SOLEKI fa yu sabi, dan sma na ini a ten disi e kon owru, den e kon siki, èn den e dede. Son leisi, srefi pikin-nengre e dede. Yu musu frede gi dede, noso gi iniwan sma di dede?— Yu sabi san e pasa te wi dede?—

We, nowan sma di de na libi now, ben dede kaba wan leisi èn kon na libi baka fu fruteri san a ondrofeni di a ben dede. Ma di Yesus, a Bigi Leriman ben de na grontapu, dan wan man ben de di ben dede kaba wan leisi. Te wi e leisi fu a man dati, dan wi kan kon sabi san e pasa nanga sma te den dede. A man ben de wan mati fu Yesus, èn a ben libi na ini Betania, wan pikin foto krosibei fu Yerusalem. A ben nen Lasarus, èn a ben abi tu sisa di ben nen Marta nanga Maria. Meki wi luku san Bijbel e taki fu a tori disi.

Wan dei, Lasarus e kon siki seryusu. Na a ten dati, Yesus de farawe. Fu dati ede, Marta nanga Maria e seni wan boskopuman fu go taigi Yesus taki Lasarus, a brada fu den, e siki. Den e du dati fu di den sabi taki Yesus kan meki a brada fu den kon betre baka. Yesus no de wan datra, ma a kisi makti fu Gado fu dresi ibri sortu siki.​—Mateyus 15:30, 31.

Ma bifo Yesus e go luku Lasarus, dan Lasarus e kon siki so te taki a e dede. Ma Yesus e taigi den disipel fu en taki Lasarus e sribi èn taki a o go wiki en. Den disipel no e frustan san Yesus wani taki nanga dati. Fu dati ede Yesus e taigi den krinkrin: „Lasarus dede.” Sobun, nanga san wi kan agersi dede?— Iya, wi kan  agersi en nanga wan dipi sribi. A sribi disi dipi so te taki a sma no e dren srefi.

Yesus e kon luku Marta nanga Maria now. Furu mati fu a famiri doro kaba. Den kon fu trowstu den sisa fu di a brada fu den dede. Te Marta e yere taki Yesus e kon, dan a e waka go miti en. Heri esi Maria sosrefi e go na doro fu si Yesus. A e sari srefisrefi, a e krei, èn a e fadon na en futu. Tra mati di waka kon nanga Maria e krei tu.

A Bigi Leriman e aksi pe den poti Lasarus. Ne den sma e tyari Yesus go na a ston-olo pe den poti Lasarus na ini. Te Yesus e si ala den sma e krei, dan a e bigin krei tu. A sabi fa a e hati te wan lobiwan dede.

Wan ston de na fesi a ston-olo, èn fu dati ede Yesus e taki: „Un puru a ston.” Den musu du dati?— Marta no feni a sani dati bun. A e taki: ’Masra, a musu e tingi now, bika a dede fo dei kaba.’

Ma Yesus e taigi en: „Mi no taigi yu taki efu yu e bribi, dan yu o si a glori fu Gado?” Nanga tra wortu, Yesus taki dati Marta ben o si wan sani di ben o gi Gado grani. San Yesus o du? Te den puru a ston, dan Yesus e begi Yehovah nanga wan tranga sten. Baka dati, Yesus e bari: „Lasarus, kon na doro!” A ben o kon na doro? A ben o man du dati?—

We, yu kan wiki wan sma di e sribi?— Iya, efu yu e kari nanga wan tranga sten, dan a sa wiki. Ma yu kan wiki wan sma di e sribi na ini dede?— Nôno. Awansi o tranga yu e bari kari en, a sma di dede no sa yere. Nowan sma, efu na yu, mi, noso iniwan tra sma na grontapu na ini a ten disi, no man du noti fu wiki den dedewan.

 Ma Yesus de tra fasi. A kisi aparti krakti fu Gado. Sobun, te Yesus e kari Lasarus, dan wan fruwondru sani e pasa. A man di dede fo dei kaba e komoto na ini a ston-olo! A kisi libi baka! A kan bro, a kan waka, èn a kan taki baka! Iya, Yesus e meki Lasarus kon na libi baka.​—Yohanes 11:1-44.

Now, denki a sani disi pikinso: San pasa nanga Lasarus di a dede? A de so taki wan pisi fu en, sobun wan sili noso wan yeye, gowe libi en skin fu go tan na wan tra presi? A sili fu Lasarus go na hemel? A ben e libi drape na loktu fo dei langa makandra nanga Gado nanga den santa engel?—

Nôno, dati no ben de so. Memre taki Yesus ben taki dati Lasarus ben e sribi. Fa a de te yu e sribi? Te yu e sribi dipi, dan yu no sabi san e pasa na yu lontu, a no so?— Èn te yu e wiki, dan yu no sabi o langa yu sribi, teleki yu luku o lati a de.

 Na so a de tu nanga dedesma. Den no sabi noti. Den no e firi noti. Èn den no man du noti. Na so a ben de nanga Lasarus di a dede. Dede de leki wan dipi sribi pe wan sma no e memre noti. Bijbel e taki: „Fu a sei fu den dedewan, den no sabi notinoti.”​—Preikiman 9:5, 10.

Denki a sani disi sosrefi: Efu Lasarus ben de na ini hemel den fo dei dati, dan a ben o taki fa a ben de drape, a no so?— Èn efu a ben de na ini hemel, dan Yesus no ben o meki a gowe libi a moi presi dati fu kon baka na grontapu, a no so?— A no ben o du dati kwetikweti!

Toku furu sma e taki dati wi abi wan sili, èn taki a sili e libi go doro baka te a skin dede. Den e taki dati Lasarus en sili ben de na libi na wan presi. Ma Bijbel no e taki dati. Bijbel e taki dati Gado meki a fosi man Adam tron „wan libi sili”. Adam ben de wan sili. Bijbel e taki sosrefi taki di Adam sondu, dan a dede. A tron wan „dede sili”, èn a tron doti baka, a srefi doti di Gado ben gebroiki fu meki en. Bijbel e taki sosrefi taki ala den bakapikin fu Adam kisi sondu nanga dede tu.​—Genesis 2:7; 3:17-19; Numeri 6:6; Romesma 5:12.

 Fu dati ede, a krin fu si taki wi no abi wan sili di de aparti fu wi skin. Ibriwan fu wi na wan sili. Èn fu di sma kisi sondu fu a fosi man, Adam, meki Bijbel e taki: ’A sili di e sondu sa dede.’​—Esekièl 18:4.

Son sma e frede gi dedewan. Den no wani go na wan beripe, fu di den e denki taki den dedewan abi wan sili di de aparti fu a skin fu den èn ben kan du libisma ogri. Ma wan dedesma kan du ogri nanga wan sma di de na libi?— Nôno, a no man.

Son sma e bribi srefi taki den dedewan e tron yeye di kan kon baka na sma di de na libi. Fu dati ede den sma disi e poti nyanyan gi den dedewan. Ma sma di e du dati no e bribi trutru san Gado e taki fu den dedewan. Te wi e bribi san Gado e taki, dan wi no sa frede gi den dedewan. Èn efu wi de nanga tangi trutru fu a libi di Gado gi wi, dan wi sa sori dati fu di wi sa du san Gado feni bun.

Ma yu ben kan aksi yusrefi: ’Gado sa gi pikin-nengre di dede wan opobaka? A wani du dati trutru?’ Meki wi taki fu a tori dati now.