KAPITEL 10
„A wortu fu Yehovah ben e panya na ala sei”
Petrus e kisi ferlusu èn nowan ogri di sma e du nanga den Kresten no man tapu a bun nyunsu fu panya go na ala sei
A pisi disi abi fu du nanga Tori fu den apostel 12:1-25
1-4. Na ini sortu muilek situwâsi Petrus de èn fa yu ben o firi efu yu ben o de na ini en presi?
BRAM! Nanga a bigi babari disi a bigi isri portu e naki tapu na baka Petrus. A tai nanga keti na mindri tu srudati fu Rome èn den e tyari en go na en cel. A e sdon wakti omeni yuru langa, iya, omeni dei kande, fu kon sabi san den o du nanga en. A no e si nowan tra sani boiti den skotu fu a cel, den isri stanga, den keti fu en nanga den srudati di e hori wakti drape.
2 A nyunsu di Petrus e kisi fu yere no bun srefsrefi. Kownu Herodes Agrepa I poti na en ede fu kiri en. a Fu taki en leti, baka a Paskafesa a o tyari Petrus kon na fesi a pipel fu gi en dedestrafu. Disi o de leki wan kado fu plisi den. A no skreki Herodes wani tapu skreki gi Petrus, ma a wani kiri en trutru. A srefi tiriman disi ben kiri Yakobus, wan fu den tra apostel, kba.
3 A de a neti fosi den o kiri Petrus. San a e denki na ini a dungru cel fu en? Kande a e memre ete taki wan tu yari na fesi Yesus ben taki dati wan dei ben o kon taki sma ben o tai en èn taki den ben o tyari en go kiri, aladi a no ben o wani (Yoh. 21:18, 19). Kande Petrus e aksi ensrefi efu a ten dati doro now.
4 Fa yu ben o firi efu yu ben de na ini a srefi situwâsi leki Petrus? Furu sma ben o frede èn den ben o denki taki howpu no de moro gi den. Ma wan trutru bakaman fu Yesus Krestes kan kon de na ini wan situwâsi pe howpu no de moro gi en? San wi kan leri fu a fasi fa Petrus nanga den tra Kresten brada fu en tyari densrefi di sma ferfolgu den? Kow go luku.
A gemeente „ben e begi Gado fayafaya” (Tori fu den apostel 12:1-5)
5, 6. (a) Fu san ede Kownu Herodes Agrepa I du ogri nanga a Kresten gemeente èn fa a du dati? (b) Fu san ede a dede fu Yakobus ben de wan bigi tesi gi a gemeente?
5 Soleki fa wi leri na ini kapitel neigi fu a buku disi, dan di Kornelius di no ben de wan Dyu teki a Kresten bribi makandra nanga en famiri, dan dati ben de wan span ten gi a Kresten gemeente. Ma a musu fu de so taki di den Dyu di no ben de Kresten, si taki furu Dyu Kresten ben e anbegi Gado makandra nanga sma di no ben de Dyu èn taki den ben e du dati sondro fu syen, dan den skreki srefsrefi.
6 Herodes, wan politiekman di ben lai triki, ben si na okasi disi leki wan fasi fu suku wan bun na den Dyu. Sobun, a bigin du wan lo ogri nanga den Kresten. A kan taki a ben yere taki spesrutu na apostel Yakobus ben de wan heri bun mati fu Yesus Krestes. Dati meki Herodes „meki sma kiri Yakobus, a brada fu Yohanes, nanga fet’owru” (Tori 12:2). A sani disi ben de wan bigi tesi gi a gemeente. Yakobus ben de wan fu den dri apostel di ben si nanga en eigi ai fa Yesus ben kenki kon tron wan heri tra fasi èn a si tra wondru tu di den tra apostel no ben si (Mat. 17:1, 2; Mark. 5:37-42). Yesus ben kari Yakobus nanga en brada Yohanes „Manpikin fu Dondru” fu di den ben de fayafaya srefsrefi (Mark. 3:17). Sobun, a gemeente lasi wan dek’ati apostel di ben de wan ret’ati kotoigi èn di ala sma ben lobi.
