1-3. Fa Yesus e gwe libi den apostel fu en èn sortu aksi e opo kon?

 DEN wiki di psa ben moi srefsrefi gi den apostel! Den no wani taki den wiki disi kon na wan kba. Den man disi ben e sari srefsrefi, ma now den e prisiri trutru fu di Yesus kisi wan opobaka. Na ini den 40 dei di psa, Yesus sori ensrefi difrenti leisi na den bakaman fu en. A gi den moro leri èn a gi den dek’ati. Ma a dei disi, a e sori ensrefi na den a lasti leisi.

² Den apostel di e tnapu na tapu na Olèif-bergi makandra nanga Yesus, e arki bun san a abi fu taki. Ma aladi den apostel ben sa wani yere moro, tòg Yesus no e taki go doro. A e opo en anu go na loktu èn a e blesi den. Baka dati a e bigin opo go na loktu. Den bakaman fu en e tan luku en te a e opo go na loktu. Te fu kba, wan wolku e tapu  en so taki den no man si en moro. A gwe, ma den e tan luku go na hemel.​—Luk. 24:50; Tori 1:9, 10.

³ Na ondrofeni disi e tyari wan kenki kon na ini a libi fu den apostel fu Yesus. San den o du now di Yesus Krestes, a Masra fu den, opo go na hemel? Wi kan de seiker taki a Masra fu den sreka den fu go doro nanga a wroko di a ben bigin. Fa a sreka den gi a prenspari wroko disi èn fa den du a wroko disi? Sortu krakti dati abi na tapu Kresten na ini a ten disi? A fosi kapitel fu Tori fu den apostel e gi piki na tapu den aksi disi èn den piki disi o gi wi dek’ati.

4. Fa Lukas e bigin nanga a tori fu en di skrifi na ini Tori fu den apostel?

⁴ Wan pisi ten na fesi, Lukas ben skrifi na Evangelietori fu en gi Teofilus kba. a Na a bigin fu a buku Tori fu den apostel, Lukas e taki nanga a srefi man disi. Dyaso Lukas e bigin taki syatu fu den tori di a ben skrifi na a kba fu na Evangelietori fu en. A e gebroiki tra wortu fu taki fu den tori dati èn a e taki fu wan tu nyun sani tu. Na so a e sori taki na ini Tori fu den apostel a e taki moro fara fu den tori di a ben skrifi na ini a fosi buku fu en.

5, 6. (a) San o yepi den bakaman fu Yesus fu tan abi wan tranga bribi? (b) Fu san ede wi kan taki dati Kresten na ini a ten disi abi „de seiker” fu den sani di den e bribi?

⁵ San o yepi den bakaman fu Yesus fu tan abi wan tranga bribi? Tori fu den apostel 1:3 e taki fu Yesus: „A meki den si en furu leisi, so taki den ben o de seiker taki a ben de na libi.” Na ini Bijbel, soso Lukas, a ’lobi brada di ben de wan datra’, gebroiki a wortu di vertaal nanga „de seiker” (Kol. 4:14). Den wortu „de seiker” e sori taki den sani di skrifi de tru, yu kan fertrow den, iya, yu no abi fu tweifri srefsrefi na den. Yesus ben sori ensrefi furu leisi so taki den bakaman fu en ben o de seiker taki a kisi wan opobaka. Son leisi a sori ensrefi na wán noso tu fu den, son leisi na ala den apostel èn wán leisi a sori ensrefi na moro leki 500 bribiman (1 Kor. 15:3-6). Ala den buweisi disi ben tranga a bribi fu den bakaman fu Yesus.

