’Unu musu de leriman’ (Hebr. 5:12). Prakseri a sani disi: Yehovah, a moro bun Leriman e gi wi a kari fu gi trawan leri fu en. A de wan bigi grani fu gi leri na ini na osofamiri, na ini a gemeente èn na ini a preikiwroko, ma a de wan bigi frantwortu tu. San kan yepi wi fu tyari a frantwortu disi bun?

Luku san na apostel Paulus ben skrifi gi Timoteyus: „Tan meki muiti fu leisi gi sma, fu gi sma deki-ati èn fu gi leri.” A taki moro fara: „Te yu du disi, dan yu o frulusu yusrefi nanga den sma di e arki yu” (1 Tim. 4:13, 16). Yu abi wan boskopu di kan kibri sma libi. Dati meki a de prenspari fu du muiti fu leisi èn fu gi leri moro bun. A brochure disi o yepi yu fu du dati. Luku fa a seti:

Yehovah na a „Gran Leriman” (Yes. 30:20). Aladi a brochure disi meki fu yepi yu fu leisi èn fu gi leri moro bun, toku yu no musu frigiti taki a boskopu di wi e tyari na fu Yehovah èn na en e hari sma kon na en (Yoh. 6:44). Dati meki wi musu begi en ala ten fu gi wi en santa yeye. Gebroiki a Wortu fu Gado furu. No du sani fu meki sma poti tumusi furu prakseri na yu, ma yepi den fu si taki na Yehovah e gi den leri. Yepi den arkiman fu kon lobi Yehovah.

Yehovah gi yu a grani fu leri sma a moro prenspari boskopu di de. Wi de seiker taki efu yu e frutrow „tapu a krakti di Gado e gi”, dan yu o de wan bun leriman.​—1 Petr. 4:11.

Un brada di e wroko makandra nanga unu,

A Tiri Skin fu Yehovah Kotoigi