Mi sa tron san mi wani tron” (Exodus 3:14). Na ini furu Bijbel a pisi disi vertaal so: „Mi de di mi de.” Ma pisi fu Bijbel di vertaal moro soifri e tyari kon na krin taki Gado no ben wani sori Moses nomo taki a de trutru. Na presi fu dati, Yehovah ben wani leri Moses èn ala tra libisma tu, taki A ben ’o tron san a wani tron’. Dati wani taki dati a bosroiti fu tron iniwan sani di de fanowdu fu du san a pramisi. A tekst disi vertaal bun tu na ini a bijbelvertaling fu Joseph Bryant Rotherham, pe skrifi: „Mi o tron iniwan sani di mi wani tron.” Wan sabiman fu a Hebrewtongo fu Bijbel e fruklari den wortu dati na a fasi disi: „Awinsi san na a situwâsi noso awinsi san de fanowdu . . . , Gado o ’tron’ a sani di de fanowdu fu lusu a problema.”

⁹ San dati ben wani taki gi den Israelsma? Awinsi sortu problema ben o miti den, awinsi o bigi a nowtu fu den ben o de, Yehovah ben o tron iniwan sani di ben de fanowdu fu puru den na ini katibo, èn fu tyari den go na ini a Pramisi Kondre. A no de fu taki dati a nen Yehovah ben gi den Israelsma deki-ati fu  poti frutrow tapu Gado. Na ini a ten disi a nen dati kan gi wi a srefi deki-ati tu (Psalm 9:10). Fu san ede?

10, 11. Na sortu fasi a nen fu Yehovah e gi wi deki-ati fu si en leki wan sma di man du furu difrenti sani, èn leki a moro bun Papa di wi kan abi? Gi wan eksempre.

¹⁰ Fu gi yu wan eksempre: Papa nanga mama sabi taki den musu man du furu difrenti sani èn taki den musu man fiti densrefi na den pikin fu den, fu man sorgu den bun. Na ini wán dei nomo, wan papa noso mama kan abi fu tyari ensrefi leki wan sma di e sorgu sikiwan, wan boriman, wan leriman, wan sma di e gi trawan piri-ai, wan krutuman, èn so moro fara. Furu sma feni taki a hebi fu tyari ala den difrenti frantwortu disi. Den e si taki den pikin fu den e frutrow den dorodoro. Den pikin e bribi trutru taki papa noso mama man puru skin-ati, taki den man kowru ala trobi, taki den man meki iniwan preisani di broko, èn taki den sa man piki ala den aksi fu den. Te son papa nanga mama e si o furu sani de di den no man du, dan den e firi leki den no warti nofo fu den pikin frutrow den so furu, èn ten na ten a e bruya den. Furu tron den e firi leki den no bun nofo fu tyari den frantwortu disi.

¹¹ Yehovah na wan lobi-ati Papa tu. Ma gi en nowan sani no de di a no man tron. Sondro fu pasa den volmaakti markitiki di ensrefi poti, a kan tron ala san de fanowdu fu sorgu en pikin na grontapu na a moro bun fasi. Sobun, a nen fu en, Yehovah, e sori wi taki wi musu si en leki a moro bun Papa di wi kan abi (Yakobus 1:17). A no teki langa bifo Moses nanga ala den tra getrow Israelsma kon si taki Yehovah e handri akruderi a nen fu en. Nanga opo mofo den luku fa Gado ben meki ensrefi kon tron wan Srudati Komandanti di sma no man wini, wan Basi fu sani soleki faya, watra nanga winti; wan bigi Afkati, wan Krutuman, wan Sma di sabi du bigi bow-wroko, wan Sma di e gi trawan nyanyan nanga watra, wan Sma di kan meki taki krosi nanga susu no kon owru, èn so moro fara.

