1-6. Ferteri wan ondrofenitori di e sori taki Yehovah Kotoigi e preiki na ini ala sortu situwâsi.

 REBECCA, wan yongu Kotoigi fu Yehovah na ini Gana, ben e si a skoro fu en leki a kontren pe a kan preiki. Na ini en skorotas a ben abi buku nanga tijdschrift di e taki fu Bijbel. Te a abi pauze, a ben e suku okasi fu preiki gi pkin fu en skoro. Rebecca ben bigin studeri Bijbel nanga wan tu fu den pkin fu en klas.

² Na tapu na èilanti Madagaskar, krosbei fu na owstusei fu Afrika, tu pionier ben gwenti waka sowan 25 kilometer na ini a bun faya son fu go na wan farawe dorpu. Drape den ben e studeri Bijbel nanga wan tu sma di wani kon sabi moro fu Gado.

³ Fu man doro den sma di e libi na sei Paragwei-liba nanga Paraná-liba, dan Kotoigi na ini Paragwei makandra nanga Kotoigi fu 15 tra kondre, wroko makandra fu bow wan boto. A boto disi man tyari 45 ton èn a man hori sowan 12 sma. Den fayafaya Kownukondre preikiman gebroiki a boto disi fu preiki a bun nyunsu na ini kontren pe sma no ben man doro fosi.

⁴ Na den kontren te na a noordsei fu grontapu, Kotoigi fu Alaska gebroiki a moi okasi di den ben abi fu preiki na a ten te furu sma e kon drape nanga fakansi. Na a waran ten fu a yari, bigi sipi di lai nanga sma fu difrenti kondre, e kon drape. Na den okasi dati, Kotoigi fu Alaska go na a lanpe fu miti den sma nanga Bijbel buku nanga tijdschrift di skrifi na ini furu difrenti tongo. Den ben e seti den buku nanga tijdschrift disi na so wan fasi taki den ben e hari sma kon fu kon luku. Na ini a srefi kontren dati, Kotoigi gebroiki wan opolani fu doro den farawe dorpu. Na so den man preiki a bun nyunsu gi den Aleutsma, den Atapaskansma, den Tyimesyansma, nanga den Telingitsma.

⁵ Larry, di e libi na ini Texas, na Amerkankondre, ben abi wan aparti kontren pe a ben e preiki. Dati na wan oso pe owru sma ben e tan di no man sorgu densrefi moro. Larry ben e libi na ini na oso  dati fu di a ben kisi wan mankeri di ben meki taki a ben musu sdon na ini wan rolsturu. Ma tòg a tan preiki fayafaya. A ferteri trawan fu a Kownukondre èn fu a howpu di Bijbel gi en taki te a Kownukondre o tiri, a o man waka baka.​—Yes. 35:5, 6.

⁶ Wan grupu Kotoigi fu Mandalay, teki boto fu go na wan bigi konmakandra na noordsei fu Mianmar èn den ben de na pasi dri dei langa. Fu di den ben de fayafaya fu preiki a bun nyunsu, meki den tyari Bijbel buku nanga tijdschrift go nanga den èn den prati den gi tra sma di ben de tu na ini a boto. Ibri leisi te a boto ben e stop na wan foto noso dorpu, dan den fayafaya preikiman ben e saka èn es’esi den ben e waka na ini a heri foto noso dorpu fu gi den sma drape buku nanga tijdschrift. Na a srefi ten, tra sma ben e kon na ini a boto èn te den Kownukondre preikiman ben drai kon baka na a boto, dan den ben e preiki gi den sma dati tu.

7. Na sortu fasi anbegiman fu Yehovah e preiki fu Gado Kownukondre èn fu san ede den e du a wroko disi?

⁷ Disi na soso wan tu eksempre. Ma den e sori fa brada nanga s’sa na heri grontapu, di de fayafaya anbegiman fu Yehovah, e „preiki finfini fu Gado Kownukondre” (Tori 28:23). Den e preiki oso fu oso, den e taki nanga sma na strati, den e skrifi brifi èn den e bèl sma fu preiki gi den. Awansi den e sdon na ini wan bus, awansi den e waka e koiri, noso awansi den abi pauze na wroko, tòg den e suku ibri okasi fu preiki fu Gado Kownukondre. Kande den alamala abi den eigi fasi fa den e preiki a bun nyunsu, ma den abi a srefi sani na prakseri. Dati na fu preiki a bun nyunsu gi ala sortu sma awansi pe den e miti den.​—Mat. 10:11.

