KAPITEL 17
’A taki-go-taki-kon nanga den fu Gado Buku’
A sani di e meki taki wan sma kan gi bun leri èn a moi eksempre fu den Bereyasma
A pisi disi abi fu du nanga Tori fu den apostel 17:1-15
1, 2. Suma na den sma di e teki waka fu Filipi go na Tesalonika èn san den e prakseri kande?
A PASI pe furu sma gwenti waka e abra bergi di lai nanga ston èn di muilek fu kren. Na koni Romesma di sabi meki pasi nanga broki, meki en. Ala sortu b’bari de fu yere na tapu a pasi disi. Yu kan yere a b’bari fu buriki, a b’bari fu den wiel fu asiwagi di e lolo na tapu den ston fu a pasi èn yu kan yere a taktaki fu den someni sma di e waka drape. Na mindri den yu abi srudati, bisnisman nanga sma di sabi meki moimoi sani. Paulus, Silas, nanga Timoteyus na dri mati di e waka a pasi disi tu fu Filipi go na Tesalonika. Den musu waka moro leki 130 kilometer. A no makelek fu teki a waka disi, spesrutu gi Paulus nanga Silas. Den soro di den kisi na Filipi pe sma fon den nanga tiki, no betre ete.—Tori 16:22, 23.
2 San den man disi e du fu puru den prakseri fu a langa waka di den musu teki? Wán sani di den kan du na fu taki nanga makandra. Den e memre ete fa a waktiman fu a straf’oso na ini Filipi nanga en osofamiri tron bribiman. A moi sani dati meki taki den man disi de nanga moro faya now fu tan preiki a wortu fu Gado. Ma te den e doro Tesalonika, wan foto na sesyoro, den e aksi densrefi kande san den Dyu na ini a foto dati o du nanga den. Den Dyu o grabu den èn fon den neleki fa a ben psa na ini Filipi?
3. Te wi e luku a fasi fa Paulus ben kisi dek’ati fu preiki, dan sortu wini wi kan kisi fu dati na ini a ten disi?
3 Bakaten, te Paulus e skrifi wan brifi gi den Kresten na ini Tesalonika, a e taki fa a ben e firi: „Soleki fa unu sabi, dan den sma na Filipi ben pina wi èn ben du sani nanga wi fu gi wi syen. Ma baka dati a Gado fu wi gi wi deki-ati fu fruteri unu a bun nyunsu, aladi sma ben e gens wi srefisrefi” (1 Tes. 2:2). Sobun, a kan taki Paulus ben frede pkinso fu go na ini a foto Tesalonika, spesrutu baka den sani di miti den na ini Filipi. Yu e ferstan san Paulus e firi? Yu e feni en muilek son leisi fu preiki a bun nyunsu? Paulus ben sabi taki Yehovah ben o gi en krakti di ben o yepi en fu kisi a dek’ati di a ben abi fanowdu. Te yu e luku na eksempre fu Paulus, dan dati kan yepi yu fu du a srefi.—1 Kor. 4:16.
„A taki-go-taki-kon . . . fu Gado Buku” (Tori fu den apostel 17:1-3)
4. Fu san ede a kan taki Paulus tan moro leki dri wiki na Tesalonika?
4 Bijbel e taki dati di Paulus ben de na Tesalonika, dan a preiki dri Sabat-dei na ini a snoga. Disi wani taki dati a tan dri wiki nomo na ini a foto dati? Dati no abi fu de so. Wi no sabi o ten Paulus go na a snoga, baka di a doro na Tesalonika. Den brifi di Paulus skrifi e sori taki di a ben de na Tesalonika, en nanga den mati fu en wroko fu sorgu densrefi (1 Tes. 2:9; 2 Tes. 3:7, 8). Boiti dati, di Paulus ben de drape, den brada fu Filipi seni sani gi en di a ben abi fanowdu èn den du dati tu leisi (Fil. 4:16). Sobun, a kan taki a tan moro leki dri wiki na Tesalonika.
