SAN a wani taki fu dyaf? Yu sabi dati?— Luku wan eksempre dyaso. Oiti yu pruberi fu du wan sani di yu no man du so bun? Kande yu pruberi fu skopu wan bal. Noso, kande yu pruberi fu rei wan baisigri. Kande wan sma ben taki: „Waa! Mi kan du dati moro bun leki yu!”— We, a sma dati ben e dyaf, noso a ben e meki bigi.

Fa yu feni en te tra sma e du dati? Yu lobi dati?— We, fa yu denki trawan e firi te yu e dyaf?— Yu e sori switifasi gi wan tra sma te yu e taigi en: „Mi bun moro yu”?— Yehovah lobi sma di e du dati?—

A Bigi Leriman ben sabi sma di ben e denki taki den ben bun moro trawan. Den sma disi ben gwenti fu dyaf, noso fu meki bigi, èn den ben e wisiwasi ala tra sma. Sobun, wan dei Yesus fruteri den wan tori fu sori den taki a no ben bun kwetikweti fu dyaf. Arki a tori.

A tori abi fu du nanga wan Fariseiman nanga wan man di e piki moni gi lanti. Den Fariseiman ben de kerki leriman, di furu tron ben e du neleki den ben bun noso santa moro tra sma. A Fariseiman na ini a tori fu Yesus ben go fu begi na ini a tempel fu Gado na ini Yerusalem.

Yesus ben taki dati a man di e piki moni gi lanti ben go na a tempel tu fu begi. Furu sma no ben lobi den man di e piki moni gi lanti. Den ben feni taki den man disi ben e pruberi fu bedrigi den. Èn a tru taki furu fu den man di e piki moni gi lanti ben gwenti fu bedrigi sma.

 Na a tempel, a Fariseiman bigin begi Gado na a fasi disi: ’Ke, mi Gado, mi e taigi yu tangi taki mi no de wan sondari leki tra sma. Mi no e bedrigisma èn mi no e du tra takru sani tu. Mi no de leki a man drape di e piki moni gi lanti. Mi na wan regtfardiki man. Mi e tan sondro nyanyan tu leisi wan wiki so taki mi abi moro ten fu prakseri fu yu. Èn mi e gi a tempel a di fu tin pisi fu ala sani di mi e kisi.’ A Fariseiman ben denki trutru taki a ben bun moro tra sma, a no so?— Èn a ben abi a drei-ai srefi fu taigi Gado dati.

Ma a man di e piki moni gi lanti no ben de so. Di a ben e begi, a no ben wani opo en ai srefi fu luku go na hemel. A ben tan tanapu te na bakasei èn a ben boigi en ede. A man disi ben e naki ensrefi na tapu en borsu fu sori taki a ben e sari srefisrefi fu den sondu fu en. A no ben pruberi fu taigi Gado taki a ben de wan bun sma. Na presi fu dati, a begi: ’Ke, mi Gado, abi sari-ati nanga mi, fu di mi na wan sondari.’

Sortuwan fu den tu man disi yu denki Gado ben feni bun? A ben de a Fariseiman, a wan di ben e denki taki a ben bun srefisrefi? Noso, a ben de a man di e piki moni gi lanti, a wan di ben firi sari fu den sondu di a du?—

Yesus ben taki dati a man di e piki moni gi lanti ben de a wan di Gado ben feni bun. Fu san ede? Yesus ben taki: ’Bika iniwan sma di e du neleki a bun moro tra sma sa kisi syen. Ma a sma di abi sakafasi sa kisi grani.’​—Lukas 18:9-14.

 San Yesus ben wani leri wi nanga a tori disi?— A ben wani leri wi taki a no bun fu denki taki wi bun moro tra sma. Kande wi no e taki dati wi bun moro tra sma, ma a fasi fa wi e tyari wisrefi kan sori taki wi abi a denki dati. Oiti yu tyari yusrefi na a fasi dati?— Luku na apostel Petrus.