8, 9. (a) Fu san ede a fasi fa a Kownukondre preikiwroko e go na fesi, na wan wondru? (b) Sortu moi aksi opo kon èn san wi musu du fu man kisi piki na tapu na aksi dati?

⁸ Lespeki leisiman, a de so taki yu na wan fu den someni Kownukondre preikiman na ini moro leki 235 kondre, di e teki prati na a preikiwroko? Efu dati de so, dan yu e yepi tu fu meki a tumsi moi Kownukondre preikiwroko disi go na fesi! A no de fu taki dati a wroko di den preikiman du na heri grontapu na wan wondru. Yehovah Kotoigi kisi bun furu problema nanga tesi, iya, na son presi lanti tapu a wroko fu den èn den e kisi hebi ferfolgu. Ma aladi den sani disi miti den,tòg den e tan preiki finfini fu Gado Kownukondre gi sma fu ala kondre.

⁹ A fiti fu poti prakseri na a tumsi moi aksi disi: Fu san ede nowan enkri sani, sosrefi nowan gens fu Satan, ben man tapu a  Kownukondre preikiwroko? Fu kisi piki na tapu na aksi dati, dan wi musu luku fa sani ben waka na ini a fosi yarihondro. Te yu luku en bun, dan wi leki Kotoigi fu Yehovah na ini a ten disi, e go doro nanga a wroko di ben bigin na a ten dati.

10. San Yesus ben e du fayafaya èn san a ben sabi fu a wroko disi?

¹⁰ Yesus Krestes, a sma di seti a Kresten gemeente, ben e preiki a bun nyunsu fu Gado Kownukondre fayafaya tu. Dati ben de a moro prenspari wroko gi en. Wan leisi a ben taki: „Mi musu go fruteri a bun nyunsu fu Gado Kownukondre na tra foto tu, bika na fu disi Gado ben seni mi kon” (Luk. 4:43). Yesus ben sabi taki a ben e bigin nanga wan wroko di a no ben o man du en w’wan. Syatu bifo a dede, a taki dati a Kownukondre boskopu ben o preiki „na ala kondre” (Mark. 13:10). Ma fa a wroko dati ben o du èn suma ben o du en?

11. Sortu prenspari wroko Yesus ben gi den disipel fu en èn fa a ben o yepi den nanga a wroko disi?

¹¹ Baka di Yesus dede èn a kisi wan opobaka, dan a sori ensrefi na den disipel fu en èn a gi den a tumsi prenspari wroko disi: „Fu dati ede, go na sma fu ala kondre èn meki den tron disipel. Dopu den na ini a nen fu a Tata, fu a Manpikin, èn fu a santa yeye. Leri den fu du ala san mi taigi unu fu du. Unu o si taki mi o de nanga unu ala dei te na a kaba fu a grontapu disi” (Mat. 28:19, 20). Den wortu „mi o de nanga unu” e sori taki a ben o horbaka gi den disipel fu en te den ben o preiki a bun nyunsu èn te den ben o meki disipel. Den ben o abi a yepi dati fanowdu, bika Yesus ben taki dati „na ini ala kondre sma o teige” den (Mat. 24:9). Den disipel ben o kisi yepi na ete wan fasi. Syatu bifo Yesus go na hemel, a taigi den disipel taki den ben o kisi krakti fu a santa yeye fu de kotoigi fu en „te na den moro farawe presi fu grontapu”.​—Tori 1:8.

12. Sortu prenspari aksi e opo kon èn fu san ede a de tumsi prenspari taki wi sabi a piki na tapu den aksi dati?

¹² Now wan tu prenspari aksi e opo kon: A de so taki den apostel fu Yesus nanga den disipel fu a fosi yarihondro ben e si a wroko leki wan seryusu sani? A de so taki a pkin grupu Kresten man nanga uma disi ben e preiki finfini fu Gado Kownukondre, awansi den ben e kisi hebi ferfolgu? Di den ben e meki disipel, dan a de so trutru taki den kisi yepi fu Yehovah, Yesus Krestes nanga den  engel èn fu Gado en santa yeye? Na ini a Bijbel buku Tori fu den apostel, wi e kisi piki na tapu den aksi disi èn sosrefi na tapu trawan. A de tumsi prenspari taki wi sabi a piki na tapu den aksi disi. Fu san ede? Yesus ben pramisi taki a wroko di a ben gi den disipel fu en ben o go doro „te na a kaba fu a grontapu disi”. Sobun, ala tru Kresten musu du a wroko disi, sosrefi wi di e libi na ini a ten disi fu a kba. Dati meki wi e angri fu kon sabi den fosten tori di skrifi na ini Tori fu den apostel.

