TE WI dede, dan Gado sa wani gi wi wan opobaka?— A bun man Yob ben bribi taki na dati Gado wani. Sobun, di Yob ben denki taki a ben o dede, dan a taigi Gado: „Yu sa kari, èn misrefi sa piki yu.” Yob ben taki dati Yehovah Gado ben o angri, noso a ben o wani srefisrefi, fu gi en wan opobaka.​—Yob 14:14, 15.

Yesus de neleki Yehovah Gado, en Tata. Yesus wani yepi wi. Wan leisi, wan man di ben abi gwasi ben taigi en: „Efu yu wani nomo, yu kan meki mi kon krin.” Dan Yesus piki: „Mi wani.” Èn a dresi a gwasi fu a siki man.​—Markus 1:40-42.

Yesus lobi pikin-nengre. A ben leri dati fu en Tata. Wan langa ten pasa, Yehovah gebroiki den futuboi fu en na tu okasi fu gi yongu pikin wan opobaka. Elia ben begi Yehovah fu gi wan opobaka na a manpikin fu wan uma di ben sori switifasi gi en. Èn Yehovah du dati. Yehovah gebroiki sosrefi en futuboi Elisa fu gi wan pikin boi wan opobaka.​—1 Kownu 17:17-24; 2 Kownu 4:32-37.

 A no wan moi sani fu sabi taki Yehovah lobi wi so te?— A no e prakseri wi soso te wi de na libi. A e prakseri wi tu te wi dede. Yesus ben taki dati en Tata e si den sma di a lobi èn di dede, leki den de na libi! (Lukas 20:38) Bijbel e taki dati ’nowan dede noso libi, nowan sani di de dyaso noso sani di musu kon ete, sa man prati wi fu a lobi fu Gado’.​—Romesma 8:38, 39.

Di Yesus ben de na grontapu, dan a sori taki Yehovah e broko en ede nanga yongu pikin. Yu musu fu sabi ete taki Yesus ben teki ten fu taki nanga pikin-nengre fu Gado. Ma yu ben sabi taki Gado gi Yesus a makti fu meki yonguwan di dede kon na libi baka?— Meki wi taki fu a ten di Yesus ben gi wan opobaka na a umapikin fu wan man di ben nen Yairus. A meisje disi ben abi 12 yari.

Yairus e libi krosibei fu a Se fu Galilea, makandra nanga en wefi èn a wan-enkri pikin fu den. Wan dei, a yongu meisje e kon siki srefisrefi, èn Yairus sabi taki a o dede. Yairus e bigin prakseri Yesus. A yere fu na aparti man disi di kan meki sma kon betre baka. Fu dati ede Yairus e go suku en. A e feni Yesus na a syoro fu a Se fu Galilea, pe a e gi furu sma leri.

Yairus e waka pasa mindri den ipi sma èn a e fadon na den futu fu Yesus. A e taigi Yesus: ’Mi umapikin siki seryusu. Grantangi, yu kan kon yepi en? Mi e begi yu fu kon.’ Wantewante Yesus e gowe nanga Yairus. Den sma di kon fu si a Bigi Leriman e go tu. Ma baka di den waka wan pisi, dan wan tu man e komoto fu na oso fu Yairus, èn den e taigi en: „Yu umapikin dede! Fu san ede yu e trobi a Leriman ete?”

Yesus e yere te den man e taki a sani disi. A sabi fa Yairus e sari fu di a lasi en wan-enkri pikin. Fu dati ede a e taigi en: ’No frede. Na bribi yu musu abi nomo na ini Gado, èn sani sa waka  bun nanga yu umapikin.’ Den e tan waka teleki den doro na a oso fu Yairus. Mati fu a famiri ben e krei na ini na oso. Den e sari fu di a pikin mati fu den dede. Ma Yesus e taigi den: ’No krei moro. A yongu pikin no dede, ma a e sribi.’