7, 8. San a gemeente du di sma poti Petrus na straf’oso?
7 Soleki fa Agrepa ben howpu, dan den Dyu ben e prisiri di a kiri Yakobus. A sani disi gi en dek’ati fu go suku Petrus now. Soleki fa wi ben taki na a bigin fu a kapitel, dan a meki sma grabu Petrus èn a sroto en. Ma a kan taki Agrepa ben e memre ete taki den apostel ben kmoto wan leisi kba na straf’oso na wan wondru fasi, soleki fa skrifi na ini kapitel 5 fu a buku disi. Sobun, a ben wani de seiker taki Petrus no ben man lowe. Dati meki a meki den keti na apostel disi na mindri tu waktiman èn fo grupu fu fo srudati ben e hori wakti drape dei nanga neti. Efu Petrus ben o lowe, dan den srudati ben o kisi a dedestrafu di en ben o kisi. San den Kresten brada nanga s’sa fu Petrus ben kan du na ini a muilek pisi ten dati?
8 A gemeente ben sabi heri bun san fu du. Tori fu den apostel 12:5 e taki: „Fu dati ede, den hori Petrus na straf’oso. Ma a gemeente ben e begi Gado fayafaya gi en.” Iya, di den begi gi a lobi brada fu den, dan den du dati fayafaya èn nanga den heri ati. A dede fu Yakobus no meki den las’ati èn a no gi den a firi taki Gado no wani arki den begi fu den. Yehovah lobi en srefsrefi te sma e taki nanga en na ini begi. Efu den begi dati e kruderi nanga a wani fu en, dan a o piki den (Hebr. 13:18, 19; Yak. 5:16). Disi na wan prenspari sani di Kresten na ini a ten disi musu hori na prakseri.
9. San wi kan leri fu na eksempre di den Kresten brada nanga s’sa fu Petrus gi te a abi fu du nanga begi?
9 Yu sabi Kresten brada nanga s’sa di e kisi furu tesi? Kande sma e ferfolgu den, noso den de na ini wan kondre pe lanti tapu a preikiwroko fu den, noso kande den e kisi fu du nanga rampu. Fu san ede yu no e begi fayafaya gi den? Kande yu sabi brada nanga s’sa tu di e kisi tesi di furu sma no sabi. Iya, kande den e kisi fu du nanga famiri problema, kande den las’ati noso wan tra sani de di e tesi a bribi fu den. Efu yu prakseri bun fosi yu begi, dan kande yu kan kari wan tu sma nen te yu e taki nanga Yehovah, „a sma di e arki begi” (Ps. 65:2). Iya, te yu e kisi fu du nanga problema, dan yu ben o wani taki den brada nanga s’sa fu yu du a srefi gi yu, a no so?
Wi e begi gi den brada nanga s’sa fu wi di de na straf’oso fu a bribi fu den ede
„Tan waka na mi baka” (Tori fu den apostel 12:6-11)
10, 11. Ferteri fa na engel fu Yehovah ferlusu Petrus fu straf’oso.
10 Petrus ben e broko en ede nanga a sani di Herodes ben wani du nanga en? Wi no man taki seiker, ma na a lasti neti dati na straf’oso a ben e sribi dipi na mindri den tu waktiman di ben de na ai. A no de fu taki dati a man disi di ben abi wan tranga bribi ben sabi taki Yehovah ben o yepi en awansi san ben o psa (Rom. 14:7, 8). Awansi fa a no fa, Petrus no ben ferwakti den kfalek sani di ben de fu psa. Wantronso wan faya skèin na ini a heri cel fu en. Wan engel ben tnapu drape èn soleki fa a sori dan den waktiman no si en. Na engel naknaki Petrus na en seibere fu wiki en èn den keti di ben tai na en anu, keti di ben gersi leki den no ben o man broko noiti, fadon kmoto na en anu sondro taki a du wan sani.
