1-3. (a) Na ini sortu muilek situwâsi Stefanus de, ma san a e du? (b) Na sortu aksi wi o poti prakseri?

 STEFANUS e tnapu na fesi krutu. A de na ini wan kfalek moi kamra di bigi èn 71 man e sdon na en lontu. A kan taki a kamra disi de krosbei fu a tempel na ini Yerusalem. Tide a Grankrutu kon makandra fu krutu Stefanus. Den krutuman na prenspari man di abi furu makti èn furu fu den no abi nowan enkri lespeki gi a disipel disi fu Yesus. Fu taki en leti, a man di seti a krutu disi na Granpriester Kayafas di ben e teki fesi di a Grankrutu gi Yesus Krestes dedestrafu wan tu mun na fesi. Stefanus e frede?

² Wan spesrutu sani de fu si na Stefanus en fesi. Den krutuman e piri den ai luku a fesi fu Stefanus èn den e si taki en fesi de „leki a fesi fu wan engel” (Tori 6:15). Engel e tyari boskopu kon fu Yehovah Gado èn dati meki den no e frede noti. Den no e bruya. Na so a de nanga Stefanus èn srefi den krutuman di e teige en man si dati. Fa a du kon taki a no e frede?

³ Kresten na ini a ten disi kan leri furu sani fu a piki na tapu na aksi dati. Wi musu kon sabi tu fa Stefanus kon de na ini a muilek situwâsi disi. Fa a ben opo taki gi a bribi fu en na tra okasi? Fa wi kan teki na eksempre fu en?

4, 5. (a) Fu san ede wi kan taki dati Stefanus ben e du furu sani gi a gemeente? (b) Fu san ede wi kan taki dati Stefanus ben de ’wan man di Gado ben horbaka gi èn di ben e Gado gi furu krakti’?

⁴ Wi si kba taki Stefanus ben de wan disipel di ben e du furu sani gi a nyun Kresten gemeente. Na ini kapitel 5 fu a buku disi, wi si taki a ben de wan fu den seibi man di ben abi sakafasi èn di ben de klar’klari  fu yepi den apostel te dati ben de fanowdu. Wi e kisi moro warderi gi a sakafasi fu en te wi e hori na prakseri taki Gado ben blesi a man disi nanga furu grani. Na ini Tori fu den apostel 6:8 wi e leisi taki a ben man du „bigi wondru nanga bigi sani”, neleki sonwan fu den apostel. Wi e leisi tu taki a ben de wan man di ’Gado ben e horbaka gi en èn ben e gi furu krakti’. San dati ben wani taki?

⁵ Soleki fa a sori, Stefanus ben abi switifasi èn dati meki sma ben lobi en. A ben taki na so wan fasi dati a ben man meki furu fu den arkiman fu en bribi den sani di a taki. Den ben si taki a ben abi wan krin ati èn taki den tru tori di a ben e taki ben kan tyari wini kon gi den. A ben abi furu krakti fu di a yeye fu Yehovah ben de na en tapu èn nanga sakafasi a ben e teki a tiri fu a yeye dati. Aladi a ben koni èn a ben man du sani bun, tòg a no ben abi bigifasi. Na presi fu dati a gi Yehovah ala grani èn a ben e broko en ede na wan lob’ati fasi nanga den sma di ben e arki en. Dati meki a no e ferwondru wi taki den gensman fu en ben feni taki a ben o tyari problema kon gi den!

6-8. (a) Gi sortu tu sani den gensman fu Stefanus tyari en go na fesi krutu èn fu san ede den du dati? (b) Fu san ede Kresten na ini a ten disi kan leri furu fu na eksempre fu Stefanus?

⁶ Difrenti man opo fu har’taki nanga Stefanus, ma „den no ben man nanga Stefanus, fu di a ben e taki nanga koni èn nanga yepi fu a santa yeye”. a Fu di den ati ben e bron meki „kibrikibri den kisi wan tu sma so fara” fu ferteri lei fu a ret’ati bakaman disi fu Krestes. Boiti dati, den meki a pipel èn den owru man nanga den leriman fu Wet „ati bron nanga Stefanus”, so taki den grabu Stefanus tyari go na fesi a Grankrutu fu den Dyu (Tori 6:9-12). Den gensman tyari en go na fesi krutu fu di den feni taki a du den tu sani disi: A ben e taki ogri fu Gado èn fu Moses. Fa so?

