1, 2. San Saulus wani go du na ini Damaskus?

 WAN tu man di teki waka go na Damaskus e kon krosbei fu a foto dati. Den wani du wan kfalek ogr’ati sani drape èn den no e lafu. Den man disi di e teige den disipel fu Yesus, o srepi den puru na ini den oso, den o tai den, den o gi den syen èn den o tyari den go na Yerusalem so taki a Grankrutu fu den Dyu kan strafu den.

² A fesiman fu a grupu disi nen Saulus èn a ben sori kba taki a feni en bun taki den kiri wan sma. a Wan syatu pisi ten na fesi, a ben e tnapu e luku fa den sma di ben e horbaka fayafaya gi a bribi fu den neleki en, fringi ston kiri Stefanus. Stefanus ben de wan fayafaya futuboi fu Yesus (Tori 7:57–8:1). Fu di a no ben sari gi Saulus taki a puru atibron na tapu den bakaman fu Yesus di ben libi na ini Yerusalem, meki a bigin sutu faya gi sma fu ferfolgu den Kresten na ala sei. A wani puru a falsi bribi disi na pasi. A grupu disi e pori sma denki èn sma ben sabi den leki „a Pasi fu Masra”.​—Tori 9:1, 2; Luku a faki di nen „ A makti di Saulus ben abi na ini Damaskus”.

3, 4. (a) San e psa nanga Saulus? (b) Na sortu aksi wi o poti prakseri?

³ Wantronso wan brenki faya e skèin lontu Saulus. Den man di de nanga en e si a faya tu, ma den skreki so te taki den no man taki noti. Saulus di kon breni wantronso, fadon na gron. A e yere wan sten kmoto na hemel e taki: „Saul, Saul, fu san ede yu e suku fu du ogri nanga mi?” Saulus skreki èn a aksi: „Masra, suma na yu?” A musu fu de so taki Saulus en ati tapu te a sten e piki en: „Mi na Yesus, di yu wani du ogri.”​—Tori 9:3-5; 22:9.

⁴ San wi kan leri fu den fosi sani di Yesus taigi Saulus? Fa wi kan kisi wini te wi e luku den sani di psa na a ten di Saulus tron wan  Kresten? San wi kan leri fu a fasi fa a gemeente gebroiki a pisi ten di ala sani kon tiri, baka di Saulus tron wan Kresten?

5, 6. San wi e leri fu den sani di Yesus ben taigi Saulus?

⁵ Di Yesus tapu Saulus fu go na Damaskus, dan a no aksi en: „Fu san ede yu e suku fu du ogri nanga den disipel fu mi?” Soleki fa wi si, dan a ben taki: „Fu san ede yu e suku fu du ogri nanga mi?” (Tori 9:4) Iya, Yesus e firi en te den bakaman fu en e kisi tesi.​—Mat. 25:34-40, 45.

⁶ Efu sma e gens yu fu di yu e bribi na ini Krestes, dan yu kan abi a dyaranti taki Yehovah nanga Yesus sabi san e miti yu (Mat. 10:22, 28-31). Kande Yehovah no o puru a tesi dati wantewante. Hori na prakseri taki Yesus ben e luku fa Saulus ben horbaka gi den sma di kiri Stefanus èn a si fa Saulus srepi ret’ati disipel kmoto na ini den oso na ini Yerusalem (Tori 8:3). Tòg Yesus no ben du noti na a ten dati. Ma Yehovah meki Krestes gi Stefanus nanga den tra disipel a krakti di den ben abi fanowdu fu hordoro.

7. San yu musu du fu man hordoro te sma e ferfolgu yu?

⁷ Te sma e ferfolgu yu, dan yu kan hordoro tu te yu e du den sani disi: (1) Abi a fasti bosroiti fu tan gi yesi na Gado, awansi san e psa. (2) Aksi Yehovah fu yepi yu (Fil. 4:6, 7). (3) Libi en gi Yehovah fu strafu den sma di du ogri nanga yu (Rom. 12:17-21). (4) Abi a fertrow taki Yehovah o gi yu a krakti fu hordoro, teleki a feni en fanowdu fu tyari wan kba kon na a tesi.​—Fil. 4:12, 13.