„Den doro na a isri portu fu a straf’oso pe den ben kan go na ini a foto. A portu disi opo fu ensrefi.”—Tori fu den apostel 12:10
11 Na engel taigi Petrus sondro draidrai: „Opo es’esi! . . . Weri yu krosi nanga yu susu. . . . Weri yu dyakti.” Wantewante Petrus du san na engel taigi en. Te fu kba na engel taigi en: „Tan waka na mi baka”, èn na dati Petrus du. Den kmoto na a cel èn den psa den srudati di ben hori wakti na dorosei. Sondro fu meki wan babari den waka go na a bigi isri portu. Fa den ben o psa a bigi portu dati? Efu Petrus ben aksi ensrefi a sani dati, dan a no ben abi fu denki langa. Di den doro a portu, dan a portu „opo fu ensrefi”. Fosi Petrus ben man ferstan san psa, den psa a portu go na strati èn na engel no ben de fu si moro. Petrus ben de en w’wan na strati èn now a kon ferstan taki a sani disi psa trutru. A no ben de wan fisyun. A ben fri!—Tori 12:7-11.
12. Fu san ede a kan trowstu wi te wi e prakseri fa Yehovah ferlusu Petrus?
12 A e trowstu wi te wi e prakseri taki Yehovah abi so furu makti taki noti no man tapu en fu ferlusu den futuboi fu en, a no so? A kownu di ben poti Petrus na straf’oso ben tiri nanga a primisi fu a moro tranga tirimakti di ben de na grontapu na a ten dati. Ma tòg Petrus waka kmoto na a straf’oso neleki noti no psa. A tru taki Yehovah no e du den sortu wondru disi gi ala den futuboi fu en. A no ben du disi gi Yakobus èn bakaten a no du en gi Petrus di den sani di Yesus ben taki na fesi fu na apostel disi, kon tru te fu kba. Kresten na ini a ten disi no e ferwakti taki den o kisi ferlusu na wan wondru fasi. Ma wi e hori na prakseri taki Yehovah no kenki (Mal. 3:6). Heri esi a o meki en Manpkin ferlusu milyunmilyun sma puru na dede, a moro ogri straf’oso (Yoh. 5:28, 29). Den sortu pramisi disi e gi wi dek’ati trutru te wi e kisi fu du nanga tesi.
Di den si en, „den no ben man bribi” (Tori fu den apostel 12:12-17)
13-15. (a) San den memre fu a gemeente di ben kon makandra na ini Maria en oso du di Petrus doro? (b) Na san a buku Tori fu den apostel e poti prakseri now èn fa Petrus tan horbaka gi den Kresten brada nanga s’sa fu en?
13 Petrus ben e tnapu na ini a dungru strati èn a ben aksi ensrefi pe a ben o go now. Ne a teki wan besroiti. Wan Kresten uma di nen Maria ben tan krosbei. Soleki fa a sori, a ben lasi en masra na ini dede. Maria ben abi en bun èn en oso ben bigi nofo fu meki wan gemeente hori konmakandra drape. A ben de a m’ma fu Yohanes Markus èn disi na a fosi tron taki Tori fu den apostel e taki fu a man disi. Bakaten a kon de neleki Petrus en manpkin (1 Petr. 5:13). A neti disi furu sma fu a gemeente ben de na a oso fu Maria, aladi a ben lati kba èn den ben e begi fayafaya. A musu de so taki den begi Gado fu ferlusu Petrus. Ma den no ben ferwakti srefsrefi taki Yehovah ben o piki a begi fu den so esi.