⁷ Den leiman ben taki dati Stefanus ben taki ogri fu Gado, fu di a ben tan taki takru sani fu „a santa presi disi” noso a tempel na ini Yerusalem (Tori 6:13). Den ben feni taki a ben taki ogri fu Moses, fu di a no ben taki bun fu a Wet di Gado gi Moses èn fu di a ben wani kenki den furu gwenti nanga leri fu den afo fu den di Gado ben meki den kon sabi nanga yepi fu Moses. Disi ben de wan seryusu tori, bika na a ten dati den Dyu ben si a tempel leki wan tumsi prenspari sani. Na so den ben denki tu fu den pkinpkin sani fu a Wet di Gado gi Moses èn fu den furu gwenti nanga leri fu den afo fu den di  den ben kon si leki wan pisi fu a Wet dati. Sobun, sma ben feni taki Stefanus ben de wan kfalek ogri man di ben musu dede!

⁸ A sari fu si taki kerkisma e taki lei tu fu gens den futuboi fu Gado. Te na a dei fu tide, kerkisma di e gens wi e sutu faya son leisi so taki tiriman e ferfolgu Yehovah Kotoigi. San wi musu du te sma e taki sani fu wi di no tru? Wi kan leri furu fu Stefanus.

9, 10. San sma di e krutu sani taki fu a taki di Stefanus ben hori na fesi a Grankrutu fu den Dyu èn san wi musu hori na prakseri?

⁹ Wi ben si na a bigin fu a kapitel disi taki di Stefanus ben tnapu na fesi krutu e yere san sma ben taki fu en, dan a fesi fu en ben gersi a di fu wan engel èn a no ben e bruya srefsrefi. Ne Kayafas drai luku en èn a taki: „Den sani disi tru?” (Tori 7:1) Stefanus ben musu taki now èn na dati a du!

¹⁰ Son sma feni taki aladi Stefanus ben taki langa, tòg a no gi piki na tapu den sani di sma ben krutu en gi. Ma fu taki en leti, Stefanus sori wi wan heri moi fasi fu „opo taki” gi a bun nyunsu (1 Petr. 3:15). Hori na prakseri taki sma ben krutu Stefanus taki a ben taki ogri fu Gado fu di a no ben taki bun fu a tempel. Sma ben krutu en tu taki a ben taki ogri fu Moses, fu di a no ben taki bun fu a Wet. Di Stefanus piki den gensman, dan a taki syatu fu dri pisi ten na ini a historia fu den Israelsma. A ben poti prakseri finfini na spesrutu tori. Meki wi poti prakseri na ibriwan fu den dri pisi ten dati.

11, 12. (a) Fa Stefanus taki na wan moi fasi fu na eksempre fu Abraham? (b) Fu san ede Stefanus ben taki fu Yosef?

¹¹ A pisi ten fu den famiri-edeman (Tori 7:1-16). Stefanus bigin taki fu Abraham, di den Dyu ben e lespeki fu di a ben abi wan tranga bribi. Di Stefanus taki fu den prenspari sani disi di den krutuman ben sabi, dan a sori krin taki Abraham ben de na ini Mesopotamia, di Yehovah „a Gado di abi glori”, ben sori ensrefi na en fu a fosi leisi (Tori 7:2). Fu taki en leti, Abraham ben e libi na ini a Pramisi Kondre leki wan trakondre sma. Abraham no ben abi wan tempel èn a no ben abi a Wet di Gado gi Moses. Fa wan sma ben kan taki dati wan tempel noso a Wet ben de fanowdu fu anbegi Gado na a yoisti fasi?

¹² Den krutuman ben abi bigi lespeki tu gi Yosef, Abraham en bakapkin. Ma Stefanus memre den taki Yosef en eigi brada, den afo fu den lo fu Israel, ben ferfolgu a ret’ati man dati èn den seri en leki srafu. Tòg Gado gebroiki Yosef fu ferlusu den Israelsma di angriten miti den. A no de fu taki dati Stefanus ben si krin taki den srefi sortu sani  di miti Yosef, miti Yesus Krestes. Ma a no taki fu den sani dati, fu di a ben wani taki den krutuman tan arki en.

