1-3. (a) Suma na a sma di e teki waka nanga Paulus now èn fa a sma disi tan? (b) San wi o leri na ini a kapitel disi?

 TE NA apostel Paulus nanga wan yonkuman e waka fu a wan foto go na a trawan, dan den e psa na ini bergibergi kontren di no makelek fu waka. Paulus e luku a yonguman di e waka na en sei èn a e prakseri den sani di kan miti a yonkuman disi. A nen fu a yonguman na Timoteyus, a de fayafaya èn a abi sowan 20 yari. A e hari go na farawe presi fu du a nyun wroko fu en èn na so a e libi en oso na baka.Safsafri a dei e psa gwe èn na so den man disi e gwe libi a kontren fu Listra nanga Ikoniyum na den baka. San o miti den? Paulus sabi pkinso san o psa fu di disi na a di fu tu leisi taki a e go preiki leki zendeling. A sabi taki den o kisi fu du nanga furu problema. Fa sani o waka nanga a yonguman di e waka na en sei?

² Paulus sabi taki sani o waka bun nanga Timoteyus. A fertrow di a abi na ini Timoteyus di abi sakafasi, bigi moro a fertrow di a yonguman disi abi na ini ensrefi. Sani di psa na fesi meki taki Paulus kon ferstan moro leki iniwan ten bifo, taki a musu abi a yoisti sma fu teki waka nanga en. Paulus sabi taki te den o go luku den gemeente èn den o gi den dek’ati, dan den no musu meki nowan sani puru den prakseri fu a wroko disi èn den musu abi wán denki. San meki taki Paulus e denki so? Kande na a trobi di a ben kisi nanga Barnabas èn di meki taki den prati pasi.

³ Na ini a kapitel disi wi o leri san na a moro bun fasi fu lusu trobi. Wi o leri tu fu san ede Paulus teki Timoteyus fu kon nanga en di a ben teki a preikiwaka fu en èn wi o kon ferstan moro bun sortu prenspari wroko den kring-owruman di e go na difrenti gemeente e du.

4. San Paulus ben wani du di a go preiki leki zendeling a di fu tu leisi?

⁴ Na ini kapitel 14 wi si fa fo brada, Paulus, Barnabas, Yudas nanga Silas gi a gemeente Antiokia dek’ati di den ferstan sortu besroiti a tiri skin teki na ini a tori fu a besnèi di sma musu besnèi. San Paulus du baka dati? A go taki nanga Barnabas fu teki wan tra preikiwaka. A taigi en: „Kow drai go baka na ala den foto pe wi ben ferteri sma a wortu fu Yehovah. Dan wi kan si fa a e go nanga den brada drape” (Tori 15:36). Paulus no ben wani go luku nomo fa a ben e go nanga den sma disi di ben tron Kresten no so langa psa. A buku Tori fu den apostel e ferteri wi fu san ede Paulus teki a di fu tu preikiwaka. Wán sani na taki a ben o tan ferteri den brada sortu besroiti a tiri skin teki (Tori 16:4). Boiti dati, leki owruman di ben musu go luku den difrenti gemeente, Paulus ben abi a fasti besroiti fu gi den gemeente dek’ati èn fu yepi den fu kon abi wan tranga bribi (Rom. 1:11, 12). Fa na organisâsi fu Yehovah Kotoigi na ini a ten disi e teki na eksempre fu den apostel?

5. Fa a Tiri Skin na ini a ten disi e sorgu taki den gemeente kisi rai nanga dek’ati?

⁵ Na ini a ten disi Krestes e gebroiki a Tiri Skin fu Yehovah Kotoigi fu tiri a gemeente fu en. Nanga yepi fu brifi, buku, tijdschrift, gemeente konmakandra èn na tra fasi a Tiri Skin e gi ala den gemeente na heri grontapu rai nanga dek’ati. Nanga yepi fu den owruman di den e seni e go na den difrenti gemeente, a Tiri Skin e pruberi fu kon sabi fa sani e waka na ini ibri gemeente. Dati meki na heri grontapu den poti dusundusun owruman di abi ondrofeni fu dini leki kring-owruman.

6, 7. San na wan tu frantwortu fu den kring-owruman?