14 Petrus naki na a portu di ben de na a fesidyari. Wan uma di ben wroko drape èn di ben nen Roda, kon na a portu. Roda na wan nen di furu Griki uma ben abi èn a nen disi wani taki, „rowsu”. Roda no ben man bribi san a yere. Disi ben de a sten fu Petrus! A ben breiti so te taki na presi fu a opo a portu, a meki Petrus tnapu na strati èn a lon go baka na ini na oso. A ben pruberi fu meki den sma fu a gemeente bribi taki Petrus ben de na a portu. Den taigi en taki a law, ma a ben sabi san a ben taki èn dati meki a no tapu en mofo. A tan hori nomo taki Petrus ben de drape fu di dati ben de so trutru. Wan tu fu den sma ben agri taki kande Roda yere wan sani trutru èn taki kande a sani disi ben de wan engel di ben e teki presi gi Petrus (Tori 12:12-15). A heri pisi ten dati Petrus tan naki na a portu, teleki den sma go opo a portu.
15 Di den opo a portu, den si en èn ”den no ben man bribi” (Tori 12:16). Petrus ben musu taigi den fu tan pî so taki a ben man ferteri den san psa. A taigi den fu go ferteri a disipel Yakobus nanga den tra brada san psa. Baka dati a gwe, fosi den srudati fu Herodes ben man feni en. Petrus gwe na wan presi pe sma no ben man du en ogri èn pe a ben man go doro nanga a preikiwroko di a ben du nanga en heri ati. Boiti taki Petrus ben yepi fu lusu a problema di ben abi fu du nanga a besnèi di sma ben musu besnèi, soleki fa skrifi na ini Tori fu den apostel kapitel 15, dan a Bijbel buku disi no e taki moro fu Petrus. Now a e taki fu a preikiwroko fu na apostel Paulus nanga den waka di a teki. Ma a no abi misi taki Petrus tranga a bribi fu den brada nanga s’sa fu en awansi pe a ben go. Di a gwe libi den brada nanga s’sa na a oso fu Maria, dan a no de fu taki dati den no ben sari moro.
16. Fu san ede wi kan de seiker taki wi o abi furu prisiri na ini a ten di e kon?
16 Son leisi Yehovah e gi den futuboi fu en moro leki san den ben ferwakti oiti. Te a sani dati e psa, dan den e breiti so te taki den no man bribi. Dati na fa den Kresten brada nanga s’sa fu Petrus ben firi a neti dati. Kande son leisi wi e firi so tu te wi e kisi furu blesi fu Yehovah (Odo 10:22). Na ini a ten di e kon wi o si fa ala den pramisi fu Yehovah o kon tru na heri grontapu. Den o moi furu tron moro iniwan sani di wi e ferwakti. Sobun, solanga wi e tan gi yesi na Gado, wi kan de seiker taki wi o abi furu prisiri na ini a ten di e kon.
„Na engel fu Yehovah meki woron nyan en” (Tori fu den apostel 12:18-25)
17, 18. San meki taki den sma bigin korkori Herodes?
17 Di Petrus lowe, dan Herodes ben ferwondru tu, ma a no ben breiti srefsrefi. Es’esi a taigi sma fu suku Petrus na ala sei èn a poti wan lo aksi gi den man di ben hori wakti na Petrus. A meki sma „tyari den gwe meki den kisi strafu” èn a kan taki den kisi dedestrafu (Tori 12:19). Sma no o memre Herodes Agrepa leki wan man di ben abi sar’ati noso wan man di ben firi gi tra sma. Wan dei doro taki na ogr’ati man disi kisi en strafu?
18 A kan taki Agrepa ben firi syen fu di a no ben man kiri Petrus, ma heri esi a feni wan okasi fu meki bigi baka. Wan situwâsi ben kon de pe sonwan fu den feanti fu en ben musu begi en fu meki freide nanga den. A no de fu taki dati a ben breiti fu taki na fesi wan bigi grupu sma. Lukas e ferteri taki di Herodes sreka ensrefi fu taki nanga den sma, dan a „weri kownukrosi”. A Dyu historia skrifiman Josephus skrifi taki a krosi fu Herodes ben meki fu solfru, so taki te leti ben skèin na tapu a kownu, dan a ben gersi leki en ben skèin leti. Ne a politiek man disi di ben abi bigi memre bigin taki. Den sma di ben pruberi fu korkori Herodes bigin bari: „Disi a no a sten fu wan libisma, ma na a sten fu wan gado!”—Tori 12:20-22.