13. Fa den sani di Stefanus ben taki fu Moses, sori den krutuman krin taki a no ben taki ogri fu Moses? Sortu prenspari tori a ben e tyari kon na krin?

¹³ A ten fu Moses (Tori 7:17-43). Stefanus ben taki furu sani fu Moses. A ben bun taki a ben du dati, fu di furu memre fu a Grankrutu fu den Dyu ben de Saduseiman di no ben bribi san skrifi na ini den Bijbel buku boiti den wan di Moses ben skrifi. Hori na prakseri tu taki sma ben krutu Stefanus taki a ben taki ogri fu Moses. Di Stefanus piki, a sori krin taki dati no tru, bika a sori den taki a ben abi bigi lespeki gi Moses èn gi a Wet (Tori 7:38). A ben taki dati den sma di Moses ben wani ferlusu, no ben wani Moses tu leki a ferlusuman fu den. A sani dati ben psa di Moses ben abi 40 yari. Moro leki 40 yari baka dati, den sori na difrenti okasi taki den no ben e lespeki en leki a fesiman fu den. b Na so Stefanus tyari wan prenspari tori saf’safri kon na krin: A pipel fu Gado ben gwenti fu opo densrefi teige den wan di Yehovah ben poti fu teki fesi.

14. San Stefanus ben wani tyari kon na krin di a taki fu Moses?

¹⁴ Stefanus ben memre den krutuman taki Moses ben taki na fesi dati wan profeiti neleki Moses ben o opo na ini Israel. Suma ben o de a profeiti dati èn sma ben o arki en? Stefanus piki den aksi dati na a kba fu a taki fu en. A taki fu ete wan prenspari tori: Moses ben kon si taki iniwan gron kan kon santa, neleki fa a ben de nanga a gron na a makabusi di ben e bron, pe Yehovah ben taki nanga en. Sobun, a de so taki sma di wani anbegi Yehovah musu go na wán spesrutu gebow nomo, soleki a tempel na ini Yerusalem? Meki wi go luku.

15, 16. (a) Fu san ede a ben de prenspari taki Stefanus ben taki fu a tabernakel? (b) Fu san ede Stefanus ben taki fu a tempel fu Salomo?

 ¹⁵ A tabernakel nanga a tempel (Tori 7:44-50). Stefanus ben memre den krutuman taki fosi wan tempel ben bow na ini Yerusalem, Gado ben taigi Moses fu bow wan tabernakel. Dati ben de wan sortu tenti pe den ben kan anbegi Gado èn den ben kan tyari a tenti dati go na ala sei pe den ben e go. Suma ben o prefuru fu taki dati a tabernakel no ben prenspari so leki a tempel, efu Moses srefi ben anbegi Gado drape?

¹⁶ Bakaten di Salomo bow a tempel na ini Yerusalem, dan a yeye fu Yehovah meki a taki wan prenspari sani na ini a begi fu en. Soleki fa Stefanus e taki, dan „a Moro Heiwan no e tan na ini oso di libisma meki nanga anu” (Tori 7:48; 2 Kron. 6:18). Yehovah kan gebroiki a tempel fu meki a wani fu en kon tru, ma a no e tan na ini. Sobun, fu san ede den anbegiman fu en musu denki taki den kan anbegi en soso na ini wan gebow di libisma meki? Na a kba fu a taki fu en, Stefanus taki den krin wortu di skrifi na ini Yesaya: „Hemel na mi kownusturu èn grontapu na mi futubangi. Sortu oso unu o bow gi mi?, na so Yehovah taki. Sortu presi unu kan meki gi mi fu tan? A no mi anu meki ala den sani disi?”​—Tori 7:49, 50; Yes. 66:1, 2.

17. Fa den sani di Stefanus ben taki, ben sori (a) taki den krutuman no ben ferstan sani bun èn (b) taki a no ben du nowan ogri?

