PRAKSERI taki yu de na ini wan boto di e sungu. Yu ben o wani wan sma fu kon yepi yu?— Fa yu ben o feni en te wan sma gi en libi fu du dati?— We, na dati Yesus Krestes ben du. Soleki fa wi leri na ini kapitel 37, dan a gi en libi leki wan lusu-paiman so taki wi kan kisi frulusu.

A no de fu taki dati Yesus e yepi wi na wan heri tra fasi na ini a ten disi. Fa a e yepi wi? Yu sabi dati ete?— A e frulusu wi fu a sondu nanga dede di wi alamala kisi fu Adam. Aladi son sma du tumusi takru sani, toku Yesus dede gi den sma dati tu. Yu ben o wani gi yu libi fu pruberi fu yepi den sortu sma dati?—

Bijbel e taki: „Nanga bun furu muiti wan sma sa wani dede gi wan regtfardiki sma; iya, kande wan sma wani dede gi wan bun sma ete.” Toku Bijbel e taki dati Yesus „dede gi ogrisma”. Dati na sma di no e dini Gado srefisrefi! Bijbel e taki moro fara: „Krestes dede gi wi, aladi wi ben de sondari ete [noso di wi ben e du takru sani ete].”​—Romesma 5:6-8.

Yu sabi wan apostel di ben du bun takru sani fosi?— Na apostel dati ben skrifi: „Krestes Yesus kon na grontapu fu frulusu sondari. Mi na a moro bigiwan fu den.” Na apostel di ben taki a sani dati, na Paulus. A ben taki dati ’wan ten ben de di a ben e du don sani’, èn taki a ben e tyari ensrefi ’na wan takru fasi’.​—1 Timoteyus 1:15; Titus 3:3.

Prakseri o bigi a lobi fu Gado ben de fu di a seni en Manpikin kon fu dede gi den sortu sma dati di du takru sani! Fu san ede yu  no e teki yu Bijbel èn leisi fu a tori disi na ini Yohanes kapitel 3, vers 16. A tekst dati e taki: „Gado ben lobi grontapu [dati wani taki, den sma di e libi na grontapu] so te, taki a gi wi en wan-enkri Manpikin, so taki ala sma di e bribi na ini en no sa dede, ma taki den sa kisi têgo libi.”

Yesus ben sori taki a lobi wi neleki fa en Tata lobi wi. Kande yu sabi ete taki na ini kapitel 30 fu a buku disi, wi leisi fu wan tu takru sani di ben pasa nanga Yesus na a neti di sma grabu en. Den ben tyari en go na a oso fu a Granpriester Kayafas, pe den krutu en. Sma ben tyari falsi kotoigi kon di fruteri lei fu Yesus, èn den sma naki en nanga kofu. Na a ten dati, Petrus taki dati a no ben sabi Yesus. Now, meki wi du leki wi de leti drape èn kan si san e pasa moro fara.

Dei e broko. Heri neti Yesus no sribi. Fu di den no ben krutu Yesus soleki fa a wet ben taki, meki esi-esi den priester e kari a Sanhedrin, noso a hei krutu fu den Dyu kon na wan. Den o krutu Yesus ete wan tron. Na a krutu disi den e taki agen dati Yesus ben du ogri teige Gado.

Baka dati, den priester e meki sma tai Yesus, èn den e tyari en go na Pilatus, a tiriman fu Rome. Den e taigi Pilatus: ’Yesus de teige a tirimakti. A musu dede.’ Ma Pilatus kan si taki den priester e fruteri lei. Fu dati ede Pilatus e taigi den: ’Mi no feni taki a man disi du wan ogri. Mi o lusu en.’ Ma den priester nanga den tra sma e bari: ’Nôno! Kiri en!’

