TE PIKIN-NENGRE e du bun sani, dan a papa nanga a mama fu den e prisiri. Te wan meisje e du wan sani bun, dan en papa e prisiri fu di a man taigi tra sma: „Disi na mi umapikin.” Noso efu wan boi e du bun sani, dan a papa e prisiri fu taki: „Disi na mi boi.”

Ala ten Yesus e du sani di e gi en Tata prisiri. Fu dati ede en Tata breiti nanga en. Yu e memre san Yesus en Tata ben du wan dei di Yesus ben de nanga dri fu den bakaman fu en?— Iya, Gado ben taki komoto te na hemel fu taigi den: „Disi na mi Manpikin, a lobiwan di mi feni bun.”​—Mateyus 17:5.

Ala ten Yesus de klariklari fu du sani di e gi en Tata prisiri. Yu sabi fu san ede? Fu di a lobi en Tata trutru. Efu wan sma e du sani soso fu di a musu du den, dan a kan tranga gi a sma fu du den sani. Ma te a sma de klariklari fu du wan sani, dan a sa de moro makriki gi en fu du dati. Yu sabi san a wani taki fu de klariklari fu du wan sani?— A wani taki dati yu wani du wan sani nanga yu heri ati.

Srefi bifo Yesus ben kon na grontapu, a ben de klariklari fu du iniwan sani di en Tata ben aksi en fu du. Dati ben kon fu di a lobi en Tata, Yehovah Gado. Yesus ben abi wan tumusi moi posisi sei en Tata na ini hemel. Ma Gado ben wani Yesus fu du wan spesrutu wroko. Fu man du a wroko dati, dan Yesus ben musu gowe libi hemel. A ben musu gebore leki wan beibi na grontapu. Yesus ben de klariklari fu du disi, fu di Yehovah ben wani en fu du so.

Ma efu Yesus ben musu gebore leki wan beibi na grontapu, dan a ben abi wan mama fanowdu. Yu sabi suma ben de na uma dati?— En nen ben de Maria. Yehovah ben seni en engel Gabrièl komoto  fu hemel fu taki nanga Maria. Gabrièl taigi Maria taki a ben o kisi wan boi. A beibi ben o nen Yesus. Èn suma ben o de a papa fu a beibi?— Na engel taki dati Yehovah Gado ben o de a Papa fu a beibi. Na fu dati ede meki sma ben o kari Yesus a Manpikin fu Gado.

Fa yu denki taki Maria ben feni a sani disi?— A ben taki: „Mi no wani fu de a mama fu Yesus”? Nôno, Maria ben de klariklari fu du san Gado ben wani. Ma fa a Manpikin fu Gado di ben de na ini hemel, ben o gebore leki wan beibi na grontapu? Fa a fasi fa Yesus gebore ben difrenti fu a fasi fa ala tra beibi gebore? Yu sabi dati?—

We, Gado ben meki wi fosi papa nanga mama, Adam nanga Eva, so taki den ben kan kon na wán na wan tumusi moi fasi. Bakaten, wan beibi ben o bigin gro na ini a bere fu en mama. Sma e taki dati a sani disi na wan wondru! Mi sabi seiker taki yu sa agri nanga dati.

Ma now Gado du wan moro bigi wondru. A teki a libi fu en Manpikin puru fu hemel èn a poti en na ini a bere fu Maria. Gado noiti no ben du so wan sani ete, èn baka dati a no du en noiti moro tu. A bakapisi fu a wondru disi ben de taki Yesus bigin gro na ini Maria en bere, neleki fa tra beibi e gro na ini den mama bere. Baka dati, Maria trow nanga Yosef.

Di a ten doro taki Yesus ben musu gebore, dan Maria nanga Yosef ben de na ini a foto Betlehem. Ma a foto ben lai nanga sma.  Maria nanga Yosef no ben man feni wan kamra srefi pe den ben kan tan. Fu dati ede den ben musu tan na ini wan presi pe meti ben e tan. Na drape Maria kisi Yesus, èn a poti en na ini wan baki pe sma ben e poti nyanyan gi kaw nanga tra meti, soleki fa yu kan si dyaso na tapu a prenki.