¹⁷ Te yu e luku den sani di Stefanus taigi a Grankrutu fu den Dyu, dan a de krin taki a ben sori den krutuman na wan koni fasi taki den no ben ferstan sani bun. Te Yehovah e du san a abi na prakseri a no e du dati na a srefi fasi doronomo, ma son leisi a du sani na wan tra fasi te a feni en fanowdu. Den sma di ben abi tumsi tranga lobi gi a moi tempel na ini Yerusalem èn gi den gwenti di ben abi fu du nanga a Wet di Gado gi Moses, no ben e ferstan srefsrefi san ben de a marki fu a Wet nanga a tempel! Fu taki en leti, den sani di Stefanus taki e poti prakseri na a tumsi prenspari sani disi: A moro bun fasi fa yu kan gi yesi na Yehovah, na te yu e lespeki a Wet nanga a tempel. Iya, den sani di Stefanus ben taki ben sori na wan tumsi moi fasi taki a no ben du nowan ogri, bika a ben gi yesi na Yehovah so bun leki a ben man.

18. Na sortu fasi wi kan teki na eksempre fu Stefanus?

¹⁸ San wi kan leri fu den sani di Stefanus taki? Stefanus ben sabi Bijbel heri bun. Neleki Stefanus wi musu studeri Gado Wortu bun tu efu wi wani gebroiki „a tru leri na ini Gado wortu na wan yoisti fasi” (2 Tim. 2:15). Stefanus e leri wi tu fa fu taki na wan lespeki fasi èn sondro fu hati den firi fu trawan. Den krutuman ati ben e bron srefsrefi! Ma solanga leki a ben man, Stefanus tan taki fu sani di den man dati  ben e lespeki srefsrefi so taki den tan arki en. A taki na wan lespeki fasi tu nanga den fu di a kari den owru man „mi lespeki brada” (Tori 7:2). Na so wi tu musu ferteri sma den tru tori fu Gado Wortu „na wan safri fasi èn nanga bigi lespeki”.​—1 Petr. 3:15.

19. Fa Stefanus taigi a Grankrutu fu den Dyu sondro frede san na a krutuboskopu fu Yehovah?

¹⁹ Ma aladi wi no wani hati den firi fu sma, tòg dati no e tapu wi fu ferteri den sma disi den tru tori fu Gado Wortu. Wi no e frede tu fu meki sma kon sabi krin san na den krutuboskopu fu Yehovah. Na eksempre fu Stefanus e sori dati krin. Iya, a ben man si taki nowan fu den buweisi di a gi a Grankrutu fu den Dyu naki na ati fu den krutuman disi di no ben firi gi trawan. Sobun, te fu kba Stefanus sori den krutuman nanga yepi fu a santa yeye èn sondro fu frede taki den ben de neleki den afo fu den di ben opo densrefi teige Yosef, Moses, nanga ala den profeiti (Tori 7:51-53). Fu taki en leti, den krutuman disi fu a Grankrutu fu den Dyu ben kiri a Mesias, a man di Moses nanga ala den profeiti ben taki krin dati a ben o kon. Fu tru, den ben trangayesi a Wet di Gado gi Moses na a moro ogri fasi!

20, 21. San a Grankrutu fu den Dyu du di den yere den sani di Stefanus taigi den? Fa Yehovah gi Stefanus dek’ati?

²⁰ Fu di a ben de krin taki Stefanus no ben e lei, meki den krutuman kisi bigi atibron. Den no ben man tyari densrefi na wan lespeki fasi moro èn den kaw tifi fu di den ati ben e bron nanga Stefanus. A ret’ati man dati ben musu fu si taki den no ben o sori sar’ati nanga en, neleki fa den no ben sori dati gi Yesus, a Masra fu en.

