YU LOBI te wan sma e du wan bun sani gi yu?— We, tra sma lobi tu te wan sma e du wan bun sani gi den. Wi alamala lobi dati. A Bigi Leriman ben sabi dati, èn ala ten a ben e du sani gi sma. A ben taki: ’Mi no kon fu sma dini mi, ma mi kon fu dini sma.’​—Mateyus 20:28.

Sobun, efu wi wani de leki a Bigi Leriman, dan san wi musu du?— Wi musu dini trawan. Wi musu du bun sani gi den. A tru taki furu sma no e du disi. Fu taki en leti, furu sma wani taki tra sma musu dini den ala ten. Wan leisi, srefi den bakaman fu Yesus ben feni dati. Ibriwan fu den ben wani fu de a moro bigiwan, noso a moro prenspariwan.

Wan dei, Yesus ben e teki waka nanga den disipel fu en. Baka di den go na ini a foto Kaperna-um di ben de krosibei fu a Se fu Galilea, dan den alamala go na ini wan oso. Drape Yesus aksi den: „Fu san unu ben e haritaki di wi ben de na pasi?” Den tan tiri, bika di den ben de na pasi, dan den ben e haritaki nanga makandra suma fu den ben de a moro bigiwan.​—Markus 9:33, 34.

 Yesus ben sabi taki a no ben de wan bun sani efu iniwan fu den disipel fu en ben si ensrefi leki a moro bigiwan. Fu dati ede, soleki fa wi leri na ini a fosi kapitel fu a buku disi, a meki wan yongu pikin tanapu na den mindri èn a taigi den taki den ben musu abi sakafasi neleki a yongu pikin dati. Ma toku den no teki leri. Sobun, syatu bifo Yesus dede, a leri den wan sani di den no ben o frigiti noiti. San a ben du?—

We, di den alamala ben de makandra fu nyan wan sani, dan Yesus opo fu a tafra èn a puru en dyakti. A teki wan duku èn a tai en na en mindribere. Ne a teki wan beki èn a poti watra na ini. Den bakaman fu en ben musu fu aksi densrefi san a ben o du. Aladi den ben e luku san ben o pasa, dan Yesus go na den alamala, a bukundu, èn a wasi den futu fu den. Ne a drei den futu nanga a duku. Denki a sani dati! San yu ben o du efu yu ben de drape? Fa yu ben o firi?—

Den bakaman fu en no ben feni en bun taki a Bigi Leriman ben dini den na a fasi disi. Den ben e syen. Fu taki en leti, Petrus no ben o meki Yesus du a lagi wroko disi gi en. Ma Yesus taki dati a ben de prenspari gi en fu du a sani dati.

Na ini a ten disi a no e pasa so furu taki wi e wasi makandra futu. Ma sma ben gwenti fu du dati na a ten di Yesus ben de na grontapu. Yu sabi fu san ede?— We, na ini a kondre pe Yesus nanga den bakaman fu en ben tan, sma ben e weri opo-susu èn den no ben e weri kowsu. Fu dati ede, te den ben e waka na tapu den santi pasi, dan den futu fu den ben e kon doti. Wan sma ben e du wan bun te a ben e wasi a doti puru fu den futu fu wan fisitiman di ben kon na ini na oso.

Ma disi leisi nowan enkriwan fu den disipel fu Yesus ben aksi den trawan efu a ben kan wasi den futu gi den. Fu dati ede, Yesus srefi du dati. Nanga a sani dati, Yesus leri den bakaman fu en wan prenspari sani. A ben de fanowdu taki den leri a sani disi. Na ini a ten disi, wisrefi musu leri a sani disi tu.

 Yu sabi san na a sani dati?— Baka di Yesus weri a dyakti fu en baka, dan a go sidon baka na a tafra èn a taki: „Un sabi san mi du gi unu? Unu e kari mi: ’Leriman’ nanga ’Masra’, èn unu abi leti, bika na dati mi de tu. Fu dati ede, efu mi wasi un futu aladi mi na Masra nanga Leriman, dan un musu wasi den futu fu makandra tu.”​—Yohanes 13:2-14.

Nanga a sani disi, a Bigi Leriman ben sori taki a ben wani den bakaman fu en fu dini makandra. A no ben wani den fu denki densrefi nomo. A no ben wani den fu denki taki den ben de so prenspari taki trawan ben musu dini den ala ten. A ben wani taki den ben musu de klariklari fu dini trawan.

Na wan tumusi bun sani den ben leri, a no so?— Yu sa dini tra sma neleki fa a Bigi Leriman ben e du dati?— Wi alamala kan du sani gi trawan. Disi sa gi den prisiri. Ma san moro prenspari, na taki a sa gi Yesus nanga en Tata prisiri.

A no muilek fu dini tra sma. Te yu e luku en bun, dan yu sa si taki furu sani de di yu kan du gi tra sma. Prakseri a sani disi: Wan sani de di yu kan du fu yepi yu mama? Yu sabi taki a e du furu sani gi yu  nanga den trawan fu na osofamiri. Yu no kan yepi en?— Fu san ede yu no e aksi en?

Kande yu kan seti a tafra fosi unu e go nyan nanga makandra leki osofamiri. Noso, kande yu kan puru den doti preti fu a tafra te unu kaba nyan. Son pikin e krabu a prasi ibri dei. A no abi trobi san yu kan du, ma te yu e du wani sani fu yepi trawan, dan na so fasi yu sa dini trawan, soleki fa Yesus ben du dati.

Yu abi pikin brada nanga sisa di yu kan yepi? Memre taki Yesus, a Bigi Leriman, ben e dini srefi den bakaman fu en. Te yu e yepi den pikin brada nanga sisa fu yu, dan yu sa du neleki Yesus. San yu kan du gi den?— Kande yu kan leri den fu poti den preisani fu den baka tapu den presi te den kaba prei. Noso, kande yu kan yepi den fu weri den krosi fu den. Noso, kande yu kan yepi den fu meki a bedi fu den. Yu kan  prakseri fu wan tra sani di yu kan du gi den?— Den sa lobi yu te yu e du den sani disi gi den, neleki fa den bakaman fu Yesus ben lobi en.

Yu kan yepi tra sma sosrefi te yu de na skoro. Kande yu kan yepi den pikin na ini yu klas, noso kande yu kan yepi yu skoromeester. Efu den buku fu wan fu den skoropikin fadon, dan yu e du wan bun te yu e piki den gi en. Yu ben kan aksi yu skoromeester efu yu kan figi a bord, noso efu yu kan du wan tra sani gi en. Srefi te yu e hori a doro opo gi wan sma, dan yu e du wan bun gi a sma dati.

Son leisi wi sa si taki sma no sa taki wi tangi te wi e yepi den. Yu feni taki dati na wan bun reide fu no du bun sani gi sma moro?— Nôno! Furu sma no ben taki Yesus tangi gi den bun sani di a ben du. Ma dati no ben tapu en fu du bun gi sma.

Sobun, no meki wi draidrai noso weigri noiti fu dini trawan. Meki wi memre a Bigi Leriman, Yesus, èn meki wi pruberi fu teki na eksempre fu en ala ten.