1, 2. Di sma pruberi fu tapu den Kresten fu preiki a bun nyunsu, dan fa sani waka heri tra fasi leki fa sma ben ferwakti?

 DEN Kresten bigin kisi bun hebi ferfolgu èn Saulus bigin „du wan lo ogri” nanga a gemeente. Na ini Grikitongo, a wortu di vertaal nanga „wan lo ogri” wani taki dati wan sma e du kfalek ogr’ati sani nanga wan trawan (Tori 8:3). Den disipel lowe gwe èn kande sonwan fu den e denki taki Saulus o man puru a Kresten bribi na pasi. Ma baka te den Kresten panya go na ala sei, dan wan sani e psa di nowan sma e ferwakti. Sortu sani?

² Den Kresten di panya go na ala sei e bigin „preiki a bun nyunsu” na ini den kondre pe den lowe go (Tori 8:4). Denki a tori! A ferfolgu no ben man tapu den Kresten fu preiki a bun nyunsu, ma te yu luku en bun, a yepi fu panya a boskopu go na ala sei! Fu di den gensman dwengi den disipel fu gwe libi a tanpe fu den, dan sondro taki den gensman wani, den yepi fu meki a Kownukondre preikiwroko panya go na farawe kondre. Soleki fa wi o si, dan wan srefi sortu sani psa na ini a ten disi.

3. (a) Suma ben de Filipus? (b) Fu san ede furu sma na ini Samaria no ben yere a bun nyunsu? Ma san ben o psa na ini a kontren dati soleki fa Yesus ben taki?

³ Wan fu den sma „di ben lowe go na tra presi”, ben de Filipus (Tori 8:4; luku a faki di nen „ Filipus, ’a preikiman’”). a A ben go na Samaria, wan foto pe furu sma no ben yere  a bun nyunsu ete, fu di Yesus ben taigi den apostel wan leisi: „No go na wan foto na ini Samaria. Na presi fu dati, un musu go soso na den lasi skapu fu Israel” (Mat. 10:5, 6). Ma Yesus ben sabi taki baka wan pisi ten, den Kresten ben o preiki finfini na ini Samaria, bika syatu bifo a opo go na hemel, a taki: „Unu o de kotoigi fu mi na ini Yerusalem, na ini heri Yudea nanga Samaria èn te na den moro farawe presi fu grontapu.”​—Tori 1:8.

4. San den Samariasma du di Filipus preiki gi den? Sortu sani ben meki taki den du dati?

⁴ Filipus ben kon si taki na ini Samaria „a nyanyan lepi kaba fu koti” (Yoh. 4:35). A boskopu di a ben e preiki ben de leki kowru watra na wan waran dei gi den sma drape èn wi kan ferstan fu san ede. Den Dyu no ben e moksi nanga den Samariasma èn furu fu den ben wis’wasi den sma dati srefi. Den Samariasma kon si taki a bun nyunsu no ben e desko nowan sma, ma a ben e gi ala sma howpu. Iya, a bun nyunsu disi no ben e kruderi srefsrefi nanga a denki fu den Fariseiman di ben e desko sma. Filipus no desko nowan sma, ma a preiki fayafaya gi den Samariasma èn na so a sori taki a no ben denki leki den wan di ben e wis’wasi den. Dati meki a  no musu ferwondru wi taki di Filipus ben e preiki gi den Samariasma, dan „bigi grupu sma” ben e poti prakseri na den sani di a ben taki.​—Tori 8:6.

5-7. Gi eksempre di e sori fa Kresten di panya go na ala sei, meki taki moro nanga moro sma kon yere a bun nyunsu.

⁵ Neleki fa a ben de na ini a fosi yarihondro, na so a ferfolgu di a pipel fu Gado e kisi na ini a ten disi no tapu a preikiwroko fu den. Ibri tron baka te sma ben e ferfolgu Kresten, so taki den ben abi fu froisi fu a wán presi go na a trawan, awansi na straf’oso noso wan tra kondre, dan dati yepi sma na ini a nyun kontren fu kon sabi a Kownukondre boskopu. Fu eksempre, na a ten fu a Di Fu Tu Grontapufeti, Yehovah Kotoigi ben man preiki aladi den ben de na ini Nazi strafuman-kampu. Wan Dyu di ben miti Kotoigi drape ben taki: „Di mi si fa den strafuman di ben de Yehovah Kotoigi ben e hordoro, dan dati meki mi kon si taki a bribi fu den e kruderi nanga Bijbel. Na so mi srefi kon tron wan Kotoigi.”

