KAPITEL 9
„Gado no lobi a wan sma moro a trawan”
Den Kresten bigin preiki gi sma di no ben de Dyu èn di no ben besnèi
A pisi disi abi fu du nanga Tori fu den apostel 10:1–11:30
1-3. Sortu fisyun Petrus kisi èn fu san ede wi musu kon ferstan san a wani taki?
A DE a yari 36. Petrus de na tapu a plata dak fu wan oso di de krosbei fu se na ini a foto Yope di abi wan bigi lanpe. A e begi èn a e firi a waran fu a son di e skèin na en tapu. A e tan wan tu dei kba leki fisitiman na ini na oso dati. Petrus ben de klarklari fu tan drape èn disi e sori taki a no e desko tra sma. Fa so? A man di abi na oso nen Simon èn a e gebroiki metibuba fu meki leri. A no ala Dyu ben o wani tan na ini na oso fu wan man di e du a sortu wroko dati. a Ma tòg Petrus o leri wan prenspari sani, fu di a o si taki Yehovah no lobi a wan sma moro a trawan.
2 Petrus e begi ete te a e kisi wan fisyun. Den sani di a e si na ini a fisyun ben o skreki iniwan Dyu. Wan sani di gersi wan bigi duku e saka kmoto na hemel èn a duku disi abi meti na ini di no krin soleki fa a Wet e sori. Te wan sten e taigi Petrus fu srakti den meti èn fu nyan den, dan Petrus e piki: „Noiti mi nyan wan sani di no krin èn di no santa.” A no wán leisi nomo, ma na dri leisi a sten e taigi en: „Yu no musu taki moro taki a sani dati no krin” (Tori 10:14-16). A fisyun disi bruya Petrus, ma dyonsro a o ferstan en.
3 San a fisyun di Petrus kisi ben wani taki? A de prenspari taki wi e kon sabi san a wani taki, bika a fisyun disi e yepi wi fu kon ferstan krin fa Yehovah e si sma. Wi leki tru Kresten no o man preiki finfini fu Gado Kownukondre efu wi no e leri fu si sma soleki fa Gado e si den. Efu wi wani kon sabi san a fisyun di Petrus kisi wani taki, dan meki wi poti prakseri na den span sani di psa na a ten dati.
„A ben abi a gwenti fu begi Gado” (Tori fu den apostel 10:1-8)
4, 5. Suma ben de Kornelius èn san ben psa di a ben e begi?
4 Petrus no ben sabi taki a dei na fesi, wan man na ini a foto Sesareya di ben de sowan 50 kilometer go na noordsei, ben kisi wan fisyun tu fu Gado. A man disi di nen Kornelius ben de wan ofsiri na ini a legre fu Rome èn a ben „abi wan tranga bribi na ini Gado”. b Leki osofamiri-edeman, a ben de wan bun eksempre di ben lobi en osofamiri èn „en nanga ala den sma na ini en oso ben e anbegi Gado”. Kornelius no ben de wan Dyu, a no ben teki a Dyu bribi èn a no ben besnèi. Ma tòg a ben e sori sar’ati gi Dyu di ben pôti èn a ben e yepi den. A ret’ati man disi „ben abi a gwenti fu begi Gado”.—Tori 10:2.
5 Na a ten fu dri yuru bakadina, Kornelius ben e begi di a kisi wan fisyun. Na ini a fisyun dati, wan engel taigi en: „Gado yere den begi fu yu èn a si fa yu e du bun gi den pôtisma” (Tori 10:4). Soleki fa na engel ben taigi en fu du, Kornelius seni sma fu go kari na apostel Petrus. Leki wan sma di no ben de wan Dyu èn di no ben besnèi, Kornelius ben o kisi wan okasi di fosi a no ben abi. A ben o yere a bun nyunsu di e meki sma kisi ferlusu.
6, 7. (a) Ferteri wan ondrofenitori di e sori taki Gado e piki den begi fu ret’ati sma di wani kon sabi en trutru. (b) San den ondrofenitori disi e sori wi?
6 A de so taki Gado e piki den begi fu ret‘ati sma na ini a ten disi te den wani kon sabi en trutru? Luku wan ondrofenitori. Wan uma na ini Albania ben teki wan Waktitoren di ben abi wan artikel na ini di ben e taki fu a fasi fa sma musu kweki pkin. c A taigi a Kotoigi di ben kon na a doro fu en: „Yu sabi taki na begi mi ben e begi Gado fu yepi mi fu kweki den umapkin fu mi? Na en seni yu kon! Yu gi mi soifri san mi ben abi fanowdu!” Na uma nanga den umapkin fu en bigin studeri èn bakaten a masra fu en bigin studeri tu.