5. Fa Paulus ben taki-go-taki-kon nanga sma?
5 Di Paulus kisi dek’ati, dan a taki nanga den sma di ben kon makandra na ini a snoga. Soleki fa a ben gwenti, dan „a taki-go-taki-kon nanga den sma drape fu Gado Buku. A ferklari Gado Buku gi den èn a sori den krin taki Krestes ben musu pina èn taki a ben musu kisi wan opobaka. A taki: ’Yesus na a Krestes. Na fu en mi e ferteri unu’” (Tori 17:2, 3). Luku taki Paulus no ben pruberi nomo fu wroko na tapu a firi fu den arkiman fu en, ma a ben wani meki den gebroiki den ferstan. A ben sabi taki den sma di ben e kon na a snoga ben sabi Gado Buku èn den ben e lespeki en. Ma den no ben ferstan ala sani krin. Fu dati ede Paulus taki-go-taki-kon nanga den, a ferklari sani gi den èn a sori den na ini Bijbel taki Yesus fu Nasaret ben de a pramisi Mesias, noso Krestes.
6. Fa Yesus ben taki-go-taki-kon nanga yepi fu Gado Buku èn san ben de a bakapisi?
6 Paulus teki na eksempre fu Yesus di ben gebroiki Bijbel fu gi sma leri. Fu eksempre, di Yesus ben e du en preikiwroko, dan a taigi den bakaman fu en taki soleki fa Bijbel e sori, a Manpkin fu libisma ben o nyan pina, a ben o dede èn a ben o kisi wan opobaka (Mat. 16:21). Baka di Yesus kisi wan opobaka, a sori ensrefi na den disipel fu en. A sani dati w’wan ben sari kba fu meki den sabi taki a no ben lei. Ma tòg Yesus ferteri den moro. Disi na san a taigi wan tu fu den disipel fu en: „A bigin taki fu den buku fu Moses èn fu ala den buku fu den Profeiti fu tyari kon na krin gi den san Gado Buku e taki fu en.” San ben de a bakapisi? Den disipel taki: „Di a ben e taki nanga wi na pasi èn di a meki wi frustan finifini san skrifi na ini Gado Buku, dan dati ben naki wi ati trutru!”—Luk. 24:13, 27, 32.
7. Fu san ede a prenspari taki wi e leri sma sani di skrifi na ini Bijbel?
7 A boskopu di skrifi na ini Gado Wortu abi krakti (Hebr. 4:12). Na dati meki Kresten na ini a ten disi e leri sma soso san skrifi na ini a Wortu fu Gado, neleki fa Yesus, Paulus nanga den tra apostel ben du. Wi e opo a Bijbel fu meki den ososma srefi leisi san skrifi na ini. Na so wi e taki-go-taki-kon nanga den, wi e ferklari san Gado Wortu wani taki èn wi e bewijs taki den sani di wi e leri na tru tori. Te yu luku en bun, dan a boskopu di wi e preiki no e kon fu wi srefi. Fu di wi e gebroiki Bijbel furu leisi, meki wi e yepi sma fu kon ferstan taki wi no e ferteri den wi eigi denki, ma den leri fu Gado. Boiti dati, a bun fu hori na prakseri taki a boskopu di wi e preiki kmoto langalanga na Gado Wortu. Yu kan fertrow en dorodoro. A sani dati no e gi yu a krakti fu preiki a boskopu nanga dek’ati, neleki Paulus?
„Wan tu . . . tron bribiman” (Tori fu den apostel 17:4-9)
8-10. (a) San den sma na ini Tesalonika du di den yere a bun nyunsu? (b) Fu san ede sonwan fu den Dyu ben dyarusu na tapu Paulus? (c) San den Dyu gensman du?
8 Paulus ben ondrofeni kba taki den wortu disi fu Yesus tru: „Wan srafu no bigi moro en masra. Efu den frufolgu mi, dan den o frufolgu unu tu. Efu den du san mi taki, dan den o du tu san unu taki” (Yoh. 15:20). Na ini Tesalonika Paulus ben si taki sma ben e du difrenti sani te a ben e preiki a wortu. Sonwan ben de klarklari fu du san a taki, ma trawan no ben lobi a boskopu kwetkweti. Fu den wan di ben arki, Lukas e skrifi: „Wan tu fu den tron bribiman èn den bigin waka nanga Paulus nanga Silas. Wan bigi grupu Grikisma di ben anbegi Gado èn furu prenspari uma bigin waka nanga den tu” (Tori 17:4). Iya, den nyun disipel disi ben musu fu breiti taki wan sma yepi den fu kon ferstan Gado Buku moro bun.