Te Yesus e taki disi, dan den sma e bigin lafu, bika den sabi taki a meisje dede. We, fu san ede yu denki taki Yesus e taki dati a e sribi?— San yu denki a wani leri den sma?— A wani leri den taki dede kan de leki wan dipi sribi. A wani leri den taki neleki fa a makriki gi wi fu wiki wan sma di e sribi, na so a makriki gi en tu fu gi wan dedesma libi baka nanga yepi fu a krakti fu Gado.

Yesus e taigi ala sma fu komoto na ini na oso, boiti den apostel Petrus, Yakobus, Yohanes nanga a papa nanga mama fu a meisje. Dan, a e go na ini a kamra pe a yongu pikin de. A e hori en anu èn a e taki: ’Yongu meisje, opo!’ Èn wantewante a e opo èn a e bigin waka! En papa nanga mama e prisiri srefisrefi.​—Markus 5:21-24, 35-43; Lukas 8:40-42, 49-56.

Now, denki a sani disi pikinso. Efu Yesus ben kan gi a yongu  meisje dati wan opobaka, a kan du a srefi gi tra sma dan?— Yu denki a sa du dati trutru?— Iya, a sa du dati. Yesus srefi ben taki: ’A yuru e kon te ala den sma di de na ini den grebi èn di Gado e memre, o yere mi sten, èn den o kon na doro.’​—Yohanes 5:28, 29.

Yu denki taki Yesus wani gi dedesma wan opobaka?— Wan tra eksempre na ini Bijbel e yepi fu piki na aksi dati. Wan dei, wan sani e pasa krosibei fu a foto Nain, en a sani disi e sori wi fa Yesus e si sma di e sari fu di wan sma dede.

Wan uma de na mindri wan grupu fu sma di e komoto fu Nain fu go beri wan sma. Den e go beri en manpikin. Wan pisi ten na fesi, en masra dede, èn now en wan-enkri pikin dede. A e sari fu tru! Furu fu den sma fu Nain e waka baka a grupu di e tyari a dedeskin fu en manpikin go na dorosei fu a foto. Na uma e krei, èn den sma no man du noti fu trowstu en.

A dei disi, Yesus nanga den disipel fu en e kon na a foto Nain. Krosibei fu a portu fu a foto, den e miti a grupu sma di e go beri a manpikin fu na uma. Te Yesus e si na uma di e krei, dan a e firi sari gi en. A e naki en ati fu si taki na uma e sari so te. A wani yepi en.

Sobun, Yesus e taigi na uma wan sani. A e du dati na wan switi fasi, ma na wan krakti fasi sosrefi, so taki na uma e arki en. Yesus e taigi en: „No krei moro.” Den sani di Yesus e du èn e taki e meki taki ala sma e luku en fu si san o pasa. Te Yesus e waka go na a dedeskin, dan a musu de so taki den alamala e aksi densrefi san a o du. Yesus e gi a komando: „Yonkuman, mi e taigi yu: Opo!” Wantewante a e opo sidon! Èn a e bigin taki.​—Lukas 7:11-17.

Prakseri fa na uma ben musu firi! Fa yu ben o firi efu wan lobiwan fu yu di dede ben kisi wan opobaka?— A sani disi no e sori  taki Yesus lobi sma trutru èn taki a wani yepi den?— Prakseri nomo o moi a sa de na ini a nyun grontapu fu Gado te wi sa gi wan switikon na den sma di o kisi libi baka!​—2 Petrus 3:13; Openbaring 21:3, 4.

Na a ten dati, sonwan fu den sma di sa kisi wan opobaka sa de sma di wi ben sabi fosi, èn pikin-nengre sa de na den mindri tu. Wi sa sabi suma na den, neleki fa Yairus ben sabi en umapikin di Yesus gi en wan opobaka. Trawan fu den sa de sma di dede hondrohondro noso dusundusun yari pasa. Ma Gado no sa frigiti den soso fu di den ben libi wan langa ten pasa.

A no wan moi sani fu sabi taki Yehovah Gado nanga en Manpikin, Yesus, lobi wi so te?— Den wani taki wi musu libi, a no fu wan tu yari nomo, ma fu ala ten!