8, 9. San Ananias ben musu denki fu a spesrutu wroko di Yesus gi en?

⁸ Di Saulus aksi Yesus „Masra, suma na yu?” èn Yesus kba piki en, dan a taigi en moro fara: „Opo go na ini a foto, dan wan sma o ferteri yu san yu musu du” (Tori 9:6). Den tyari Saulus di ben kon breni go na a presi pe a ben o tan na Damaskus. A no nyan noti èn a begi dri dei langa. Na a srefi ten, Yesus ferteri wan disipel fu en di ben e tan na ini a foto dati, san ben psa nanga Saulus. A man dati di nen Ananias, „ben abi wan bun nen na ala den Dyu” di ben e tan na ini Damaskus.​—Tori 22:12.

⁹ Prakseri fa Ananias ben musu firi. A ben musu de so taki a no ben sabi san a ben musu denki fu a tori! Na a Edeman fu a gemeente, Yesus Krestes srefi di kisi wan opobaka, ben e taki nanga en èn a ben gi en wan spesrutu wroko fu du. A ben de wan bigi grani, ma a  wroko no ben makriki srefsrefi! Di Yesus taigi Ananias taki a ben musu go taki nanga Saulus, dan Ananias piki en: „Masra, furu sma ferteri mi fu ala den ogri di a man disi du nanga den disipel fu yu na ini Yerusalem. A kisi primisi fu den edeman fu den priester fu sroto ala den sma dya di e kari yu nen.”​—Tori 9:13, 14.

10. San wi e leri fu Yesus te wi e luku a fasi fa a taki nanga Ananias?

¹⁰ Yesus no ben pir’ai gi Ananias di a ben taki san ben e gi en broko-ede. Ma Yesus sori en krin san a ben musu du. Boiti dati, a hori den firi fu Ananias na prakseri, fu di a taigi en fu san ede a ben wani taki a du a muilek wroko disi. Yesus ben taki fu Saulus: „Mi teki a man disi fu go ferteri den trakondre sma, den kownu nanga den Israelsma fu a nen fu mi. Mi o sori en krin taki a o abi fu nyan furu pina te a de mi disipel” (Tori 9:15, 16). Wantewante Ananias gi yesi na Yesus. A go suku Saulus, a man di ben e ferfolgu sma èn a taigi en: „Saul mi brada, Masra Yesus di kon na yu di yu ben de na pasi e kon dyaso, seni mi kon fu meki yu si baka èn fu meki yu kisi santa yeye.”​—Tori 9:17.

11, 12. San wi e leri fu den sani di wi leisi didyonsro fu Yesus, Ananias nanga Saulus?

¹¹ Den sani di wi leisi didyonsro fu Yesus, Ananias nanga Saulus e tyari wan tu sani kon na krin. Fu eksempre, Yesus e tiri a preikiwroko, soleki fa a ben pramisi (Mat. 28:20). Aladi Yesus no e taki langalanga nanga sma moro, tòg a e tiri a preikiwroko fu di a poti a srafu di de fu fertrow fu luku den futuboi fu en (Mat. 24:45-47). A Tiri Skin e seni preikiman nanga pionier fu go feni den wan di wani kon sabi moro fu Krestes. Soleki fa wi si na ini kapitel 7, dan a psa nanga furu fu den sortu sma disi taki Yehovah Kotoigi kon na den oso di den ben kba begi Gado fu yepi den.​—Tori 9:11.

