KON meki wi taki dati wan sma e gi yu wan heri moi kado. Fa yu ben o feni dati?— Yu ben o taki grantangi nomo èn baka dati frigiti a sma di gi yu a sani? Noso yu ben o tan memre en fu di a du a sani dati gi yu?—

Yehovah Gado gi wi wan moi kado. A seni en Manpikin kon na grontapu fu dede gi wi. Yu sabi fu san ede Yesus ben musu dede gi wi?— Wi musu frustan disi, fu di a de wan tumusi prenspari sani.

Soleki fa wi leri na ini kapitel 23, dan Adam ben sondu di a pasa a volmaakti wet fu Gado. Èn wi kisi sondu fu Adam, a tata fu wi alamala. Sobun, san yu denki wi abi fanowdu?— Fu taki en leti, wi abi wan nyun tata fanowdu, noso wan sma di libi wan volmaakti libi na grontapu. Suma yu denki kan de a tata dati gi wi?— Dati na Yesus.

Yehovah seni Yesus kon na grontapu so taki a ben kan tron leki wan papa gi wi na presi fu Adam. Bijbel e taki: „’A fosi libisma, Adam, ben tron wan libi sili.’ A lasti Adam ben tron wan yeye di e gi libi.” Suma ben de a fosi Adam?— Iya, a sma di Gado ben meki fu a doti fu grontapu. Suma na a lasti Adam?— Yesus. Bijbel e sori disi te a e taki: „A fosi libisma [Adam] komoto fu grontapu èn a meki fu doti; a di fu tu libisma [Yesus] komoto fu hemel.”​—1 Korentesma 15:45, 47; Genesis 2:7.

Fu di Gado teki a libi fu Yesus puru fu hemel èn a poti en na ini a bere fu na uma Maria, meki Yesus no ben kisi nowan sondu fu  Adam. Na dati meki Yesus ben de wan volmaakti man (Lukas 1:30-35). Na fu dati ede sosrefi, di Yesus ben gebore, dan wan engel taigi den skapuman: „Tide wan Frulusuman gebore gi unu” (Lukas 2:11). Ma san a beibi Yesus ben musu du fosi fu man de wi Frulusuman?— A ben musu gro kon bigi fu tron wan bigisma, neleki Adam. Dan fosi Yesus ben kan tron ’a lasti Adam’.

Yesus, wi Frulusuman, sa tron sosrefi wi „Têgo Tata”. Na so Bijbel e kari en (Yesaya 9:6, 7). Iya, a volmaakti Yesus kan tron wi tata na presi fu Adam, di ben lasi a volmaaktifasi fu en di a sondu. Na so fasi wi kan bosroiti fu abi ’a lasti Adam’ leki wi tata. A no de fu taki, dati Yesus srefi na wan Manpikin fu Yehovah Gado.

Te wi e kon sabi moro fu Yesus, dan wi kan teki en leki wi Frulusuman. Yu e memre ete fu sortu sani wi musu kisi frulusu?— Iya, wi musu kisi frulusu fu a sondu nanga dede di wi kisi fu Adam. A volmaakti libi di Yesus ben gi leki ofrandi gi wi di a ben de wan bigisma, na san sma e kari a lusu-paiman. Yehovah ben sorgu fu a lusu-paiman so taki wi kan kisi pardon fu den sondu fu wi.​—Mateyus 20:28; Romesma 5:8; 6:23.

A no de fu taki, dati wi no wani frigiti san Gado nanga en Manpikin du gi wi, a no so?— Yesus ben sori den bakaman fu en wan spesrutu fasi fa wi kan memre san a du. Meki wi taki fu a tori disi.

 Kon meki wi taki dati yu de na ini wan sodrokamra fu wan oso na ini Yerusalem. A de neti yuru. Yesus nanga den apostel fu en e nyan na wan tafra. Na tapu a tafra losi skapumeti de, plata brede, nanga redi win. Den e nyan wan spesrutu nyanyan. Yu sabi fu san ede?—

A nyanyan disi na fu memre den fu a sani di Yehovah ben du hondrohondro yari na fesi, di a pipel fu en, den Israelsma, ben de srafu na ini Egepte. Na a ten dati, Yehovah ben taigi en pipel: ’Ibri osofamiri musu srakti wan pikin skapu, èn un musu poti a brudu fu en na den doropostu fu un oso.’ Baka dati a taki: ’Go na ini un oso, èn nyan a pikin skapu.’