⁶ Tru Kresten na ini a ten disi e bribi tu fu di den ’de seiker’. Buweisi  de taki Yesus ben libi na grontapu, taki a dede fu den sondu fu wi ede èn taki a kisi wan opobaka? Iya, buweisi de! Na ini Gado Wortu di skrifi nanga yepi fu santa yeye, sma di ben si sani nanga den eigi ai, e ferteri tori di e gi wi ala den krin buweisi di wi abi fanowdu. Te wi e poti prakseri na den tori disi èn te wi e begi Gado fu du san wi leri, dan dati kan tranga a bribi fu wi trutru. Hori na prakseri taki na te wi de seiker fu sani, dan dati e yepi wi fu kon abi trutru bribi. Wi musu abi trutru bribi fu man kisi têgo libi.​—Yoh. 3:16.

7. Fa Yesus ben de wan eksempre gi den bakaman fu en te yu e luku a fasi fa a ben e gi leri èn fa a ben e preiki?

⁷ Yesus ben e „ferteri den fu a Kownukondre fu Gado” tu. Fu eksempre, a ferklari den profeititori di ben e sori taki a Mesias ben o abi fu pina èn dede (Luk. 24:13-32, 46, 47). Di Yesus meki sma kon sabi taki en na a Mesias, dan a taki krin fu Gado Kownukondre, fu di en ben de a sma di Gado ben o poti leki Kownu. Ala ten Yesus ben e taki fu a Kownukondre te a ben e preiki èn den bakaman fu en na ini a ten disi e taki fu a srefi sani dati te den e preiki.​—Mat. 24:14; Luk. 4:43.

8, 9. (a) Sortu tu sani den apostel fu Yesus no ben ferstan bun? (b) Fa Yesus yepi den apostel fu kon ferstan sani bun èn san Kresten na ini a ten disi e leri fu dati?

⁸ Di den apostel kon makandra na tapu na Olèif-bergi, dan dati ben de a lasti leisi di den ben e kon makandra nanga Yesus na grontapu. Fu di den ben angri fu kon sabi sani, meki den aksi Yesus: „Masra, yu o seti a kownukondre baka gi Israel na ini a ten disi?” (Tori 1:6) Na aksi disi sori taki tu sani ben de di den apostel no ben ferstan bun. A foswan ben de taki den ben e bribi taki Gado ben o seti a Kownukondre baka gi a pipel Israel. A di fu tu sani ben de taki den ben e ferwakti taki a Kownukondre ben o bigin tiri wantewante, noso „na ini a ten disi”. Fa Yesus yepi den fu ferstan den tori disi bun?

⁹ Yesus ben musu fu sabi taki heri esi a foswan fu den sani di den bakaman fu en no ben ferstan ben o kon na krin. Fu taki en leti, tin dei nomo baka dati, den bakaman fu en ben o si fa Gado ben o teki wan nyun pipel, na Israel fu Gado! A no ben o teki langa moro fosi a spesrutu matifasi di Gado ben abi nanga a pipel Israel, ben o kon na wan kba. Te wi e luku a di fu tu sani di den no ben ferstan, dan wi e si taki Yesus ben memre den na wan switi fasi: „Na a Papa w’wan abi a reti fu taki o ten son sani o psa èn unu no abi fu sabi o ten den sani dati o psa” (Tori 1:7). Yehovah na a sma di e bosroiti o ten sani o psa. Di Yesus ben de na grontapu, dan ensrefi taki dati a Manpikin no ben sabi san na a „dei nanga a yuru” te a kba ben o kon, ma taki na „soso  a Tata” ben sabi dati (Mat. 24:36). Te nanga a dei fu tide a de so taki te Kresten e broko den ede tumsi nanga o ten a kba fu a grontapu disi o kon, dan yu kan taki dati den e broko den ede nanga sani di den no abi fu sabi.

10. Sortu denki di den apostel ben abi, wi musu kon abi tu èn fu san ede?

¹⁰ Ma tòg wi no musu denki takru fu den apostel fu Yesus, fu di den man dati ben abi wan tranga bribi. Den teki a pir’ai fu Yesus nanga sakafasi. Boiti dati, aladi den no ben ferstan sani krin, tòg na aksi di den ben poti ben e sori wan bun sani fu den. Difrenti leisi Yesus ben gi den bakaman fu en a rai disi: „Tan na ai” (Mat. 24:42; 25:13; 26:41). Den ben de na ai èn den ben e meki ala muiti fu feni buweisi di ben o sori den taki Yehovah ben o du wan sani. Na a srefi denki dati wi musu kon abi na ini a ten disi. Fu taki en leti, „den lasti dei” disi pe bigi sani o psa, e meki taki a de moro prenspari taki wi e kon abi a denki dati.​—2 Tim. 3:1-5.