7 A sani disi psa wán leisi nomo? Nôno, kwetkweti. Den sortu ondrofenitori disi psa someni leisi na difrenti presi fu grontapu. A psa so furu, taki wi no man taki dati Gado no ben abi noti fu du nanga den. San disi e sori dan? We, na a fosi presi, Yehovah e piki den begi fu ret’ati sma di wani kon sabi en (1 Kow. 8:41-43; Ps. 65:2). A di fu tu sani, na taki den engel e horbaka gi wi na ini a preikiwroko.—Openb. 14:6, 7.
„Petrus ben e broko en ede” (Tori fu den apostel 10:9-23a)
8, 9. San a yeye meki Petrus kon sabi èn san Petrus du?
8 Petrus ben de na tapu a dak ete èn a „ben e broko en ede” fu sabi san a fisyun ben wani taki, di den boskopuman fu Kornelius kon na a oso (Tori 10:17). Petrus ben o de klarklari fu go nanga den boskopuman disi na ini na oso fu wan sma di no ben de wan Dyu? Wi sabi ete taki Petrus ben taki dri leisi taki a no ben o nyan sani di no ben krin, soleki fa a Wet e sori. Ma nanga yepi fu santa yeye, Gado meki Petrus kon sabi san a ben musu du. Wan sten taigi Petrus: „Luku, dri man e aksi fu yu. Opo, dan yu go na gron. Yu no abi fu tweifri fu go nanga den, bika na mi seni den kon” (Tori 10:19, 20). A no de fu taki dati a fisyun di Petrus kisi fu a sani di gersi wan bigi duku, sreka en fu teki a tiri fu a santa yeye.
9 Di Petrus kon sabi taki Gado ben taigi Kornelius fu seni kari en, dan Petrus meki den boskopuman di no ben de Dyu kon na ini en oso „èn a meki den tan drape” (Tori 10:23a). Na apostel di ben du san Gado taigi en, ben e bigin denki tra fasi kba fu sani, di a ben e kon si moro krin san na a wani fu Gado.
10. Fa Yehovah e tiri a pipel fu en èn sortu sani wi musu aksi wisrefi?
10 Te na a dei fu tide, Yehovah e tyari sani kon na krin saf’safri gi a pipel fu en (Odo 4:18). A e gebroiki a santa yeye fu en fu tiri „a koni srafu di de fu frutrow” (Mat. 24:45). Son leisi wi e leri sani di e yepi wi fu kon ferstan Gado Wortu moro bun, noso kenki e kon na ini a fasi fa sani seti na ini na organisâsi. A bun te wi e aksi wisrefi: ’San mi e du te den kenki disi e kon? Mi e teki a tiri fu Gado en santa yeye te a abi fu du nanga den tori disi?’
Petrus „taigi den fu dopu” (Tori fu den apostel 10:23b-48)
11, 12. San Petrus du di a doro na ini Sesareya èn sortu sani a leri?
11 A dei baka di Petrus kisi a fisyun fu en, dan en nanga neigi trawan (den dri boskopuman di Kornelius ben seni kon nanga „siksi [Dyu] brada” fu Yope), hari go na Sesareya (Tori 11:12). Fu di Kornelius ben ferwakti Petrus, meki a kari „den famiriman nanga den bun mati fu en” kon na wán. Soleki fa a sori, dan nowan fu den sma disi ben de Dyu (Tori 10:24). Di Petrus doro drape, dan a du wan sani di noiti a ben prakseri taki a ben o du. A go na ini na oso fu wan sma di no ben de wan Dyu èn di no ben besnèi! Petrus ferklari: „Unu sabi heri bun taki wan Dyu no mag moksi nanga wan sma di no de wan Dyu èn taki a no mag go na a oso fu den. Ma tòg Gado sori mi taki mi no musu taki fu nowan sma taki a no krin noso taki a no santa” (Tori 10:28). Na a ten dati, Petrus ben kon si kba taki a fisyun di a ben kisi no ben o leri nomo sortu n’nyan wan sma mag nyan, ma a fisyun ben o leri en tu fu no „taki fu nowan sma [srefi fu wan sma di no ben de wan Dyu] taki a no krin noso taki a no santa”.