9 Aladi son sma ben breiti, tòg yu ben abi trawan di ati ben bron nanga den sani di Paulus taki. Sonwan fu den Dyu na ini Tesalonika ben dyarusu di den si taki „wan bigi grupu Grikisma” ben bribi den sani di Paulus taki. Den Dyu disi ben de nomonomo fu meki sma teki a Dyu bribi. Fu dati ede den ben leri den Grikisma di no ben abi a Dyu bribi, san skrifi na ini den Hebrew Buku fu Bijbel èn den ben e si den Grikisma disi leki bakaman fu den. Ma now a ben gersi leki Paulus ben e puru den Grikisma disi na den anu èn a ben e du dati leti drape na ini a snoga! Den Dyu ati ben bron srefsrefi.
’Den go suku Paulus nanga Silas, so taki den ben kan tyari den go na dorosei pe den ip’ipi sma ben de.’—Tori fu den apostel 17:5
10 Lukas e ferteri wi san psa baka dati: „Fu di son Dyu kon dyarusu, meki den tyari wan tu ogriman di ben gwenti fu anga-anga na w’woyo kon makandra, dan den taigi den fu meki dyugudyugu na ini a foto. Den broko go na ini na oso fu Yason fu suku Paulus nanga Silas, so taki den ben kan tyari den go na dorosei pe den ip’ipi sma ben de. Di den no feni den, den srepi Yason nanga wan tu tra brada tyari go gi den tiriman fu a foto èn den bari: ’Den man di e bruya sma na heri grontapu kon dyaso tu, èn Yason meki den tan na en oso. Ala den man disi e psa den wet fu Grankownu, fu di den e taki dati wan tra kownu de di nen Yesus’” (Tori 17:5-7). Fa Paulus nanga den mati fu en ben o firi te den ben o yere den sani di a grupu ogr’ati sma disi du?
11. Sortu ogri den Dyu ben feni taki Paulus nanga den tra Kownukondre preikiman du èn sortu wet den ben kan abi na prakseri? (Luku a futuwortu.)
11 Te ogr’ati sma e kon makandra fu tyari dyugudyugu kon, dan dati na wan tumsi takru sani. Den e du ogr’ati sani èn yu no man hori den fu di den de leki wan krasi liba di span nanga watra èn di e wasi ala sani gwe di de na en pasi. Den Dyu gebroiki den sma dati di den pruberi fu puru Paulus nanga Silas na pasi. Baka di den Dyu „meki dyugudyugu na ini a foto”, den taki sani fu Paulus nanga Silas fu meki den tiriman bribi taki den man disi du wan tu seryusu ogri. A fosi sani di den taki, na taki Paulus nanga den tra Kownukondre preikiman ben „bruya sma na heri grontapu”, aladi wi sabi taki a no Paulus nanga den mati fu en meki a dyugudyugu kon na ini Tesalonika. A di fu tu sani di den taki ben moro seryusu. Den Dyu ben feni taki den zendeling psa den wet fu Grankownu fu di den ben ferteri sma fu wan tra Kownu, Yesus. a
12. Fa wi sabi taki den sani di sma taki fu den Kresten na Tesalonika ben kan meki den kisi bigi problema?
12 Hori na prakseri taki den Dyu kerki fesiman ben taki wan srefi sortu sani fu Yesus. Den taigi Pilatus: „Wi feni taki a man disi e gi a pipel fu wi deki-ati fu opo densrefi . . . A taki tu dati en na Krestes, wan kownu” (Luk. 23:2). Kande Pilatus ben frede taki a grankownu ben o denki taki a feni en bun taki sma opo densrefi teige a grankownu. Dati meki Pilatus gi primisi taki sma kiri Yesus. Sobun, den sani di sma ben taki fu den Kresten na Tesalonika ben kan meki den kisi bigi problema tu. Wan buku e taki: „A no tori wi e gi te wi taki dati a sani disi ben kan meki bigi ogri miti den Kresten. Bika ’nofo tron na taki wan sma ben musu taki nomo taki a ben wani opo ensrefi teige den grankownu fu Rome, dan a ben kan lasi en libi kba’.” Na ogri sani disi di sma taki ben o tapu a preikiwroko fu Paulus nanga den mati fu en?