⁶ Na ini a ten disi den kring-owruman e du muiti fu poti prakseri na ibri brada noso sisa na ini den gemeente di den e fisiti. Fa den e du dati? Den e teki na eksempre fu den Kresten fu a fosi yarihondro, soleki Paulus. A ben gi wan tra owruman a rai disi: „Preiki a wortu, du disi fayafaya na ini bun ten èn na ini muilek ten, gi sma rai, warskow den èn gi den deki-ati. Du dati nanga ala pasensi èn nanga a koni fu gi sma leri. . . . Du a wroko fu wan preikiman.”​—2 Tim. 4:2, 5.

⁷ Soleki fa den tekst disi e sori, dan wan kring-owruman e wroko oso fu oso nanga den preikiman fu a gemeente pe a e go. A e go na Bijbelstudie noso gobaka nanga den èn efu a trow, dan en frow  e teki prati na a wroko disi tu. Den preikiman disi di e go na den difrenti gemeente de fayafaya te den e du a preikiwroko fu den èn den na bun leriman. A fasi fa den e du sani e tyari wini kon gi den gemeente (Rom. 12:11; 2 Tim. 2:15). Den brada nanga sisa sabi taki den kring-owruman e sori trutru lobi. Den de klarklari fu du ala san den man fu yepi trawan. Awansi a weer no bun, tòg den e teki waka go na den gemeente èn den e go srefi na kontren pe ogri kan miti den (Fil. 2:3, 4). Kring-owruman e gi trawan dek’ati tu, den e gi den leri èn den e tranga ibri gemeente te den e hori lezing di teki puru na ini Bijbel. Ala sma na ini den gemeente e kisi wini te den e poti prakseri na a fasi fa den kring-owruman e tyari densrefi èn te den e teki na eksempre fu den.​—Hebr. 13:7.

8. San Barnabas du di Paulus aksi en fu kon nanga en?

⁸ Barnabas ben breiti di Paulus aksi en fu drai go baka fu „si fa a e go nanga den brada” fu den gemeente (Tori 15:36). Den tu man disi ben gwenti fu wroko bun nanga makandra te den ben e go luku den difrenti gemeente èn ala tu ben sabi den kontren nanga den sma pe den ben o go (Tori 13:2–14:28). Sobun, a ben sori leki a ben de wan koni èn bun sani fu go du a wroko disi makandra. Ma wan problema opo kon. Tori fu den apostel 15:37 e taki: „Barnabas ben wani nomonomo taki Yohanes, di sma sabi tu leki Markus, ben musu kon nanga den.” Barnabas no ben aksi nomo fu meki Markus kon nanga den. A „ben wani nomonomo” taki en neef Markus kon nanga den te den ben o teki a waka disi leki zendeling.

9. Fu san ede Paulus no ben agri nanga Barnabas?

⁹ Paulus no ben agri nanga Barnabas. Fu san ede? A tori e taki: „Paulus no ben wani taki a [Markus] kon nanga den, fu di Markus ben gwe libi den di den ben de na Pamfilia èn a no ben go nanga den fu du a preikiwroko” (Tori 15:38). Di Paulus nanga Barnabas teki a fosi preikiwaka leki zendeling, dan Markus go nanga den, ma a no tan nanga den te na a kba (Tori 12:25; 13:13). Den ben de na Pamfilia, di Markus gwe libi den fu drai go baka na oso na Yerusalem. Di Markus du dati, dan den no ben de na pasi so langa ete. Bijbel no e taki fu san ede a gwe, ma soleki fa a sori, dan na apostel Paulus ben feni taki a sani di Markus du sori taki a no ben ferstan bun san na den frantwortu fu en. Paulus ben tweifri efu a ben kan fertrow Markus ete.

10. San psa di Paulus nanga Barnabas kisi trobi èn san ben de a bakapisi fu dati?

 ¹⁰ Tòg Barnabas ben wani nomonomo taki Markus kon nanga den. Ma Paulus ben poti na en ede tu taki Markus no ben musu kon. Soleki fa Tori fu den apostel 15:39 e taki, dan „a sani disi meki taki den tu man disi kisi bun bigi trobi. Dati meki ibriwan fu den go en eigi pasi.” Barnabas teki boto go na a èilanti Siprus, a mamakondre fu en èn a meki Markus kon nanga en. Ma Paulus du san a ben abi na prakseri. A tori e taki: „Paulus teki Silas fu go nanga en. Ne den brada aksi Yehovah fu meki sani waka bun nanga Paulus” (Tori 15:40). Makandra den waka „psa na ini Siria nanga Silisia èn a gi den gemeente drape dek’ati.”​—Tori 15:41.