12. Na sortu fasi Farao nanga Moses ben difrenti na ini a fasi fa den ben e prakseri fu Yehovah?

¹² Na a fasi disi Gado meki sma kon sabi en nen èn a sori den  wan tu moi sani di abi fu du nanga en, a Sma di e tyari a nen dati. A sori tu taki ala sani di a e taki fu ensrefi, tru. A de krin taki Gado wani taki wi musu sabi en. San wi fu wi sei e du? Moses ben wani fu sabi suma na Gado. A tranga winsi dati ben abi krakti tapu a fasi fa Moses ben libi, èn a firi dati ben meki taki a kisi wan krosibei banti nanga en hemel Tata (Numeri 12:6-8; Hebrewsma 11:27). A de wan sari sani taki soso wan tu sma na ini a ten fu Moses ben abi a srefi tranga winsi dati. Di Moses kari a nen fu Yehovah gi a Farao fu Egepte, dan na asranti tiriman dati ben piki en na wan grofu fasi taki: „Suma na Yehovah?” (Exodus 5:2) Farao no ben wani kon sabi moro fu Yehovah. Na presi fu dati a ben sori na wan spotu fasi taki a no ben e hati en ede kwetikweti nanga a Gado fu Israel. Furu sma na ini a ten disi e prakseri so tu. A sani disi e breni sma ai gi wan fu den moro prenspari tru tori di de ​— Yehovah na a Moro Hei Masra.

13, 14. (a) Fu san ede Bijbel e kari Yehovah na difrenti fasi? San na wan tu fasi fa Bijbel e kari En? (Luku a  faki na tapu bladzijde 14.) (b) Fu san ede Yehovah na a wan-enkri sma di wi kan kari a „Moro Hei Masra”?

¹³ Yehovah man fiti ensrefi na ibri situwâsi èn fu di a man du furu difrenti sani. Dati meki difrenti fasi de fa Bijbel e kari Gado. Dati no wani taki dati den difrenti fasi fa Bijbel e kari Gado, prenspari a srefi leki a nen di a gi ensrefi. Na presi fu dati den e sori wi moro krin san Gado nen wani taki. Leki eksempre, Bijbel e kari en „Yehovah, a Moro Hei Masra” (2 Samuel 7:22). A prenspari fasi disi fa Bijbel e kari Gado, e fruteri wi sortu hei posisi Yehovah abi èn a de fu feni hondrohondro leisi na ini Bijbel. En wawan abi a reti fu de Tiriman fu hemel nanga grontapu. Luku fu san ede.

¹⁴ Yehovah na a wan-enkri sma di wi kan kari wi Mekiman. Openbaring 4:11 e taki: „Yu, Yehovah, iya wi Gado, warti fu kisi a glori nanga a grani nanga a makti, bika yu ben meki ala sani, èn fu yu wani ede den ben de èn fu yu wani ede yu ben meki den.” Den kefalek wortu disi no e fiti nowan tra sma. Iniwan  sani di de na hemel noso grontapu komoto fu Yehovah! A no de fu taki dati Yehovah de warti fu kisi grani, makti, nanga glori soleki fa a fiti a Moro Hei Masra nanga a Mekiman fu ala sani.

15. Fu san ede Bijbel e kari Yehovah a „têgo Kownu”?

¹⁵ Ete wan fasi fa Bijbel e kari Yehovah wawan, na „têgo Kownu” (1 Timoteyus 1:17; Openbaring 15:3). San dati wani taki? Wi libisma no man frustan trutru san dati wani taki, ma Yehovah de fu têgo. A de sensi owruten, èn a o tan fu têgo. Psalm 90:2 e taki: „Fu ten di no skotu te ten di no skotu yu na Gado.” Sobun, noiti Yehovah ben abi wan bigin; ala ten a ben de kaba. Nanga reti a e tyari a nen fu „a Wan di de fu sensi Owruten”, fu di a ben de ala ten kaba, iya, langa ten bifo a meki iniwan sma noso iniwan sani na hemel èn na grontapu! (Danièl 7:9, 13, 22) Suma kan kon nanga buweisi fu sori taki Gado no abi a reti fu de a Moro Hei Masra?

16, 17. (a) Fu san ede wi no man si Yehovah? Fu san ede dati no musu fruwondru wi? (b) Na sortu fasi wi kan taki dati Yehovah na wan trutru Gado di wi no kan agersi nanga iniwan tra sani di wi man si, noso fasi?