²¹ Stefanus ben musu abi dek’ati fu man psa den sani di ben o miti en. A no de fu taki dati a kisi furu dek’ati fu a fisyun di Yehovah gi en na wan lob’ati fasi na a ten dati. Stefanus si a glori fu Gado èn a si Yesus e tnapu na a ret’anusei fu Yehovah! Di Stefanus ferteri den krutuman san a si na ini a fisyun, dan den tapu den yesi nanga den anu. Fu san ede? Wan pisi ten na fesi, Yesus ben taigi a srefi krutubangi dati taki a ben de a Mesias èn taki heri esi a ben o sdon na a ret’anusei fu en P’pa (Mark. 14:62). A fisyun fu Stefanus ben sori taki Yesus ben taki san tru. Fu taki en leti, a Grankrutu fu den Dyu dati tori a Mesias èn den kiri en! Den alamala lon kon na tapu Stefanus, den grabu en èn den meki sma ston en kiri. c

22, 23. Fu san ede wi kan taki dati Stefanus dede bijna na a srefi fasi leki a Masra fu en èn fa Kresten na ini a ten disi kan abi a srefi fertrow di Stefanus ben abi?

 ²² Wi kan taki dati Stefanus dede bijna na a srefi fasi leki fa a Masra fu en dede. Iya, a dede nanga wan korostu firi, nanga bigi fertrow na ini Yehovah èn sondro fu abi bit’ati gi den sma di ben e kiri en. A ben taki: „Masra Yesus, teki mi libi.” Kande a ben taki dati fu di a ben man si a fisyun ete pe a Manpkin fu libisma ben de makandra nanga Yehovah. A no de fu taki dati Stefanus ben sabi den wortu fu Yesus di ben e gi sma dek’ati. Yesus ben taki: „Mi na a opobaka nanga a libi” (Yoh. 11:25). Te fu kba, Stefanus begi Gado langalanga nanga wan tranga sten: „Yehovah, no strafu den fu a sondu disi di den du.” Baka di a taki dati, a dede.​—Tori 7:59, 60.

²³ Na so Stefanus tron a fosi bakaman fu Krestes di dede fu en bribi ede, soleki fa Bijbel e taki. (Luku a faki di nen „ Stefanus dede fu di a ben e gi kotoigi”.) Ma a de wan sari sani taki a no ben o de a lastiwan. Sensi a ten dati te nanga a dei fu tide, ogr’ati kerkisma, fayafaya politiekman nanga tra ogr’ati gensman, kiri wan tu fu den ret’ati futuboi fu Yehovah. Tòg wi kan abi a srefi fertrow di Stefanus ben abi. Yesus e tiri now leki Kownu nanga bigi makti di a kisi fu en Papa. Noti o man tapu en fu gi den ret’ati bakaman fu en wan opobaka.​—Yoh. 5:28, 29.

24. Fa Saulus ben horbaka gi den sma di kiri Stefanus èn sortu bun bakapisi a dede fu a ret’ati man dati ben abi langa ten baka dati?

²⁴ Wan yonguman di nen Saulus, ben tnapu e luku ala den sani di ben e psa. A ben feni en bun taki sma kiri Stefanus èn a ben e hori wakti srefi na den krosi fu den sma di ben e trowe ston na tapu Stefanus. Syatu baka dati, Saulus teki fesi di sma bigin ferfolgu den Kresten na wan ogr’ati fasi na ala sei. Ma a dede fu Stefanus ben o abi bun bakapisi ete langa ten baka dati. Na eksempre fu Stefanus ben o tranga den tra Kresten fu tan gi yesi na Gado èn fu hordoro te na a kba neleki en. Boiti dati, Saulus ben o taki bakaten dati a ben e sari taki a ben horbaka gi den sma di ben kiri Stefanus. Na ini den yari baka dati, sma ben o kari en Paulus moro furu (Tori 22:20). A ben yepi sma fu kiri Stefanus, ma bakaten a ben o taki: „Mi ben de wan sma di ben e taki ogri fu Gado, di ben e frufolgu sma èn di no ben abi syen” (1 Tim. 1:13). A de krin taki Paulus noiti no fergiti a kfalek moi fasi fa Stefanus ben taki a dei dati. Fu taki en leti, son sani di Paulus ben taki èn ben skrifi, ben abi fu du nanga sani di Stefanus ben taki di a ben de na fesi a Grankrutu (Tori 7:48; 17:24; Hebr. 9:24). Baka wan pisi ten, Paulus kon leri fu sori bribi nanga dek’ati neleki Stefanus, ’wan man di Gado ben e horbaka gi en èn di a ben gi furu krakti’. Na aksi di e opo kon now na: Wi o du dati tu?