¹² Ananias ben de klarklari fu du a wroko di Yesus ben gi en èn a kisi blesi tu. Yu e preiki finfini soleki fa Yesus ben  taigi wi fu du? Yu e du dati awansi yu e frede pkinso? Son sma feni en muilek fu go oso fu oso fu taki nanga sma di den no sabi. Trawan feni en muilek fu preiki gi sma di den e miti na den wrokope, na strati, noso den feni en muilek fu preiki gi sma nanga yepi fu telefon noso brifi. Ma te fu kba, Ananias no ben frede moro èn a ben abi a grani fu yepi Saulus so taki a ben kan kisi santa yeye. b Ananias ben abi  bun bakapisi fu di a ben fertrow na tapu Yesus èn fu di a ben e si Saulus leki wan sma di ben kan tron en Kresten brada. Te wi e teki na eksempre fu Ananias, dan wi no sa frede moro. Iya, neleki en, wi musu fertrow na tapu Yesus, wi musu firi gi sma èn wi musu si srefi den sma di e meki wi frede leki sma di kan tron wi Kresten brada noso s’sa.​—Mat. 9:36.

13, 14. Efu yu e studeri Bijbel ma yu no dopu ete, dan san yu kan leri fu na eksempre fu Saulus?

¹³ Saulus no draidrai fu du san a ben leri. Di a kon betre baka, dan a teki dopu. A bigin moksi nanga den disipel na ini Damaskus. Ma dati a no ala san a ben du. Bijbel e taki: „Wantewante a bigin preiki na ini den snoga taki Yesus na a Manpkin fu Gado.”​—Tori 9:20.

¹⁴ Efu yu e studeri Bijbel, ma yu no dopu ete, dan yu o fiti den sani di yu e leri, neleki fa Saulus ben du dati wantewante? A tru taki Saulus srefi si wan wondru fu Krestes èn a no de fu taki dati a sani dati gi en dek’ati fu teki wan bosroiti. Ma tra sma ben si tu fa Yesus ben du wondru. Fu eksempre, wan grupu Fariseiman ben si fa Yesus ben dresi a malengri anu fu wan man èn wan bigi grupu Dyu ben sabi taki Yesus ben gi Lasarus wan opobaka. Tòg furu fu den ben e du neleki den sani dati na noti èn den ben e gens Yesus srefi (Mark. 3:1-6; Yoh. 12:9, 10). Ma tra fasi leki den sma dati, Saulus ati kon kenki. Fu san ede Saulus poti bribi na ini Krestes, aladi trawan no ben e du dati? A du dati fu di a ben abi moro lespeki gi Gado leki gi libisma èn a ben abi furu warderi gi a sar’ati di Yesus sori en (Fil. 3:8). Te yu e teki na eksempre fu Saulus, dan yu no o meki noti tapu yu fu teki prati na a preikiwroko èn noti o tapu yu tu fu teki dopu.

15, 16. San Saulus du na ini den snoga èn san den Dyu na ini Damaskus du?

¹⁵ Fa yu denki taki den sma ben e firi di den si fa Saulus bigin preiki fu Yesus na ini den snoga? A ben musu fu de so taki den ben ferwondru, taki den ben skreki èn taki den ati ben e bron. Den sma ben taki: „A no a man disi ben du wan lo ogri nanga den bakaman fu Yesus na ini Yerusalem?” (Tori 9:21) Di Saulus ben taigi den sma fu san ede a ben e denki tra fasi fu Yesus, dan a „ben e sori den krin taki Yesus na a Krestes” (Tori 9:22). Ma te yu e sori sma krin fa sani de, dan dati no wani taki dati ala sma o bribi. Yu no o  man kenki a denki fu sma di de nomonomo fu hori densrefi na den gwenti fu den. Son sma no wani kenki a denki fu den fu di den abi heimemre. Ma tòg Saulus no las’ati.

¹⁶ Dri yari baka dati, den Dyu na ini Damaskus ben e gens Saulus ete. Te fu kba den suku fu kiri en (Tori 9:23; 2 Kor. 11:32, 33; Gal. 1:13-18). Di Saulus kon sabi a tori dati, a teki wan koni bosroiti èn a gwe libi a foto. Sma poti en na ini a wan baskita èn den saka en go na gron na wan fensre di ben de na ini a skotu fu a foto. Lukas e taki dati den sma di yepi Saulus fu lowe na a neti dati, ben de „den disipel fu en [Saulus]” (Tori 9:25). Den wortu disi e sori taki wan tu fu den sma di ben yere Saulus di a ben e preiki na ini Damaskus, ben poti bribi na ini a boskopu fu en èn den tron bakaman fu Krestes.