⁶ Son leisi, srefi ferfolguman ben e yere a bun nyunsu èn den ben e poti bribi na ini den sani di den ben e leri. Fu eksempre, di den tyari wan Kotoigi di nen Franz Desch go na a strafuman-kampu Gusen, na ini Oostenrijk, dan a ben man studeri Bijbel nanga wan SS-ofsiri, wan srudati fu wan spesrutu grupu di ben e hori wakti gi Hitler. Prakseri fa den tu man disi ben breiti di den miti makandra baka na wan kongres fu Yehovah Kotoigi èn di den kon si taki den ala tu ben de preikiman fu a bun nyunsu!

⁷ Wan srefi sortu sani psa di furu Kresten ben musu lowe go na wan tra kondre, fu di sma ben e ferfolgu den. Fu eksempre, sowan 50 yari psa, Kotoigi fu Malawi ben lowe go na Mosambik èn den ben man preiki gi furu sma drape. Srefi di den Kresten na ini Mosambik bigin kisi gens bakaten, dan tòg a preikiwroko tan go doro. Francisco Coana e taki: „A tru taki skowtu grabu wi furu leisi di wi ben e preiki. Ma di furu sma poti bribi na ini a Kownukondre boskopu, dan wi ben de seiker taki Gado ben e yepi wi, neleki fa a ben yepi den Kresten na ini a fosi yarihondro.”

8. Fa den kenki di kon na ini politiek èn na ini na ekonomia ben abi krakti na tapu a preikiwroko?

⁸ A no de fu taki dati ferfolgu no ben de a wan-enkri sani di meki taki moro nanga moro sma fu tra kondre teki a Kresten bribi. Na ini den yari di psa, kenki kon na ini politiek èn na ini na ekonomia. Disi meki tu taki furu sma di e taki difrenti tongo èn di kmoto na difrenti kondre ben kan yere a Kownukondre boskopu. Son sma di  de fu kontren pe feti de èn pe sma e pina, lowe go na kondre pe a libi no tranga so. Drape den bigin studeri Bijbel. Fu di furu sma lowe go na tra kondre, meki den brada opo gemeente pe sma e taki wan tra tongo. Yu e pruberi fu preiki gi sma di e libi na ini a kontren fu yu èn di „komoto fu ala kondre, lo, pipel, nanga tongo”?​—Openb. 7:9.

9. Suma ben de Simon èn sortu sani fu Filipus ben e hari en kande?

⁹ Filipus ben du furu wondru na ini Samaria. Fu eksempre, a ben dresi sma di ben malengri èn a ben e puru ogri yeye tu na sma tapu (Tori 8:6-8). Wan man ben e ferwondru srefsrefi taki Filipus ben man du wondru. A man dati ben de Simon, wan bonuman di sma ben e lespeki so te taki den ben taki fu en: „A man disi abi a bigi krakti fu Gado.” Ma di Simon si den wondru di Filipus du, dan a si a trutru krakti fu Gado. Na so a du kon taki a tron wan bribiman (Tori 8:9-13). Ma bakaten a ben o kon na krin san ben de na ini Simon ati. Fa so?

10. (a) San Petrus nanga Yohanes du na ini Samaria? (b) San Simon du di a si taki den nyun disipel kisi santa yeye di Petrus nanga Yohanes poti den anu na den tapu?

¹⁰ Di den apostel kon si taki moro nanga moro sma na ini Samaria ben e teki a tru bribi, dan den seni Petrus nanga Yohanes go drape (Luku a faki di nen „ Petrus e gebroiki den ’sroto fu a Kownukondre’”.) Di den tu apostel doro drape, dan den poti den anu na  tapu den nyun disipel èn ibriwan fu den kisi a santa yeye. b Di Simon si dati, dan a ben wani kon sabi nomonomo san na a sani dati. A taigi den apostel: „Gi mi a makti disi tu. Dan sma kan kisi santa yeye tu te mi poti mi anu na den tapu.” Simon ben wani gi den apostel moni srefi, fu di a ben wani bai a santa grani disi!​—Tori 8:14-19.