„Kornelius ben wakti den kba èn a ben kari den famiriman nanga den bun mati fu en kon.”—Tori fu den apostel 10:24
12 Den sma di ben e wakti Petrus ben de klarklari fu arki san a ben abi fu taki. Kornelius taigi en: „We, now wi alamala de na fesi Gado fu yere ala den sani di Yehovah taigi yu fu taki” (Tori 10:33). Prakseri fa yu ben o firi te wan sma di wani kon sabi Yehovah, ben o taigi yu a sani dati! Petrus bigin nanga den krakti wortu disi: „Now mi e ferstan trutru taki Gado no lobi a wan sma moro a trawan. Awansi fu sortu kondre wan sma de, Gado o feni en bun efu a e lespeki Gado èn a e du san reti” (Tori 10:34, 35). Petrus ben leri taki a fasi fa Gado e si sma, no abi noti fu du nanga a ras fu den, a kondre fu den, noso nanga a fasi fa den ben de. Baka dati, Petrus go doro fu taki fu Yesus en diniwroko, en dede nanga en opobaka.
13, 14. (a) Fu san ede a ben de so prenspari taki Kornelius nanga tra sma di no ben de Dyu teki a Kresten bribi na ini a yari 36? (b) Fu san ede wi no musu krutu sma fu a fasi fa den tan?
13 Baka dati, wan sani psa di den no ben ferwakti: „Petrus ben e taki ete”, di a santa yeye kon na tapu ’den sma disi di no de Dyu’ (Tori 10:44, 45). Disi na a wan-enkri leisi di Bijbel e taki dati a santa yeye kon na tapu sma fosi den teki dopu. Petrus ben si taki Gado ben feni den sma disi bun èn fu dati ede a „taigi den [a grupu dati fu sma di no ben de Dyu] fu dopu” (Tori 10:48). Di den sma disi teki a Kresten bribi na ini a yari 36, dan dati ben e sori taki wan kba ben kon na a ten di den Dyu ben kisi spesrutu grani (Dan. 9:24-27). Petrus ben teki fesi na a okasi dati èn a gebroiki a di fu dri ’sroto fu a Kownukondre’ di de a lasti sroto (Mat. 16:19). A sroto disi opo na okasi gi sma di no ben de Dyu èn di no ben besnèi, fu tron salfu Kresten.
14 Wi leki Kownukondre preikiman na ini a ten disi, sabi taki „Gado no lobi a wan sma moro a trawan” (Rom. 2:11). Gado wani taki „ala sortu sma musu kisi frulusu” (1 Tim. 2:4). Dati meki noiti wi no musu krutu sma, awansi fa den tan. A wroko di wi kisi fu du, na fu preiki finfini fu Gado Kownukondre. Dati wani taki dati wi musu preiki gi ala sma, awansi fu sortu ras den de, awansi fu sortu kondre den de, awansi fa den de, noso awansi sortu bribi den abi.
’Den no krutu nanga Petrus moro, ma den gi Gado glori’ (Tori fu den apostel 11:1-18)
15, 16. Fu san ede son Dyu Kresten meki trobi nanga Petrus èn fa a ben meki den brada kon ferstan den sani di a du?
15 A no de fu taki dati Petrus ben de fayafaya fu ferteri den tra brada san ben psa èn fu dati ede a go na Yerusalem. Soleki fa a sori, dan den Kresten drape ben yere kba taki sma di no ben de Dyu èn di no ben besnèi „bigin bribi a wortu fu Gado”. Syatu baka di Petrus doro drape, „den sma di ben feni taki sma musu besnèi, bigin krutu nanga en”. Den no ben feni en bun taki Petrus go „na ini na oso fu sma di no besnèi èn nyan nanga den” (Tori 11:1-3). Te yu luku en bun, dan a no ben de wan problema gi den taki sma di no ben de Dyu tron bakaman fu Krestes. Ma den Dyu disipel disi ben wani nomonomo taki sma di no de Dyu ben musu hori a Wet fu man anbegi Yehovah na a yoisti fasi. Iya, den ben wani taki den sma dati ben musu besnèi tu. A de krin taki son Dyu disipel ben feni en muilek fu lusu a Wet di Gado gi Moses.
16 Fa Petrus meki den brada kon ferstan den sani di a du? Soleki fa Tori fu den apostel 11:4-16 e sori, dan a ben taki fu fo sani di ben e sori taki Gado ben e tiri a wroko: (1) a fisyun di a ben kisi fu Gado (vers 4-10); (2) a sani di a santa yeye ben taigi en fu du (vers 11, 12); (3) na engel di ben go na Kornelius (vers 13, 14); (4) a santa yeye di ben kon na tapu den sma di no ben de Dyu (vers 15, 16). Te fu kba Petrus poti a tumsi prenspari aksi disi: „Fu dati ede, efu Gado gi den [sma di no ben de Dyu èn di ben teki a Kresten bribi] a srefi kado [a santa yeye] di a gi wi [den Dyu] di e bribi na ini Masra Yesus Krestes, dan suma na mi taki mi ben kan tapu Gado fu du dati?”—Tori 11:17.
