YESUS ben e krei di en mati Lasarus dede. Yu denki taki Yehovah ben sari di Yesus ben e pina èn di a dede?— Bijbel e taki dati sani di e pasa kan „hati” Gado èn taki Gado kan „firi sari” srefi fu den sani dati.​—Psalm 78:40, 41; Yohanes 11:35.

Yu kan frustan fa Yehovah ben sari di a si fa en lobi Manpikin ben e dede gowe?— Yesus ben de seiker taki Gado no ben o frigiti en. Dati meki den lasti wortu di a taki bifo a dede ben de: „Mi Tata, mi e poti mi yeye na ini yu anu.”​—Lukas 23:46.

Yesus ben de seiker taki a ben o kisi libi baka, èn taki Gado no ben o libi en ’na ini Hades’, noso a grebi. Baka di Yesus ben kisi libi baka, dan na apostel Petrus gebroiki den wortu na ini Bijbel di ben taki fu Yesus: ’Gado no ben libi en sili na ini Hades èn en skin no ben kisi pori’ (Tori fu den Apostel  2:31; Psalm 16:10). Nôno, a skin fu Yesus no ben tan langa nofo na ini a grebi fu kon pori èn fu bigin smeri.

Di Yesus ben de na grontapu, dan a taigi en disipel srefi taki a no ben o tan na ini a grebi wan langa pisi ten. A taigi den taki sma ben o ’kiri en, ma na a di fu dri dei a ben o kisi wan opobaka’ (Lukas 9:22). Sobun, den disipel no ben musu fruwondru srefisrefi di Yesus kisi wan opobaka. Ma den ben fruwondru?— Meki wi luku efu dati ben de so.

Na wan ten fu dri yuru freida bakadina, a Bigi Leriman dede na wan pina-udu. Yosef, wan gudu memre fu a Sanhedrin, na wan sma di e bribi na ini Yesus, ma a no taigi nowan sma. Te a e kon sabi taki Yesus dede, dan a e go na Pilatus, a tiriman fu Rome. A e aksi efu a kan saka a dedeskin fu Yesus puru fu a pina-udu fu beri en. Baka dati, Yosef e tyari a dedeskin fu Yesus go na ini wan dyari pe wan grebi de.

Baka di den poti a dedeskin na ini a grebi, dan den e lolo wan bigi ston poti fesi a grebi. Sobun, a grebi tapu. Now a de a di fu dri dei, èn dati na sonde. Son no opo ete, sobun a dungru ete. Man e hori wakti na a grebi. Den edeman fu den priester seni den man disi fu du dati. Yu sabi fu san ede?—

Den priester ben yere tu taki Yesus ben taki dati a ben o kisi wan opobaka. Den no wani den disipel fu fufuru a dedeskin èn fu taki bakaten dati Yesus kisi wan opobaka. Fu dati ede den e meki sma hori wakti na a grebi fu en. Wantronso a gron e bigin seki. Faya e koti na ini a dungru. Na wan engel fu Yehovah! Den srudati frede so te taki den no man buweigi. Na engel e go na a grebi èn a e lolo a ston puru. A grebi leigi!

Iya, a de soleki fa na apostel Petrus ben taki bakaten: „Gado gi a Yesus disi wan opobaka” (Tori fu den Apostel 2:32). Gado gi  Yesus libi baka èn a gi en wan srefi sortu skin leki san a ben abi bifo a ben kon na grontapu. A ben kisi wan opobaka na ini wan yeye skin leki san den engel abi (1 Petrus 3:18). Sobun, efu Yesus wani taki sma musu si en, dan a musu teki wan libisma skin gi ensrefi. A e du dati?— Kon meki wi luku.

Now a son e opo. Den srudati gowe. Maria Magdalena nanga tra uma di de disipel fu Yesus e go na a grebi. Den e taki nanga makandra èn den e aksi densrefi: ’Suma o lolo a hebi ston puru gi wi?’ (Markus 16:3) Ma te den doro na a grebi, dan a ston lolo puru kaba. Èn a grebi leigi! A dedeskin fu Yesus no de drape moro! Wantewante, Maria Magdalena e lon gowe fu suku wan tu fu den apostel fu Yesus.

