YU SABI wan sma di wani de a fosiwan ala ten?— Kande a e pusu wan trawan go na wan sei so taki a kan de a fosiwan na ini a lin. Yu si dati wan leisi?— A Bigi Leriman ben si taki srefi bigisma ben e pruberi fu go sidon na den moro prenspari presi. Èn a no ben feni a sani dati bun. Meki wi luku san ben pasa.

Bijbel e fruteri wi taki Yesus ben kisi wan kari fu go na wan bigi fesa di ben o hori na a oso fu wan Fariseiman. A Fariseiman disi ben de wan prenspari kerki fesiman. Di Yesus doro drape, dan a bigin luku fa den tra fisitiman di ben e kon na ini na oso, ben e teki den moro bun presi. Fu dati ede a fruteri den sma na a fesa wan tori. Yu wani yere en?—

 Yesus ben taki: ’Te wan sma kari yu kon na wan trowfesa, dan yu no musu teki a moro bun, noso a moro prenspari presi.’ Yu sabi fu san ede Yesus ben taki dati?— A ben tyari kon na krin taki kande wan moro prenspari sma kisi wan kari tu. We, soleki fa yu kan si na tapu a prenki, dan a sma di e hori a fesa e kon èn a e taki: ’Meki a man disi sidon dyaso, èn yu go sidon drape.’ Fa yu denki a fisitiman ben o firi dan?— A ben o firi syen bika ala den tra fisitiman ben o luku fa a ben e go sidon na a presi di no de so prenspari.

Yesus ben e sori taki a no fiti te wan sma wani a moro bun presi. Fu dati ede a taki: ’Te yu kisi wan kari fu go na wan trowfesa, dan go sidon na a moro lagi presi. Dan a sma di gi yu wan kari kan kon taigi yu: „Mati, go sidon na wan moro bun presi.” Te dati e pasa, dan yu o kisi grani na fesi ala den tra fisitiman di e si fa yu e go sidon na a moro bun presi.’​—Lukas 14:1, 7-11.

Yu frustan san Yesus ben wan leri wi nanga a tori disi?— Meki wi gebroiki wan eksempre fu si efu yu frustan en bun. Prakseri taki yu e go na ini wan bus di lai nanga sma. A bun te yu e lon go teki wan sidonpresi, aladi yu e meki wan moro owru sma tanapu?— Yesus ben o feni en bun efu yu ben du dati?—

Wan sma ben kan taki dati Yesus no e poti prakseri na san wi e du. Ma yu e bribi dati?— Di Yesus ben de na a bigi fesa na a oso fu a Fariseiman, dan a ben e luku sortu presi den sma ben e teki fu sidon. Yu no denki taki a e luku na a srefi fasi tu san wi e du na ini a ten disi?— Now di Yesus de na ini hemel, a no de fu taki dati a man luku heri bun san wi e du.

Te wan sma e pruberi fu de a fosiwan, dan dati kan tyari problema  kon. Furu tron sma e bigin meki trobi nanga makandra, èn den e kisi atibron. Son leisi disi e pasa te pikin-nengre e go na wan presi nanga bus. A momenti te a doro fu a bus e opo, dan den pikin e lon fu man de a fosiwan na ini a bus. Den wani den moro bun sidonpresi, den wan na den fensre. Ma san kan pasa dan?— Iya, den kan atibron nanga makandra.

Te yu wani fu de a fosiwan, dan dati kan tyari furu problema kon. A sani disi tyari problema kon srefi na mindri den apostel fu Yesus. Soleki fa wi leri na ini kapitel 6 fu a buku disi, den ben e haritaki nanga makandra suma ben de a moro bigiwan. San Yesus ben du dan?— Iya, a taigi den taki den no musu du dati. Ma bakaten den ben meki trobi baka. Meki wi si fa a trobi bigin.

Den apostel nanga tra sma e teki waka nanga Yesus go na a foto Yerusalem fu a lasti leisi. Yesus  e taki nanga den fu en Kownukondre, èn fu dati ede Yakobus nanga Yohanes e prakseri fu tiri leki kownu makandra nanga en. Srefi den mama, Salome, den fruteri fu a tori disi (Mateyus 27:56; Markus 15:40). Sobun, te den de na pasi fu go na Yerusalem, dan Salome e kon na Yesus, a e boigi gi en, èn a e aksi en fu du en wan bun.

Yesus e aksi en: „San yu wani?” A e piki taki a ben wani taki Yesus meki den manpikin fu en sidon leti na en sei na ini a Kownukondre. Iya, wan fu den ben musu sidon na en reti-anusei, èn a trawan na en kruktu-anusei. We, fa yu denki den tra tin apostel ben feni en di den kon sabi san Yakobus nanga Yohanes ben meki a mama fu den aksi Yesus?—

Iya, den e atibron trutru nanga Yakobus nanga Yohanes. Fu dati ede, Yesus e gi ala den apostel fu en bun rai. Yesus e taigi den taki den  tiriman fu den kondre lobi fu abi makti èn fu de prenspari. Den wani abi wan hei posisi so taki ala sma kan gi yesi na den. Ma Yesus e taigi den bakaman fu en taki den no musu de leki den sma dati. Na presi fu dati, Yesus e taki: „A sma di wani de a fosiwan na un mindri, musu de un srafu.” Denki a sani dati!​—Mateyus 20:20-28.

Yu sabi san wan srafu e du?— A e dini tra sma, sondro fu fruwakti taki trawan musu dini en. A no e teki a fosi presi, ma a moro lagi presi. A no e tyari ensrefi leki a moro prenspari sma, ma leki a sma di no prenspari srefisrefi. Èn memre taki Yesus ben taki dati a sma di wani de a fosiwan musu tyari ensrefi leki wan srafu gi trawan.

We, san yu denki disi wani taki gi wi?— Wan srafu ben o haritaki nanga en masra suma o sidon na a moro bun presi? Noso, a ben o haritaki nanga en masra suma o nyan fosi? San yu denki?— Yesus ben taki dati ala ten wan srafu e si en masra leki wan sma di prenspari moro en.​—Lukas 17:7-10.

Sobun, na presi taki wi e pruberi fu de a fosiwan, dan san wi musu du?— Iya, wi musu de leki wan srafu gi trawan. Èn dati wani taki dati wi musu si trawan leki den prenspari moro wi. Yu sabi wan tu fasi fa yu kan sori taki yu e si trawan leki den prenspari moro yu?— Kande yu kan go baka na bladzijde 40 nanga 41 fu luku wan tu fu den fasi fa yu kan sori taki yu e si trawan leki den prenspari moro yu. Iya, drape yu sa si na sortu fasi yu kan dini trawan.

Yu sa memre taki a Bigi Leriman ben e dini trawan fu sori taki a ben si den leki sma di prenspari moro en. A lasti neti di a ben de nanga den apostel fu en, a saka kindi srefi èn a wasi den futu fu den. Efu wi e dini trawan fu sori taki wi e si den leki sma di prenspari moro wi, dan wi sa gi a Bigi Leriman prisiri, èn sosrefi en Tata, Yehovah Gado.