Yesus ben taigi den apostel fu en taki den alamala ben o gowe libi en te sma ben grabu en. Ma Petrus ben e dyaf: ’Awansi ala den trawan e gowe libi yu, mi no sa du dati noiti!’ Ma Petrus no ben musu taki a sani dati. A ben de tumusi seiker fu ensrefi. A gowe libi Yesus aladi a ben taki dati a no ben o du dati. Ma a drai kon baka, soleki fa wi sa si na ini Kapitel 30 fu a buku disi.​—Mateyus 26:31-33.

Meki wi teki wan eksempre fu a ten disi. Kande yu skoromeester e poti wan tu aksi gi yu nanga wan tra pikin na ini yu klas. San yu e du te yu man gi piki wantewante, aladi a tra pikin no man du dati? A no de fu taki dati yu e firi bun te yu sabi den piki. Ma yu e sori switifasi te yu e agersi yusrefi nanga a pikin di no man piki so gaw?— A bun te yu e pruberi fu meki wan tra sma firi syen, soso fu kan meki bigi?—

Na dati a Fariseiman ben du. A ben dyaf taki a ben bun moro a man di e piki moni gi lanti. Ma a Bigi Leriman ben taki dati a sani di a Fariseiman ben du no ben bun. A tru taki a wan sma kan du wan sani moro bun leki wan tra sma. Ma dati no wani taki kwetikweti dati a de wan moro bun sma.

Sobun, efu wi sabi moro leki wan tra sma, dan wi musu dyaf fu a sani dati?— Denki a sani pikinso. Wi meki wi eigi edetonton?— Nôno, na Gado gi ibriwan fu wi wan edetonton. Èn furu fu den sani di wi sabi, wi leri fu wan tra sma. Kande wi leisi sani na ini wan buku. Noso, kande wan sma fruteri wi den sani dati. Èn awansi a de so taki wisrefi kon sabi fa fu lusu wan problema, ma  fa wi du dati?— Iya, wi gebroiki na edetonton di Gado gi wi.

Te wan sma e meki furu muiti, dan a bun fu taki wan sani di e meki a sma firi bun. Taigi en taki yu feni en bun san a du. Kande yu kan yepi en sosrefi fu du a sani dati moro bun. Na dati yu ben o wani sma fu du gi yu, a no so?—

Son sma tranga moro trawan. Kon meki wi taki dati yu tranga moro yu brada noso sisa. Yu musu dyaf fu a sani dati?— Nôno, yu no musu du dati. Na a nyanyan di wi e nyan e yepi wi fu gro kon tranga. Èn Gado e gi wi son, alen, nanga ala tra sani di de fanowdu fu meki nyanyan gro, a no so?— Sobun, na Gado wi musu taki tangi te wi e gro kon tranga.​—Tori fu den Apostel 14:16, 17.

Nowan fu wi lobi te wi e yere wan sma e dyaf, a no so?— Meki wi memre den wortu fu Yesus: ’San yu wani tra sma fu du gi yu, na dati yu musu du gi den tu.’ Te wi e du dati, dan noiti wi sa de leki a Fariseiman di ben dyaf na ini a tori di a Bigi Leriman ben fruteri.​—Lukas 6:31.

 Wan leisi, wan sma ben taki dati Yesus ben de wan bun sma. A Bigi Leriman ben taki: ’Iya, mi bun’?— Nôno, a no ben du dati. Na presi fu dati a taki: „Nowan sma bun, soso wán sma nomo, èn dati na Gado” (Markus 10:18). Aladi a Bigi Leriman no ben abi sondu, toku a no ben e meki bigi. Na presi fu dati, a gi en Tata, Yehovah, ala grani.

Sobun, wi kan meki bigi gi wan sma?— Iya, wi kan du dati. Wi kan meki bigi gi wi Mekiman, Yehovah Gado. Te wi e si wan moi sondongo, noso wan tra wondru sani di a meki, dan wi kan taigi wan sma: ’Wi bigi Gado, Yehovah, meki a sani disi!’ Meki wi de klariklari ala ten fu taki fu den bigi sani di Yehovah du kaba èn di a sa du na ini a ten di e kon.