MI SABI seiker taki yu sa agri taki wan sma de di hei, noso di bigi èn di tranga moro leki wi alamala. Suma yu denki na a sma dati?— Dati na Yehovah Gado. Fa a de nanga en Manpikin, a Bigi Leriman? A hei moro wi?— Iya, a hei moro wi.

Yesus ben libi nanga Gado na ini hemel. A ben de wan yeye, noso wan engel. Gado ben meki tra yeye, noso engel manpikin?— Iya, a ben meki milyunmilyun fu den. Den engel disi hei èn makti moro wi tu.​—Psalm 104:4; Danièl 7:10.

Yu e memre a nen fu na engel di ben taki nanga Maria?— A ben nen Gabrièl. A ben taigi Maria taki a beibi fu en ben o de a Manpikin fu Gado. Gado ben poti a libi fu en yeye Manpikin na ini a bere fu Maria, so taki Yesus ben kan gebore leki wan beibi na grontapu.​—Lukas 1:26, 27.

Yu e bribi a wondru dati? Yu e bribi taki Yesus ben libi kaba nanga Gado na ini hemel?— Yesus ben taki dati na so a de. Fa a du kon taki Yesus ben sabi den sortu sani dati? We, a kan taki di a ben de wan boi, dan Maria taigi en san Gabrièl ben taki. Boiti dati, a ben musu de so taki Yosef taigi Yesus taki Gado ben de en trutru Papa.

Baka di Yesus teki dopu, dan Gado srefi taki komoto fu hemel. A ben taki: „Disi na mi Manpikin” (Mateyus 3:17). Èn Yesus ben begi a neti  bifo a dede: „Mi Tata, gi mi a srefi glori na yu sei di mi ben abi di mi ben de na yu sei bifo grontapu ben de” (Yohanes 17:5). Iya, Yesus ben aksi Gado fu teki en baka na hemel so taki a ben kan libi baka nanga en. Fa a ben kan libi drape?— Soso efu Yehovah Gado ben meki a tron wan yeye baka, noso wan engel di sma no man si nanga ai.

Now mi wani aksi yu wan prenspari sani. Ala den engel na bun engel? San yu e denki?— We, wan ten ben de di den alamala ben de bun engel. Disi ben kon fu di Yehovah ben meki den, èn ala sani di Yehovah e meki na bun sani. Ma bakaten wan fu den engel kon takru. Fa dati pasa?

Fu man kisi piki tapu na aksi dati, dan wi musu go baka na a ten di Gado ben meki a fosi man nanga a fosi uma, Adam nanga Eva. Son sma e taki dati a tori fu den na wan anansitori. Ma a Bigi Leriman ben sabi taki a tori dati ben tru.

Di Gado ben meki Adam nanga Eva, dan a poti den na ini wan moi dyari na ini wan presi di ben nen Eden. A presi ben de wan paradijs. Den ben kan abi furu pikin, wan bigi osofamiri, èn den ben kan libi fu têgo na ini Paradijs. Ma den ben musu leri wan prenspari  sani. Wi ben taki fu a sani dati kaba. Meki wi luku efu wi kan memre a sani dati.

Yehovah ben taigi Adam nanga Eva taki den ben kan nyan so furu froktu leki den ben wani fu den bon na ini a dyari. Ma den no ben abi primisi fu nyan fu wán fu den bon. Gado ben taigi den san ben o pasa efu den ben nyan fu a bon dati. A ben taki: „Yu o dede fu tru” (Genesis 2:17). Sobun, san Adam nanga Eva ben musu leri?—

Den ben musu leri fu gi yesi. Iya, wi sa tan na libi soso te wi e gi yesi na Yehovah Gado! A no ben nofo taki Adam nanga Eva ben taki nomo taki den ben o gi yesi na en. Den ben musu sori dati nanga den sani di den ben e du. Efu den ben gi yesi na Gado, dan den ben o sori taki den lobi en èn taki den ben wani en fu de a Tiriman fu den. Na so fasi den ben kan libi fu têgo na ini Paradijs. Ma efu den ben nyan fu a bon dati, dan san dati ben o sori?—