17, 18. (a) Sortu besroiti den Dyu Kresten ben musu teki di Petrus taki nanga den? (b) Fu san ede a no makelek fu meki a gemeente tan abi wánfasi èn sortu sani wi musu aksi wisrefi?
17 Den sani di Petrus taki ben meki den Dyu Kresten dati kon ferstan taki den ben musu teki wan prenspari besroiti. Den ben o man libi a fasi fa den ben krutu sma fosi? Den ben o man teki den sma disi di no ben dopu so langa ete, leki den Kresten brada nanga s’sa, aladi den no ben de Dyu? Bijbel e taki: „Di den [den apostel nanga tra Dyu Kresten] yere den sani disi, den no krutu nanga Petrus moro. Den gi Gado glori èn den taki: ’We, dan Gado gi den sma di no de Dyu na okasi tu fu abi berow, so taki den kan kisi libi’” (Tori 11:18). Fu di den ben abi a bun denki dati, meki a gemeente ben kan tan abi wánfasi.
18 Na ini a ten disi, a no makelek ala ten fu meki a gemeente tan abi wánfasi, fu di tru anbegiman „komoto fu ala kondre, lo, pipel, nanga tongo” (Openb. 7:9). Sobun, wi e si taki na ini furu gemeente yu abi sma fu difrenti ras nanga kulturu èn yu abi sma tu di kweki na difrenti fasi. A bun te wi e aksi wisrefi: ’Mi libi a fasi fa mi ben krutu sma fosi? A grontapu disi e tyari prati kon fu di sma feni taki a kondre, a lo, a kulturu noso a ras fu den moro prenspari leki a di fu trawan. Mi abi a fasti besroiti fu no meki a denki disi abi krakti na tapu a fasi fa mi e libi nanga mi Kresten brada nanga s’sa?’ Prakseri san psa nanga Petrus (Seifas) wan tu yari baka di den fosi sma di no ben de Dyu teki dopu. Petrus ben teki a denki abra fu den sma di ben e krutu trawan èn fu dati ede ’a no ben nyan moro nanga den Kresten di no ben de Dyu èn a no ben e bumui nanga den srefi’. Dati meki Paulus ben abi fu pir’ai gi en (Gal. 2:11-14). Meki wi luku bun taki wi no e krutu trawan noiti.
„Furu sma ben teki a bribi” (Tori fu den apostel 11:19-26a)
19. Gi suma den Dyu Kresten na ini Antiokia bigin preiki èn san ben de a bakapisi?
19 A de so taki den bakaman fu Yesus bigin preiki gi sma di no ben de Dyu èn di no ben besnèi? Luku san psa bakaten na ini Antiokia na ini Siria. d Aladi furu Dyu ben e libi na ini a foto disi, tòg furu problema no ben de na mindri den nanga den sma di no ben de Dyu. Fu dati ede Antiokia ben de wan presi pe a ben o makelek fu preiki gi sma di no ben de Dyu. Na drape wan tu Dyu disipel bigin preiki a bun nyunsu gi „den sma di ben e taki Grikitongo” (Tori 11:20). Den no ben e preiki w’wan gi Dyu di ben e taki Grikitongo, ma den ben e preiki tu gi sma di no ben de Dyu èn di no ben besnèi. Yehovah blesi a wroko èn „furu sma ben teki a bribi”.—Tori 11:21.
20, 21. Fa Barnabas sori sakafasi èn fa wi kan sori sakafasi neleki en te wi e du a preikiwroko fu wi?
20 Fu man preiki gi den sma di ben de klarklari fu arki a bun nyunsu, dan a gemeente na ini Yerusalem seni Barnabas go na Antiokia. Soleki fa a sori, dan someni sma teki a bun nyunsu, taki en w’wan no ben man du a wroko. A moro bun sma di ben kan yepi en fu du a wroko disi, ben de Saulus, di ben o tron na apostel gi den trakondre sma (Tori 9:15; Rom. 1:5). A de so taki Barnabas ben o si Saulus leki wan sma di ben o gens en? Nôno, na presi fu dati Barnabas sori sakafasi. Na ensrefi teki a besroiti fu go na Tarsus fu go suku Saulus èn fu tyari en kon baka na Antiokia fu yepi en nanga a wroko. Den tan wán yari na ini Antiokia fu gi den disipel na ini a gemeente drape dek’ati.—Tori 11:22-26a.