19, 20. (a) Fu san ede Yehovah strafu Herodes? (b) San wi e leri fu a dede di Herodes Agrepa dede wantronso?
19 Na Gado w’wan ben musu kisi a glori dati èn Gado ben e si ala san ben e psa. Herodes ben abi wan okasi fu sorgu taki ogri no miti en. A ben kan pir’ai gi den sma, noso a ben kan taigi den taki a no ben agri nanga san den taki. Na presi fu dati a sani di wan odo e taki miti en. Na odo dati e taki so: „Bigimemre e kon bifo wan sma fadon” (Odo 16:18). „Wantewante na engel fu Yehovah meki woron nyan en”, so taki a man disi di ben abi heimemre èn di ben prakseri ensrefi nomo, pina na wan ogr’ati fasi teleki a dede. Bijbel e taki: „Woron nyan en. Herodes dede” (Tori 12:23). Josephus ben skrifi tu taki Agrepa kisi strafu wantronso èn taki a kownu srefi taki dati a ben e dede fu di a ben teki a glori di den sma ben gi en. Josephus skrifi taki Agrepa pina feifi dei langa fosi a dede. b
20 Son leisi a gersi leki ogr’ati sma e du ala sortu ogri sondro taki den kisi strafu. A sani dati no musu ferwondru wi, fu di „heri grontapu de na ini a makti fu na ogriwan” (1 Yoh. 5:19). Tòg ret’ati anbegiman fu Gado e broko den ede te a gersi leki ogr’ati sma e du ogri sondro taki den kisi strafu. Ma te den e leisi tori soleki san psa nanga Herodes, dan dati e trowstu den. Fu taki en leti, wi e si fa Yehovah du wan sani fu sori ala den futuboi fu en taki a e prisiri te sma e koti krutu na wan reti fasi (Ps. 33:5). Te fu kba, Yehovah o koti krutu na wan reti fasi gi ala sma na grontapu.
21. San na a moro prenspari sani di wi e leri fu Tori fu den apostel kapitel 12 èn fu san ede a kan trowstu wi?
21 Na a kba fu a tori disi wi e leisi wan tra sani di e gi wi moro dek’ati: „A wortu fu Yehovah ben e panya na ala sei èn moro nanga moro sma ben e tron bribiman” (Tori 12:24). A tori disi di e ferteri wi fa a preikiwroko go na fesi, kan memre wi na a fasi fa Yehovah blesi a preikiwroko na ini a ten disi. A de krin taki Tori fu den apostel kapitel 12 no e ferteri nomo taki wan apostel dede èn taki wan trawan lowe kmoto na straf’oso. Ma a e ferteri wi tu taki Yehovah e bruya ala den sani di Satan e du fu puru a Kresten gemeente na pasi èn fu tapu a preikiwroko di den e du fayafaya. Den sani di Satan ben du na a ten dati no ben abi bun bakapisi èn den no o abi bun bakapisi noiti (Yes. 54:17). Ma den wan di e teki a sei fu Yehovah nanga Yesus Krestes e teki prati na wan wroko di o abi bun bakapisi ala ten. A sani disi e gi wi dek’ati, a no so? Wi abi wan bigi grani trutru fu preiki „a wortu fu Yehovah” na ini a ten disi.
a Luku a faki di nen „ Kownu Herodes Agrepa I”.
b Wan datra skrifi taki den sani di Josephus nanga Lukas skrifi fu a fasi fa Herodes dede, ben kan abi fu du nanga wan pkin sortu woron di e libi na ini sma inibere. Den woron disi e lolo kon na makandra neleki wan bal na ini na inibere fu wan sma so taki noti no man psa drape èn a sani dati e meki a sma dede. Son leisi sma di abi den woron disi e brâk den puru, noso den e kroipi kmoto na a sma en skin te a e dede. Wan buku e taki: „Leki wan datra, Lukas e taki soifri na sortu ogri fasi Herodes dede.”