11. Sortu fasi wi musu abi efu wi no wani tan hori wan sma na ati di du wan hati sani nanga wi?

¹¹ A tori disi e memre wi taki wisrefi na sondu sma. A tiri skin ben poti Paulus nanga Barnabas fu teki presi gi den. Soleki fa a sori, dan Paulus srefi ben kon de wan memre fu a grupu dati. Ma disi leisi Paulus nanga Barnabas no ben basi den firi di den abi leki sondu sma. A trobi disi meki taki den tan hori makandra na ati? Aladi Paulus nanga Barnabas ben de sondu sma, tòg den ben abi sakafasi èn den ben abi a denki fu Krestes. Wi kan de seiker taki baka wan pisi ten den du san Kresten brada gwenti du èn den gi makandra pardon (Ef. 4:1-3). Bakaten Paulus nanga Markus ben de nanga makandra baka, di den kisi wan tra wroko fu du. a​—Kol. 4:10.

12. Sortu fasi fu Paulus nanga Barnabas den owruman na ini a ten disi musu abi tu?

¹² A wán leisi disi di Paulus nanga Barnabas kisi bigi trobi no wani taki dati den ben gwenti fu du so. Sma ben sabi Barnabas leki wan man di ben e firi gi trawan èn di ben lobi fu gi sma sani. Fu di a ben abi a gwenti disi, meki den apostel no ben kari en na en trutru nen Yosef, ma den ben kari en Barnabas, san wani taki „Manpkin fu Trowstu” (Tori 4:36). Sma ben sabi Paulus tu leki wan saf’ati man di ben abi switifasi (1 Tes. 2:7, 8). Ala Kresten owruman na ini a ten disi, sosrefi den kring-owruman, musu teki na eksempre fu Paulus nanga Barnabas. Den musu pruberi fu abi sakafasi ala ten èn den musu sori switifasi gi den tra owruman èn gi a heri gemeente.​—1 Petr. 5:2, 3.

13, 14. (a) Suma ben de Timoteyus èn fa Paulus miti en kande? (b) Fu san ede Paulus poti spesrutu prakseri na Timoteyus? (c) Sortu wroko Timoteyus kisi?

¹³ Di Paulus teki en di fu tu waka leki zendeling, dan a doro te na Galasia, wan kontren na ini a Gran Kownukondre Rome, pe wan tu gemeente ben de. Te fu kba „a doro na Derbe èn na Listra”. A tori e taki: „Wan disipel ben de drape di ben nen Timoteyus. En mama ben de wan Dyu di ben tron wan disipel, ma en papa ben de wan Grikisma.”​—Tori 16:1. b

¹⁴ Soleki fa a sori, dan Paulus ben miti a famiri fu Timoteyus di a ben kon na ini a kontren a fosi leisi na wan ten fu a yari 47. Sowan tu noso dri yari baka dati, Paulus kon drape a di fu tu leisi, ma now a e poti spesrutu prakseri na a yonguman Timoteyus. Fu san ede? Fu di ’den brada ben e taki soso bun sani fu Timoteyus’. A no ben de so nomo taki den brada fu a foto pe a ben e tan ben lobi en, ma sma na ini tra gemeente ben sabi en tu leki wan bun Kresten. A tori e sori taki den brada na ini Listra nanga Ikoniyum, di ben de sowan 30 kilometer moro fara, ben abi soso bun sani fu taki fu Timoteyus (Tori 16:2). Nanga yepi fu a santa yeye den owruman gi a yongu Timoteyus wan bigi frantwortu: A ben musu yepi Paulus nanga Silas di ben o teki waka fu go na difrenti gemeente.​—Tori 16:3.

15, 16. San meki taki den brada ben taki soso bun sani fu Timoteyus?