17. (a) San sma e du te den e yere den tru tori fu Bijbel? (b) San wi musu tan du èn fu san ede?

¹⁷ Di yu bigin ferteri yu famiriman, yu mati nanga tra sma fu den bun sani di yu ben e leri, dan a kan taki yu ben e ferwakti taki den alamala ben o bribi den tru tori fu Bijbel di makriki fu ferstan. Kande sonwan fu den sma dati ben poti bribi na ini den tori dati, ma a kan taki furu fu den no du dati. Iya, kande sma fu yu eigi osofamiri ben e si yu leki wan feanti (Mat. 10:32-38). Ma te yu e tan meki muiti fu gebroiki Bijbel fu taki-go-taki-kon moro bun nanga den èn te yu e tan tyari yusrefi leki wan Kresten, dan srefi den wan di e gens yu ben kan kenki a prakseri fu den te fu kba.​—Tori 17:2; 1 Petr. 2:12; 3:1, 2, 7.

18, 19. (a) San pasa di Barnabas opo taki gi Saulus? (b) Fa wi kan teki na eksempre fu Barnabas nanga Saulus?

¹⁸ Wi kan ferstan taki di Saulus go na ini Yerusalem, dan den disipel no ben wani bribi wantewante taki a ben tron wan disipel. Ma di Barnabas opo taki gi Saulus, dan den apostel teki en leki a brada fu den èn Saulus tan nanga den wan pisi ten (Tori 9:26-28). Aladi Saulus ben luku bun san a ben e taki, tòg a no ben syen fu ferteri sma a bun nyunsu (Rom. 1:16). A ben e preiki sondro frede na ini Yerusalem, a srefi presi pe a ben bigin ferfolgu den disipel fu Yesus Krestes na wan ogr’ati fasi. Ma den Dyu na ini Yerusalem skreki srefsrefi di den kon si taki a man di den ben denki taki a ben o teki fesi fu puru den Kresten na pasi, tron wan Kresten. Fu dati ede, den suku fu kiri en. Bijbel e taki: „Di den brada kon sabi dati, dan den tyari en [Saulus] go na Sesareya èn baka dati den seni en go na Tarsus” (Tori 9:30). Saulus horbaka gi a gemeente èn na so a  sori taki a ben saka ensrefi na ondro Yesus. Saulus nanga a gemeente kisi wini fu dati.

¹⁹ Luku taki na Barnabas fosi bosroiti fu yepi Saulus. A no de fu taki dati a bun sani disi di a du, meki taki den tu fayafaya futuboi disi fu Yehovah tron bun mati. Yu de klarklari neleki Barnabas fu yepi nyunwan na ini a gemeente? Yu e wroko makandra nanga den na ini a preikiwroko èn yu e yepi den fu go na fesi na ini a tru anbegi? Yu o kisi furu blesi te yu e du dati. Efu yu na wan nyun preikiman fu a bun nyunsu, dan yu e teki a yepi di yu e kisi neleki fa Saulus ben du dati? Te yu e wroko makandra nanga den wan di abi moro ondrofeni, dan yu o man du a preikiwroko fu yu moro bun. Boiti dati, yu o kisi moro prisiri èn yu o feni mati di o tan horbaka gi yu solanga yu e libi.

20, 21. San den futuboi fu Gado fu fosten èn fu a ten disi du na ini a den pisi ten di „ala sani kon tiri”?

²⁰ Baka di Saulus tron wan Kresten èn a gwe libi Damaskus sondro taki sma ben du en ogri, dan „ala sani kon tiri baka gi den gemeente na ini heri Yudea, Galilea, nanga Samaria” (Tori 9:31). San den disipel du na ini a „bun ten” dati? (2 Tim. 4:2) Bijbel e taki dati den gemeente „kon moro tranga”. Den apostel nanga tra brada di ben abi frantwortu yepi den disipel fu meki a bribi fu den kon moro tranga èn den teki fesi aladi a gemeente „ben abi bigi lespeki gi Yehovah èn a ben kisi krakti fu a santa yeye”. Fu eksempre, na ini a pisi ten dati, Petrus gi den disipel na ini a foto Lida di ben de na Saron-lagipresi, dek’ati. A muiti di a meki, ben meki taki den wan di ben e libi na ini a kontren dati tron „bigin bribi na ini Masra” (Tori 9:32-35). Den disipel no meki grontapu sani puru den prakseri, ma den du ala san den ben man fu yepi makandra èn fu preiki a bun nyunsu. A sani dati meki taki a gemeente „ben kon moro bigi”.