Den tra uma e tan na a grebi. Den e aksi densrefi: ’Pe a dedeskin fu Yesus ben kan de?’ Wantronso den e si tu man na ini brenki krosi. Den man disi na engel! Den e taigi den uma: ’Fu san ede unu e suku Yesus dyaso? A kisi wan opobaka. Go taigi den disipel fu en esi-esi.’ We, yu kan frustan o tranga den uma e lon! Den e miti wan man na pasi. Yu sabi suma na a man dati?—

A man dati na Yesus, di teki wan libisma skin gi ensrefi! A e taigi den uma sosrefi: ’Go fruteri den disipel fu mi.’ Den uma e prisiri. Den e feni den disipel èn den e taigi den: ’Yesus de na libi! Wi si en!’ Maria fruteri Petrus nanga Yohanes kaba fu a leigi grebi. Now den de na ini a grebi, soleki fa yu kan si dyaso na tapu a prenki. Den e luku den krosi fu linnen di sma ben domru Yesus na ini, ma den no sabi san den musu denki. Den wani bribi taki Yesus de na libi baka, ma a ben moi tumusi fu bribi.

Moro lati a sonde dati, Yesus e sori ensrefi na tu fu den disipel fu en di e waka a pasi go na a dorpu Ema-us. Yesus e waka nanga den èn a e taki nanga den, ma den no sabi suma na en fu di a no  abi a srefi libisma skin di a ben abi bifo. Te Yesus e nyan nanga den èn te a e begi, dan fosi den sabi suma na en. Den disipel e prisiri so te taki den e lon omeni kilometer go baka na Yerusalem! Kande a de syatu baka di a sani disi pasa, taki Yesus e sori ensrefi na Petrus fu meki Petrus si taki a de na libi.

Èn pikinso moro lati a sonde neti dati, furu disipel kon makandra na ini wan kamra. Den doro sroto. Wantronso, Yesus de leti drape na ini a kamra nanga den! Now den sabi taki a Bigi Leriman de na libi baka trutru. Yu kan frustan fa den koloku!​—Mateyus 28:1-15; Lukas 24:1-49; Yohanes 19:38–20:21.

 Fotenti dei langa Yesus e sori ensrefi na ini difrenti libisma skin, fu meki den disipel si taki a de na libi. Baka dati, a e gowe libi grontapu èn a e go baka na en Tata na ini hemel (Tori fu den Apostel 1:9-11). Heri esi den disipel e bigin fruteri ala sma taki Gado gi Yesus wan opobaka. Srefi te den priester e fon den èn e meki sma kiri wan tu fu den, toku den e tan preiki. Den sabi taki efu den dede, Gado no sa frigiti den, neleki fa a no frigiti en Manpikin.

Den fosi bakaman fu Yesus ben difrenti trutru fu furu sma na ini a ten disi! Na son presi fu grontapu, sma e prakseri soso Paas-konikoni nanga Paas-eksi na a ten fu a yari di Yesus ben kisi wan opobaka. Ma Bijbel no e taki noti fu Paas-konikoni nanga Paas-eksi. Bijbel e taki fu a dini di wi musu dini Gado.

Wi kan de leki den disipel fu Yesus. Wi kan fruteri sma taki Gado ben du wan tumusi moi sani di a gi en Manpikin wan opobaka. Wi no abi fu frede noiti, srefi te sma e taki dati den o kiri wi. Efu a ben o pasa taki wi dede, dan Yehovah no sa frigiti wi èn a sa gi wi wan opobaka, neleki fa a ben du nanga Yesus.

Wi no breiti fu sabi taki Gado no e frigiti den sma di e dini en èn taki a sa gi den wan opobaka srefi?— Fu di wi sabi den sani disi, meki wi musu du muiti fu kon sabi fa wi kan gi Gado prisiri. Yu sabi taki wi kan du dati trutru?— Meki wi taki fu dati now.