A NO ben o de wan moi sani efu ala sma ben e du san bun?— Ma nowan sma e du ala ten san bun. Yu sabi fu san ede wi alamala e du takru sani son leisi, srefi te wi wani du san bun?— Fu di wi alamala gebore nanga sondu. Ma son sma e du furu takru sani. Den abi bita-ati gi trawan èn den e gi den mankeri fu espresi. Yu denki taki den sma dati kan kenki èn leri fu du bun?—

Luku a yonkuman di e hori wakti na den dyakti fu den man di e fringi ston na tapu Stefanus. Na ini Hebrewtongo a nen fu en na Saulus, ma na ini a tongo fu den Romesma en nen na Paulus. A breiti taki sma e kiri Stefanus, di de wan disipel fu a Bigi Leriman. Meki wi luku fu san ede Saulus e du den takru sani dati.

Saulus na wan memre fu a Dyu kerkigrupu di sma e kari den Fariseiman. Den Fariseiman abi Gado Wortu, ma den e poti moro prakseri na den leri fu wan tu fu den eigi kerki fesiman. A sani disi e meki taki Saulus e du takru sani.

Te sma e grabu Stefanus na ini Yerusalem, dan Saulus de leti drape. Den e tyari Stefanus go na krutu-oso, èn wan tu fu den krutuman drape na Fariseiman. Aladi sma e taki takru sani fu Stefanus, toku a no frede. Wantewante a e teki deki-ati fu taki, èn a e gi den krutuman wan bun kotoigi fu Yehovah Gado nanga Yesus.

Ma den krutuman dati no lobi san den e yere. Den sabi furu sani kaba fu Yesus. Fu taki en leti, a no langa pasa di den meki sma kiri Yesus! Ma bakaten, Yehovah teki Yesus baka na ini hemel. Now, na  presi taki den krutuman e kenki den fasi fu den, den e feti teige den disipel fu Yesus.

Den krutuman e grabu Stefanus, èn den e tyari en go na dorosei fu a foto. Den e naki en so tranga taki a e fadon na gron, èn den e fringi ston na en tapu. Èn, soleki fa yu kan si na tapu a prenki, Saulus de drape e luku. A feni taki a bun fu kiri Stefanus.

Yu sabi fu san ede Saulus ben abi a denki dati?— We, Saulus ben de wan Fariseiman en heri libi langa, èn a ben bribi taki den leri fu den Fariseiman ben bun. A ben teki den man dati leki eksempre, èn fu dati ede a ben e du leki den.​—Tori fu den Apostel 7:54-60.

San Saulus e du baka di sma kiri Stefanus?— We, a e pruberi fu puru den tra disipel fu Yesus na pasi! A e go langalanga na ini den oso fu den èn a e srepi man nanga uma kon na dorosei. Baka dati, a e meki sma poti den na strafu-oso. Furu fu den disipel musu gowe libi Yerusalem, ma den no e tapu fu preiki fu Yesus.​—Tori fu den Apostel 8:1-4.

 A sani disi e meki taki Saulus e kisi moro bita-ati srefi gi den disipel fu Yesus. Sobun, a e go na a Granpriester Kayafas èn a e kisi primisi fu grabu den Kresten na ini a foto Damaskus. Saulus wani tyari den go leki strafuman na Yerusalem, so taki den kan kisi strafu. Ma te a de na pasi fu go na Damaskus, dan wan fruwondru sani e pasa.

Wan leti e koti komoto fu hemel, èn wan sten e taki: „Saulus, Saulus, fu san ede yu e frufolgu mi?” Na Yesus e taki komoto fu hemel! A leti krin so te taki a e breni Saulus, èn den sma di de nanga Saulus musu teki en na en anu tyari go na Damaskus.

Dri dei baka dati, Yesus e kon na ini wan fisyun na wan fu den disipel fu en na ini Damaskus. A disipel disi nen Ananias. Yesus e taigi Ananias fu go na Saulus, fu meki en ai kon si baka, èn fu taki nanga en. Te Ananias e taki nanga Saulus, dan Saulus e teki a waarheid fu Yesus. Baka dati a man si baka. En heri libi e kenki, èn a e tron wan getrow futuboi fu Gado.​—Tori fu den Apostel 9:1-22.