Bakaten, Pilatus e pruberi ete wan tron fu taigi den sma taki a o lusu Yesus. Ma den priester e meki den ipi sma bari: ’Efu yu lusu en, dan yu de teige a tirimakti tu! Kiri en!’ Den ipi sma e bigin meki babari. Yu sabi san Pilatus e du?—

A e du san den sma wani. A e meki sma wipi Yesus fosi. Baka  dati, a e gi en abra na den srudati fu den kiri en. Den e poti wan kownu-ati fu makamaka na tapu Yesus ede, èn den e boigi gi en fu spotu en. Baka dati, den e meki Yesus tyari wan bigi postu, èn den e tyari en go na dorosei fu a foto na wan presi di den e kari Edekrabasi Presi. Drape den e spikri Yesus en anu nanga futu na a postu. Dan den e opo a postu leti-opo, so taki Yesus e anga na en. Yesus en skin e brudu. En skin e hati en srefisrefi.

Yesus no e dede wantewante. A e anga drape nomo na a postu. Den granpriester e spotu en. Èn den sma di e waka pasa e taki: „Efu yu na wan manpikin fu Gado, dan komoto fu a pina-udu!” Ma Yesus  sabi san en Tata seni en fu kon du. A sabi taki a musu gi en volmaakti libi so taki wi kan abi na okasi fu kisi têgo libi. Te fu kaba, wan sani fu dri yuru a bakadina dati, Yesus e bari kari en Tata èn a e dede.​—Mateyus 26:36–27:50; Markus 15:1; Lukas 22:39–23:46; Yohanes 18:1–19:30.

Trutru, Yesus ben de tra fasi leki Adam! Adam no ben lobi Gado. A ben trangayesi Gado. Adam no ben lobi wi tu. Fu di a ben sondu, meki wi alamala gebore nanga sondu. Ma Yesus ben sori taki a lobi Gado èn taki a lobi wi tu. Ala ten a ben gi yesi na Gado. Èn a gi en libi so taki a ben kan tyari wan kaba kon na a ogri di Adam ben du nanga wi.

Yu e warderi a tumusi moi sani di Yesus du?— Te yu e begi Gado, dan yu e taki en tangi fu di a gi wi en Manpikin?— Na apostel Paulus ben warderi san Krestes du gi en. Paulus ben skrifi: ’A Manpikin fu Gado ben lobi mi èn a gi ensrefi abra gi mi’ (Galasiasma 2:20). Yesus dede gi yu èn gi mi sosrefi. A gi en volmaakti libi so taki wi kan abi têgo libi! Dati na wan tumusi prenspari reide fu san ede wi musu lobi Yesus.

Na apostel Paulus ben skrifi den Kresten na ini a foto Korente: ’A lobi fu Krestes e meki wi du wan sani.’ San wi musu du fu di Krestes sori lobi gi wi? San yu denki?— Luku san Paulus e piki: ’Krestes dede gi ala sma so taki den ben o libi gi En. Den no musu  libi gi den eigi prisiri.’—Na wi skrifi den wortu skoinsi; 2 Korentesma 5:14, 15, New Life Version.

Yu sabi wan tu fasi fa yu kan sori taki yu e libi gi Krestes?— We, wán fasi fa yu kan du dati, na fu fruteri trawan san yu kon sabi fu en. Noso denki a sani disi: Kande yu de yu wawan, so taki yu papa noso yu mama no man si san yu e du. Nowan enkri tra sma no man si yu. Yu sa luku telefisi programa, noso yu sa du tra sani di Yesus no ben o feni bun?— Memre taki Yesus de na libi now, èn a kan si ala sani san wi e du!

Wan tra reide fu san ede wi musu lobi Yesus, na fu di wi wani de leki Yehovah. Yesus ben taki: „A Tata lobi mi.” Yu sabi fu san ede a lobi Yesus èn fu san ede wi musu lobi Yesus tu?— Fu di Yesus ben de klariklari fu dede so taki a wani fu Gado ben kan du (Yohanes 10:17). Sobun, meki wi du san Bijbel e taigi wi: „Waka baka na eksempre fu Gado leki pikin di a lobi; tan lobi makandra neleki fa Krestes lobi unu tu èn a ben gi ensrefi gi unu.”​—Efeisesma 5:1, 2.