Iseibel yere san pasa nanga den profeiti fu Bâal èn dati meki a kisi bigi atibron. A seni a boskopu disi gi Elia: ’Tamara yu o dede neleki den profeiti fu Bâal.’ Elia ben kon frede srefisrefi. Dati meki a lon go kibri na ini a sabana. A begi: ’Yehovah, mi no man moro. Meki mi dede.’ Fu di Elia ben weri, meki a fadon na sribi na ondro wan bon.

Wan engel wiki Elia èn nanga wan safri sten a taki: ’Opo, nyan wan sani.’ Elia si wan lontu brede na tapu faya ston nanga wan kan watra. A nyan èn a dringi, dan a go sribi baka. Na engel wiki en ete wan leisi èn a taki: ’Nyan wan sani, noso yu no o man waka a pasi.’ Dati meki Elia nyan moro. Baka dati a waka 40 dei nanga 40 neti teleki a doro Horeb-bergi. Drape Elia go sribi na ini wan bergi-olo. Ma Yehovah taki nanga en. A taki: ’San yu e du dyaso Elia?’ Elia piki en: ’Den Israelsma no du san den pramisi yu. Den pori na altari fu yu èn den kiri den profeiti fu yu. Now den wani kiri mi tu.’

Yehovah taigi en: ’Go tanapu na tapu a bergi.’ Wan tranga winti wai pasa a bergi-olo. Dan wan gronseki kon, èn baka dati wan faya. Te fu kaba Elia yere wan safri sten. Elia tapu en fesi nanga en dyakti, dan a go tanapu na dorosei fu a bergi-olo. Yehovah aksi en fu san ede a lowe gowe. Elia taki: ’Mi wawan tan abra.’ Ma Yehovah taigi en: ’A no yu wawan tan abra. Na ini Israel, 7000 sma de di e anbegi mi ete. Drai go baka èn go salfu Elisa fu tron profeiti na presi fu yu.’ Wantewante Elia go du san Yehovah taigi en. Yu denki taki Yehovah o yepi yu tu te yu e du san a taki? Iya, a o yepi yu. Meki wi go baka na a ten fu a dreiten. Wi o taki fu wan sani di ben pasa na a ten dati.