11. Sortu rai Petrus e gi Simon èn san Simon e du?

¹¹ Petrus piki Simon sondro draidrai. Na apostel taki: „Yu kan dede gwe nanga a moni fu yu. Yu denki taki yu man bai a sani di Gado e gi sma fu soso? Yu no abi noti fu du nanga a wroko disi, bika Gado e si taki yu no abi wan krin ati.” Ne, Petrus taigi Simon fu sori berow èn fu begi Gado fu gi en pardon. Petrus taki: „Begi Yehovah fayafaya. Kande a o gi yu pardon fu a takru prakseri di yu abi ini yu ati.” Soleki fa a sori dan Simon no ben de wan takru man. A ben wani du san bun, ma na a pisi ten dati a no ben e ferstan sani krin. Fu dati ede a aksi den apostel: „Un begi Yehovah gi mi, so taki nowan fu den sani di unu taki psa nanga mi.”​—Tori 8:20-24.

12. San Simon ben wani du èn fa den falsi Kresten bribi du wan srefi sortu sani?

¹² Kresten na ini a ten disi musu teki leri fu a sani di Petrus taigi Simon di a pir’ai gi en. Fu taki en leti, na ini son tongo den abi wan wortu gi a gwenti di sma abi fu bai noso seri posisi, spesrutu te a abi fu du nanga kerki afersi. A wortu dati abi fu du nanga a sani di Simon ben wani du. A historia fu den falsi Kresten bribi lai nanga  eksempre fu a gwenti disi. Iya, wan buku e taki: „Te wan sma e ondrosuku a historia fu den konmakandra pe den kerki fesiman ben e stem suma den ben o teki leki pawsu, dan a sma e kon si krin taki noiti den kerki fesiman du dati sondro taki den pai tyuku. Ma a sma e kon si tu taki furu leisi den ben e du dati na a moro doti fasi, sondro wan dropu syen èn den no ben pruberi srefi fu kibri a doti fasi disi.”​—The Encyclopædia Britannica (1878).

13. Nanga sortu sani Kresten musu luku bun efu den no wani du a kruka sani di Simon ben wani du?

¹³ Kresten musu luku bun taki den no e fadon na ini a sondu fu bai noso seri posisi noso grani na ini a gemeente. Fu eksempre, te den wani kisi moro frantwortu na ini a gemeente, dan den no musu tyari ala sortu diri kado gi den brada di e teki fesi, noso prèise wan brada tumsi furu fu di den denki taki a brada disi o man gi den grani na ini a gemeente. Ma na a tra sei, den wan di abi a frantwortu fu gi sma grani na ini a gemeente, musu luku bun taki den no e gi gudu sma moro grani leki tra sma. Ala den tu situwâsi disi na a srefi leki a kruka sani di Simon ben wani du. Fu taki en leti, ala den futuboi fu Gado musu tyari densrefi leki ’den moro lagiwan’ èn den musu wakti teleki a yeye fu Yehovah e gi sma a grani fu kisi frantwortu na ini a gemeente (Luk. 9:48). Na ini Gado en organisâsi presi no de gi den wan di e pruberi fu „suku den eigi glori”.​—Odo 25:27.

14, 15. (a) Suma ben de „a heihei man fu Etiopia” èn fa Filipus miti en? (b) San na Etiopia man du di a yere a boskopu fu Filipus èn fu san ede wi no kan taki dati a teki dopu sondro fu denki? (Luku a futuwortu.)

¹⁴ Now na engel fu Yehovah taigi Filipus fu teki a pasi di ben e waka fu Yerusalem  go na Gasa. Efu Filipus ben e aksi ensrefi fu san ede a ben musu go drape, dan a kisi piki na tapu na aksi dati syatu baka di a miti wan heihei man fu Etiopia, di ben „e leisi a buku fu a profeiti Yesaya nanga wan tranga sten”. (Luku a faki di nen „ Na sortu fasi na Etiopia man ben de wan eunuch?”.) A santa yeye fu Yehovah meki taki Filipus go na a asiwagi fu a man. Di a ben e lon na sei na asiwagi, a aksi na Etiopia man: „Yu sabi san yu e leisi?” Na Etiopia man piki en: „Fa mi ben kan sabi, efu nowan sma e leri mi?”​—Tori 8:26-31.