11, 12. (a) Sortu wroko Yesus ben gi den bakaman fu en? (b) Fu san ede a ben fiti taki Yesus taki fu a santa yeye di a gi den disipel a wroko fu preiki a bun nyunsu?

¹¹ Yesus ben memre den apostel san ben de a moro prenspari sani di den ben musu hori na prakseri. A ben taki: „Unu o kisi krakti te a santa yeye kon na un tapu èn unu o de kotoigi fu mi na ini Yerusalem, na ini heri Yudea nanga Samaria èn te na den moro farawe presi fu grontapu” (Tori 1:8). A fosi presi pe den disipel ben o meki bekènti taki Yesus ben kisi wan opobaka, ben o de na ini Yerusalem pe sma ben kiri Yesus. Dan den ben o tyari a boskopu go na ala sei fu Yudea. Baka dati den ben o go na Samaria èn na den moro farawe kondre.

¹² A fiti taki Yesus ben taki fu a preikiwroko di den disipel ben o abi fu du, baka di a pramisi den ete wan leisi taki a ben o seni a santa yeye fu yepi den. Disi na wan fu den moro leki 40 leisi di den wortu „santa yeye” de fu feni na ini Tori fu den apostel. Ibri tron baka a span Bijbel buku disi e sori taki wi no man du a wani fu Yehovah sondro a yepi fu a santa yeye. Dati meki a prenspari srefsrefi taki wi e begi Gado doronomo fu gi wi a yeye dati! (Luk. 11:13) Now wi abi a santa yeye moro fanowdu srefi.

13. O bigi a preikiwroko de di a pipel fu Gado musu du na ini a ten disi? Fu san ede wi musu du a wroko disi fayafaya?

¹³ Na ini a ten disi, den wortu „den moro farawe presi fu grontapu” wani taki wan heri tra sani. Ma soleki fa a fosi kapitel fu a buku disi e sori, Yehovah Kotoigi ben de klarklari fu du a wroko di den kisi fu preiki, fu di den sabi taki Gado wani taki ala sortu sma musu yere a bun nyunsu fu en Kownukondre (1 Tim. 2:3, 4). Yu e teki prati fayafaya  tu na a wroko disi di e kibri sma libi? Nowan enkri tra wroko e gi moro prisiri! Yehovah o gi yu a krakti di yu abi fanowdu fu du a wroko disi. Tori fu den apostel o ferteri yu finfini fa yu kan du dati èn nanga sortu denki yu musu du en fu man abi bun bakapisi.

14, 15. (a) San den engel ben taki fu a fasi fa Yesus ben o drai kon baka èn san den ben wani taki nanga dati? (Luku a futuwortu sosrefi.) (b) Fa Krestes drai kon baka na „a srefi fasi” leki fa a ben gwe?

¹⁴ Soleki fa wi si na a bigin fu a kapitel disi, dan Yesus opo go na loktu èn a no ben de fu si moro. Ma den 11 apostel tan tnapu drape e luku go na loktu. Te fu kba, tu engel sori densrefi na den èn den pir’ai gi den na wan switi fasi: „Un man fu Galilea, fu san ede unu e tnapu e luku go na loktu? A Yesus disi di Gado puru na un mindri èn di opo go na hemel, o kon na a srefi fasi leki fa unu si a go na hemel” (Tori 1:11). Den engel ben wani taigi den taki Yesus ben o drai kon baka na ini a srefi skin, soleki fa son kerki e leri sma? Nôno, a no dati den ben wani taki. Fa wi sabi dati?