Tumusi moi sani pasa na a neti di Yesus ben gebore. Krosibei fu Betlehem, wan engel ben kon na wan tu skapuman. A taigi den taki Yesus ben de wan prenspari sma. Na engel taki: ’Luku! Mi e fruteri unu bun nyunsu di sa gi sma prisiri. Tide wan sma gebore di sa frulusu a pipel.’​—Lukas 2:10, 11.

Na engel taigi den skapuman taki den ben kan feni Yesus na ini Betlehem, pe a ben e didon na ini wan nyanyan-baki. Ne, wantronso, tra engel na ini hemel bigin prèise Gado makandra nanga a fosi  engel. Den engel ben e singi: ’Glori gi Gado èn vrede na grontapu gi sma di Gado feni bun.’​—Lukas 2:12-14.

Di den engel gowe, dan den skapuman go na Betlehem èn den feni Yesus. Drape den fruteri Yosef nanga Maria ala den bun sani di den ben yere. Yu kan frustan fa Maria ben breiti taki a ben bosroiti fu tron a mama fu Yesus?

Bakaten, Yosef nanga Maria tyari Yesus go na a foto Nasaret. Na drape Yesus gro kon bigi. Di a ben de wan bigiman, dan a bigin nanga a bigi leriwroko fu en. Disi ben de wan fu den sani di Yehovah Gado ben wani en Manpikin fu du na grontapu. Yesus ben de klariklari fu du a wroko dati fu di a ben lobi en hemel Tata srefisrefi.

 Bifo Yesus bigin du a wroko fu en leki a Bigi Leriman, dan a meki Yohanes a Dopuman dopu en na ini a Yordanliba. Na a ten dati wan fruwondru sani pasa! Di Yesus ben e komoto na ini a watra, dan sma yere a sten fu Yehovah komoto fu hemel. Yehovah ben taki: „Disi na mi Manpikin, a lobiwan di mi feni bun” (Mateyus 3:17). Yu no e firi prisiri te yu papa nanga mama e taigi yu taki den lobi yu?— Wi kan de seiker taki Yesus ben firi prisiri tu.

Ala ten Yesus ben du san bun. A no ben e kori sma, ma a ben sori den suma a ben de trutru. A no ben e taigi sma taki en ben de Gado. Na engel Gabrièl ben taigi Maria taki sma ben o kari Yesus a Manpikin fu Gado. Yesus srefi ben taki dati a ben de a Manpikin fu Gado. Èn a no ben e taigi sma taki a ben koni moro en Tata. A ben taki: „A Tata bigi moro mi.”​—Yohanes 14:28.

Srefi di Yesus ben de na ini hemel, a ben e du a wroko di en Tata ben gi en fu du. A no ben de wan sma di e taki dati a o du a wroko, ma dan a e du wan tra sani na presi fu dati. A ben lobi en Tata. Fu dati ede a ben arki san en Tata ben taki. Èn di Yesus kon na grontapu, dan a du san en hemel Tata ben seni en fu kon du. A no ben gebroiki en ten fu du wan tra sani. Fu dati ede a no e fruwondru wi taki Yehovah e prisiri nanga en Manpikin.

Wi wani taki Yehovah musu prisiri nanga wi tu, a no so?— Fu dati ede wi musu sori taki wi e arki Gado trutru, soleki fa Yesus ben du dati. Gado e taki nanga wi nanga yepi fu Bijbel. Efu wi ben o du neleki wi e arki Gado, ma wi e bribi èn e du sani heri tra fasi leki fa Bijbel e taki, dan dati no ben o fiti, a no so?— Èn memre taki te wi lobi Yehovah trutru, dan wi sa de klariklari fu du sani di e gi en prisiri.