 Den Israelsma du dati. Èn a srefi neti dati, na engel fu Gado pasa na ini a kondre Egepte. Na ini furu oso, na engel kiri a fosi-gebore pikin. Ma te na engel ben si a brudu fu a pikin skapu na den doropostu, dan a ben e pasa na oso dati. Na ini den oso dati, nowan pikin no dede. Farao, a kownu fu Egepte, ben kon frede fu a sani di na engel fu Yehovah ben du. Fu dati ede Farao taigi den Israelsma: ’Un fri. Komoto na ini Egepte!’ Di a taki dati, dan den teki den sani di den ben abi, den poti den na tapu den kameili nanga buriki fu den, èn den gowe.

Yehovah no ben wani taki a pipel fu en ben musu frigiti fa a frulusu den. Fu dati ede a taki: ’Wán leisi wan yari un musu nyan a srefi nyanyan leki san unu nyan tide neti.’ Den ben kari na okasi pe den ben e nyan a spesrutu nyanyan disi, a Paskafesa. Yu sabi fu san ede?— Bika a neti dati, na engel fu Gado „pasa” den oso di ben marki nanga brudu.​—Exodus 12:1-13, 24-27, 31.

Yesus nanga den apostel fu en e prakseri a sani disi te den e nyan a Paska nyanyan. Wan pisi ten baka dati, Yesus e du wan tumusi prenspari sani. Ma bifo a e du dati, dan a e seni Yudas, na apostel di no ben de getrow, gowe. Baka dati, Yesus e teki wan fu den brede di tan abra, a e begi gi en, a e broko en, èn a e seni en lontu gi den disipel fu en. A e taki: „Teki a brede, nyan.” Baka dati, a e taigi den: ’A brede disi wani taki mi skin di mi sa gi te mi o dede gi unu.’

Baka dati, Yesus e teki wan kan nanga redi win. A e begi ete wan leisi fu taki Gado tangi, dan a e seni a kan lontu èn a e taki: „Un alamala musu dringi en.” Èn a e taigi den: ’A win disi na mi brudu. Heri esi mi o kanti mi brudu trowe fu frulusu unu fu sondu. Tan du disi fu memre mi.’​—Mateyus 26:26-28; 1 Korentesma 11:23-26.

 Yu no si taki Yesus ben taki dati den disipel musu tan du disi fu memre en?— Den no ben o hori a Paskafesa moro. Na presi fu dati, ibri yari den ben o nyan a spesrutu nyanyan disi fu memre Yesus nanga a dede fu en. A nyanyan disi nen na Avondmaal fu Masra. Na ini a ten disi, wi gwenti fu kari en a Memrefesa. Fu san ede?— Fu di a e meki wi prakseri baka san Yesus nanga en Tata, Yehovah Gado, ben du gi wi.

A brede musu meki wi prakseri a skin fu Yesus. A ben de klariklari fu gi a skin dati leki ofrandi, so taki wi kan abi têgo libi. Èn fa a de nanga a redi win?— Dati musu memre wi o warti a brudu fu Yesus de. A warti moro a brudu fu a Paska skapu na ini Egepte. Yu sabi fu san ede?— Bijbel e taki dati a brudu fu Yesus kan gi wi pardon fu sondu. Èn efu wi no abi nowan enkri sondu moro, dan wi no sa kon siki, wi no sa kon owru, èn wi no sa dede moro. Wi musu denki fu dati te wi de na a Memrefesa.

A de so taki ibri sma musu nyan a brede èn dringi a win na a Memrefesa?— We, Yesus ben taigi den sma di e nyan èn dringi: ’Yu sa de na ini mi kownukondre èn unu sa sidon na tapu kownusturu na ini hemel makandra nanga mi’ (Lukas 22:19, 20, 30). Disi ben wani taki dati den ben o go na hemel fu de kownu makandra nanga Yesus. Sobun, soso den wan di abi a howpu fu tiri nanga Yesus na ini hemel musu teki a brede nanga a win.

Ma srefi den sma di no e nyan a brede èn di no e dringi a win musu de na a Memrefesa. Yu sabi fu san ede?— Fu di Yesus ben gi en libi gi wi sosrefi. Te wi e go na a Memrefesa, dan wi e sori taki wi no frigiti. Wi e memre a tumusi moi kado di Gado gi wi.