¹⁶ Toku son sma e feni taki Gado no abi a reti dati, neleki fa Farao ben feni dati. Wán fu den rutu fu a problema disi na taki sondu libisma e frutrow tumusi furu tapu san den man si nanga den ai. Wi no man si a Moro Hei Masra. En na wan yeye di libisma ai no man si (Yohanes 4:24). Boiti dati, efu wan libisma di meki fu skin nanga brudu ben o tanapu leti na fesi Yehovah Gado, dan a ben o lasi en libi. Yehovah srefi ben taigi Moses: „Yu no man si mi fesi, bika nowan libisma kan si mi èn toku tan na libi.”​—Exodus 33:20; Yohanes 1:18.

¹⁷ A sani dati no musu fruwondru wi. Soleki fa a sori, dan nanga yepi fu wan engel, Moses ben kisi na okasi fu si pikinso nomo fu a glori fu Yehovah. San ben de a bakapisi fu dati? Wan heri pisi ten baka dati a fesi fu Moses ben ’tan skèin faya’. Den Israelsma ben e frede srefi fu luku Moses langalanga na ini en fesi (Exodus 33:21-23; 34:5-7, 29, 30). Sobun, nowan libisma sa man tanapu luku a Moro Hei Masra na ini ala en glori! Ma dati wani taki dan taki a no de wan trutru sma fu di wi no man si en,  noso fasi en? Nôno, dati no de so, bika furu sani de di wi no man si, soleki winti, stroom, nanga den prakseri fu wi. Toku wi e bribi taki den sani disi de trutru. Moro fara, Yehovah no e kenki. Awinsi omeni milyard yari e pasa, a e tan a srefi! Te wi luku a tori na a fasi disi, dan wi e si taki Yehovah na wan Gado di de trutru. Wi no kan agersi en nanga nowan tra sani di wi man si, noso di wi man fasi, bika den sani dati e kon owru te fu kaba èn dan den e pori gowe (Mateyus 6:19). Ma fa wi musu si Gado dan? Leki wan sortu krakti di de sondro frustan èn sondro firi? Noso leki wan sortu sani di meki ensrefi èn di meki taki ala tra sani kon de? We, meki wi luku a tori disi.

18. Sortu fisyun Esekièl ben kisi? San den fo fesi fu den „libisani” di de krosibei fu Yehovah, e agersi?

¹⁸ Aladi wi no man si Gado, toku moi tori de fu feni na ini Bijbel di e yepi wi fu kon frustan pikinso fa sani de na ini hemel. Wan eksempre fu dati na a fosi kapitel fu a buku Esekièl. Na ini wan fisyun Esekièl ben si wan bigi hemel wagi di ben e prenki a hemel organisâsi fu Yehovah. San moi kefalek, na san Esekièl e fruteri fu den tranga yeye libisani di de lontu Yehovah (Esekièl 1:4-10). Den „libisani” disi de krosibei fu Yehovah, èn a fasi fa den tan, e fruteri wi wan prenspari sani fu a Gado di den e dini. Ibriwan fu den abi fo fesi, namku a fesi fu wan mankaw, fu wan lew, fu wan aka, èn fu wan libisma. Soleki fa a sori, dan den fo fesi disi e agersi den fo moro prenspari fasi fu Yehovah.​—Openbaring 4:6-8, 10.

19. Sortu fasi fu Gado a fesi fu (a) a mankaw e agersi? (b) a lew e agersi? (c) na aka e agersi? (d) a libisma e agersi?

¹⁹ Furu tron Bijbel e gebroiki mankaw fu agersi makti, èn dati fiti srefisrefi fu di mankaw na kefalek tranga meti. Na a tra sei, a de so furu tron taki lew e agersi retidu, bika fu man sori tru retidu wan sma musu abi deki-ati, èn lew na meti di abi furu deki-ati. Aka na meti di ai srapu. Den man si kefalek pikin sani, awinsi den sani dati de farawe. Sobun, a fesi fu na aka e agersi a koni fu Gado di e meki taki a man si sani  langa ten na fesi. Ma fa fu a libisma fesi dan? We, libisma meki akruderi a prenki fu Gado, èn den de aparti fu di den man sori a moro prenspari fasi fu Gado, namku lobi (Genesis 1:26). Den fo fasi disi fu Yehovah, namku makti, retidu, koni, nanga lobi, na fasi di de fu feni na so furu difrenti presi na ini Bijbel, taki wi kan si den leki den moro prenspari fasi fu Gado.