13, 14. (a) Suma skrifi Tori fu den apostel èn fa a skrifiman kon sabi den sani di a skrifi na ini a buku? (b) Sortu sani skrifi na ini Tori fu den apostel?

¹³ Suma skrifi Tori fu den apostel? A nen fu a skrifiman no kari na ini a Bijbel buku, ma den wortu na a bigin e sori taki a skrifiman na a srefi sma di skrifi na Evangelietori fu Lukas (Luk. 1:1-4; Tori 1:1, 2). Sobun, langa ten kba sma ben e si Lukas, di ben de wan ’lobi brada, wan datra’ nanga wan bun historia skrifiman, leki a sma di skrifi Tori fu den apostel (Kol. 4:14). A buku e taki fu sani di psa na ini wan pisi ten fu 28 yari. Dati ben de fu a ten di Yesus go na hemel na ini a yari 33 teleki a ten di na apostel Paulus kba koti strafu na ini Rome na a ten fu a yari 61. Na ini a tori di Lukas skrifi, a e gebroiki a wortu „den” èn tra leisi a e gebroiki a wortu „wi”. Disi e sori taki kande ensrefi ben de na furu fu den okasi di a e taki fu den (Tori 16:8-10; 20:5; 27:1). Fu di Lukas ben de wan sma di ben e ondrosuku sani finfini, meki a kan taki san a skrifi, a yere fu Paulus, Barnabas, Filipus, nanga tra sma di kari na ini Tori fu den apostel.

¹⁴ Sortu sani skrifi na ini Tori fu den apostel? Na ini na Evangelietori di Lukas skrifi, a ben ferteri kba fu den sani di Yesus ben taki èn ben du. Ma na ini Tori fu den apostel, Lukas e ferteri san den bakaman fu Yesus ben taki èn ben du. Sobun, a buku disi e taki fu sma di du wan spesrutu wroko, aladi trawan ben e si den leki sma di ’no ben kisi furu skoro èn di ben de gewoon sma’ (Tori 4:13). Fu taki en syatu, Tori fu den apostel di skrifi nanga yepi fu a santa yeye, e ferteri wi fa a Kresten gemeente ben bigin èn fa a gro. A e sori fa den Kresten fu a fosi yarihondro ben e preiki èn fa den ben e si a wroko disi (Tori 4:31; 5:42). A e sori tu fa a santa yeye yepi den fu prati a bun nyunsu (Tori 8:29, 39, 40; 13:1-3; 16:6; 18:24, 25). Tori fu den apostel e poti prakseri na a moro prenspari tori fu Bijbel. Wán sani di abi fu du nanga a tori disi na taki Gado  o santa a nen fu en nanga yepi fu a Kownukondre di Krestes o tiri. A e sori tu na sortu moi fasi a Kownukondre boskopu prati, aladi sma ben e gens a wroko disi srefsrefi.​—Tori 8:12; 19:8; 28:30, 31.

15. Na sortu fasi wi o kisi wini te wi e ondrosuku Tori fu den apostel?

¹⁵ A no de fu taki dati te wi ondrosuku a Bijbel buku Tori fu den apostel, dan dati o gi wi prisiri trutru èn a bribi fu wi o kon moro tranga. Te wi e luku fa den fosi bakaman fu Krestes ben e sori dek’ati èn fa den ben e preiki so fayafaya, dan dati o naki wi ati trutru. A o gi wi dek’ati fu sori a srefi bribi leki wi Kresten brada nanga sisa fu a fosi yarihondro. Na so wi o sabi moro bun fa fu du a wroko di wi kisi fu ’go na sma . . . èn fu meki den tron disipel’. A buku di yu e leisi now, skrifi fu yepi yu fu studeri Tori fu den apostel finfini.