¹⁵ Den engel no ben taki dati Yesus ben o drai kon baka na ini a srefi skin, ma „na a srefi fasi”. b Na sortu fasi a gwe? Den disipel no ben man si en moro di den engel ben e taki nanga den. Soso a pkin grupu apostel disi ben si taki Yesus ben gwe libi grontapu èn taki a ben e go na en P’pa na hemel. Krestes ben o drai kon baka na a srefi fasi. Na dati psa tu. Na ini a ten disi, soso den wan di e ferstan Bijbel èn di sabi na ini sortu ten wi e libi, sabi taki Yesus e tiri now leki Kownu (Luk. 17:20). Wi musu man si den buweisi di e sori taki a e tiri now èn wi musu ferteri trawan den sani dati so taki den kan si tu taki wi e libi na ini wan prenspari ten.

16-18. (a) San wi e leri fu Tori fu den apostel 1:13, 14, te a abi fu du nanga den konmakandra pe Kresten e anbegi Gado? (b) San wi kan leri fu na eksempre fu Yesus en m’ma Maria? (c) Fu san ede den Kresten konmakandra prenspari srefsrefi na ini a ten disi?

¹⁶ Wi kan ferstan taki den apostel „drai go baka na Yerusalem nanga bigi prisiri” (Luk. 24:52). Ma den ben o teki a tiri nanga den leri fu Krestes? Vers 13 nanga 14 fu Tori fu den apostel kapitel 1, e taki dati den ben kon makandra na ini wan „sodrokamra” èn wi e leri wan tu moi sani fu den sortu konmakandra dati. Na a ten dati, furu fu den oso na ini Palestina ben abi wan sodrokamra èn wan dorosei trapu ben e tyari sma go na a kamra dati. A de so taki a „sodrokamra” disi ben de a tapsei pisi fu na oso fu Markus en m’ma, soleki fa skrifi na  ini Tori fu den apostel kapitel 12:12? Awansi fa a no fa, a kan taki a ben de wan presi di no ben abi furu pranpran èn di ben bun nofo fu den bakaman fu Krestes hori konmakandra drape. Ma suma ben kon makandra drape èn san den ben e du?

¹⁷ Luku taki a no soso den apostel noso mansma ben de na a konmakandra dati. „Wan tu umasma” ben de drape tu, sosrefi Maria, Yesus en m’ma. Disi na a lasti leisi di Bijbel e taki fu Maria. Wi no musu denki taki a ben de drape fu suku biginen, ma fu di a ben abi sakafasi, meki a ben e kon makandra nanga den Kresten brada nanga s’sa fu en fu anbegi Gado. A ben musu fu de wan trowstu gi en taki den fo tra manpkin fu en di no ben de na bribi na a ten di Yesus ben de na grontapu, ben de makandra nanga en now (Mat. 13:55; Yoh. 7:5). Sensi a dede èn na opobaka fu na afubrada fu den, den ben kenki den libi.​—1 Kor. 15:7.

¹⁸ Luku tu fu san ede den disipel disi ben kon makandra na a dei dati. Bijbel e taki: „Leki wán man, den alamala tan begi” (Tori 1:14). Ala ten a ben de prenspari gi Kresten fu kon makandra fu anbegi Gado. Wi e kon makandra fu gi makandra dek’ati, fu kisi leri nanga rai èn san moro prenspari, fu anbegi wi hemel Papa Yehovah. Na den konmakandra dati, wi e begi Gado èn wi e singi prèisesingi di e plisi en trutru èn di prenspari srefsrefi gi wi. Meki wi go ala ten na den santa konmakandra disi di e gi wi dek’ati!​—Hebr. 10:24, 25.

19-21. (a) San wi e leri fu a prenspari wroko di Petrus ben du na ini a gemeente? (b) Fu san ede wan tra sma ben musu teki a presi fu Yudas èn san wi kan leri fu a fasi fa den apostel seti a tori dati?