20. A de fanowdu fu broko wi ede taki Gado kenki kande? Fu san ede yu e taki dati?

²⁰ Dusundusun yari pasa kaba sensi sma skrifi den difrenti tori fu Gado di wi e leisi na ini Bijbel. A de fanowdu dan fu broko wi ede taki kande Gado kenki na ini a ten dati? Nôno, a fasi fa Gado de no e kenki. A e fruteri wi: „Mi na Yehovah; mi no kenki” (Maleaki 3:6). Yehovah no de tumusi esi fu kenki a fasi fa a e prakseri. Na presi fu dati a e si ibri nyun situwâsi leki wan aparti sani. Na so fasi a e sori krin taki en na a moro bun Papa di wan sma kan abi. Gado sabi soifri o ten a musu sori wan spesrutu fasi fu en. A moro prenspariwan fu den fo fasi fu Gado, na lobi. Lobi de fu si na ini ala sani di Gado e du. A e gebroiki a makti, a retidu, nanga a koni fu en na wan lobi-ati fasi. Te yu luku en bun, dan Bijbel e taki wan kefalek moi  sani fu Gado nanga a lobi fu en. Bijbel e taki: „Gado na lobi” (1 Yohanes 4:8). Luku taki Bijbel no e taki dati Gado abi lobi, noso taki Gado e sori lobi. Na presi fu dati Bijbel e sori taki Gado na lobi. A heri fasi fa a de na lobi, èn a de a lobi disi di e tiri en na ini ala san a e du.

21. Fa wi o firi te wi o leri sabi den fasi fu Yehovah moro bun?

²¹ Oiti yu si wan pikin-nengre di e sori den mati fu en suma na en papa, aladi a e taki nanga prisiri èn na wan prodo fasi: „Dati na mi papa”? A fiti srefisrefi taki anbegiman fu Gado e firi so tu te den e taki fu Yehovah. Bijbel e taki dati wan ten o kon pe getrow sma sa bari nanga tranga sten: „Luku! Disi na wi Gado” (Yesaya 25:8, 9). O moro yu e kon frustan den fasi fu Yehovah, o moro yu o firi taki en na a moro bun Papa di yu kan abi.

22, 23. San Bijbel e leri wi fu a fasi fa wi hemel Tata de? Fa wi du sabi taki a wani wi fu de krosibei fu en?

²² A Papa disi a no wan sma di no abi firi, noso di de farawe fu wi, soleki fa son bribiman nanga filosofiaman leri sma. Efu Gado no ben abi firi, dan a no ben o hari wi kwetikweti. Boiti dati, dan Bijbel no e leri wi tu taki wi hemel Tata no abi firi. Na presi fu dati, Bijbel e kari en „a koloku Gado” (1 Timoteyus 1:11). A kan gi sma tranga leri, ma a abi switifasi tu. A e ’hati en srefisrefi’ te a e si taki libisma di a meki nanga bunbun frustan, no e hori densrefi na den markitiki fu en, aladi den markitiki dati de gi a bun fu den (Genesis 6:6; Psalm 78:41). Ma te wi e gebroiki wi frustan fu du soifri san a Wortu fu en e leri wi, dan wi ’e prisiri na ati fu en’.​—Odo 27:11.

²³ Wi Papa wani taki wi musu de krosibei fu en. A Wortu fu en e gi wi a deki-ati fu ’firifiri pe Gado de, so taki wi sa feni en trutru, aladi te yu luku en bun, a no de fara fu ibriwan fu wi’ (Tori fu den Apostel 17:27). Ma fa wan libisma kan kon krosibei na a Moro Hei Masra fu hemel nanga grontapu?