Yu kan frustan now fu san ede Saulus ben e du takru sani?— Dati e kon fu di a ben leri sani di no bun. A ben e waka baka sma di no ben de getrow na Gado. Èn a ben de wan memre fu wan grupu sma di ben feni taki den denki fu libisma prenspari moro leki a Wortu fu Gado. Ma fu san ede Saulus e kenki en libi èn e bigin du bun, aladi tra Fariseiman e tan feti teige Gado?— Dati e kon fu di a no de so trutru taki Saulus no lobi a waarheid. Sobun, te a e kon sabi san bun na Gado ai, dan a de klariklari fu du dati.

Yu sabi suma Saulus tron bakaten?— Iya, sma kon sabi en leki na apostel Paulus, wan apostel fu Yesus. Èn memre taki Paulus ben skrifi moro buku fu Bijbel leki iniwan tra sma.

Furu sma de leki Saulus èn den kan kenki tu. Ma a no makriki, fu di wan sma de di e du ala san a man fu meki libisma du takru sani. Yu sabi suma na dati?— Di Yesus ben sori ensrefi na Saulus na  a ten di a ben de na pasi fu go na Damaskus, dan Yesus ben taki fu a sma disi. A ben taki komoto fu hemel, èn a taigi Saulus: ’Mi e seni yu fu opo sma ai, fu meki den komopo na ini a dungru fu kon na ini a leti èn fu puru den na ondro a makti fu Satan, so taki den kan go na Gado.’​—Tori fu den Apostel 26:17, 18.

Iya, na Satan Didibri e pruberi fu meki ala sma du takru sani. Yu feni en muilek son leisi fu du san bun?— Na so a de nanga wi alamala. Satan e meki en muilek gi wi. Ma wan tra reide de fu san ede a no makriki ala ten fu du san bun. Yu sabi san na a reide dati?— Na fu di wi gebore nanga sondu.

Na a sondu disi e meki furu tron taki a moro makriki gi wi fu du takru sani, na presi taki wi e du san bun. Sobun, san wi musu du?— Iya, wi musu feti fu du san bun. Te wi e du dati, dan wi kan de seiker taki Yesus di lobi wi, sa yepi wi.

Di Yesus ben de na grontapu, dan a ben e sori lobi gi den sma di ben du takru sani fosi, ma di ben kenki den fasi fu den. A ben sabi o muilek a ben de gi den sma disi fu kenki. Fu gi wan eksempre, yu ben abi uma di ben  abi seks demakandra nanga furu man. A no de fu taki dati a sani disi no ben bun. Bijbel e kari den uma disi huru-uma.

Wan leisi, wan fu den sortu uma dati yere fu Yesus, èn a kon na a oso fu a Fariseiman pe Yesus ben de. A kanti oli na tapu Yesus futu èn a gebroiki en wiwiri fu figi den watra-ai fu en puru fu Yesus futu. Na uma ben firi sari srefisrefi fu den sondu fu en, èn fu dati ede Yesus gi en pardon. Ma a Fariseiman ben feni taki na uma no ben musu kisi pardon.​—Lukas 7:36-50.

Yu sabi san Yesus taigi wan tu fu den Fariseiman?— A taigi den: ’Den huru-uma sa go na ini Gado kownukondre fosi unu’ (Mateyus 21:31). Yesus ben taki disi fu di den huru-uma ben bribi na ini en, èn den ben kenki den takru fasi fu den. Ma den Fariseiman ben tan du takru sani nanga den disipel fu Yesus.

Sobun, te Bijbel e sori taki a sani di wi e du no bun, dan wi musu de klariklari fu tyari kenki kon. Èn te wi e kon sabi san Yehovah wani wi fu du, dan wi no musu draidrai fu du dati. Te wi e du so, dan Yehovah sa prisiri nanga wi èn a sa gi wi têgo libi.