21 Fa wi kan sori sakafasi te wi e du a preikiwroko fu wi? Te wi abi sakafasi, dan wi o hori na prakseri san wi man du èn san wi no man du. Wi alamala abi difrenti sani di wi man du bun èn wi alamala abi difrenti koni. Fu eksempre, son sma sabi fa fu preiki oso fu oso noso na ibri okasi, ma den feni en muilek fu tyari gobaka, noso fu bigin Bijbelstudie. Efu yu wani leri fu du wan sani moro bun na ini a preikiwroko, dan fu san ede yu no e aksi wan sma fu yepi yu? Te yu e du dati, dan yu kan abi moro bun bakapisi èn yu kan abi moro prisiri na ini a preikiwroko.—1 Kor. 9:26.
Den ’seni san den man fu yepi den brada’ (Tori fu den apostel 11:26b-30)
22, 23. Fa den brada na Antiokia sori lobi gi makandra èn fa a pipel fu Gado na ini a ten disi e du a srefi?
22 A fosi leisi di „Gado meki sma kari den disipel Kresten”, ben de na ini Antiokia (Tori 11:26b). A nen dati di Gado ben feni bun, ben sori krin suma na den bakaman fu Krestes. A de so taki Dyu bribiman nanga bribiman di no ben de Dyu ben kon de wán di trakondre sma tron Kresten? Luku san psa di wan bigi angriten kon na a ten fu a yari 46. e Na ini owruten, pôti sma ben e pina sref’srefi te angriten ben de, fu di den no ben abi nofo moni noso n’nyan. Di a bigi angriten disi kon, furu fu den Dyu Kresten di ben e libi na ini Yudea ben pôti. Den ben abi n’nyan nanga tra sani fanowdu. Di den brada na Antiokia kon sabi taki den ben de na nowtu, dan den seni „san den man, fu yepi den brada di ben e tan na Yudea”. Sonwan fu den Kresten brada na Antiokia, no ben de Dyu (Tori 11:29). A sani disi e sori krin taki den brada nanga s’sa ben lobi makandra trutru!
23 Na so a pipel fu Gado e du tu na ini a ten disi. Te wi yere taki wi brada nanga s’sa na ini wan tra kondre noso na ini wi eigi kontren de na nowtu, dan wi de klarklari fu yepi den. Wantewante difrenti Rampu Komte e seti sani fu yepi brada nanga s’sa di kisi fu du nanga rampu soleki bigi ogri winti, gronseki, nanga tsunami. Ala den sani disi e sori taki wi de wán trutru.—Yoh. 13:34, 35; 1 Yoh. 3:17.
24. Fa wi kan sori taki wi e ferstan san a fisyun wani taki di Petrus ben kisi?
24 Wi leki tru Kresten e ferstan san a fisyun wani taki di Petrus kisi di a ben de na tapu a dak fu wan oso na ini Yope, na ini a ten fu den yari 100. Wi e dini wan Gado di no lobi a wan sma moro a trawan. Gado wani taki wi e preiki finfini fu a Kownukondre fu en. Disi wani taki dati wi e preiki gi tra sma awansi fu sortu ras noso kondre den de, noso awansi den gudu noso pôti. Fu dati ede wi musu abi a fasti besroiti fu gi ala sma di wani arki, na okasi fu yere a bun nyunsu.—Rom. 10:11-13.
Te den brada nanga s’sa fu wi de na nowtu, dan wi de klarklari fu yepi den
a Son Dyu ben e wis’wasi den sma di ben e meki leri, fu di so wan sma ben musu fasi a buba nanga a dedeskin fu meti èn a ben musu wroko tu nanga wrokosani di den Dyu ben e si leki tegu sani. Den Dyu ben feni taki sma di ben e meki leri no ben de krin fu go na ini a tempel èn a wrokopresi fu den ben musu de moro leki 22 meter dorosei fu wan foto. A sani disi e yepi wi fu kon ferstan pkinso fu san ede na oso fu Simon ben de „krosbei fu a se”.—Tori 10:6.
b Luku a faki di nen „ Kornelius nanga a legre fu Rome”.
c Na artikel di nen „Bun rai fu kweki pikin”, kon na doro na ini A Waktitoren fu 1 november 2006, bladzijde 4-7.
d Luku a faki di nen „ Antiokia na ini Siria”.
e A Dyu historia skrifiman Josephus e taki fu a „bigi angriten” disi di ben de na a ten di Grankownu Klawdiyus ben e tiri (na ini den yari 41-54).
