DI SAULUS ben du takru sani, dan suma ben e prisiri?— Satan Didibri ben e prisiri. Ma den kerki fesiman fu den Dyu ben e prisiri tu. Èn di Saulus tron wan disipel fu a Bigi Leriman èn a kisi a nen Paulus, dan den kerki fesiman dati bigin teige en. Sobun, yu kan si fu san ede a muilek gi wan disipel fu Yesus fu du san bun?—

Wan leisi, a granpriester di ben nen Ananias, taigi sma fu naki Paulus na ini en fesi. Ananias pruberi srefi fu meki sma poti Paulus na strafu-oso. Wan lo problema miti Paulus di a tron wan disipel fu Yesus. Fu gi wan eksempre, takru sma ben fon Paulus, èn den fringi bigi ston na en tapu fu di den ben wani kiri en.​—Tori fu den Apostel 23:1, 2; 2 Korentesma 11:24, 25.

Furu sma sa pruberi fu meki wi du sani di Gado no feni bun. Sobun yu musu aksi yusrefi a sani disi: Trutru yu lobi fu du san bun? Yu lobi dati so te taki yu sa du san  bun, srefi te trawan e teige yu fu a sani dati? Yu musu abi deki-ati fu du so, a no so?—

Yu ben kan aksi yusrefi: ’Fu san ede sma e teige wi te wi e du san bun? Den no musu breiti?’ We, yu ben o denki taki na so a musu de. Furu tron, sma ben lobi Yesus fu di a ben du bun sani. Wan leisi, ala den sma fu wan spesrutu foto kon makandra na fesi na oso pe a ben e tan. Den kon fu di Yesus ben e meki sikisma kon betre baka.​—Markus 1:33.

Ma son leisi sma no ben lobi san Yesus ben e leri trawan. Ala ten a ben e leri sma bun sani, ma toku den no ben lobi en. Fu taki en leti, den ben e sori trutru bita-ati gi en fu di a ben taki san tru. Na  disi ben pasa wan dei na ini Nasaret, a foto pe Yesus ben gro kon bigi. A ben go na ini a snoga, wan presi pe den Dyu ben e kon makandra fu anbegi Gado.

Drape Yesus hori wan moi taki di ben komoto fu den Buku fu Bijbel. Den sma ben lobi dati na ini a bigin. Den ben fruwondru fu den moi sani di a ben e taki. Den no ben man bribi srefisrefi taki disi ben de a yonkuman di ben gro kon bigi na ini a foto pe densrefi ben e tan.

Ma baka dati, Yesus taki wan tra sani. A fruteri fu den ten di Gado ben sori bun-ati gi sma di no ben de Dyu. Di Yesus taki a sani disi, dan den sma na ini a snoga kisi atibron. Yu sabi fu san ede?— Den ben denki taki den ben de den wan-enkri sma di Gado ben feni bun. Den ben denki taki den ben bun moro tra sma. Fu dati ede den ben e teige Yesus di a taki a sani dati. Èn yu sabi san den pruberi fu du nanga en?—

Bijbel e taki: ’Den grabu Yesus èn den tyari en go esi-esi na dorosei fu a foto. Den tyari en go na a lanki fu wan bergi èn den ben wani fringi en komoto fu a lanki fu kiri en! Ma Yesus ben man fri ensrefi fu den.’​—Lukas 4:16-30.

Efu dati ben pasa nanga yu, dan yu ben o wani go baka wan dei, fu taki nanga den sma dati fu Gado?— Yu ben o abi deki-ati fanowdu, a no so?— We, pikinmoro wán yari baka dati, Yesus sori deki-ati èn a go baka na Nasaret. Bijbel e taki: „A bigin leri den sma drape na ini a snoga fu den.” Yesus no ben tapu fu taki fu a waarheid, fu di a no ben frede gi sma di no ben lobi Gado.​—Mateyus 13:54.

