SORTU pikin na grontapu yu denki ben gi Yehovah moro bigi prisiri?— Dati ben de en Manpikin, Yesus. Meki wi taki fu sani di Yesus ben du fu gi en hemel Tata prisiri.

Yesus en famiri ben libi na wan presi pe yu ben musu teki waka sowan dri dei fu doro na Yerusalem, a foto pe a moi tempel fu Yehovah ben de. Yesus ben kari a tempel „na oso fu mi Tata”. En nanga en famiri ben e go drape ibri yari fu de na a Paskafesa.

Wan fu den yari, di Yesus ben abi 12 yari, dan a famiri fu en bigin drai go baka na oso di a Paskafesa ben kaba. Ma di den doro na wan presi fu sribi, dan den kon si taki Yesus no ben de na mindri den famiriman nanga mati fu den. Fu dati ede, Maria nanga Yosef drai go baka na Yerusalem wantewante fu suku Yesus. Pe yu denki a ben de?—

Den feni Yesus na ini a tempel. A ben e arki den leriman, èn a ben e poti aksi gi den. Èn te den ben poti wan aksi gi en, dan ala ten a ben e gi piki. Den ben fruwondru fu den tumusi bun piki di a ben e gi. Yu kan frustan fu san ede Gado ben prisiri nanga en Manpikin?—

A no de fu taki, dati di Maria nanga Yosef ben feni Yesus te fu kaba, dan den ati ben sidon. Ma Yesus no ben broko en ede. A ben sabi taki a tempel ben de wan bun presi fu de. Fu dati ede a aksi: „Unu no ben sabi taki mi musu de na ini na oso fu mi Tata?” A ben sabi taki a tempel ben de na oso fu Gado, èn a ben lobi fu de drape.

 Bakaten, Maria nanga Yosef tyari Yesus di ben abi twarfu yari, go baka na oso na Nasaret. Fa yu denki Yesus ben tyari ensrefi di a ben tan nanga en papa nanga mama?— We, Bijbel e taki dati a „ben tan saka ensrefi na den ondro”. San yu denki dati wani taki?— A wani taki dati a ben e gi yesi na den. Iya, a ben du san en papa nanga mama ben aksi en fu du, srefi efu den ben aksi en fu du wan osowroko, soleki fu go teki watra na a peti.​—Lukas 2:41-52.

Sobun denki a sani disi: Aladi Yesus ben de volmaakti, toku a ben gi yesi na en papa nanga mama di no ben de volmaakti. A sani disi ben gi Gado prisiri?— Iya, a ben gi En prisiri trutru, bika Gado Wortu e taigi pikin-nengre: „Gi yesi na un papa nanga mama” (Efeisesma 6:1). Yu sa gi Gado prisiri tu te yu e gi yesi na yu papa nanga mama, soleki fa Yesus ben du dati.

Wan tra fasi fa yu kan gi Gado prisiri, na te yu e fruteri trawan fu en. We, son sma ben kan taki dati disi a nowan sani di yongusma musu du. Ma di sma ben pruberi fu tapu yongu pikin fu du disi, dan Yesus  ben taki: ’Noiti unu leisi na ini den Buku fu Bijbel: „Gado sa meki a mofo fu yongu pikin prèise en”?’ (Mateyus 21:16) Fu dati ede, efu wi wani trutru, dan wi alamala kan fruteri trawan fu Yehovah èn o bun a Gado disi de. Èn te wi e du dati, dan wi sa gi Gado prisiri.