¹⁵ Na Etiopia man taigi Filipus fu kon na ini na asiwagi. Prakseri fa a takimakandra dati ben musu de. Langa ten sma no ben man ferstan suma na a „skapu”, noso a „futuboi” na ini a profeititori fu Yesaya (Yes. 53:1-12). Ma di Filipus nanga a heihei man fu Etiopia rèi go moro fara, dan Filipus tyari kon na krin gi en taki den sani di skrifi na ini a profeititori disi psa nanga Yesus Krestes. Neleki den wan di ben teki dopu na a Pinksterfesa fu a yari 33, na Etiopia man disi di ben teki a Dyu bribi kba, ben sabi san a ben musu du wantewante. A taigi Filipus: „Luku watra dya! San e tapu mi fu dopu?” Filipus dopu na Etiopia man wantewante! c (Luku a  faki di nen „ A teki dopu na ’wan presi pe watra ben de’”.) Baka dati, a yeye fu Yehovah tyari Filipus go na wan nyun kontren, Asdod èn drape a tan meki a bun nyunsu bekènti.​—Tori 8:32-40.

16, 17. Fa engel e yepi wi nanga a preikiwroko na ini a ten disi?

¹⁶ Na ini a ten disi, Kresten abi a grani fu du a srefi wroko di Filipus ben du. Nofo tron den man preiki a Kownukondre boskopu gi sma di den e miti na difrenti okasi, soleki te den e go na tra presi. Furu tron den si taki di den miti wan ret’ati sma dan dati no kon fu ensrefi. Wi kan ferwakti dati, fu di Bijbel e sori krin taki den engel e teki fesi na ini a preikiwroko, so taki a boskopu e doro „sma fu ala kondre, lo, tongo, nanga pipel” (Openb. 14:6). Den engel e tiri a preikiwroko soifri soleki fa Yesus ben taki. Na ini na agersitori fu en di abi fu du nanga na aleisi nanga a takru w’wiri, Yesus ben taki dati na a ten fu a kotiwroko, noso na a kba fu grontapu, „den sma di e koti a nyanyan na den engel”. A ben taki tu dati den engel disi ben o ’puru ala den sma di e meki trawan du sondu èn den sma di e du kruktudu fu en kownukondre’ (Mat. 13:37-41). Na a srefi ten, den engel ben o tyari den sma kon na wan di ben o tiri leki kownu fu a Kownukondre. Bakaten den ben o tyari „wan bigi ipi sma”, den „tra skapu”, kon na wán, sma di Yehovah wani hari kon na a organisâsi fu en.​—Openb. 7:9; Yoh. 6:44, 65; 10:16.

¹⁷ Wi kan si taki a sani disi e psa trutru, fu di sonwan fu den sma di wi e miti te wi e du a preikiwroko, e taki dati den ben e begi Gado fu yepi den. Luku wan ondrofenitori fu tu Kownukondre preikiman di ben de makandra nanga wan yongu pkin. Na a kba fu a m’manten, den tu Kotoigi ben de fu tapu nanga a preikiwroko, ma a pkin ben de nomonomo fu go na a tra oso. Fu taki en leti, en srefi go klop na a doro! Di wan yongu uma opo a doro, dan den tu Kotoigi go taki nanga en. Den ben ferwondru di na uma taigi den taki na kba a ben kba begi Gado fu seni wan sma fu kon yepi en fu ferstan Bijbel moro bun. Den Kotoigi bigin wan Bijbelstudie nanga en!

18. Fu san ede noiti wi musu si a preikiwroko leki wan lawlaw sani?

¹⁸ Leki wan memre fu a Kresten gemeente, yu abi a grani fu wroko makandra nanga den engel, aladi a preikiwroko na ini a ten disi e du na moro kondre leki iniwan ten bifo. Noiti yu musu si a grani dati leki wan lawlaw sani. Te yu e tan meki muiti, dan yu o kisi bigi prisiri aladi yu e go doro fu meki „a bun nyunsu fu Yesus” bekènti.​—Tori 8:35.