13, 14. (a) Fu san ede den ogr’ati sma no ben man tapu a wroko fu den apostel? (b) Fa Paulus ben sori taki a ben luku bun leki Krestes èn fa wi kan teki na eksempre fu en?
13 Den gensman no ben man tapu a preikiwroko na ini Tesalonika. Fu san ede? Wan sani na taki den no ben man feni Paulus nanga Silas. Boiti dati, a kan taki den tiriman fu a foto no ben bribi den sani di sma ben taki fu Paulus nanga Silas. Baka di den meki Yason nanga den tra brada di sma ben tyari kon na fesi den tiriman, pai „wan butu”, dan den lusu den (Tori 17:8, 9). Paulus gi yesi na a rai fu Yesus fu ’luku bun leki sneki, ma fu de leki doifi di no e du ogri’. A gebroiki en ferstan èn a no du sani di ben kan meki ogri miti en. Na fu dati ede a ben kan go na wan tra presi fu preiki (Mat. 10:16). A de krin taki aladi Gado ben gi Paulus dek’ati, tòg dati no wani taki dati a no ben broko en ede nanga noti. Fa Kresten na ini a ten disi kan teki na eksempre fu en?
14 Furu leisi den kerki fesiman fu den Kresten kerki na ini a ten disi sutu faya gi ogr’ati sma fu gens Yehovah Kotoigi. Den e kori tiriman fu di den e taigi den taki den Kotoigi e gi sma dek’ati fu opo densrefi teige den tiriman disi. A sani disi e meki taki den tiriman e tapu a wroko fu den Kotoigi. Neleki fa a ben de nanga den sma di ben suku fu du ogri nomonomo nanga den fosi Kresten, na so furu gensman na ini a ten disi e gens wi fu di den e dyarusu. Awansi fa a no fa, tru Kresten no e suku problema. Solanga wi man, wi e wai pasi gi den sortu sma disi di ati e bron nanga wi èn di no wani yere noti fu wi. Wi e pruberi fu tan du a wroko fu wi sondro fu meki trobi èn kande wi e drai kon baka wan tra leisi te den sma ati no e bron moro.
Den ben de tra fasi fu di den ben de „klarklari fu teki leri” (Tori fu den apostel 17:10-15)
15. San den Bereyasma du di den yere a bun nyunsu?
15 Fu di den brada no ben wani taki Paulus nanga Silas kisi mankeri, meki den seni den go na Bereya di ben de sowan 65 kilometer moro fara. Di den doro drape, Paulus go na a snoga èn a taki nanga den sma di ben kon makandra. A ben breiti srefsrefi fu feni sma di ben wani arki! Lukas skrifi taki den Dyu fu Bereya „no ben de leki den sma fu Tesalonika. Den ben de klarklari fu teki leri, bika den ben teki a wortu nanga den heri ati èn den ben e ondrosuku Gado Buku finfini ibri dei fu si efu den sani di den yere tru” (Tori 17:10, 11). Den wortu disi wani taki dati den sma fu Tesalonika di ben teki a tru bribi no ben abi wan yoisti denki? Kwetkweti. Bakaten Paulus skrifi den: „Wi e taki Gado tangi doronomo tu, bika di unu yere Gado wortu di wi ben preiki gi unu, dan unu no teki a wortu leki a wortu fu libisma, ma leki a wortu fu Gado èn na dati a de trutru. A wortu dati abi furu krakti tu na tapu unu di de bribiman” (1 Tes. 2:13). Ma fa den Dyu fu Bereya ben de tra fasi leki den sma fu Tesalonika?
16. Fu san ede a fiti taki Bijbel e taki dati den sma fu Bereya ben „de klarklari fu teki leri”?
16 Aladi den Bereyasma yere wan nyun sani, tòg den no ben e si disi leki wan sani di den no man fertrow èn den no ben krutu sani tumsi. Ma dati no wani taki dati den ben e bribi iniwan sani di sma ferteri den. Fosi, den arki bun san Paulus ben abi fu taki. Baka dati den go luku na ini Bijbel fu si efu den sani di Paulus tyari kon na krin gi den ben tru. Boiti dati, den studeri a Wortu fu Gado fayafaya. Den no du dati nomo na tapu Sabat-dei, ma den du dati ibri dei. Den du disi „nanga den heri ati”. Sobun, den ben e du muiti fu kon ferstan san Gado Buku e taki fu a nyun leri disi. Baka dati den sori sakafasi tu fu di den tyari kenki kon èn „furu fu den tron bribiman” (Tori 17:12). Dati meki a no musu ferwondru wi taki Lukas e taki dati den ben de sma di ben „de klarklari fu teki leri”.