¹⁹ Now den bakaman fu Krestes ben musu luku wan prenspari tori di ben abi fu du nanga a fasi fa den ben orga. Na apostel Petrus ben teki en na en tapu fu taki fu a tori dati (vers 15-26). A e gi wi dek’ati fu si fa Petrus kenki sensi a ten di a ben taki dri leisi taki a no sabi a Masra fu en, a no so? (Mark. 14:72) Wi alamala abi sondu firi èn a de fanowdu fu yere baka taki Yehovah ’na wan bun Gado èn taki a de klarklari fu gi sma pardon’ di abi trutru berow.​—Ps. 86:5.

²⁰ Petrus kon si taki wan sma ben musu teki a presi fu Yudas, na apostel di ben tori Yesus. Ma suma ben o de a sma dati? Petrus ben taki dati a nyun apostel ben musu de wan sma di ben waka baka Yesus di A ben e du a preikiwroko fu en èn na apostel disi ben musu si tu taki Yesus ben kisi wan opobaka (Tori 1:21, 22). Disi e kruderi nanga a sani di Yesus srefi ben pramisi: „Unu di waka na mi baka o sidon tu na tapu twarfu kownusturu fu krutu den twarfu lo fu Israel” (Mat. 19:28). Soleki fa a sori, dan Yehovah ben wani taki den 12 apostel di ben wroko makandra nanga Yesus di a ben e du a preikiwroko  fu en na grontapu, tron den „twarfu ston leki fondamenti” fu a Nyun Yerusalem (Openb. 21:2, 14). Na so Gado gi pasi taki Petrus kon ferstan taki a profeititori di e taki dati „wan tra sma teki a wroko fu en leki fesiman”, ben abi fu du nanga Yudas.​—Ps. 109:8.

²¹ Fa den teki a nyun apostel disi? Den iti lòt soleki fa sma ben gwenti du na ini Bijbel ten (Odo 16:33). Ma disi na a lasti leisi di Bijbel e sori taki sma ben e gebroiki lòt na a fasi disi. Soleki fa a sori, dan di Gado seni en santa yeye kon, a no ben de fanowdu moro fu iti lòt te bosroiti ben musu teki. Ma luku fu san ede den apostel ben gebroiki lòt na a okasi disi. Den apostel ben e begi: „Yehovah, yu na a sma di sabi fa ala sma ati tan. Sori wi sortwan fu den tu man disi yu teki” (Tori 1:23, 24). Den ben wani taki Yehovah sori den suma den ben musu teki. Den teki Matias èn a kan taki a ben de wan fu den 70 disipel di Yesus ben seni go preiki. Na so Matias tron wan fu „den 12 apostel”. c​—Tori 6:2.

22, 23. Fu san ede wi musu saka wisrefi na ondro den wan di e teki fesi na ini a gemeente na ini a ten disi?

²² A tori disi e memre wi o prenspari a de taki a pipel fu Gado e du sani na wan orga fasi. Te nanga a dei fu tide, den e teki lepi brada fu dini leki fesiman na ini a gemeente. Den owruman e luku finfini efu den man disi e doro den markitiki di fesiman na ini a gemeente musu doro, soleki fa Bijbel e taki. Boiti dati, den e begi Gado fu meki a santa yeye tiri den. Sobun, a gemeente e si den man disi leki sma di poti na wroko nanga yepi fu a santa yeye. Wi fu wi sei e tan saka wisrefi na den ondro èn na so wi e gi trawan na ini a gemeente dek’ati fu wroko makandra nanga den.​—Hebr. 13:17.

²³ Den disipel ben kisi dek’ati di den si Yesus di ben kisi wan opobaka. Boiti dati, den kisi krakti tu di den tyari kenki kon na ini a fasi fa den orga a gemeente. Dati yepi den fu de srekasreka gi wan sani di ben o psa na ini a ten di ben o kon. Na ini a tra kapitel wi o poti prakseri na a tumsi prenspari sani dati.