A ben o sori taki den no ben de nanga tangi na ati trutru gi den sani di Gado ben gi den. Yu ben o gi yesi na Yehovah efu yu ben de drape?— Na ini a bigin,  Adam nanga Eva ben gi yesi. Ma bakaten wan sma di ben hei moro den, kori Eva. A meki taki Eva trangayesi Yehovah. Suma ben de a sma dati?—

Bijbel e taki dati wan sneki ben taki nanga Eva. Ma yu sabi taki wan sneki no man taki. Sobun, fa a du kon taki a ben man taki?— Wan engel ben meki a gersi leki a sneki ben e taki. Ma fu taki en leti, a ben de na engel di ben e taki. Na engel ben bigin kisi takru prakseri. A ben wani taki Adam nanga Eva ben musu anbegi en. A ben wani den fu gi yesi na en. A ben wani teki Gado presi.

Fu dati ede a takru engel dati ben meki Eva kisi takru prakseri. A gebroiki a sneki fu taigi en: ’A sani di Gado fruteri yu, no tru. Yu no sa dede efu yu e nyan fu a bon dati. Yu sa tron wan koni sma neleki Gado.’ Yu ben o bribi san a sten dati taki?—

Eva ben bigin angri gi wan sani di Gado no ben gi en. A nyan a froktu fu a bon, aladi a no ben kisi primisi fu du dati. Baka dati, a gi Adam wan pisi. Adam no ben bribi san a sneki ben taki. Ma a ben wani de nanga Eva, èn a winsi dati ben tranga moro a lobi di a ben abi gi Gado. Fu dati ede a nyan fu a bon tu.​—Genesis 3:1-6; 1 Timoteyus 2:14.

 San ben de a bakapisi?— Adam nanga Eva kon tron sondu sma, den kon owru, èn den dede. Èn fu di den ben de sondu sma, meki ala den pikin fu den ben de sondu sma tu, èn te fu kaba den kon owru èn den dede. Gado no ben lei! A de so trutru taki wi musu gi yesi na en efu wi wani tan na libi (Romesma 5:12). Bijbel e fruteri wi taki Satan Didibri ben de na engel di ben lei gi Eva, èn den tra engel di kon takru na ogri yeye.​—Yakobus 2:19; Openbaring 12:9.

We, yu e frustan fa a du kon taki a bun engel di Gado ben meki, tron wan takru engel?— Dati kon fu di a bigin prakseri takru sani. A ben wani de Nomru Wán. A ben sabi taki Gado ben taigi Adam nanga Eva fu meki pikin, èn a ben wani taki ala den pikin disi ben musu anbegi en. Didibri wani meki ala sma trangayesi Yehovah. Fu dati ede a e pruberi fu poti takru prakseri na ini wi ede.​—Yakobus 1:13-15.

Didibri e taki dati nowan sma lobi Yehovah trutru. A e taki dati yu nanga mi no lobi Gado èn taki wi no wani gi yesi na Gado trutru. Satan e taki dati wi e gi yesi na Yehovah soso te ala sani e waka na a fasi fa wi wani. Didibri abi leti? Wi de leki fa a taki?

A Bigi Leriman ben taki dati Didibri e lei! Yesus sori taki a ben lobi Yehovah trutru fu di a ben e gi yesi na En. Èn Yesus no ben gi yesi na Gado soso te sani ben makriki. A ben du dati ala ten, srefi te tra sma ben meki en muilek gi en. Yesus tan getrow na Yehovah te na dede. Na fu dati ede meki Gado gi en libi baka, so taki a ben kan libi fu têgo.

Sobun, suma yu feni na a moro bigi feanti fu wi?— Iya, dati na Satan Didibri. Yu kan si en?— Kwetikweti! Ma wi sabi taki a de èn taki a hei èn makti moro wi. Ma suma hei moro Didibri?— Dati na Yehovah Gado. Fu dati ede wi sabi taki Gado kan kibri wi.