²¹ Na a kba fu a di fu 20 yarihondro, a psa tu taki na ini furu kondre „ala sani kon tiri” gi den gemeente fu Yehovah Kotoigi. Tirimakti di ben e kwinsi a pipel fu Gado furu tenti yari langa, kon na wan kba wantronso. Boiti dati, na ini son kondre pe a preikiwroko ben tapu, den brada nanga s’sa kisi moro okasi fu preiki èn na tra kondre den kisi primisi baka fu preiki. Dusundusun Kotoigi teki na okasi disi fu preiki gi ala sma èn den ben abi tumsi moi bakapisi.

22. Fa yu kan gebroiki na okasi di yu abi fu preiki fri?

 ²² Yu e gebroiki na okasi di yu abi fu preiki fri na ini a kondre fu yu? Efu yu e libi na ini wan kondre pe den no e tapu sma fu anbegi Gado, dan Satan o de nomonomo fu kori yu fu feti baka gudu, na presi fu horbaka gi Kownukondre afersi (Mat. 13:22). No meki a puru yu prakseri. Te freide de na ini a kondre fu yu, dan gebroiki a ten dati bun. Si en leki wan okasi fu preiki finfini èn fu gi a gemeente dek’ati. Hori na prakseri taki a situwâsi fu yu kan kenki wantronso.

23, 24. (a) San wi e leri fu a tori fu Tabita? (b) Sortu fasti bosroiti wi musu abi?

²³ Luku san pasa nanga wan disipel di nen Tabita, noso Dorkas. c A ben e libi na ini Yope, wan foto di no ben de fara fu Lida. A ret’ati s’sa disi ben e gebroiki en ten nanga den gudu fu en na wan koni fasi, fu di a „ben du furu bun sani èn a ben meki furu sani gi den pôtisma”. Ma wantronso a kon siki èn a dede. A sani dati meki taki den disipel na ini Yope ben e sari srefsrefi. Dati ben de so spesrutu nanga den umasma di a masra fu den dede. Den uma disi ben lobi Tabita fu di a ben du bun gi den. Di Petrus doro na a oso pe sma ben e sreka Tabita en skin fu beri en, dan a du wan wondru di nowan fu den apostel fu Yesus Krestes ben du ete. Petrus begi èn baka dati a gi Tabita wan opobaka! Yu kan ferstan taki den umasma di a masra fu den dede èn sosrefi den tra disipel ben e prisiri srefsrefi di Petrus kari den kon baka na ini a kamra fu si taki Tabita ben de na libi. A ben musu fu de so taki den sani disi gi den dek’ati fu hordoro te tesi ben o miti den! A no de fu taki dati „na ini heri Yope sma kon yere fu a tori disi èn furu fu den bigin bribi na ini Masra”.​—Tori 9:36-42.

²⁴ Wi e leri tu prenspari sani fu a moi tori disi fu Tabita. (1) A libi syatu. Dati meki a de tumsi prenspari taki wi e kon abi wan bun matifasi nanga Gado, aladi okasi de ete fu du dati! (Preik. 7:1) (2) A howpu di wi abi fu kisi wan opobaka na wan trutru howpu. Yehovah ben si den someni bun sani di Tabita ben du èn a blesi en. A o memre a  tranga wroko di wi du èn a o gi wi wan opobaka efu wi dede fosi Armagedon (Hebr. 6:10). Sobun, awansi wi e libi na ini „muilek ten”, noso na ini wan pisi ten pe ’ala sani tiri’, meki wi tan preiki finfini fu Krestes.​—2 Tim. 4:2.