¹⁵ San meki taki Timoteyus ben abi so wan bun nen, aladi a ben yongu ete? Na fu di a ben koni? Na fu di a ben moi noso tranga? Noso na fu di a ben man du son sani bun? Nofo tron libisma e luku den sani disi. Srefi a profeiti Samuel ben du disi wan leisi. A ben e luku a fasi fa sma tan èn dati ben abi krakti na en tapu. Ma Yehovah taigi en: „Gado no e si sani soleki fa libisma e si sani, bika libisma e si soso san na ai e si. Ma Yehovah e si fa na ati de” (1 Sam. 16:7). A no fu di Timoteyus ben moi noso tranga, ma na fu di a ben abi Kresten fasi meki den brada ben taki bun fu en.

¹⁶ Wan tu yari baka dati, na apostel Paulus ben taki fu wan tu fu den fasi di Timoteyus ben abi leki Kresten. A ben taki fu a bun fasi fa Timoteyus ben tyari ensrefi, fu a lobi di a ben sori èn fa a ben de klarklari fu du sani gi den gemeente (Fil. 2:20-22). Sma ben sabi Timoteyus tu leki wan brada di „no ben e hoigri” èn di „ben abi trutru bribi”.​—2 Tim. 1:5.

17. Fa yonguwan na ini a ten disi kan teki na eksempre fu Timoteyus?

 ¹⁷ Furu yonguwan na ini a ten disi e teki na eksempre fu Timoteyus, fu di den e meki muiti fu kon abi fasi di Gado feni bun. Te den e du dati, dan den e kisi wan bun nen na Yehovah èn na a pipel fu en, aladi den yongu ete (Odo 22:1; 1 Tim. 4:15). Den abi bribi sondro fu hoigri èn den no e libi wan dobru libi (Ps. 26:4). A bakapisi fu dati na taki furu yonguwan kan du prenspari sani gi a gemeente neleki fa Timoteyus ben du dati. Ala sma di lobi Yehovah e kisi dek’ati te den yonguwan disi e tron preikiman fu a bun nyunsu, te den e gi densrefi abra na Yehovah èn e teki dopu te fu kba.

18. (a) Sortu spesrutu grani Paulus nanga Timoteyus ben abi di den ben e dini leki owruman di ben musu go luku den difrenti gemeente? (b) Sortu wini den gemeente kisi?

¹⁸ Paulus nanga Timoteyus ben wroko makandra furu yari langa. Leki owruman di ben e go luku den difrenti gemeente, den du furu wroko gi a tiri skin. Bijbel e taki: „Te den ben go na den foto, dan den ben e ferteri den brada drape sortu besroiti den apostel nanga den owruman na ini Yerusalem ben teki, so taki den ben kan du san den apostel taki” (Tori 16:4). Soleki fa a sori, dan den gemeente teki a rai fu den apostel nanga den owruman na Yerusalem. Fu di den ben gi yesi, meki ’a bribi fu den gemeente kon tranga trutru èn dei fu dei moro nanga moro sma ben e tron bribiman’.​—Tori 16:5.

19, 20. Fu san ede Kresten musu gi yesi na „den wan di e teki fesi”?

¹⁹ Na a srefi fasi Yehovah Kotoigi na ini a ten disi e kisi blesi te den e sori sakafasi èn te den e gi yesi na „den wan di e teki fesi” na den mindri (Hebr. 13:17). Fu di sani na grontapu e tan kenki, meki a de tumsi prenspari taki Kresten e teki den rai di den e kisi fu „a koni srafu di de fu frutrow” (Mat. 24:45; 1 Kor. 7:29-31). Te wi e du disi, dan a kan yepi wi fu no kmoto na a bribi èn fu no meki grontapu flaka wi.​—Yak. 1:27.

²⁰ A tru taki Kresten owruman na ini a ten disi e meki fowtu èn dati de so tu nanga den memre fu a Tiri Skin. Na so a ben de tu nanga Paulus, Barnabas, Markus nanga tra salfu owruman fu a fosi yarihondro (Rom. 5:12; Yak. 3:2). Ma fu di den brada fu a Tiri Skin e du soifri san Gado Wortu e taki èn den e teki na eksempre fu den apostel finfini, meki wi kan fertrow den (2 Tim. 1:13, 14). A bakapisi fu dati na taki den e tranga a bribi fu den gemeente.