16. San na dri fasi fa a buku disi e yepi wi?

¹⁶ Na sortu fasi a buku disi kan yepi wi? A kan yepi wi na dri fasi: (1) A e tranga a bribi di wi abi taki Yehovah e gebroiki en santa yeye fu horbaka gi a Kownukondre preikiwroko èn gi a wroko fu meki disipel. (2) A e yepi wi fu kisi moro faya gi a preikiwroko te wi e luku na eksempre fu den fosi bakaman fu Krestes. (3) A e meki wi kisi moro lespeki gi Yehovah en organisâsi èn gi den wan di e teki fesi na ini a preikiwroko èn na ini den gemeente.

17, 18. Fa a buku disi seti èn sortu sani na ini o yepi yu te yu e studeri Bijbel?

¹⁷ Fa a buku disi seti? Yu o si taki a prati na ini aiti pisi èn ibriwan fu den pisi disi e taki fu wan tu kapitel fu Tori fu den apostel. Den kapitel di e kon now no e taki fu ibri vers fu Tori fu den  apostel, ma den e poti prakseri na sani di wi kan leri fu den tori di skrifi na ini a Bijbel buku dati. Den e yepi wi tu fu kon si fa wi kan fiti den sani di wi leri. Na a bigin fu ibri kapitel, wan tu wortu skrifi di e sori san na den prenspari sani na ini a kapitel dati. Wan tekst skrifi tu fu sori fu sortu pisi fu Tori fu den apostel wi o taki.

¹⁸ A buku disi abi tra sani tu di o yepi yu te yu e studeri Bijbel. Te yu e poti prakseri na wan pisi fu Tori fu den apostel, dan den moi prenki di abi fu du nanga den span tori na ini a Bijbel buku disi, o yepi yu fu si na yu fesi san ben e psa. Furu kapitel abi faki di e taki fu moro sani di o yepi yu. Wan tu faki e taki fu wan sma na ini Bijbel di de wan eksempre gi yu fu di a ben abi wan tranga bribi. Son faki e ferteri moro fini fu spesrutu presi, fu sani di psa, fu gwenti, noso fu tra sma di kari na ini Tori fu den apostel.

19. Sortu sani wi musu aksi wisrefi ten na ten?

¹⁹ A buku disi kan yepi yu fu ondrosuku yusrefi nanga wan krin ati. Awansi o langa yu de wan Kownukondre preikiman kba, tòg a bun fu teki ten son leisi fu luku san na den moro prenspari sani na ini yu libi èn fa yu e si a Kresten diniwroko (2 Kor. 13:5). Aksi yusrefi a sani disi: ’Mi e tan du a diniwroko fu mi na wan fasi di e sori taki mi sabi taki a ten kon syatu? (1 Kor. 7:29-31) Te mi e preiki a bun nyunsu, dan mi e du dati fayafaya èn sma man si taki mi e bribi san mi e taki? (1 Tes. 1:5, 6) Mi e du ala san mi man fu teki prati na a preikiwroko èn na a wroko di wi kisi fu meki disipel?’​—Kol. 3:23.

20, 21. Fu san ede a wroko fu wi prenspari srefisrefi èn sortu fasti bosroiti wi musu abi?

²⁰ Meki wi tan hori na prakseri taki wi kisi wan prenspari wroko fu du èn dati na fu preiki a bun nyunsu èn fu meki disipel. Ibri dei di e psa, a wroko dati e kon moro prenspari. A kba fu a grontapu disi e kon moro krosbei heri esi. Noiti ete someni sma ben de di ben kan lasi den libi. Wi no sabi omeni ret’ati sma de ete di o arki a boskopu fu wi (Tori 13:48). Ma na wi abi a frantwortu fu yepi den sma disi fosi a lati tumsi.​—1 Tim. 4:16.

²¹ Fu dati ede a de tumsi prenspari taki wi e teki na eksempre fu fayafaya Kownukondre preikiman fu a fosi yarihondro. Wi howpu taki te yu studeri a buku disi finfini, dan dati o gi yu dek’ati fu preiki nanga moro faya èn sondro frede. Meki a bosroiti di yu abi fu tan „preiki finfini fu Gado Kownukondre” kon moro tranga.​—Tori 28:23.