YU MUSU fu sabi san na wan marki, a no so?— Na ini kapitel 46 wi e leisi fu a marki di Gado ben gi fu sori taki noiti moro a ben o meki wan frudu pori grontapu. Den apostel ben aksi fu wan marki tu, so taki den ben kan sabi o ten Yesus ben o drai kon baka èn o ten a kaba fu grontapu, noso a seti fu sani, ben o de krosibei.​—Mateyus 24:3.

Fu di Yesus ben o de na ini hemel èn sma no ben o man si en, meki den ben abi wan marki fanowdu di ben musu sori den taki a bigin tiri. Fu dati ede, Yesus ben fruteri den disipel fu en gi sortu sani den ben musu de na ai dyaso na grontapu. Te den sani disi ben e pasa, dan dati ben o sori taki a drai kon baka èn taki a bigin tiri leki Kownu na ini hemel.

Yesus ben wani leri den disipel fu en o prenspari a de fu tan na ai, èn fu dati ede a taigi den: „Luku a figabon  nanga ala den tra bon: Te unu e si taki den e bigin gi bromki, dan unu sabi taki dreiten de krosibei.” Te alen no e fadon so furu moro, èn te a grasi e bigin drei, dan yu sabi taki dreiten e doro. Na so yu kan sabi tu o ten Armagedon de krosibei te yu e si taki den sani di Yesus ben taki e pasa trutru.​—Lukas 21:29, 30.

Na tapu a bladzijde disi èn na tapu a wan di e kon baka dati, wi sa luku prenki fu den sani di ben o de wan marki. Soleki fa Yesus ben taki, den  sani disi ben o sori taki a Kownukondre fu Gado de krosibei. Te ala den sani disi e pasa, dan Gado en Kownukondre di sa abi Krestes leki Tiriman, sa pori ala den tra tirimakti, soleki fa wi leisi dati na ini kapitel 46.

Fu dati ede, luku bun san den prenki na tapu den tu bladzijde fosi a wan disi e sori, èn wi sa taki fu den. Na Mateyus 24:6-14 nanga Lukas 21:9-11, yu kan leisi fu den sani di yu e si na tapu den prenki disi. Sosrefi, luku a nomru na tapu ibri prenki. A srefi nomru dati de fu feni na a bigin fu a paragraaf di e taki fu a prenki. Now, meki wi luku efu den someni sani di Yesus ben gi leki wan marki e pasa trutru na ini a ten disi.

(1) Yesus ben taki: „Unu o yere taki feti de èn unu o yere nyunsu taki feti e feti; . . . a wan pipel o opo go feti nanga a trawan, èn a wan kownukondre nanga a trawan.” Yu yere nyunsu fu feti di e feti?— A fosi grontapufeti ben de fu 1914 te go miti 1918, èn baka dati a di fu Tu Grontapufeti ben de, fu 1939 te go miti 1945. Noiti bifo grontapufeti ben de! Now feti e feti na heri grontapu. A gersi leki ibri dei tapu telefisi, radio èn na ini koranti, wi e yere, noso e leisi taki feti e feti.

(2) Yesus ben taki sosrefi: „Angriten o de . . . na difrenti presi.” Soleki fa yu sabi kande, dan a no ala sma abi nofo nyanyan. Ibri dei dusundusun sma e dede fu di den no abi nofo nyanyan.

(3) Yesus ben taki moro fara: ’Na difrenti presi, takru siki sa de.’ Den takru siki disi e kiri furu sma. Wan bun takru siki di ben kiri furu sma na a Spaanse griep. A siki disi kiri sowan 20 milyun sma na ini wán yari nomo. Na ini a ten disi, a kan taki moro sma leki dati sa dede fu AIDS. Dan yu abi kanker, ati-siki, nanga tra siki di e kiri dusundusun sma ibri yari.

 (4) Yesus ben taki fu ete wan sani di ben o de wan marki tu. A ben taki: „Gronseki o de na difrenti presi.” Yu sabi san na wan gronseki?— Te wan gronseki de, dan a gron e seki na ondro yu futu. Oso e broko fadon, èn furu tron sma e lasi den libi. Sensi 1914, furu gronseki de ibri yari. Oiti yu yere fu gronseki?

(5) Yesus ben taki dati wan tra sani di ben o de wan marki tu, na taki ’moro nanga moro sma ben o du ogri’. Na fu dati ede meki moro nanga moro sma e fufuru èn wan lo ogri e pasa. Sma na ala sei frede taki wan sma ben kan pruberi fu kon fufuru na ini den oso. Noiti bifo so furu ogridu ben de na ala sei fu grontapu leki na ini a ten disi.

(6) Yesus ben taki fu wan tumusi prenspari sani di ben o de ete wan tra marki. A ben taki: „A bun nyunsu disi fu a kownukondre o preiki na ala sma na heri grontapu, so taki ala kondre kan yere dati, èn dan a kaba o kon” (Mateyus 24:14). Efu yu e bribi „a bun nyunsu disi”, dan yu musu taki nanga tra sma fu dati. Na so fasi yu kan yepi fu meki a marki disi kon tru.

Son sma e taki dati den sani fu san Yesus ben taki, na sani di ben e pasa ala ten kaba. Ma noiti bifo a ben de so taki ala den sortu sani disi pasa na someni presi fu grontapu na a srefi ten. Sobun, yu e frustan san a marki disi wani taki?— A wani taki dati te wi e si ala den sani disi e pasa, dan heri esi a nyun grontapu fu Gado sa kon na ini a presi fu a takru grontapu disi.

Di Yesus ben gi a marki disi, dan a ben taki sosrefi fu wan spesrutu ten fu a yari. A ben taki: ’Tan begi taki unu no abi fu lowe na ini a kowru ten fu a yari’ (Mateyus 24:20). San yu denki a ben wani taki nanga dati?—

Te wan hebi alen e fadon èn wan bigi winti e wai, dan a muilek fu sma teki waka go na wan presi, èn den kan lasi den libi srefi.  Sobun, efu wan sma musu lowe gi wan rampu aladi wan bigi alen e fadon, dan san ben kan pasa nanga a sma dati?— Kande a sa man lowe gowe, ma toku a o tranga gi en fu du dati. Efu wan sma lasi en libi soso fu di a ben e du tra sani so taki a no ben man lowe gowe moro fruku, dan dati ben o de wan sari sani, a no so?—

Yu si san Yesus ben wani taigi wi di a taki dati wi no musu wakti teleki a kowru ten fu a yari fu lowe gowe?— A ben taigi wi taki fu di wi sabi dati Armagedon de krosibei, dan wi no musu draidrai fu dini Gado fu sori taki wi lobi en. Te wi e draidrai, dan a kan lati gi wi fu du dati. Na so fasi wi ben o de leki den sma na a ten fu a bigi Frudu. Den sma disi ben yere a warskow fu Noa, ma den no ben go na ini na ark.

Ma meki wi luku now fa a sa de te a bigi feti fu Armagedon kon na wan kaba. Wi sa leri san Gado abi na prakseri fu du gi wi alamala di lobi en èn di e dini en na ini a ten disi.