17. Fu san ede den sma fu Bereya de so wan bun eksempre èn fa wi kan tan teki na eksempre dati awansi wi de na bribi langa ten kba?
17 Den sma fu Bereya no ben man sabi taki a fasi fa den du di den yere a bun nyunsu, ben o skrifi na ini Gado Wortu èn taki a ben o de wan moi eksempre te na ini a ten disi. Den du soifri san Paulus ben howpu taki den ben o du èn san Yehovah Gado ben wani taki den du. Wi e gi sma dek’ati tu fu ondrosuku Bijbel finfini, so taki den sabi taki a bribi fu den e kruderi nanga den sani di skrifi na ini Gado Wortu. Ma a de so taki baka di wi tron Kresten, dan wi no abi fu de klarklari moro fu teki leri? Kwetkweti. A de moro prenspari now taki wi e angri fu teki leri fu Yehovah èn taki wi e du den sani di wi e leri fu en. Na so fasi wi e gi Yehovah na okasi fu gi wi leri èn fu meki wi kon de leki fa a abi na prakseri (Yes. 64:8). Te wi e du dati, dan a hemel Tata fu wi kan tan gebroiki wi èn wi kan tan plisi en dorodoro.
18, 19. (a) Fu san ede Paulus gwe libi Bereya, ma fa a fasi fa a hordoro na wan moi eksempre gi wi? (b) Gi sortu sma Paulus ben o preiki èn pe dati ben o de?
18 Paulus no tan langa na Bereya. Na ini Bijbel wi e leisi: „Di den Dyu fu Tesalonika kon sabi taki Paulus ferteri den sma na Bereya a wortu fu Gado tu, dan den go drape fu meki dyugudyugu èn fu bruya den sma. Wantewante den brada seni Paulus go na sesyoro, ma Silas nanga Timoteyus tan na baka. Den sma di ben go nanga Paulus tyari en go te na Ateine. Baka di Paulus taigi den fu gi Silas nanga Timoteyus a boskopu fu kon na en wantewante, den gwe” (Tori 17:13-15). Den feanti fu a bun nyunsu ben de nomonomo fu puru Paulus nanga Silas na pasi! A no ben sari gi den taki den ben yagi Paulus kmoto na Tesalonika. Den teki pasi go na Bereya èn den pruberi fu meki a srefi dyugudyugu drape. Ma sani no waka soleki fa den ben wani. Paulus ben sabi taki a kontren pe a ben kan preiki ben bigi srefsrefi. Dati meki a no broko en ede tumsi, ma a go preiki na wan tra presi. Meki a de so taki wi tu e du ala san wi man fu no gi gensman na okasi fu tapu a preikiwroko!
19 Di Paulus preiki finfini gi den Dyu fu Tesalonika nanga Bereya, dan a musu fu de so taki a leri o prenspari a de fu preiki nanga dek’ati èn fu taki-go-taki-kon nanga sma nanga yepi fu Gado Buku. Na so a musu de tu nanga wi. Ma now Paulus ben o kisi fu du nanga tra sma: Den sma fu Ateine di no de Dyu. Fa sani ben o waka nanga en na ini a foto dati? Na ini a kapitel di e kon, wi o si dati.
a Soleki fa wan sabiman skrifi, dan na a ten dati yu ben abi wan wet fu Grankownu di no ben gi sma primisi fu taki dati „wan nyun kownu noso wan nyun kownukondre ben o kon, spesrutu te den ben e taki dati a nyun kownu noso kownukondre dati ben o teki a presi fu a Grankownu di ben e tiri noso taki a ben o strafu a Grankownu”. Kande den feanti fu Paulus drai a boskopu fu en, so taki a ben gersi leki na apostel ben gi sma dek’ati fu psa a wet dati. Luku a faki di nen „ Den grankownu fu Rome na ini Tori fu den apostel”.