Fa wi e kon sabi sani di abi fu du nanga Gado èn di wi kan fruteri trawan?— Fu di wi e studeri Bijbel na oso. Ma wi e leri moro sani na a presi pe a pipel fu Gado e kon makandra fu studeri. Ma fa wi kan sabi suma na a pipel fu en?—

We, san den sma e du na den konmakandra fu den? Den e leri sma trutru san de na ini Bijbel? Den e leisi en èn den e taki fu san skrifi? A no dati wi musu du fu sori taki wi e arki Gado?— Èn na den Kresten konmakandra wi e fruwakti taki sma e fruteri wi san Gado e taki, a no so?— Ma fa a de te sma e taki dati yu no abi fu libi soleki fa Bijbel e taki? Yu ben o taki dati den sma dati na Gado pipel?—

Luku wan tra sani di yu musu prakseri. Bijbel e taki dati a pipel fu Gado ben o de ’wan pipel di musu tyari en nen’ (Tori fu den Apostel 15:14). Fu di Gado en nen na Yehovah, meki wi kan aksi sma efu Yehovah na a Gado fu den. Efu den sma dati e taki nôno, dan wi sabi taki den a no a pipel fu Gado. Boiti dati, a pipel fu Gado ben o taki nanga trawan fu a Kownukondre fu Gado. Èn den ben o sori taki den lobi Gado fu di den e hori densrefi na den komando fu en.​—1 Yohanes 5:3.

Efu yu sabi sma di e du ala den sani dati, dan yu musu kon makandra nanga den fu anbegi Gado. Yu musu arki bun na den konmakandra disi èn baka dati yu musu gi piki te den takiman e poti aksi gi den arkiman. Na dati Yesus ben du di a ben de na ini Gado oso. Èn te yu e du den sani dati, dan yu sa gi Gado prisiri, neleki fa Yesus ben du dati.

 Yu sabi tra pikin na ini Bijbel di ben gi Gado prisiri?— Timoteyus na wan heri bun eksempre. A papa fu en no ben e bribi na ini Yehovah. Ma en mama, Enise, nanga en granmama Lowis, ben e bribi. Timoteyus ben arki den èn a ben kon sabi moro fu Yehovah.

Di Timoteyus gro kon bigi, dan na apostel Paulus kon na a foto pe a ben e tan. Paulus ben si taki Timoteyus ben wani dini Yehovah trutru. Fu dati ede, a aksi Timoteyus fu kon nanga en so taki a ben kan du moro na ini a diniwroko fu Yehovah. Ala presi pe den ben e go, den ben e fruteri sma fu Gado Kownukondre èn fu Yesus.​—Tori fu den Apostel 16:1-5; 2 Timoteyus 1:5; 3:14, 15.

Ma den eksempre na ini Bijbel na soso fu yongu boi nomo di ben gi Gado prisiri?— Kwetikweti. Luku a tori fu wan yongu meisje fu Israel di ben du dati. Na ini a ten di a ben de na libi, a pipel fu Siria èn a pipel fu Israel ben de feanti fu makandra. Wan dei, den Siriasma feti nanga den Israelsma èn den teki a yongu meisje tyari gowe. Den seni en go na a oso fu a legre ofsiri, di ben nen Naman.  Drape a tron na umasrafu fu a wefi fu Naman.

Now a ben de so, taki Naman ben abi wan siki di nen gwasi. Nowan fu den datra ben man yepi en. Ma a yongu meisje fu Israel ben bribi taki wan fu den spesrutu futuboi fu Gado, wan profeiti, ben kan yepi Naman. A no de fu taki, dati Naman nanga en wefi no ben de anbegiman fu Yehovah. A yongu meisje ben musu fruteri den san a ben sabi? San yu ben o du?—

We, a pikin meisje taki: ’Efu Naman ben o go nomo na a profeiti fu Yehovah na ini Israel, dan a ben o kon betre baka fu a gwasi fu en.’ Naman arki a meisje, èn a go na a profeiti fu Yehovah. Di a du san a profeiti taigi en fu du, dan a kon betre baka. A sani disi meki taki Naman tron wan anbegiman fu a tru Gado.​—2 Kownu 5:1-15.

Yu ben o wani yepi wan sma fu kon sabi moro fu Yehovah èn fu san a kan du, soleki fa a yongu meisje ben du dati?— Suma yu ben kan yepi?— A no de fu taki, dati na ini a bigin den ben kan feni taki den no abi yepi fanowdu. Ma yu ben kan taki nanga den fu den bun sani di Yehovah e du. Èn kande den sa arki. Yu kan de seiker taki disi sa gi Gado prisiri.