Tapu wan tra dei, a ben de wan Sabadei, dan Yesus ben de na wan presi pe wan man ben de di ben abi wan malengri anu. Yesus ben kisi makti fu Gado fu meki a man dati kon betre baka. Ma sonwan fu den man drape ben e pruberi fu tyari Yesus kon na ini problema. San a Bigi Leriman ben o du?— A aksi den fosi: ’Efu unu ben abi  wan skapu di fadon go na ini wan bigi olo tapu a Sabadei, dan unu ben o puru en na ini na olo?’

Iya, den ben o puru a skapu na ini na olo, srefi tapu a Sabadei, a dei di den ben musu rostu. Fu dati ede Yesus taki: ’A moro bun srefi fu yepi wan man tapu a Sabadei, fu di wan man warti moro wan skapu!’ A ben de krin fu si taki efu Yesus ben wani yepi a man disi, dan a ben musu meki a kon betre baka!

Yesus taigi a man fu langa en anu. Wantewante na anu kon betre baka. A man ben breiti trutru! Ma fa a ben de nanga den tra man? Den ben breiti?— Nôno. Den ben kisi moro bita-ati srefi gi Yesus. Den go na dorosei fu taki nanga makandra fa den ben o kiri en!​—Mateyus 12:9-14.

Na so a de tu na ini a ten disi. Awansi san wi e du, noiti wi kan meki ala sma prisiri nanga wi. Sobun, wi musu bosroiti suma wi wani fu prisiri trutru. Efu wi wani taki Yehovah Gado nanga en Manpikin, Yesus Krestes, prisiri nanga wi, dan ala ten wi musu du san den e leri wi. Ma efu wi e du dati, dan suma sa abi bita-ati gi wi? Suma sa meki en muilek gi wi fu du san bun?—

Satan Didibri. Ma suma moro?— Den sma di Didibri kori fu bribi sani di no tru. Yesus ben taigi den kerki fesiman na ini a ten fu en: „Unu na fu un tata Didibri èn un wani du den sani di un tata wani.”​—Yohanes 8:44.

Furu sma de di Didibri lobi. Yesus e kari den sma dati „a grontapu”. San yu denki na „a grontapu” di Yesus e taki fu en?— We, meki wi luku san skrifi na Yohanes kapitel 15, vers 19. Drape wi e leisi den wortu disi fu Yesus: „Efu unu ben de wan pisi fu grontapu, dan grontapu ben o lobi san de fu en. Ma fu di unu no de wan pisi fu grontapu, èn mi teki unu puru na grontapu, dati meki grontapu e teige unu.”

 Sobun a grontapu di e teige den disipel fu Yesus, na ala den sma di no de bakaman fu en. Fu san ede grontapu e teige den disipel fu Yesus?— Denki a sani dati. Suma na a tiriman fu grontapu?— Bijbel e taki: „Heri grontapu de na ini a makti fu na ogriwan.” Na ogriwan dati na Satan Didibri.​—1 Yohanes 5:19.

Yu e si now fu san ede a muilek so fu du san bun?— Satan nanga a grontapu fu en e meki en muilek gi wi. Ma ete wan reide de. Yu sabi ete san na dati?— Na ini kapitel 23 fu a buku disi, wi leri taki wi alamala gebore nanga sondu. A no ben o de wan moi sani te sondu, Didibri, nanga a grontapu fu en no de moro?—

Bijbel e pramisi: „Grontapu e pasa gowe.” Disi wani taki dati ala den sma di no de bakaman fu a bigi Leriman, no sa de moro. Den no sa kisi na okasi fu libi fu têgo. Yu sabi suma sa libi fu têgo?— Bijbel e taki moro fara: „A sma di e du a wani fu Gado, sa tan fu têgo” (1 Yohanes 2:17). Iya, soso den sma di e du san bun, noso di e du „a wani fu Gado”, sa libi fu têgo na ini a nyun grontapu fu Gado. Sobun, awansi a muilek, toku wi wani du san bun, a no so?—